სარეკლამო ადგილი

947x125



წლევანდელი წლის პირველი მნიშვნელოვანი პოლიტიკური მოვლენა ამერიკის შეერთებული შტატების პრეზიდენტის დონალდ ტრამპის ინაუგურაცია გახლდათ. პოლიტოლოგები აცხადებდნენ, რომ ტრამპი გახდა თეთრი სახლის ლიდერი იმაზე ნაკლები მხარდაჭერით, ვიდრე ოდესმე ჰქონია აშშ-ის რომელიმე პრეზიდენტს. ტრამპის ინაუგურაცია იმითაც იყო გამორჩეული, რომ მან მედიას შეუტია. "ომს ვაწარმოებ მედიასთან. ისინი დედამიწის ზურგზე ყველაზე უსინდისო არსებები არიან", _ განაცხადა ტრამპმა.

 მას მხედველობაში, პირველ რიგში, ამერიკული მედია ჰქონდა. როგორც მოგვიანებით გაირკვა, ტრამპს მხოლოდ მედიასთან არ მოუწევდა ბრძოლა. პრეზიდენტობის 10 თვეში ტრამპმა თავისივე დანიშნული 12 მაღალჩინოსანი ჩინოვნიკი გადააყენა თანამდებობიდან.

საშინაო პოლიტიკაში ტრამპმა წარუმატებლობები პრეზიდენტობის დაწყებისთანავე განიცადა. სწორედ ამ გარემოების გასანეიტრალებლად და საკუთარი პრესტიჟის ასამაღლებლად ტრამპის ბრძანებით დაიბომბა ფრთოსანი რაკეტებით სირიის სამთავრობო ჯარების აეროდრომი. თუმცა მისი ერთ-ერთი დაპირება ე.წ. "ისლამური სახელმწიფოსთან" უკომპრომისო ბრძოლა და მისი სრული განადგურება გახლდათ. ამისთვის აშშ-ისა და რუსეთის სამხედროებმა გარკვეული შეთანხმებაც დადეს - ამიტომაც აღმოჩნდა მსოფლიო საზოგადოებისთვის მოულოდნელი სირიის სამთავრობო ჯარების აეროდრომის დაბომბვა. საინტერესო გახლდათ ის გარემოება, რომ ტრამპმა შეტევის გადაწყვეტილება მაშინ მიიღო, როდესაც ქვეყანაში ოფიციალური ვიზიტით ჩინეთის ლიდერი სი ძინ პინი იმყოფებოდა. ტრამპმა ჩინელ სტუმარს დაბომბვის შესახებ ოფიციალური სადილობისას აცნობა, როდესაც დესერტად შოკოლადის ტორტს მიირთმევდნენ. მოგვიანებით ექსპერტებმა ფაქტი ნართაულ მუქარად შეაფასეს, თუმცა სტუმარს არანაირი რეაქცია არ ჰქონია და არც კომენტარი გაუკეთებია. მოგვიანებით ჩინეთის მხარემ საკმაოდ მკვეთრი განცხადება გააკეთა.

მოსკოვში ტილერსონის სტუმრობის თითქმის ერთი თვის შემდეგ სერგეი ლავროვმა განახორციელა საპასუხო ვიზიტი ვაშინგტონში. ტილერსონის შემდეგ ლავროვი დონალდ ტრამპმა მიიღო. რუსეთის ოფიციალური პირები, 2013 წლიდან მოყოლებული, არ ყოფილან თეთრ სახლში. ამჯერად შეხვედრა ოვალურ კაბინეტში შედგა. რუსეთის საგარეო საქმეთა მინისტრის ვიზიტი სტუმარ-მასპინძლებმა ნაყოფიერად შეაფასეს. გავრცელებული ინფორმაციით, უნდა შექმნილიყო ერთობლივი სამუშაო ჯგუფი, რომელიც მოამზადებდა რუსეთისა და აშშ-ის პრეზიდენტების პირისპირ შეხვედრას დიდი ოცეულის ფარგლებში.

ლავროვის ვიზიტმა ახალი ძალით ააგორა ტრამპის საწინააღმდეგო კამპანია, ამერიკული პრესა წარმოუდგენელი ჭორებით დაიხუნძლა.

ამაშობაში საფრანგეთში მეთერთმეტე საპრეზიდენტო არჩევნები გაიმართა. ევროპელი პოლიტოლოგები და ექსპერტები ერთხმად აღნიშნავდნენ, რომ მსგავსი ბინძური საარჩევნო კამპანია საფრანგეთის ისტორიაში არ ყოფილა. გამარჯვება ახალგაზრდა, 39 წლის ემანუელ მაკრონმა (რომელსაც 64 წლის ცოლი ჰყავს) მოიპოვა.

პირველი ტურის შემდეგ თავის უშუალო კონკურენტს მარი ლე პენს მაკრონი მხოლოდ 1,5 პროცენტით უსწრებდა, ხოლო მეორე ტურში თითქმის 30 პროცენტით აჯობა. მაკრონისგან განსხვავებით, ლე პენს ჰქონდა სამოქმედო გეგმა. მისი აზრით, საფრანგეთმა უარი უნდა თქვას ევროზე და დააბრუნოს მიმოქცევაში ეროვნული ვალუტა, ასევე განსაკუთრებული ყურადღება უნდა დათმობოდა ადგილობრივ პროდუქციას. ამის გარდა, დღემდე ლე პენი ნატოში და ევროკავშირში ყოფნას საჭიროდ არ მიიჩნევს. პირველი ოფიციალური ვიზიტი დაონალდ ტრამპმა ევროპა-ახლო აღმოსავლეთში განახორციელა. ვოიაჟის დაწყებისას პოლიტოლოგები ამბობდნენ, რომ ტრამპი ცოტა ხნით მაინც გაეცლება ვაშინგტონის ჭაობს, რომლის ამოშრობასაც აპირებდაო. თავდაპირველად ტრამპი საუდის არაბეთს ეწვია, სადაც მართლაც გრანდიოზული დახვედრა მოუწყეს.

არაბეთში ტრამპმა 280-მილიარდიანი ხელშეკრულებები გააფორმა. საუდის არაბეთის და ისრაელის შემდეგ ტრამპი ევროპას ეწვია. ტრამპის ევროკავშირში ვიზიტის შემდეგ ევროჩინოვნიკები იმედგაცრუებული დარჩნენ, მათ ვერ მიიღეს ფინანსური დახმარების დაპირებაც კი. ფაქტობრივად, უშედეგოდ დამთავრდა სიცილიაზე გამართული დიდი შვიდეულის შეხვედრა. წლევანდელი წლის ერთ-ერთი მთავარი პოლიტიკური მოვლენა გერმანიის ქალაქ ჰამბურგში განვითარდა. დიდი ოცეულის სამიტზე დაგეგმილი იყო დონალდ ტრამპის და ვლადიმირ პუტინის პირისპირ პირველი შეხვედრა, რომელსაც მსოფლიოს პიოლიტიკოსები მოუთმენლად ელოდნენ. დიალოგი შედგა, რომელიც ორ საათზე მეტ ხანს გაგრძელდა. საუბარს მხოლოდ ამერიკელი და რუსი პირველი დიპლომატები ესწრებოდნენ. ორმხრივი შეხვედრით ორივე მხარე კმაყოფილი დარჩა.

