30-09-2018, 21:05


"ლომი, იქედნე, გველი უფრო დიდსულოვანნი და თავმდაბალნი არიან ამპარტავან ეპისკოპოსებთან შედარებით, რომლებშიც სიყვარულის ნაპერწკალიც კი არ არის. კარგად შეხედე და შენ ცხვრის ტყავში მგელს აღმოაჩენ. და თუ იგი მგელი არ არის, მაშინ დამიმტკიცოს ეს არა სიტყვებით, არამედ საქმით. ჩემთვის ფასი არა აქვს იმ სწავლებას, რომელიც ეწინააღმდეგება ცხოვრებას… მაგალითად, მღვდლები უმწეოებს ლომებივით ექცევიან, ხოლო ძლიერებს – ძაღლებივით, რომლებიც ყველგან ყოფენ ცხვირს და უფრო მეტად გავლენიანი ადამიანების კართან არიან ატუზულნი, ვიდრე ბრძენი ადამიანების კართან. ერთი თავისი კეთილშობილური წარმომავლობით ტრაბახობს, მეორე – მჭევრმეტყველებით, მესამე – სიმდიდრით, მეოთხე – ყოვლისშემძლე ახლობლებით, ხოლო ვისაც არაფერი აქვს სატრაბახო, თავისი ცოდვებით მოაქვს თავი”.
წმ. გრიგოლი ღვთისმეტყველი

გასულ კვირას მეუფე ანტონმა (ბულუხია) წმინდად იმერული კილოთი ბრძანა: არ გავჩერდები საქართველოში თუ პრეზიდენტი სალომე ზურაბიშვილი იქნებაო.

ბოდბელი მეუფე იაკობი (იაკობაშვილი)უფრო შორს წავიდა და პრეზიდენტობის კანდიდატს სალომე ზურაბიშვილს კანაფის დედოფალი უწოდა.
ამ მეუფეებს არც შევარდნაძის დროს გამოუხატავთ პროტესტი, არც სააკაშვილის დროს უცდიათ საქართველოდან წასვლა, როცა სინოდალურ განჩინებებს ბოკერია, უგულავა და ძმანი მათნი უწერდნენ, არც მარგველაშვილის პრეზიდენტობისას გასჩენიათ პროტესტის გრძნობა და რაღა სალომე ზურაბიშვილის გაპრეზიდენტება გახდა მაგათვის მეორედ მოსვლა და აპოკალიპსი, აი, ეს არის საინტერესო.

რას ნიშნავს ეს, თუ არა იმას რომ ეს მეუფეები ღვთის კი არა, სააკაშვილის სისხლიანი რეჟიმის მსახურები იყვნენ, მისგან იღებდნენ სუბსიდიებს და დივიდენდებს სიჩუმისთვის და თანხმობისთვის ქართველი ხალხის ძარცვა-გლეჯის კურთხევაში?!

მაშინ ზოგი სააკაშვილს კოცნიდა გულ-მკერდზე და ხატების გვერდით იმ არანორმალურის პორტრეტი ეკიდა თითქოს წმინდანი ყოფილიყოს, ზოგი როლანდ ახალაიას აძლევდა რეკომენდაციას პატრიარქთან _ ჯილდო რომ მიეღო, ზოგი სანდრა რულოვსს ნათლავდა და ზოგიერთი ბაჩო ახალაიას აღსარებებს იბარებდა.

მაშინ რატომ არ გამოვიდა არც ერთი მღვდელთმთავარი და არ გააპროტესტა, რაც ხდებოდა 10 წლის განმავლობაში?
ამაზე უპასუხებენ: ვლოცულობდით, ბატონო, ხელისუფლებას ღმერთს ვავედრებდითო. 

კი, ასე იყო: მწამებლებსა და ჯალათებს ეკლესია ყოველ დილით ლოცავდა და მრევლსაც აიძულებდა სანთლები დაენთოთ მიშას სიცოცხლისათვის.
თუმცა ყველამ ყველაფერი კარგად იცის. მეუფე იაკობზე (იაკობაშვილი) ერთმა დიდი ხნის მრევლმა, ასაკოვანმა კაცმა მითხრა: მისი სწავლება არც ქრისტიანობაა და არც იუდაიზმი, ეგ არის რაღაც ჰიბრიდი, მიშას დემოკრატიასავით არისო.

ბოდბელი მღვდელმთავარი მას შემდეგ გახდა საზოგადოების განსაკუთრებული დაინტერესების ობიექტი, რაც საპატრიარქოს სხვა წარმომადგენლებთან ერთად შარშან ნოემბერში ვაშინგტონში იმყოფებოდა, როგორც მაშინ თქვეს, ინტერ-რელიგიურ შეხვედრებზე და კონფერენციაზე დასასწრებად.
დელეგაცია საქართველოს მართლმადიდებელი ეკლესიის, მუსლიმთა თემის, ამიერკავკასიის ლათინური წესის კათოლიკეთა სამოციქულო ეკლესიის და სომეხთა სამოციქულო მართლმადიდებელი წმიდა ეკლესიის საქართველოს ეპარქიის წარმოამდგენლებისგან შედგებოდა. ვიზიტი განვითარებისა და დემოკრატიის ცენტრის (ჩDD-ს) ინიციატივითა და ორგანიზებით შედგა.

ვაშინგტონში დაწყებული მჭიდრო „მეგობრული“ ურთიერთობა ამიერკავკასიის ლათინ კათოლიკეთა სამოციქულო ადმინისტრატორის – ეპისკოპოს ჯუზეპე პაზოტოს სტუმრობით გაგრძელდა ბოდბეში, მეუფე იაკობთან…

არადა, სჯულის კანონის მიხედვით, აკრძალულია მართლმადიდებელმა სასულიერო პირმა არათუ სტუმრად მიიღოს, არამედ პური გატეხოს არამართლმადიდებელთან, რომელიც წმინდა სამების, როგორც ერთარსების მგმობელი და უარმყოფელია…
მაგრამ მოუსმინეთ, რას ამბობს მეუფე: „არის რაღაცა, რასაც არ დათმობს ადამიანი, ხო? არის რაღაც, რასაც არ დავთმობთ, თუ საჭირო გახდა [კონკრეტული ნაბიჯები] რა პრობლემააა, მარტო ქადაგება არა, რა“…
„2012-ში მე ვერ ვიფიქრებდი, რომ ასე საუბარი მომიწევდა…

ჩვენ არ ვართ რევოლუციონერები, ჭკვიანი ხალხი ვართ და შეგვიძლია ისე წყნარად გავაკეთოთ ყველაფერი, არც იცოდნენ, რას ვაკეთებთ.
კეთილი ინებონ და გამოფხიზლდნენ, გეუბნებით რა, სხვებიც ყოფილან, უფრო ძლიერად ყოფილან რა, შევარდნაძე იყო, უფრო ძლიერად იყო, სააკაშვილი იყო, უფრო ძლიერად იყო~… – განაცხადა მარიხუანის ლეგალიზაციის საკითხის განხილვის პერიოდში ქორეპისკოპოსმა.
დააკავირდით მისი მეტყველების სტილს: „გეუბნებით, რა“, „მარტო ქადაგება არა, რა“, – ჰგავს ეს ტონი ეპისკოპოსის მეტყველებას? 
მუქარას უფრო ჰგავს, ჩემი აზრით, რომელიც დღევანდელ დღეს ისე უადგილოა, როგორც ღორის თავ-ფეხი სამარხო სუფრაზე.
პატრიარქის ქორეპისკოპოსი მეუფე იაკობი საქმიანი კაცია. ის წმინდა მთავარანგელოზთა სახელობის დარიალის სამონასტრო კომპლექსის მშენებლობის ფონდის ხელმძღვანელი გახლავთ და ამავე დროს საპატრიარქოს საფინანსო-ეკონომიკური საბჭოს თავმჯდომარე.

„საერთაშორისო გამჭვირვალობა – საქართველოს“ მიერ გამოქვეყნებულ საჯარო ინფრომაციაში, რომელიც საქართველოს საპატრიარქოსთან დაკავშირებული ბიზნესკომპანიები და სხვა ორგანიზაციების საქმიანობას განიხილავს, წერია:

„დარიალის ხეობაში საეკლესიო კომპლექსის მშენებლობაში დახმარების მიზნით აღნიშნულ ფონდთან ინფრასტრუქტურის სამინისტროს საკუთრებაში არსებულმა „სახელმწიფო სამშენებლო კომპანიამ“ 2 მილიონი ლარის საერთო ღირებულების ოთხი ხელშეკრულება გააფორმა. ხელშეკრულებათა უმეტესობა 2011 წლის პირველ ნახევარზე მოდის და მათგან უმსხვილესი (936,000 ლარი) ფონდს გამარტივებული შესყიდვების პროცედურების გზით მიენიჭა 2011 წლის 15 აგვისტოს“.

ბოდბელი მეუფე „ციანიდის საქმეშიც“ აქტიურად ფიგურირებდა.

იმ პერიოდში დაეჯახა აშკარად პატრიარქის სიძეს და დაცვის უფროსს სოსო ოხანაშვილს და, როგორც ამბობენ, ცემა-ტყეპაც გამართულა.
მერე საინფორმაციო საშუალებებთანაც დაადასტურა მეუფემ: კარგად მიიბერტყა ერთი ადამიანიო. ამ ერთ ადამიანში, ცხადია, ოხანაშვილს გულისხმობდა.
წლების წინ „საერთო გაზეთში“ გამოქვეყნდა ინტერვიუ სამთავროს დედათა მონასტრის ყოფილ მორჩილთან, რომელიც ამბობდა: საპატრიარქოში იარაღის ტრიალი იყო, არა მე ვარ უფრო ადრინდელი მღვდელმსახური და არა მეო.

მაშინ ცოტა არ იყოს, მეეჭვებოდა ამ ამბის სისწორე, მაგრამ ახლა ვხვდები, ესენი არაფერზე რომ არ დაიხევდნენ უკან.
სამწუხაროდ, დღეს უკვე ლაპარაკობენ იმაზეც, რომ ბოდბელი ქორეპისკოპოსი მანქანის მოპარვისთვის არის ნასამართლევი და ეს კიდევ არაფერი – მეუფე იაკობი „მხედრიონის“ წევრი ყოფილა და სამოქალაქო ომის დროს თბილისის კომენდანტის გელა ლანჩავას მოადგილე. ავტომატით დადიოდა თურმე ქალაქის ქუჩებში.

რამდენიმე ხნის წინ სოციალურ ქსელში ერთი იღუმენის მოწოდებას წავაწყდი. ბერმონაზონი ილია ვაშაკიძე მეუფე იაკობს მკვლელს უწოდებდა და ეკლესიის გახლეჩაში ადანაშულებდა. აი, რას წერდა მღვდელმონაზონი:

“ყოვლად სამღვდელონო მიტროპოლიტნო, მთავარეპისკოპოსნო და ეპისკოპოსნო, პატიოსანნო მღვდელნო, ქრისტეს მიერ დიაკონნო, სამონაზვნო დასნო ზიარნო დედაეკლესიისა, ქრისტეში საყვარელო ერო, მოგმართავთ რა, პირველ რიგში, უმორჩილესი თხოვნითა და ქრისტესმიერი სიყვარულით, სასწრაფო რეჟიმში მოვითხოვოთ პატრიარქის ჩამობრძანება საქართველოში, რათა მიხედოს საქმეს, რომელიც ქორეპისკოპოსმა იაკობმა გააფუჭა და ეკლესია პოლიტიკური ნიშნებით შუაზე გაყო, საერთო ძალებით აღვკვეთოთ ქორეპისკოპოს იაკობ იაკობიშვილის პოლიტიკური თარეში ამბიონზე, გამომდინარე იქედან, რომ იგი დიამეტრალურად ეწინააღმდეგება წმიდა სინოდის განჩინებებს, რაც საეკლესიო კანონიკით დასჯადია და აღვივებს შუღლს ხალხთა შორის, რაც სისხლის სამართლებრივადაა დასჯადი, ენატრება რა საბჭოთა კავშირის რეჟიმი და ძველბიჭური გარჩევები, რასაც თავადვე ადასტურებს ამბიონიდან. მოგიწოდებთ, ზემოთ ხსენებულ ქორეპისკოპოსს არ მიმართოთ არანაირ საკითხზე, რომელიც დაკავშირებულია აღსარების საიდუმლოსთნ და მოვითხოვოთ გამოაშკარავდეს მისი ბიოგრაფიის 10 წელიწადი. ეს მოთხოვნა თანხვედრაშია მოციქულების მიერ დადგენილ კანონთან. განსაკუთრებით კი სამხედრო პროკურატურის მიერ გამოძიებულ იქნას კონსტანტინე და კახაბერ იაკობიშვილების (კონსტანტინე მეუფე იაკობია, კახაბერი კი მისი ძმა) 1992 წლის ივლისისა და აგვისტოს დისლოკაციისა და მათი დანაშაულებრივი ქმედებების დეტალური ცნობები. მათი სახელები შავი ასოებითაა ჩასაწერი საქართველოს ისტორიაში...