მსოფლიოს, განსაკუთღებით ევროპის ქვეყნებისთვის ტერორიზმი და მასთან ბრძოლა ერთ-ერთი მთავარი პრობლემა გახლდათ. თუმცა პოლიტიკურ არენაზე წლეულს გაჩნდა ახალი თავსატეხი ჩრდილო კორეის სახით. წლის დასაწყისიდან დღემდე თითქმის 15-ჯერ გამოსცადეს ბალისტიკური რაკეტები. აგვისტოს მიწურულს ქვეყანაში წყალბადის ბომბი წარმატებულად გამოსცადეს. გაერთიანებული ერების ორგანიზაციის გენერალურ ასამბლეაზე სიტყვით გამოსვლისას ტრამპი ჩრდილო კორეის სრული განადგურებით დაემუქრა. მსგავსი განცხადება გაეროს ტრიბუნიდან მისი არსებობის მანძილზე არც ერთ პოლიტიკოსს, მით უფრო, ქვეყნის მმართველს არ გაუკეთებია. სწორედ ამ განცხადებამ შეაშფოთა მსოფლიო. აღსანიშნავია, რომ რეგიონში საომარი ვითარების დაწყებას ეწინააღმდეგებიან იაპონიისა და სამხრეთ კორეის ლიდერები. ჩინეთი და რუსეთი ორივე ქვეყანას დიალოგისკენ მოუწოდებენ.

ტრამპის საგარეო პოლიტიკას მიმომხილველების ნაწილი დადებითად აფასებს, მაგრამ ფაქტია, რომ თავისი მოღვაწეობა მან ზოგიერთი საერთაშორისო ორგანიზაციიდან აშშ-ის გამოყვანით დაიწყო. ამასთან, ამერიკის მოკავშირე თურქეთთან იმდენად დაიძაბა ურთიერთობა, რომ პრეზიდენტმა ერდოღანმა განაცხადა, `ამერიკა არ გვჭირდებაო~. პოლიტოლოგების გაოცება გამოიწვია ტრამპის გადაწყვეტილებამ, ირანთან შეაჩეროს ბირთვული თანამშრომლობა. 2011 წელს გაეროს ჩარევით, როგორც იქნა, დაიყოლიეს ეს ქვეყანა, შეეჩერებინა ბირთვულ იარაღზე მუშაობა. ტრამპის განცხადების შემდეგ, ირანელებმა უპასუხეს, რომ მათი ქვეყანა კვლავ დაიწყებს ბირთვული იარაღის შექმნაზე მუშაობას.

ამასობაში კი რუსეთი აძლიერებს საკუთარ გავლენას მსოფლიოში. ამაზე მეტყველებს სხვადასხვა სახელმწიფო მეთაურების იქ განხორციელებული ოფიციალური ვიზიტები. განსაკუთრებით აღსანიშნავია საუდის არაბეთის მეფის სალმან იბნ აბდულ-აზიზ ალ საუდის მოსკოვში სტუმრობა. საუდის არაბეთის მონარქის ვიზიტი რუსეთში ისტორიაში პირველი გახლდათ. არაბეთის დელეგაციის შემადგენლობაში ათასზე მეტი წევრი იყო, რაც ბევრის მთქმელია. ვიზიტისას გაფორმდა 15-ზე მეტი ხელშეკრულება. არაბებს განსაკუთრებით შეიარაღების შეძენა სურდათ, მიუხედავად იმისა, რომ გაზაფხულზე აშშ-სთან გააფორმერს ხელშეკრულება იარაღის შეძენაზე.

აღსანიშნავია ასევე სოჭში გამართული რუსეთის, ირანისა და თურქეთის პრეზიდენტების სამმხრივი შეხვედრა, რომელიც უცხოელმა ჟურნალისტებმა "ახალ იალტად" მონათლეს. ამერიკულმა პრესამ აღნიშნა, რომ აშშ-მა ახლო აღმოსავლეთში პოზიციები დათმო და მაყურებლის როლში დარჩა. გასულ კვირას გაეროს გენერალურ ასამბლეაზე განიხილეს იერუსალიმის ისრაელის დედაქალაქად აღიარების საკითხი. მიუხედავად ტრამპის მუქარისა, რომელი ქვეყანაც არ აღიარებს, დაფინანსებას შევუწყვეტთო, საკითხი ხმების უმრავლესობით ვერ გავიდა.

პალესტინის მეთაურის მაჰმუდ აბასის განცხადებით, ტრამპის გადაწყვეტილება კიდევ უფრო დაძაბავს ვითარებას ახლო აღმოსავლეთში,. კიდევ ერთი საინტერესო მოვლენა, რომელიც გასულ კვირაას ესპანეთის კატალონიაში განვითარდა. ამომრჩეველთა აქტივობამ 82 პროცენტს გადააჭარბა, ეს მაშინ, როდესაც რაფერენდუმზე მოსახლეობის 43-მა პროცენტმა დააფიქსირა თავისი არჩევანი. არჩევნებზე ხმების უმრავლესობა - 70 ადგილი დამოუკიდებლობის მომხრე პარტიებმა მიიღეს, რახოის პარტიამ კი მხოლოდ 3 ადგილი მოიპოვა. ვნახოთ, როგორ გასრულდება წლევანდელი წელი. იმედი ვიქონიოთ, რომ ახალი 2018 მშვიდობიანი იქნება საქართველოსთვის, და საერთოდ, მსოფლიოსთვისაც, თუმცა ისეთი ვითარებაა სამყაროში, როდის აფეთქდება `ბომბი~ სახელად ომი, არავინ იცის…

გია ბურდული

მეტის ნახვა
12-01-2018, 12:19


    გიორგი მარგველაშვილმა 40 კანონს მოაწერა ხელი პრეზიდენტის საპარლამენტო მდივნის ანა ნაცვლიშვილის განცხადებით, ხელმოწერილ კანონებს შორის არის საავტორო უფლებების დაცვის, ოჯახში ძალადობის მსხვერპლთა დაცვის შესახებ, მარტოხელა მშობლის, ეროვნული ბანკის საზედამხედველო და საკონტროლო ფუნქციების შესახებ კანონები.

"პრეზიდენტის საპარლამენტო მდივნად დანიშვნის შემდეგ მინდა საზოგადოება საქმის კურსში ჩავაყენო იმ საკანონმდებლო მუშაობის შესახებ, რაც მიმდინარეობს ამ დღეების განმავლობაში. ჩვენ ვიმუშავეთ პარლამენტის მიერ დეკემბრის თვეში მიღებულ კანონებზე. პრეზიდენტმა დღეს ხელი მოაწერა 40-მდე კანონს.