...ეხლა დამირეკოს, რატომ არ მირეკავს არ გაინტერესებთ? ვთავაზობ მეუფე იაკობს დამირეკოს ეხლა და დამირეკოს სასწრაფოდ. ვერ მირეკავს? ეს იმას ნიშნავს, მას, მას და პიტალო კახას ერისკაცობაში ბირჟაზე ჩემს გვერდით არ დავიყენებდი. კიდევ 15 წუთი ველოდები მის ზარს. თუ არ დარეკავს, რა განცხადებებს გავაკეთებ კიდევ, თვითონ უფრო კარგად იცის. მთელი საქართველო კი უფრო კარგად გაიგებს".

ჩვენ ცხადია, არ ვიცით, რა საიდუმლო არგუმენტები შეიძლება ჰქონდეს იღუმენს, მაგრამ ვითვალისწინებთ ჟურნალისტის მოვალეობას – მან კატა უნდა დაინახოს ბნელ ოთახში და დაიჭერენ თუ არა მას, ეს ჩვენს პრეროგატივას სცილდება. არც ის არის ჩვენი მიზანი დავამტკიცოთ, ნამდვილად იყო "მხედრიონელი" მეუფე იაკობი, არის თუ არა მკვლელი, მოიპარა თუ არა რაიმე, ან შეგნებულად ხლეჩს თუ არა ეკლესიას, საქმე იმაშია, რომ ჩვენ გვაქვს ეჭვი და არსებობს ჭორი, რომელიც ძალიან ხშირად არ შეიძლება სიმართლის მარცვალს არ შეიცავდეს.

პატრიარქი აცხადებს: ნუ ჩაერევით პოლიტიკაში მღვდელმსახურებო, ეკლესია ყოველთვის ნეიტრალური იყო, შეინარჩუნეთ ზომიერებაო, მაგრამ მეუფე იაკობი კვლავ პოლიტიკურ განცხადებებს აკეთებს ხან საჯაროდ, ერში, ხან ამბიონიდან მრევლისთვის და თან დასძენს, პატრიარქის მოწოდება მე არ მეხებოდა, მე არ ვქადაგებ პოლიტიკურადო.

თუმცა საწინააღმდეგოს ამტკიცებს ზოგიერთი არასამთავრობო ორგანიზაცია, რომლებიც ჯერ კიდევ თვითმმართველობის არჩევნების დროს მიუთითებდნენ კათოლიკოს-პატრიარქის ქორეპისკოპოს იაკობს: საკვირაო ქადაგების დროს კანონსაწინააღმდეგო აგიტაციის ნიშნების შემცველი პოლიტიკური მოწოდებები გააკეთაო. მრევლს მოუწოდებდა, აქტიურად მიეღოთ მონაწილეობა თვითმმართველობის არჩევნებში და არ დაეშვათ კონკრეტული პოლიტიკური სუბიექტის გამარჯვებაო.

ძალიან მერყეობს ეს ჩვენი მეუფე, რაღაც, ძალიან…

აბა, რას უნდა ნიშნავდეს ის განცხადება, რაც მან ამერიკაში ვიზიტის მერე გააკეთა: „ამერიკა ის ქვეყანაა, რომელსაც ჩვენთვის არ უღალატიაო“?
რელიგიის ისტორიისა და წმინდანების ნაშრომების გათვალისწინებით, მეუფე რუსეთზე სხვა რამეს უნდა ლაპარაკობდეს, მაგრამ...
საბჭოთა კავშირის პირობებში აღზრდილი იერარქიის მემკვიდრე სასულიეროებმა არაერთხელ დაამტკიცეს, რომ მათი ხელდამსხმელი არაფერზე ფიქრობდა, გარდა სასულიერო პირთა რაოდენობისა.


გარკვული დროის წინ საინტერესო ინფორმაციას წავაწყდი, სადაც იუწყებოდნენ, რომ ბულგარეთში საეკლესიო კრიზისი მძვინვარებდა. სასულიერო პირთა და მრევლის ნაწილი იმ მიტროპოლიტების გადადგომას მოითხოვდნენ, რომელთა საბჭოთა უშიშროების ორგანოებთან და სამხედრო დაზვერვასთან თანამშრომლობაც სპეციალურმა სახელმწიფო კომისიამ დაადგინა. შედეგმა მრევლი შეძრა. სპეცსამსახურებთან კავშირში არ აღმოჩნდა თხუთმეტიდან მხოლოდ ოთხი მართლმადიდებელი მიტროპოლიტი, მათ შორის პატრიარქიც. დანარჩენები КГБ-სთან სხვადასხვა ფორმით თანამშრომლობდნენ. ბულგარეთის მართლმადიდებელმა ეკლესიამ ლუსტრაციის დაწყებისთანავე მიიღო გადაწყვეტილება, ქვეყნის ნაციონალური უსაფრთხოების დეპარტამენტისთვის გადაეცა ყველა აუცილებელი მასალა, რომელიც გადაბირებული სასულიერო პირების შესახებ მოეპოვებოდა.