მიხარია, რომ ამ კანონების დიდი ნაწილი მიმართულია საქართველოს მოქალაქეების რიგი უფლებების უკეთ დასაცავად. განსაკუთრებით გამოვყოფდი ცვლილებებს, რომლებიც ემსახურება საავტორო უფლებების დაცვის სტანდარტის ამაღლებას, ასევე იმას, რომ სახელმწიფო უწყებებმა უფრო კოორდინირებულად და ეფექტურად იმუშაონ ძალადობის მსხვერპლების და ოჯახში ძალადობის მსხვერპლების დასაცავად და ამისთვის შეიქმნება პროცედურები. ასევე მარტოხელა მშობლების შვილებს ავტომატურად აღარ შეუწყდებათ სოციალური დაცვის გარანტიები, მხოლოდ იმ ფაქტის გამო, რომ მათი მშობელი რეგისტრირებულ ქორწინებაში შევა და სხვა.

აღსანიშნავია, რომ პარლამენტის მიერ მიღებული ცვლილებების მიხედვით, გაიზრდება დამოუკიდებელი ინსტიტუტის ეროვნული ბანკის საზედამხედველო და საკონტროლო ფუნქციები საფინანსო სექტორთან მიმართებაში, რაც ასევე აქტუალური თემაა საზოგადოებისთვის. მისასალმებელია, რომ ამ ცვლილებების ნაწილი განპირობებულია ევროკავშირთან ასოცირების შეთანხმებით გათვალისწინებული ვალდებულებების შესრულებით.

ევროპული სტანდარტის და სულისკვეთების კანონმდებლობის შექმნა და შემდეგ ამ კანონების პრაქტიკაში განხორციელება ძალიან მნიშვნელოვანი იმისთვის, რომ საქართველო შედგეს და ჩამოყალიბდეს როგორც ევროპული ტიპის ძლიერი დემოკრატია. ამ მიმართულებით ჩვენ ველოდებით შემდგომ საკანონმდებლო სამუშაოებსაც. ერთერთი კანონი, რომელიც ასევე იყო სამუშაო პროცესის ნაწილი, ეს არის "სახელმწიფო დაცვის სპეციალური სამსახურის შესახებ" კანონში შეტანილი ცვლილებები. ამ ცვლილებებით გარკვეულწილად იცვლება მოსამსახურეთა მდგომარეობა. აქამდე წვევამდელებს შეეძლოთ, რომ მცირე ანაზღაურების საფასურად ემსახურათ სპეციალური დაცვის სამსახურში. ახლა კანონი ითვალისწინებს გარკვეულ ცვლილებებს და შესაძლებელია, რომ კონტრაქტის გარეშეც მოხდეს მათი ამ სამსახურში აყვანა და ჩვენ, რა თქმა უნდა, ამ ცვლილებას არ მივესალმებით. ვფიქრობთ, რომ ამ საკითხის ფინანსური მხარის გადაწყვეტა სხვაგვარადაც იყო შესაძლებელი. სამწუხაროა, რომ ასე არ მოხდა. მას შემდეგ, რაც პრეზიდენტი ხელს მოაწერს ამ კანონებს და ისინი ძალაში შევა, ძალიან მნიშვნელოვანია, რომ საქართველოს პარლამენტმა და ასევე, საზოგადოებამ აქტიურად მიადევნოს თვალი, იმას, თუ როგორ განხორციელდება და დაინერგება ეს კანონები ყოველდღიურ ცხოვრებაში", - განაცხადა ანა ნაცვლიშვილმა.

მეტის ნახვა
11-01-2018, 14:56


სოსო არჩვაძე, ეკონომიკის ექსპერტი:

– გაზეთ „საერთო გაზეთის“ შემოქმედებით ნიჭიერ კოლექტივს, დამდეგ გილოცავთ ახალ, 2018 და გისურვებთ ახალ წელს შემოქმედებით წარმატებებს და აღიარებას. დაე, ამ ახალ წელს თქვენთაგანისათვის და ყველა თქვენი სახით – სრულიად საქართველოს მოსახლეობისათვის – მოეტანოს ხვავი, ბარაქა, კეთილდღეობა, მიზნების ასრულება.
თქვენ ყოველთვის იცავდით პირუთვნელად საერთო-ეროვნულ და სახელმწიფოებრივ ინტერესებს, მაღალპროფესიულად და ობიექტურად აშუქებდით ჩვენი ქვეყნისათვის აქტუალურ პრობლემებს და ამითაც ზედმიწევნით ამართლებდით თქვენი გაზეთის სახელწოდებას. დარწმუნებული ვარ, მომავალი წელი იქნება გაცილებით წარმატებული, მიღწევებისა და ახალი წელი აღიარებების – პირადად თქვენთვის და თქვენი ერთგული მრავალათასიანი მკითხველისათვის. იხარეთ და იდღეგრძელეთ!

მეტის ნახვა
29-12-2017, 14:12


კახა ძაგანია,პოლიტიკური პარტიის "მემარცხენე ალიანსის" ლიდერი:

– როცა საქართველომ თავისი დამოუკიდებლობის პერიოდში რთული ამოცანების წინაშე იდგა, გავიარეთ რევოლუციები, ომები, მძიმე რეჟიმები, ისეთი ინსტიტუტი დემოკრატიული, არის პრესა როგორიც, მედია. თავის მხრებზე, სიცოცხლის რისკის ფასად, თავისუფლების რისკის ფასად, ამ ინსტიტუციებმა აქამდე მხრებით მოიტანეს საქართველოში დემოკრატია. ერთ-ერთი ასეთია "საერთო გაზეთი". ის ნამდვილად სახელწოდებას ამართლებს.

2017 წელს მსოფლიოში 80 ჟურნალისტი გარდაიცვალა პროფესიული მოვალეობის შესრულების დროს. წინასაახალწლოდ ასეთ მძიმე სტატისტიკას იმიტომ ვახსენებ ჩვენს მოსახლეობას, რომ მკითხველმა დააფასოს და გააანალიზოს, რამდენად რთულია თქვენი საქმიანობა, რომ ემსახუროთ სიმართლეს და ქვეყანას.
გასულ წელს ბევრი კარგი რამ მოხდა საქართველოში – ვიზალიბერალიზაცია, ასოცირების ხელშეკრულების ხელმოწერა ევროკავშირთან და ა. შ. სამწუხაროდ, რუსეთთან ურთიერთობები კვლავ გაყინულია და ვისურვებდი, 2018 წელს ყინული გამლღვალიყოს, რაც შეიძლება მეტი ინვესტორი შემოსულიყოს, ხელფასი ოჯახის ყველა ზრდასრულს ჰქონოდეს, ტერორიზმის საფთხე ჩვენს ქვეყანას არიდებოდეს, საქართველოში და არ მსოფლიოშიც ბავშვები შიმშილობდნენ...
ამ 2018 ახალ წელს ხვავი, ბარაქა ყოფილიყოს საქართველოში.

წინა ხელისუფლების მსგავსი დიქტატურა აღარ დაბრუნებულიყოს ჩვენს ქვეყანაში.
ხელისუფალს თავი ხალხის მსახურად ეგრძნოს და არა ხალხის უფროსად.
გამთლიანებულიყოს ჩვენი ქვეყანა.