ეს ინფორმაცია იმის დასადასტურებლად მოვიტანე, რომ ლუსტრაცია არა ხოლოდ პოლიტიკურ, არამედ სასულიერო პირებშიც უნდა მოხდეს და გაირკვეს ბოლოს და ბოლოს, ვინ რატომ აქტიურობს ასე თავგამოდებით პოლიტიკურ ასპარეზზე…


2003 წელს ბოდბელი ეპისკოპოსი კონმეუფე იაკობი სტანტინე იაკობაშვილი, ბერად აღიკვეცა და მერე უკვე 2010 წლიდან იწყება მისი იერარქიული სვლა ზემოთ, ეპის- კოპოსის ტიტულამდე. მოარული ხმებით, ქორეპისკოპოსს პატრიარქის ტახტისკენ უჭირავს თვალი.

უკვე მერამდენე პირზე ვწერ, რომლებსაც პატრიარქობა უნდა, მაგრამ რას ვიზამთ, სამწუხაროდ, ტახტი ერთია – მსურველი ბევრი.

„მინდა მასმედიას ვთხოვო – ძალიან ნიჭიერები ხართ ყველანი, ვინც ხართ, ნიჭიერად გვიტევთ ხოლმე ეკლესიას. რაც თქვენი საქმე არ არის, მოდით, ნუ ჩაერევით, თორემ იცით, სინამდვილეში რა ხდება. ეკლესიას მაინც ვერავინ დაამარცხებს… ჩვენს შიდა საქმეებს შიგნით გადავწყვეტთ, ჭორიკნები არა ვართ, გარეთ გამოვიდეთ და რაღაცები ვილაპარაკოთ. ნუ ჩაერევით იმიტომ, რომ თქვენც კარგად იცით, სინამდვილეში რა ხდება, ისევე, როგორც ჩვენ". – ბრძანა ამას წინათ ბოდბელმა ქორეპისკოპოსმა.

მეტი თავმდაბლობა გმართებთ მეუფეო, ასე აშკარად მითითება – რაც თქვენი საქმე არ არისო და პატარა ბავშვივით თითის დაქნევა არ ეკუთვნის მრავალ ჭირ-ვარამგამოვლილ ქართულ მასმედიას!..

მაგრამ კვლავაც იმუქრებით, მეუფეო: თუ საჭირო გახდება, ჩვენს ძალას გაჩვენებთ, ნახევარ მილიონ ადამიანს გამოვიყვან ქუჩაშიო. რისი ნახევარი მილიონის გამომყვანი ხარ შენ… _ არ გამომყვანის ასე და ისეო, _ დაუწერა ვიღაცამ ფეისბუკზე მეუფეს.

თუ ამდენი ადამიანის გამოყვანა შეგეძლოთ, გამოგეყვანათ, მეუფევ, იმ დროში, როცა "ნაცმოძრაობა" უდანაშაულო ადამიანებს ქუჩაში ქათმებივით ხოცავდა, როცა 2500 ადამიანი ციხეში ჰყავდა გამომწყდეული, როცა ცხინვალიდან თავქუდმოგლეჯილი გამორბოდა და ადგილობრივ ქართველობას გავეშებული მტრის პირისპირ ღვთის ანაბარა ტოვებდა, როცა 12 აგვისტოს ჯერ კიდევ გაუციებელი ქართველი ბიჭების ცხედრებზე ცეკვავდა და "გამარჯებას" ზეიმობდა.

გამოგეყვანათ მაშინ, მეუფე, ის 500 000 ქართველი. 500 000-ს თავი დავანებოთ, 5000 კაცი გამოგეყვანათ, ჯანდაბას, 500 კაცი მაინც გამოგეყვანათ, ამდენს თუ ვერ მოახერხებდით, 50 კაცი გამოგეყვანათ, ან სულაც 5, ან მარტო გამოსულიყავით, თუ საქართველო ასე გიყვარდათ.

ხანდახან მგონია, რომ ნატოში და ევროკავშირში შესვლა სამოთხეში შესვლაში გეშლებათ, მეუფევ _ სულ ნატო და ევროკავშირი რომ გაკერიათ პირზე, უფრო შორს რომ არ წავიდეთ, ერთი ის იკითხეთ, ბოლო წლების განმავლობაში რამდენი „ცხვარი“ დაკარგეთ, რამდენი ადამიანი გახდა იეღოველი, 50-იანელი, ბაპტისტი, რამდენი შეუერთდა სხვადასხვა მწვალებლურ სექტებს იმის გამო, რომ თქვენ, მეტწილად, სამშენებლო ბიზნესით იყავით დაკავებული, მიწების დაკანონებას და სიმდიდრის დაგროვებას ჩქარობდით და მრევლისთვის ვეღარ მოიცალეთ?

ადრეც ვთქვი და კიდევ გავიმეორებ: ამასობაში „მგელმა“ გააჩანაგა თქვენი ფარა და ვინც დარჩა, აღარც მათშია რწმენა, იმედი და სიყვარული.


ირანდა კალანდაძე

მეტის ნახვა
30-09-2018, 09:30


ტყვია და სისხლში მისი შემცველობა მას შემდეგ გახდა აქტუალური, რაც ქართულ სუნელებში ტყვიის შემცველობის შესახებ ინფორმაცია გავრცელდა. ამას სექტემბერში, ესტონეთის საელჩოს თანამშრომლებისა და დიპლომატიური კორპუსის წევრების საგანგაში განცხადებები მოჰყვა, რომლებსაც საქართველოში ყოფნის პერიოდში სისხლში ტყვიის მომატებული შემცველობა დაუდგინდათ.