მეტის ნახვა
27-12-2017, 15:01


წყალტუბო –ახალი სტანდარტები საბავშვო ბაღებში

სურსათის  უვნებლობის  სააგენტოს რეკომენდაციების თანახ მად,  საბავშვო  ბაღებში  იცვლება  სამზარეულოს,  სურსათის სასაწყობე  ფართისა  და  სველი წერტილების  სტანდარტები.  ამ რეკომენდაციების  შესრულება სავალდებულოა  ყველა  მუნიციპალიტეტისთვის.  წყალტუბოს მუნიციპალიტეტში  სარემონტო სამუშაოებისთვის  ადგილობრივი  ბიუჯეტიდან  194 000  ლარი გამოიყო  და  მუნიციპალიტეტის 22 ბაღში სამუშაოები სხვადასხვა გრაფიკით მიმდინარეობდა.
წყალტუბოს  მერმა  გრიგოლ იოსელიანმა,  მოადგილეებთან ერთად,  საბავშვო  ბაღები  დაათვალიერა. „რამდენიმე  საბავშვო  ბაღში ამჟამად შეწყვეტილია სასწავლო- სააღმზრდელო  პროცესი.  მიმდინარეობს  სარემონტო  სამუშაოები  სოფ.  მაღლაკის,  გვიშტიბის, გუმბრის,  ქვიტირის,  ფარცხაყა- ნევის  საბავშვო  ბაღებში,  აგრეთვე ქალაქის ორ საბავშვო ბაღში (დანარჩენ  ბაღებში  სამუშაოები უკვე  დასრულდა).  
სოფ.  გვიშტიბის,  მაღლაკისა  და  ქალაქის საბავშვო  ბაღებში  სამუშაოები დათქმულ  ვადებში დასრულდება და ახალი წლიდან ყველა საბავშო ბაღი  ახალ  გარემოში,  განახლებული  სტანდარტებით  შეუდგება ფუნქციონირებას“, – განაცხადა წყალტუბოს  მუნიციპალიტეტის მერმა გრიგოლ იოსელიანმა.მერმა მოადგილეებთან, ზურაბ მაისურაძესთან  და  ალექსანდრე დადუნაშვილთან  ერთად,  მშენებარე  სოფელ  თერნალის  ბაღიც მოინახულა.
ა(ა)იპ.  „წყლტუბოს  მუნიციპალიტეტის  ბაღების  გაერთიანების“  უფროსის,  გიორგი  იობიძის თქმით,  კიდევ  ერთი  ახლადგარე- მონტებული  საბავშვო  ბაღი  შეე- მატა სოფელ ყუმისთავს.

ბაღდათი - მუნიციპალური ნარჩენების მართვა

 ბაღდათის მუნიციპალიტეტის მერის, არჩილ გოგსაძის კაბინეტში  გაიმართა  სამუშაო  შეხვედრა მუნიციპალური  ნარჩენების  მართვის გეგმასთან დაკავშირებით. საქართველოს  ნარჩენების მართვის კოდექსის მოთხოვნების შესაბამისად,  ყველა  მუნიციპალიტეტის  ვალდებულებაა,  2017 წლის დასასრულამდე შეიმუშაონ ნარჩენების  მართვის  5-წლიანი გეგმა,  რომელიც  უნდა  მოიცავ- დეს 2018–2022 წლებს.

ხარაგაული - უფასო სამედიცინო კონსულტაციები ქალბატონებისთვის

19–21  დეკემბერს  სარგვეშის ადმინისტრაციულ  ერთეულში, სოფლის  ამბულატორიაში  უფასო სამედიცინო აქცია იმართება.„მედ  ალფას“  გამოცდილი მეან-გენეკოლოგები,  ქეთევან გიორგაძე  და  ირინა  გოგიშვილი, უფასო  კონსულტაციებს  ჩაუტა რებენ ხარაგაულის მუნიციპალი- ტეტში  მცხოვრებ  ქალბატონებს, რომლებსაც  პროფილაქტიკური და ბაქტერიოლოგიური კვლევები ჩაუტარდება თ. კონსულტაციების შემდეგ,  საჭიროების  შემთხვევაში,  პაციენტები  კოლპოსკოპიურ გამოკვლევაზე გაიგზავნებიან. აქციაში  ჩართვა  შეუძლია ხარაგაულის  მუნიციპალიტეტში მცხოვრებ ნებისმიერ ქალბატონს.

დუშეთი - ბოდორნაში ”მწვანე” ჰესის მშენებლობა დაიწყო

დუშეთის  მუნიციპალიტეტის სოფელ  ბოდორნაში,  “ჯორჯიან უოთერ ენდ ფაუერის” ინიციატივით, ეკოლოგიურად სუფთა ჰესის მშენებლობა  დაიწყო.  ბოდორნა- ჰესის  ტერიტორიაზე  კომპანიის გენერალურმა დირექტორმა გიორგი ცხადაძემ და ქვეყნის პირველმა ვიცე-პრემიერმა დიმიტრი ქუმსიშვილმა  სიმბოლური  კაფსულა ჩააგდეს. ბოდორნაჰესის მშენებლობის-ვის “ჯორჯიან უოთერ ენდ ფაუ ერის”  მიერ  განხორციელებული ინვესტიციის  საერთო  მოცულობა  10  მლნ  ლარია.  ჰესი  შემდეგი წლის  შემოდგომაზე  ამუშავდება და საქართველოს ერთიანი ენერგოსისტემის განუყოფელი ნაწილი გახდება. მშენებარე ჰესის დადგმული სიმძლავრე 2,5 მგვტია, ხოლო საშუალო  წლიური  გამომუშავე ბა – 15  მლნ.კვტ/სთ.  ამასთანავე, მნიშვნელოვანია,  რომ  კომპანია “ჯორჯიან უოთერ ენდ ფაუერის”  სათავო  ნაგებობები  და  სატუმბი სადგურები  ელექტროენერგიით მუდმივად მომარაგდება, რაც თბი- ლისის უწყვეტი წყალმომარაგების კიდევ ერთი გარანტია იქნება.

ზუგდიდის ცენტრალური ბულვარის კეთილმოწყობა

ზუგდიდის მუნიციპალიტეტის მერმა ლაშა გოგიამ, ვიცე-მერ გია გულორდავასთან,  საკრებულოს თავმჯდომარე მამუკა წოწერიასთან  და  შესაბამისი  სამსახურის წარმომადგენლებთან  ერთად, ქალაქში  მიმდინარე  ინფრასტრუქტურული  სამუშაოები  დაათვალიერა. მერი ზუგდიდის ცენტრალურ ბულვარში მიმდინარე სამუშაოებს გაეცნო,  სადაც  ამ  ეტაპზე  სანიაღვრე  არხის  მოწყობა  და  გარე განათების მონტაჟი მიმდინარეობს. პროექტით  გათვალისწინებულია  მოაჯირებიანი  ხიდ-გადასასვლელების,  სარწყავი  სისტემისა და წყალსაწრეტის მოწყობა, ასევე  დეკორატიული  ქოთნების განთავსება.  შეიცვლება  სკამები და  სანაგვე  ურნები,  ბულვარის ტროტუარებზე შშმ პირთა დაუბრკოლებელი  მოძრაობისთვის მოეწყობა პანდუსები, განახლდება ბულვარის გამწვანება.