„საერთო გაზეთს“ ასოციაცია "საშენი მასალები და მშენებლობა ფალსიფიკაციის გარეშეს" თავმჯდომარე, ტექნიკურ მეცნიერებათა დოქტორი ანზორ საკანდელიძე ესაუბრა:

– რატომ არის მომატებული ტყვიის შემცველობა? დავიწყოთ იმით, რომ რომ საქართველოში ნავთობპროდუქტების და ბენზინის მაფია მოქმედებს და ჩვენი ყველა უბედურება საბაჟოდან იწყება. რაც კი იმპორტზე შემოდის, ყველაფერს თავისი მაფია ჰყავს. სანამ ბიზნესი ასე კარტერულ გარიგებებზე იმუშავებს, მანამდე არაფერი გვეშველება, ამიტომ პირველ რიგში ამ სფეროს მოწესრიგებით უნდა დაიწყოს. როცა ჰაერის ტყვიით დაბინძურებაზე ვსაუბრობთ, აუცილებლად უნდა ითქვას, რომ ამის ერთ-ერთი მიზეზი ბენზინისა და თავად ავტომობილების ხარისხი, უფრო სწორად, უხარისხობა გახლავთ. არც ერთი ჩვენი მეზობელი არ უშვებს თავის ტერიტორიაზე ისეთ ძველ მანქანებს, როგორც ჩვენ. ეს მანქანები როგორც არ უნდა ვარემონტოთ და რაც არ უნდა შევუცვალოთ, იმ კონდიციამდე მაინც ვერ მივა, რომ ეკოლოგიის მოთხოვნებს შეესაბამებოდეს, თუმცა ეს მთავარი უბედურება არ არის.. ჩვენ ჰაერის დაბინძურებას მარტო ქუჩაში ვზომავთ, მაგრამ იცით, ბინებში რა ხდება? რასაც ქუჩაში ვიწამლებით, ათჯერ იმაზე მეტად ვიწამლებით ჩვენს საკუთარ ბინაში.

– საკუთარ ბინაში რამ და როგორ შეიძლება მოგვწამლოს?

– რამ და არც ერთ სამშენებლო, მოსაპირკეთებელ თუ სანტექნიკურ მასალას, რაც საქართველოში შემოდის, საბაჟოზე არავინ ამოწმებს, ამიტომ რაც მსოფლიოში ნაგავია, ყველაფერი ჩვენთან შემოაქვ თ. გაივსო საქართველო უხარისხო სამშენებლო თუ სარემონტო მასალებით. ტყვიის შემცველობა განსაკუთრებით მაღალია საღებავებში, წებოებში და სხვა დამხმარე სამშენებლო მასალებში. საღებავები, რომლებიც ეკოლოგიურ სისუფთავესთან ახლოს იყო, საქართველოში აღარ შემოდის, იმიტომ, რომ თურქეთიდან უფრო იაფფასიანები შემოყარეს. ხელოსნებისგან გამიგია, კარგი საღებავია, უცბად შრებაო.. ამ დროს, რაც უფრო ადრე შრება, მით უფრო მეტ ტყვიას შეიცავს და მით მეტად მომწამლავია, მაგრამ მარტო საღებავები? ახალი სახლები სულ ტოქსიკური სამშენებლო და მოსაპირკეთებელი მასალებით არის ნაშენები და გამკითხავი არავინაა. რკინა-ბეტონიდან დაწყებული, ყველა საშენი და მოსაპირკეთებელი მასალა შესამოწმებელია და შემოწმების ნაცვლად, ტყვია და სხვა მომწამვლელი ნივთიერებები ჩვენი ხელით შეგვაქვს ბინებში. ეს ევრორემონტი კი არა, ევროსიკვდილია, ვინაიდან ტყვია ორგანიზმში მოხვედრის შემდეგ ძნელად გამოდის გარეთ, ორგანიზმში დაგროვებას იწყებს და ყოველი შესუნთქვის დროს დამატებითი რაოდენობა კონცენტრირდება. უნდა არსებობდეს აუცილებელი მოთხოვნა, რომ ჩაბარების დროს ბინა შემოწმდეს საშენებლო- ეკოლოგიური უსაფრთხოების ნორმებზე, როგორც ტოქსიკურ მასალებზე ასევე, რადიაციაზე და რადონზე. ეს გახლავთ რადიაციის ბუნებრივი წყაროებიდან ყველაზე მომწამვლელი და ჰაერზე ცხრაჯერ მძიმე რადიაქტიული გაზი, რომელსაც თეთრ სიკვდილს ეძახიან. ის ყველგან და ყველაფერშია: მიწაში, წყალში და ა.შ. რადონის გამოსხივებამ მთელ მსოფიოში უამრავი ადამიანი იმსხვერპლა, ამიტომ დაიწყეს რადონომეტრების შექმნა და სამშენებლო მასალების შემოწმება, მაგრამ საქართველოში ეს საკითხი ჯერ გაჟღერებულიც არ არის..

— თქვენი აზრით, წყალში ტყვიის მაღალი შემცველობა სასმელი წყლის პლასტმასის მილებში გატარებას არ უკავშირდება?

– გააჩნია, პლასტმასის მილი რომელი მასალისგან არის დამზადებული და შემოწმებულია თუ არა. ტოქსიკური პლასტმასიც შეიძლება იყოს და რკინაც. ალბათ იცით, რომ სანამ ატომური ელექტროსადგურზე კატასტროფა მოხდებოდა, ჩერნობილი სამრეწველო რეგიონი იყო და ათასობით ქარხანა და წარმოება ჰქონდა. ავარიის შემდეგ ჩერნობილის ტერიტორია გამოცხადდა მკვდარ ზონად, მაგრამ რამდენიმე წლის შემდეგ გარკვეულმა ჯგუფებმა იქ პარტიზანულად შესვლა და ლითონის ჯართად გამოტანა დაიწყეს. შემდეგ ეს ლითონი გადაადნეს და მილები, არმატურები, „შველერები“ და სხვა სამშენებლო მასალები დაამზადეს. მოგვიანებით, რადიაციით დაბინძურებული 100 ტონა ლითონის სამშენებლო მასალა მოსკოვში შეიტანეს და როგორც ჩანს, შემოწმების გარეშე დაიწყეს მშენებლობაში გამოყენება. ეს ამბავი სრულიად შემთხვევით „გასკდა“. იაპონელებმა რომელიღაც საბავშვო ბაღთან, გაიარეს, სადაც მილებს ამონტაჟებდნენ. რომელიღაცას ჯიბეში დოზიმეტრი ედო და განგაში ატეხა. გაყვნენ და ნახეს, რომ იმ ბაღში ყველა მილი რადიაციულად დაბინძურებული იყო და ბავშვებს წყლის ნაცვლად, შხამს ასმევდნენ. ამის მერე ატყდა ერთი ამბავი და ცხადი გახდა, რომ რუსეთი ამ მასალას ქვეყნის ტერიტორიაზე არ გააჩერებდა. მაშინ ითქვა, რომ ეს ჩალის ფასად ნაყიდი მილიონი ტონა რადიაციური ლითონი საქარველოში გივი თარგამაძემ და მისმა ძმამ შემოიტანეს. ამიტომ ვამბობთ, რომ შესამოწმებელია ყველაფერი.. მშენებარე, უკვე აშანებული თუ მომავალში ასაშენებელი..

– გამოდის, რომ ჩვენ სიცოცხლისა და ჯანმრთელობის ხარჯზე ვაკეთებთ ეკონომიას და საბოლოოდ, მკურნალობაში ორმაგ ფულს ვიხდით. არავისთვის საიდუმლო არაა, საქართველოში მძიმე დაავადებების რიცხვმა იმატა და თურქეთის კლინიკები ქართველი ონკოპაციენტებით სავსეა..

– რადგან კლინიკები ახსენეთ, გეტყვით, რომ სამშენებლო მასალები საავადმყოფოებშიც კი არაა შემოწმებული. ბევრჯერ შეთავაზეთ, რომ გვყავს სერტიფიცირებული ჯგუფი, გვაქვს შესაბამისი ხელსაწყოები და შეგიძლია შემოწმების დაწყება, მაგრამ პასუხიც არ გვაღირსეს. წარმოიდგინეთ, ძვირადღირებულ ოპერაციებს აკეთებენ და შემდეგ პაციენტები „გაზის კამერებში“ შეჰყავთ, რომლებიც სავსეა ტოქსიკური აირებით, რადონით, რადიაციით, მძიმე მეტალებით და ათასი უბედურებით. ეს მაინც არ უნდა შეამოწმო? როგორ უნდა მისცე საავადმყოფოს სერტიფიკატი ისე, თუ სამშენებლო ეკოლოგიაზე არ გყავს შემოწმებული? დროზე თუ არ დავიწყეთ სამშენებლო ეკოლოგიური ნორმების დაცვაზე ზრუნვა, მალე გვიან იქნება. ქალაქის მერია იქნება თუ ტექნიკური ზედამხედველობა, ვინც ამ შენობებს იბარებს, მათმა შვილებმაც ხომ ამ ქალაქში უნდა იცხოვრონ? რაზე ფიქრობენ, რატომ აძლევენ ამის უფლებას? 14 წელია, ამაზე ვიბრძვი, სად არ დავწერე, როგორ არ ვეცადე და ნაბიჯი ვერ გადავადგმევინე. ბოლოს და ბოლოს, ეს ყველაფერი ხომ ჯანმრთელობის დაცვის სამინისტროს ეხება? რამდენჯერმე მივმართე ამირან გამყრელიძის სამსახურს, მაგრამ არაფერი.. მსოფლიო სტატისტიკა გვეუბნება, რომ ადამიანთა 50%-ზე მეტი სამშენებლო ეკოლოგიური ნორმების დაუცველობისგან გამოწვეული მძიმე დაავადებებით იღუპება და ჩვენ ჯერ ის ნორმებიც არ დაგვიდგენია, რომლებიც სიკვდილიანობას იწვევს. არც დაუდგენიათ, არც დაუმუშავებიათ და არც აუმოქმედებიათ. ყოველდღიურად ვიღაცა ავადდება, ვიღაცას დაავადება უმძიმდება და ვიღაცა კვდება და გამკითხავი და მომკითხავი არავინაა..

– როგორც ვიცი, საბჭოთა კავშირის დროს რაღაც მსგავსი ნორმები არსებობდა და ნაციონალური მოძრაობის დროს გაუქმდა, თუმცა არც დღევანდელ ხელისუფლებას უზრუნია აღდგენასა თუ ახლის შექმნაზე..

– საქმეც ამაშია, რომ არსებობდა და ამ ყველაფერს მშენებლობის სამინისტრო არეგულირებდა. 2004 წელს ყველაფერი ერთი ხელის მოსმით გააუქმეს, რომ ასე ეპარპაშათ. ამიტომ არის ასეთი განუკითხაობა სეისმოუსაფრთხოებაში და როდის დაგვემხობა ეს სახლები, კაციშვილმა არ იცის, თუმცა ეს კიდევ ცალკე თემაა. . ჯანმრთელობის დაცვას მიმართავ და ჩვენ არ გვეხებაო, მერიას მიწერ და ჩვენ არ გვეხება, თვითონ მშენებლის და ინვესტორის პრობლემააო.. გამოდის, სულ რომ ამოვწყდეთ ამ დაავადებებისგან, პასუხს არავინ არაფერზე აგებს.

– ამოწყვეტის გარდა, სხვა გამოსავალი არ არსებობს?

– ერთადერთი გამოსავალია, რომ გაჩნდეს პასუხისმგებელი სტრუქტურა, როგორიც ადრე მშენებლობის სამინისტრო იყო და ზუსტად ახლა არის ამისთვის ხელსაყრელი მომენტი. სამინისტროების შეცირება რომ მოხდა, რეგიონული განვითარებისა და ინფრასტრუქტურის სამინისტროს რეგიონული განვითარების სამსახური ჩამოაცილეს და მთავრობის ადმინისტრაციას დაუქვემდებარეს, რომელსაც კახიშვილი ხელმძღვანელობს. იქ უკვე დარჩა ინფრასტრუქტურა, ანუ ინფრასტრუქტურული ობიექტების მშენებლობა და მშენებლობის დეპარტამენტი. დაარქვან ბარემ მშენებლობის სამინისტრო და გახსნან სამშენებლო ეკოლოგიური უსაფრთხოების დეპარტამენტი, რომელიც უშუალოდ აგებს პასუხს ტყვია იქნება თუ სხვა ტოქსიკური გამონაბოლქვი და რადიაცია. ამ საქმეში ჟურნალისტებმაც უნდა დაგვიჭირონ მხარი და მთელმა საქართველომაც, თუ გვინდა, რომ ამ ჭირს გადავურჩეთ.