ფოთი - მალთაყვის ბულვარის მშენებლობის ახალი ეტაპი

მალთაყვის  სანაპირო  ზოლზე მშენებლობის  მეორე  ეტაპი  მიმდინარეობს.  სამუშაო  პროცესი ქალაქის  მერმა  გოჩა  კურდღელიამ  დაათვალიერა.  ბულვარის სიგრძე  გაიზრდება  800  მეტრით, მშენებლობის მეორე ეტაპზე იგეგმება  მიწისქვეშა  კომუნიკაციების მოწყობა,  მცირე  არქიტექტურული ფორმებისა და საყვავილეების, გარე  განათების  სისტემის  მონტაჟი.  პროექტი  საქართველოს რეგიონებში განსახორციელებელი პროექტების ფონდიდან ფინანსდება  და  მიმდინარე  წელს  2  მილიონ 780 ათასი ლარის სამუშაოები ხორციელდება.

სოფელ მარანში სანიაღვრე არხები იწმინდება
აბაშის  მუნიციპალიტეტის მერი  ლევან  მაკალათია  სოფელ მარანში სანიაღვრე არხის გაწმენდითი სამუშაოების მიმდინარეობას გაეცნო.  არხი  გზის  იმ  სამკილო- მეტრიან  მონაკვეთზე  მდებარეობს, რომელიც, ადგილობრივების თქმით, მარანჭალის ქვიშა-ხრეშის კარიერიდან მძიმეწონიანი თვითმცლელი სატვირთო ავტომანქანების ინტენსიური მოძრაობის გამო ზიანდება,  არხი  მიწით  ივსება  და იწვევს მიმდებარე საცხოვრებელი სახლების  ეზოების  დატბორვას. რამდენიმე დღის წინ, სოფელ მარნის მოსახლეობამ მერთან, ლევან მაკალათიასთან  შეხვედრისას, ქუჩაზე არსებული პრობლემებისა და სხვადასხვა სახის საჭიროების შესახებ  ისაუბრა.  მოქალაქეებმა ერთ-ერთ უპირველეს პრობლემად სანიაღვრე არხის რეაბილიტაცია- გაწმენდის  საჭიროება  დაასახელეს. სანიაღვრე არხის შესაბამისი ტექნიკით გაწმენდითი სამუშაოები აბაშის მუნიციპალიტეტის მერიის ორგანიზებით მიმდინარეობს.

სენაკის მუნიციპალიტეტის სრული გაზიფიცირება

სენაკის  მუნიციპალიტეტის სრული  გაზიფიცირება  მუნიციპალიტეტის  მერიის  საქმიანობის ერთ-ერთი  უმნიშვნელოვანესი პრიორიტეტია.  ამ  ეტაპზე  შპს “ალგეთი” თეკლათის, ახალსოფ- ლისა და ნოსირის ადმინისტრაცი- ულ ერთეულებში გაზიფიცირების სამუშაოებს ასრულებს. თეკლათსა და ახალსოფელში სამუშაო პროცესს გაეცნენ საქარ თველოს  პარლამენტის  წევრი, სენაკის  მაჟორიტარი  დეპუტატი ირაკლი ბერაია, სენაკის მუნიციპალიტეტის მერი ლევან კუპრეიშვილი და მერის პირველი მოადგილე გრიგოლ ბაღათურია.

წალენჯიხა - რეგიონული ჰაბის პრეზენტაცია

ასოციაცია „ათინათის“ ოფისში  „სამოქალაქო  საზოგადოების  განვითარების  ინიციატივის“  სამეგრელო-ზემო  სვანეთის რეგიონული  ჰაბის  პრეზენტაცია გაიმართა.  ღონისძიების  მიზანი რეგიონში ჰაბის ცნობადობის გაზრდა  და  დაინტერესებულ  მხარეებს შორის ეფექტიანი დიალოგის დაწყება იყო. პრეზენტაციას  ადგილობრივი თვითმმართველობების,  ბიზნესისა და არასამთავრობო სექტორის წარმომადგენლები ესწრებოდნენ. შეხვედრაზე  ისაუბრეს  ჰაბის როლსა და ფუნქციაზე, პროექტის სამომავლო გეგმებსა და იმ სავარაუდო  სარგებელზე,  რომელსაც რეგიონის  სამოქალაქო  საზოგადოება მიიღებს. პროექტი  ევროკავშირისა  და გერმანიის  ეკონომიკური  თანამშრომლობისა  და  განვითარების ფედერალურმა  სამინისტრომ დააფინანსა,  რომლის  ფარგლებ- ში განხორციელდება სხვადასხვა სახის  110-ზე  მეტი  აქტივობა  და გაიცემა 80-მდე გრანტი.

თაფლის გადამმუშავებელი ახალი საწარმო დმანისში

დმანისის  მუნიციპალიტეტის სოფელ  გომარეთში  თაფლის  გადამმუშავებელი  მცირე  კოოპერაციული საწარმო  გაიხსნა.  ახალგახსნილი საწარმო საერთაშორისო ორგანიზაციის „მოძრაობა შიმშილის წინააღმდეგ“ რეგიონალურმა დირექტორმა მარსელა მაქსფილდმა, დმანისის მუნიციპალიტე- ტის მერმა გიორგი ტატუაშვილმა და სასოფლო-სამეურნეო კოოპერატივების განვითარების სააგენტოს თავმჯდომა- რემ გიორგი მიშელაძემ დაათვალიერეს და  კოოპერატივ  „ქციის  მონასტრის“ წევრებს შეხვდნენ. „ქციის  მონასტერი“  2015  წელს დმანისის  მუნიციპალიტეტის  სოფელ გომარეთში  დაფუძნდა.  კოოპერატივში  გაერთიანდა  13  მეფუტკრე,  იმავე წელს  კოოპერატივს  სასოფლო-სამეურნეო კოოპერატივების განვითარების სააგენტოს  მიერ  მიენიჭა  სასოფლო- სამეუნეო  კოოპერატივის  სტატუსი. კოოპერატივმა  მოიპოვა  დაფინანსება სოფლის მეურნეობის და სოფლის განვითარების პროგრამის ( ENPARD )ფარგლებში  დაფინანსებული პროექტის – „სასოფლო-სამეურნეო კოოპერატივების განვითარების მხარდაჭერა საქართველოში“ – ფარგლებში, “ოქსფამ საქართველოსა” და საერთაშორისო ორგანიზაცია „მოძრაობა შიმშილის წინააღმდეგ“ მხარდაჭერით.