ნელი თორდია

მეტის ნახვა
30-09-2018, 08:00


დავით უსუფაშვილი, სხვებთან შედარებით, განათლებული კაცია, მაგრამ მან ვერა და ვერ მოიგო ქართველი ხალხის გული, რა 1%-იანიც იყო, იგივე დარჩა. ამას, რასაკვირველია, აქვს სუბიექტური და ობიექტური მიზეზები. აი, პირადად მე, როცა ტელევიზორში ვუსმენ, სულ მგონია, რომ ნახევარს თინა ხიდაშელის (ცოლის) დაწერილს კითხულობს, ანუ გაზეპირებულს იმეორებს. არადა, ვიცი, შეიძლება ასე არ არის.

და მაინც, რა არის დავით უსუფაშვილის ურეიტინგობის მიზეზი? მის ბიოგრაფიას თუ გადავხედავთ, არ უნდა ჰქონოდა ურიგო მომავალი, 1992 წელს თბილისის სახელმწიფო უნივერსიტეტი დაუმთავრებია, იურიდიული განხრით. თუმცა მას ხშირად უხსენებენ პირველ "ჩეპეს" – მაშინ, როცა კომუნისტური პარტია იშლებოდა, ფაქტობრივად დაიშალა, წინა დღეს შევიდა მის რიგებში. არა, ეს არ გახლავთ დიდი კომპრომატი, კომუნისტურ პარტიაში ვინ არ შესულა და გამოსულა, მაგრამ შავ ლაქად მაინც რჩება – მან ეს აქტი ჩაიდინა 1989 წლის 9 აპრილის შემდეგ, ანუ მაშინ, როცა იქიდან ხალხი გამორბოდა.

მოგვიანებით დავითს ჰკითხეს, ეს როგორ გააკეთეო? რას ამბობთ, პარტიაში იმიტომ შევედი, რომ შიგნიდან დამენგრიაო. ვერაფერს იტყვი, თუ მერაბ კოსტავა და ზვიად გამსახურდია მთელი ცხოვრება სოციალიზმს ებრძოდნენ, ბოლომდე მაინც ვერ დაანგრიეს და ფაქტობრივად, ამ საქმეს შეეწირნენ კიდეც, უსუფაშვილი უფრო მაგარი გამოდგა – შევიდა, მიიხედ-მოიხედა, იქით ჩაქუჩსა ძვრა უყო, აქეთ ნამგალსა წიხლი ჰკრა, ლენინის ბიუსტს თვალებში თითი ატაკა და ოდესღაც უძლეველი პარტია დაანგრია, უცებ ხუხულად აქცია. ნუ იცინით… მართალია, ეს ამბავი ზუსტად ნაცარქექიას "პონტსა" ჰგავს, მაგრამ ფაქტია, ამ ადამიანმა კომუნისტურ პარტიას დედა უტირა. თუმცა იცით, როცა ტანისამოსიდან მტვერი ჩამოიბერტყა, რა გააკეთა? აი, უკან მობრუნებულმა კომუნისტებმა ზვიად გამსახურდიას ხელისუფლება რომ დაამხეს და დასაწყისში "სახელმწიფო საბჭო" დაირქვეს, იქ შევიდა, მრჩევლად დაიწყო მუშაობა. არ ვიცი, კიტოვანს, სიგუას და შევარდნაძეს მისი რჩევა რა ფეხებად უნდოდათ, მაგრამ ეს სოფლიდან ჩამოსული ტიპი, რატომღაც, სტუდენტობის დროიდან მოყოლებული, სულ "ხოდში" იყო. ამბობენ, უსუფაშვილი ქიზიყის სოფელ მაღაროდან როა, ამას საგულდაგულოდ მალავს, ამ მხრივ დაკომპლექსებულია, დედაქალაქელობას აწვებაო. არადა, მშვენიერი სოფელია ზემო მაღარო, ლამის ზედ აკრავს სიღნაღს და მშვენიერი ხედებიც აქვს. მე მგონი, მან ამით უნდა იამაყოს. მერე რა, რომ სოფლელია, არც ქალბატონი თინა ხიდაშელი გახლავთ დედაქალაქელი, საგარეჯოს სოფელ ანთოკში გაიზარდა, რა პრობლემაა? მეტიც, თინას მამა – ანზორი ცნობილი "გაიშნიკი" იყო, არც ეგაა პრობლემა!

მოკლედ, ასე იყო თუ ისე, ერთი რამ ცხადია, დღეის მდგომარეობით გამომცხვარ ლიბერალ დავით უსუფაშვილს აშკარად ჰქონდა მიდრეკილება კომუნისტობისკენ, კომუნიზმისკენ და დიადი მომავალიც "ეჭყანებოდა", რომ არა ავადსახსენებელი მიხეილ გორბაჩოვი და მასხარა რონალდ რეიგანი. პრინციპში, ესენი კი წაეხმარნენ უსუფაშვილს, მაგრამ თვითონაც დაუშვა მიუტევებელი შეცდომა – უკვე გითხარით, შევარდა პარტიაში და ჩამოშალა, შემოეშალა, ანუ ვერ მოზომა. არაუშავს, ცოტა ზედმეტი მომივიდა, მაგრამ სამაგიეროდ, ერი თავისუფალიაო, თქვა დავითმა და ედუარდ შევარდნაძის ეგიდით დაიწყო ახალი კონსტიტუციის წერა… პრინციპში, წერა რა, სხვები წერდნენ და ესეც კითხულობდა. აი, ამ დროს სულზე მოუსწრეს ამერიკელებმა, სხვა სიომ დაუბერა, იურისტების ერთმა ნაწილმა "ახალგაზრდა იურისტთა ასოციაცია" დააფუძნა, დამფუძნებელთა შორის დავითიც აღმოჩნდა. მეტიც, შემდეგ თავმჯდომარე გახდა. ეს იყო უკეთესი ტრამპლინი, ვიდრე კომუნისტური პარტია. დაიწყო უსუფაშვილის ცხოვრებამ საათივით წიკწიკი – გაჩნდა ამერიკულ-ევროპული პროექტები, უცხოეთში წასვლა-სწავლის შანსი, შევიდა დიუკის საჯარო პოლიტიკის ინსტიტუტში, დაამთავრა, ჩამოვიდა და ეგრევე დანიშნეს "რესპუბლიკური პარტიის" თავმჯდომარედ. ეს ისტორიული ფაქტი მოხდა 2005 წელს, მიხეილ სააკაშვილის ზეობის ხანაში.