ბორჯომი - საბავშვო ბაღი დაბა წაღვერში

განახლებულ და სრულიად კეთილმოწყობილ  საბავშვო  ბაღებს  კიდევ ერთი ბაღი შეემატა. დაბა  წაღვერის  ახლად  რეაბილიტირებული  სკოლამდელი  აღზრდის დაწესებულება რიგით მეშვიდეა, რომელიც  ადგილობრივმა  მუნიციპალიტეტმა  ბოლო  3  წლის  განმავლობაში გაარემონტა. საბავშვო  ბაღი  ბორჯომის  მუნიციპალიტეტის  მერმა  ლევან  ლიპარტიამ,  კულტურის  სამსახურის  ხელმძღვანელმა მარინა ხუჯაძემ და სკოლამდელი  აღზრდის  დაწესებულების დირექტორმა  მანანა  ორჯონიკიძემ დაათვალიერეს. შენობაში  სრულად  გარემონტდა ოთახები, შეიღება კედლები და ჭერი, დაიგო  ლამინატისა  და  კერამიკული  ფილების იატაკი, მოწესრიგდა სველი წერტილები, საკანალიზაციო სისტემა, ელექტროგაყვანილობა, შეიღება შენობის ფასადი, სააღმზრდელო დაწესებულება აღიჭურვა თანამედროვე აუდიო და  ვიდეოაპარატურით,  სამზარეულო ტექნიკით,  ასევე  სპეციალური  გაზქურებით,  ოთახები  განახლდა  ასევე ავეჯით და მომარაგდა ყველა საჭირო ინვენტარით. მერის  განცხადებით,  საბავშვო ბაღების კეთილმოწყობა მომავალშიც ინტენსიურად გაგრძელდება. „სკოლამდელი აღზრდის დაწესებულებების რეაბილიტაცია და ბავშვებისთვის სათანადო, საერთაშორისო სტანდარტების გარემოს შექმნა ადგილობრივი მუნიციპალიტეტისთვის ერთ-ერთ მთავარ პრიორიტეტად რჩება მომავალ წელსაც“, – აღნიშნა მერმა. უახლოეს  მომავალში  გაიხსნება ტაძრისის საბავშვო ბაღი.

სამუშაო შეხვედრა ნინოწმინდის მერიაში

ნინოწმინდის  მუნიციპალიტეტის მერმა  ანივარდ  მოსოიანმა,  მოადგილეებთან  ალექსანდრ  მიქელაძესთან და  არტავაზდ  ტონოიანითან  ერთად, სამუშაო  შეხვედრა  გამართა  მუნიციპალიტეტის სამსახურებისა და განყოფილებების უფროსებთან. შეხვედრაზე მოისმინეს ინფორმაცია კვირის სამუშაო ანგარიშების შესახებ. მუნიციპალიტეტის მერმა ანივარდ მოსოიანმა სოფ. განძაში, ეფრემოვკაში, დიდ და პატარა ხანჩალში, უჩმანასა  და კატნატუში გარეგანათებისა და საბავშვო ბაღებში არსებულ პრობლემებზე და მათი გადაჭრის გზებზე ისაუბრა.

მოქალაქეთა შეხვედრები რუსთავის მერთან

ირაკლი ტაბაღუა ნიკოლოზ ბარათაშვილის  სახელობის  ადმინისტრაციული  ერთეულის  ტერიტორიაზე მცხოვრებ  რუსთაველებს  შეხვდა, მათ  პრობლემებს  გაეცნო  და  უფლებამოსილების ფარგლებში დახმარებას დაჰპირდა. შეხვედრას მერის მოადგილე გოჩა ლორია და საკრებულოში აღნიშნული ადმინისტრაციული ერთეულის მაჟორიტარი დეპუტატი რამაზ გოგობერიშვილიც დაესწრნენ.

გორი - სოციალური პროგრამის ახალი პროექტი

მერიაში  შექმნილმა  დროებითმა სამუშაო ჯგუფმა პროექტზე მუშაობა დაასრულა. „ადგილობრივი ბიუჯეტიდან სოციალური  დახმარების  გაცემის  ახალი წესის  პროექტი,  ამჟამად  ლიკვიდირებული  ქალაქ  გორისა  და  გორის მუნიციპალიტეტების  სოციალური პროგრამების საუკეთესო კომბინაციაა.  დოკუმენტი  მორგებულია  ადგილობრივი მოსახლეობის საჭიროებებს“, – აცხადებს  გორის  მუნიციპალიტეტის მერიის  ჯანდაცვისა  და  სოციალური უზრუნველყოფის სამსახურის უფროსი დავით ჩიხრაძე. სამუშაო ჯგუფს ერთი კვირის განმავლობაში  გორის  მერის  მოადგილე ეკატერინე  სუხიშვილი  ხელმძღვანელობდა. ჯგუფში მუშაობდნენ გორის მერიის სოციალური და ადმინისტარციული სამსახურების თანამშრომლები,  გორის მუნიციპალიტეტის საკრებულოს წევრები და მოწვეული სპეციალისტები. დოკუმენტი განსახილველად უახ-ოეს საკრებულოს სხდომას წარედგინება.



მეტის ნახვა
22-12-2017, 18:32


რომან რურუა, მსოფლიო ჩემპიონი
– პირველ რიგში, ახალ წელს მივულოცავ "საერთო გაზეთს", მთელ თქვენს შესანიშნავ კოლექტივს. მართლაც შეუპოვარი და პატრიოტი ადამიანები ხართ. სულ გამარჯვებით გევლოთ!

წარმატებები, წინსვლა, გაერთიანება, გაძლიერება, გამთლიანება მინდა ვუსურვო ჩვენს მრავალტანჯულ ქვეყანას. "აწმყო თუ არა გწყალობს, მომავალი შენიაო", უთხრა ილია ჭავჭავაძემ საქართველოს, მომავლებმა ცუდ დღეში ჩააგდეს ჩვენი ქვეყანა. გვიჭირს დღეს, მაგრამ იმედი უნდა ვიქონიოთ, რომ 2018 წელი საქართველოსთვის წარმატებების და ძლიერების წელი იქნება.

იხარეთ, მრავალჟამიერ! გილოცავთ წელს 2018!

მეტის ნახვა
22-12-2017, 13:13


„საერთო გაზეთის“ სტუმარია ეკონომისტი, სოხუმის სახელმწიფო უნივერსიტეტის პროფესორი იური პაპასქუა:

– ბატონო იური, სახელმწიფოს სიძლიერის ერთ-ერთი განმაპირობებელი, ალბათ, ქვეყნის სწორი საგადასახადო პოლიტიკაა. მოდით, საუბარი საგადასახადო კოდექსით დავიწყოთ, ამ კუთხით, რა პრობლემებია?

– კოდექსი რომ გვაქვს, ეს კარგია.
მოქმედი საგადასახადო კოდექსი რიგით მესამეა. წინამორბედებში დაუსრულებლივ შეჰქონდაც ცვლილებები და დამატებები. ყველა შემთხვევაში, ეს ცვლილებები არ იყო ორიენტირებული სრულყოფასა და გამარტივებაზე. ცვლილებების ნაწილი ცალკეული ლობისტური ჯგუფებისა და პოლიტიკოსების ახირებებს ითვალისწინებდა. ხშირი, გაუმართავი, გამკაცრებისკენ მიმართული, გადამხდელის ინტერესების საწინააღმდეგო ცვლილებები და დამატებები ქმნიდენ არასტაბილურ, ამასთან გადამხდელისთვის არახელსაყრელ გარემოს. ამ მხრივ, არც მოქმედი კოდექსია გამონაკლისი, თუმცა უნდა ვაღიაროთ, რომ ქართული საგადასახადო სისტემა მთელს პოსტსაბჭოთა სივრცესა და აღმოსავლეთ პარტნორობის წევრ ქვეყნებში ყველაზე საუკეთესოა. გადამხდელები ოფისიდან გაუსვლელად უკვე სარგებლობენ ელექტრონული დეკლარირებით, სასაქონლო ზედდებულებისა და ანგარიშ-ფაქტურების გამოწერა მთლიანად ელექტრონულია, საკასო აპარატების ფისკალური მეხსიერება მიერთებულია ერთიან ელექტრონულ ბაზასთან, საბაჟო ოპერაციები და დეკლარირებაც ელექტრონულად ხორციელდება, ნებისმიერი ნორმატიული აქტის კონსოლიდირებული ვერსია და სიტუაციური სახელმძღვანელო განთავსებულია შემოსავლების სამსახურის საიტზე და ნებისმიერ დროს ხელმისაწვდომია დაინტერესებული პირისთვის.

– გაძვირდა აქციზის გადასახადი, რაც ავტომატურად იწვევს ფასების ზრდას და ლარს კიდევ უფრო სავალალო მდგომარეობაში აგდებს. აქვე, საინტერესოა რამდენად მისაღებია ჩვენი ქვეყნისთვის მოგების დაბეგვრის ესტონური მოდელი?


– ერთი შეხედვით, აქციზის გაძვირება და „მოგების დაბეგვრის ესტონური მოდელი“, კავშირში არ უნდა იყოსო, შესაძლოა იფიქროს სხვამ, თუმცა თქვენ სწორად შენიშნეთ მათი ურთიერთდამოკიდებულება.
ის, რაც ჩვენთან დამკვიდრდა, ესტონური არაა. ესტონურისგან მხოლოდ განაწილებული მოგების დაბეგვრის იდეაა გადმოღებული. ესტონურ მოდელს მხოლოდ ესტონეთში, კონკრეტულ გარემოში, დროსა და ვითარებაში ქონდა წარმატება. ეს მოდელი სხვა არც ერთ ქვეყანაში არ გადაუღიათ, ევროკავშირმაც კი არ მიიღო და გავრცელება ვერ ჰპოვა. თეორიული გათვლებით, ამ მოდელს (ასე მას პირობითად შეიძლება ვუწოდოთ) კვლავწარმოების გაფართოების მოტივაცია გააჩნია. ვერ ვუარვყოფ, რაღაც ეტაპზე ეს ასეც მოხდება. მაგრამ მაშინ, როდესაც სამეწარმეო სუბიექტების 90%-ზე მეტი მიკრო, მცირე და საშუალო საწარმოა, მათ გაფართოებისთვის იმდენი რესურსი არ რჩებათ, რომ ეკონომიკას მატება მალე დაეტყოს.
მოგების გადასახადის ახალი მოდელის შემოღებით ბიუჯეტის შემოსავლებს არანაკლებ 500,0 მილ. ლარი აკლდება რამდენიმე წელიწადს მაინც. ეს მნიშვნელოვანი თანხაა, მით უფრო, ჩვენი ეკონომიკისთვის.

– რით ივსება ბიუჯეტი?


– ეს მართლაც საინტერესო საკითხია – რით ივსება, რისგან შედგება ბიუჯეტი?
ადრე, ბიუჯეტში ყველაზე დიდ ნაწილს გადასახადები შეადგენდა. დღეს, გადასახადები მთლიან შემოსავლებში იმდენი არაა, მათი ადგილი მოსაკრებლებმა, ჯარიმებმა, საურავებმა შეავსო. ნახეთ, რა წინააღმდეგობასთან გვაქვს საქმე: 2011 წელს პრეზიდენტმა გამოსცა ეკონომიკური დამოუკიდებლობის აქტი, რითაც ახალი გადასახადის დაწესების, მისი გაზრდის საკითხის გადაწყვეტა მხოლოდ რეფერენდუმით არის შესაძლებელი. არ ვიცი, ვის შეიძლება მოუვიდეს ასეთი აზრად, ხალხს შეეკითხოს: გინდათ ეს გადასახადი თუ არა, მოქნილია იგი თუ არა? რომელი გადამხდელი იტყვის, არიქა, გამიზარდეთ გადასახადი, მეტი მაქვს და არ მჭირდებაო. ამიტომაცაა, როცა ბიუჯეტს პრობლემები ექმნება, ყოველთვის არის ცდა მოსაკრებლები გაზარდონ. დღეს ბიუჯეტის შემოსავლების უფრო მეტი ნაწილი მოსაკრებლებია.

– გამოდის, რომ ბიუჯეტი მოსაკრებლებით ივსება. რატომ ხდება ასე?

– აბა, გადასახადები იმდენი არაა, ბიუჯეტს რომ ეყოს. ეკონომიკა არ იზრდება ან ნელა იზრდება. გადასახადების განაკვეთების გაზრდა ისედაც უკმაყოფილებას გამოიწვევს, ამასთან, ეს შესაძლებლობა შეზღუდულია ეკონომიკური დამოუკიდებლობის აქტით. ჯარიმების გადაუხდელობაზე საურავებს ვერ დააწესებ. ჯარიმებზე საურავები რომ დააწესო, წარმოგიდგენიათ რა მოხდება? – ასე მოსახლეობას სულ განადგურდება.

– ოპოზიცია მუდმივად გადასახადების შემცირებას ითხოვს. რას მოგვცემს ეს ყოველივე?

– სიმართლე გითხრათ, ჩვენთან საგადასახადო ტვირთი ერთ-ერთი ყველაზე ნორმალურია. იგი არც ყველაზე დაბალია და არც ძალიან მაღალი. მაგრამ პრობლემა სხვა რამ არის. ვინ იხდის გადასახადს? – კოდექსის მიხედვით გადასახადის გადამხდელი არის პირი, რომელიც შემოსავალს ღებულობს. ეს შეიძლება იყოს ფიზიკური ან იურიდიული პირი. სინამდვილეში, იურიდიული პირი არაფერს იხდის. არაპირდაპირი გადასახადები – დამატებული ღირებულების გადასახადი, აქციზი, იმპორტის გადასახადი მომხმარებლის გადასახადია, საწარმო, იურიდიული პირი აგენტის ფუნქციას ასრულებს მხოლოდ. პირდაპირ გადასახადებსაც (მოგებას, საშემოსავლოს, ქონების გადასახადს) სინანდვილეში მომხმარებელი იხდის. რა არის მოგების გადასახადი? ესაა გადასახადი სხვაობიდან შემოსავალს მინუს ხარჯები. ქონების გადასახადს ვინ იხდის? ქონების გადასახადი თვითღირებულებაში აისახება და შესაბამისად, როცა პროდუქციას ვყიდულობ, მომხმარებელი მას იხდის. რაც თვითღირებულებაში შედის, იმის გადამხდელი მხოლოდ და მხოლოდ მომხმარებელია. ასეა ამ გადასახადების რეალური ბუნება.