ბარემ აქვე აღვნიშნავ… "რესპუბლიკელებს" (ძმები ბერძენიშვილები, დავით ზურაბიშვილი და სხვები) თავიდანვე აქვთ "წამოკიდების" მეთოდი – ვინც ხელისუფლებაში მოდის, უცებ შეეტენებიან, მხარს დაუჭერენ, პარლამენტში შევლენ და მერე იჭერენ გაუგებარ ლიბერალურ კურსს, მიუღებელ იდეებზე ბოდვას და დგებიან განზე. ამას ჩვენებურად ღალატს ეძახიან. იყვნენ უზენაეს საბჭოში, შემდეგ შევარდნაძესთან, შემდეგ მიხეილ სააკაშვილთან და… ასევე უპრობლემოდ აღმოჩნდნენ კოალიცია "ქართულ ოცნებაში". კარგად მახსოვს ამ თემაზე ჩემი საუბარი ბიძინა ივანიშვილთან:

– "რესპუბლიკელებზეა" ატეხილი ერთი ამბავი, ნეტა რაში გჭირდებოდათ, რატომ დაიყენეთ გვერდით მოღალატეები?
– "რესპუბლიკელებს" რას ერჩი, რას უწუნებ?
- ყველას წამოეკიდნენ, ვინც კი ხელისუფლებაში მოვიდა და მერე უღალატეს. უჯიშო კოსმოპოლიტები არიან და მოვა დრო, თქვენც გიღალატებენ.
- განათლებული ხალხია… თუ ვინმე არასწორ გზას დაადგება, მე კი არა, ქვეყანას უღალატებს. ახლა ასეა საჭირო, არ ინერვიულო, მე ყველაფერი ვიცი, ისე იქნება საქმე, ვერც კი წარმოიდგენ.

მიუხედავად იმისა, რომ ბიძინა ივანიშვილმა იცოდა, "რესპუბლიკელები" უღალატებდნენ, განზე გაუდგებოდნენ, მაინც მისცა მათ სრული კარტბლანში – ადგილები პარლამენტში, ადგილები სამინისტროებში და რაც მთავარია, პარლამენტის თავმჯდომარის თანამდებობა. ამავე დროს ახდა ჩემი ნათქვამიც (ამას დიდი წინასწარმეტყველება არ სჭირდებოდა), უჯიშოთა მოდგმა ტრადიციულად გადგა გვერდზე და ყველაფერზე დაიწყო ვაჭრობა. სწორედ ამ ვაჭრობის შედეგი გახლდათ, თინა ხიდაშელი რომ გახდა თავდაცვის მინისტრი. რა იყო ვაჭრობის საგანი 5 წლის განმავლობაში? უსუფაშვილს უნდა მიეღო ის კანონები და ცვლილებები, რასაც იღებს დღეს ირაკლი კობახიძე. ფაქტობრივად, დავითმა დაიწყო იმნაირივე მოქმედება, როგორც დაიწყო კომუნისტურ პარტიაში – შეყო თავი და შიგნიდან თხარა გვირაბი, დააზიანა "ქართული ოცნება". როდესაც მას ახსენებდნენ, რომ ესა და ეს კანონიაო მისაღები, ასე და ასეა საქმე გასაკეთებელიო, ის ყოველთვის თავს იკატუნებდა და დრო გაჰყავდა. მიუხედავად ამისა, როცა წინა პარლამენტს ყავლი გაუვიდა, დავით უსუფაშვილს ბიძინა ივანიშვილმა შესთავაზა, დატოვე უჯიშოთა ჯოგი, გადმოდი "ოცნებაში", მაინც გამოსადეგი კაცი ხარო. უარი თქვა დავითმა, თანაპარტიელებს გაუწია ანგარიში თუ რამე სხვა მოსაზრება ჰქონდა, არ ვიცი. პრინციპში, თანაპარტიელების ხათრით რომ მოქცეულიყო ასე, მაშინ აღარ დატოვებდა "რესპუბლიკურ პარტიას" და აღარ შექმნიდა "შენების მოძრაობას", ყოვლად უსახურ ორგანიზაციას, სადაც არც არავინ შედის, არც არავინ გამოდის.

მოკლედ, ბევრი რომ აღარ გავაგრძელო, თავი რომ აღარ შეგაწყინოთ, დავითმა (ერთი შეხედვით) პოლიტიკური გზის გაკვლევა დამოუკიდებლად დაიწყო. დაუკვირდით, ის ყოველთვის ასე იქცეოდა, ყოველთვის იყო ურეიტინგო და თითქოს უპერსპექტივო, მაგრამ ცხოვრებაში, როგორც ბიძინა ივანიშვილი იტყვის ხოლმე, რაღაცებს გაარტყა – ბოლოს და ბოლოს, 5 წლის განმავლობაში იყო ქვეყნის მეორე პირი, 1%-იანი ადამიანისთვის განა ეს ცოტაა? კაი, ახლა იტყვით, ეგ ბიძინა ივანიშვილის დამსახურებააო, მაგრამ ხომ იყო, ხომ "გაარტყა" კაცმა რაღაცას?!

რა შანსი აქვს ბატონ უსუფაშვილს, რომ გახდეს საქართველოს პრეზიდენტი? არავითარი. მაშ რატომ იყრის კენჭს, არ იცის? აი, მე მყავდა ერთი დიდი ბებია, თუ ისეთ რაღაცას ჰკითხავდნენ, რაც არ იცოდა, ეგრევე უპასუხებდა ხოლმე: ეშმაკმა რო სილა გკრათ, მე რა ვიცი?! მთლად ასე არ გიპასუხებთ, მაგრამ საქართველოში ვის თავში რა იხარშება, როგორ იხარშება, რატომ იხარშება, ძალიან ძნელი გასარკვევია!

ისე, რაღა დაგიმალოთ და… დავითი ხშირად ბასტი-ბუბუსაც მაგონებს თავისი ჰაბიტუსით და საუბრის მანერით. ეს ნამდვილად არ არის კომპრომატი, დამიჯერეთ.

გელა ზედელაშვილი

მეტის ნახვა
30-09-2018, 08:00