– ამდენი გადასახადი ზურგზე ღატაკ ადამიანებს აწევთ, ასე როგორ ავაშენოთ მდიდარი სახელმწიფო?

– უფრო რომ დავკონკრეტდეთ, რაზეც ახლა ვისაუბრე, ეს გადასახადი არ არის. გადასახადი არის ის, რაც კოდექსითაა გათვალისწინებული. ეს არც მოსაკრებელია. ჩვენ გვაქვს საერთო-სახელმწიფოებრივი და ადგილობრივი (ქონების) გადასახადი. სულ 6 გადასახადია დაწესებული: აქციზი, დამატებითი ღირებულების გადასახადი, მოგების, საშემოსავლო, იმპორტის და ქონების გადასახადი. ეს არის რასაც საგადასახადო კოდექსი არეგულირებს. სხვა მოსაკრებლებია სათამაშო ბიზნესიდან, მომსახურებიდან და საქმიანობიდან, ჯარიმებია, საურავებია. ბიუჯეტში გადასახადებს ბევრად სჭარბობს სხვა შემოსავლები. ეს ნიშნავს, ეკონომიკა არ ვითარდება. მოსახლეობაზე სახელმწიფო არ ზრუნავს. მომხმარებელი, მოსახლეობა ინახავს სახელმწიფოს და ბიუროკრატიას, რომელიც, პრაქტიკულად, არაფერს აკეთებს. ადრე, ძალიან საინტერესო საზოგადოებაში ვცხოვრობდით, სადაც სხვა რამ იყო პრივილეგია. ჩვენ ის მოვსპეთ, გავანადგურეთ. აღმოვჩნდით, სრულიად უცხო, დაუცველ გარემოში, სადაც დამოუკიდებლად თავი უნდა გაიტანო და სხვაც უნდა არჩინო. სოციალისტურ იდეალაბს მრავალჯერ დაუბრუნდება საზოგადოება. სანამ მთავარი საზრუნავი ადამიანი არ გახდება, საშველი არ მოვა.

– ბატონო იური, ბოლოს ინვესტიციებზეც მინდა გკითხოთ. მაგალითად, თურქეთმა ეკონომიკა სწორედ იმით გააძლიერა, რომ ინვესტორებს ბეგარა ხუთი წლით მოუხსნა. ჩვენთან როგორი საინვესტიციო გარემოა?

– ძალიან რთულ თემას შეეხეთ. იცით, როგორ განვითარდა სამხრეთ-კორეა? მან საოცარი რამ გააკეთა. როცა ქვეყნის თავები დაფიქრდნენ, მიხვდნენ, რომ არ ჰყავდათ სათანადო კადრები. გადაწყვიტეს კადრების კვალიფიკაცია აემაღლებინათ, თუ ადგილზე არ ჰყავდათ შესაბამისი სპეციალისტები, სასწავლებლად ევროპაში აგზავნიდნენ, ოღონდ, მიზნობრივად ასწავლიდნენ საჭირო სპეციალობებს. შედეგად, კორეა უცებ განვითარდა, დღეს, იგი, იაპონიის დონეზეა. თურქეთმა 80-იანი წლების დასაწყისიდან საოცარი რამ გააკეთა, მან ლიბერალური პოლიტიკა გაატარა, რამაც ბაზა შექმნა და მერე, ყველაფერი დალაგდა. ინვესტიციები უფაქიზესი თემაა. ვინც ევროპაში წავიდა და ისწავლა, მათი გაგებით, საქართველოსთვის, ინვესტიციები აუცილებელია. ბევრს წარმოუდგენია, რომ უცხოური ინვესტიცია ეს არის საქართველოს გადარჩენა, სინამდვილეში ასე არ არის. თუ განვიხილავთ იმ ინვესტიციების გენეზისს, რაც საქართველოში განხორციელდა, თუ როგორ დაიწყო, რა ხდებოდა, გაოცდებით. რა ინვესტიციაც მივიღეთ, უფრო მეტი საქართველოდან გავიდა. არცერთი პირველი ინვესტორი აქ, არ დარჩენილა. იმიტომ კი არა, რომ მას არასაინვესტიციო გარემო შეექმნა, არა! იგი სხვა მიზნით იყო აქ ჩამოსული. იყიდა იაფად, გაამსხვილა ადვილად და გაყიდა. ვიღაც ამბობდა: უცხოურ ინვესტიციაში ის კი არ უნდა დავინახოთ, რომ ვიღაცა ფულს დებს, ეს კულტურაც არისო, ჩვენ წარმოების კულტურას ვღებულობთო. უცხოური ინვესტიციის აკრძალვის მომხრე არ ვარ, მაგრამ უპირატესობა რომ მივანიჭოთ, სწორი არ იქნება. მავანი ამბობს: ბიუჯეტს ხომ უხდისო. რას უხდის? – მოგების გადასახადს არ გადაუხდის. უცხოური ინვესტორი თუ აქაური მუდმივი დაწესებულების სახით ჩამოყალიბდება, მასზე ის კანონი მოქმედებს, რაც გვაქვს. კონკრეტული ინვესტორი აქ ჩადებს ფულს, რათა დაიწყოს მუშაობა, მერე წარმოებას გააფართოვებს, მოგებას მიიღებს და რაღაც მომენტში უკან წაიღებს, თანაც აქ, თავის ხალხს ასაქმებს და ის შემოაქვს რაც სჭირდება. როცა ჩვენ იმპორტს ვზრდით, ბევრმა არ იცის ეს რას ნიშნავს, ჩვენ, ვმუშაობთ იაპონიაზე, ამერიკაზე, საფრანგეთზე, ანუ იმ ქვეყნებზე, საიდანაც ეს იმპორტი მოდის. ჩვენ მათ ქვეყნებს ვუწყობთ ხელს. როგორც იცით ვაჭრობის საერთაშორისო ორგანიზაციის წევრი გავხდით. უნდა ვიყოთ კიდეც, მაგრამ ეს სულაც არ ნიშნავს იმას, რომ ამ ორგანიზაციის გავლენის ქვეშ აღმოვჩნდეთ და ჩვენი არაფერი გავაკეთოთ. აუცილებლად უნდა შევცვალოთ იმპორტისა და ექსპორტის თანაფარდობა. თუ ეს არ შეიცვლება, ჩვენი ვალუტა არასოდეს არ იქნება მყარი და ა.შ. კარის გაღება იმპორტისათვის სულაც არ ნიშნავს იმას, რომ წინააღმდეგობა არ გაუწიოთ და ჩვენი არ შევქმნა თ. პირიქით, ისეთი პოლიტიკა უნდა ვაწარმოოთ, რომ აქ შეიქმნას უფრო მეტი და ფასეული და მაშინ გვეშველება. თავის დროზე, აქ, უცხოური ინვესტიცია იყო წახალისებული. დღეს, ეს მიდგომა შეიცვალა, ადგილობრივთან გათანაბრდა, მაგრამ ჩვენ, მაინც უცხოურ ინვესტიციას გავიძახით. ვინმეს მართლა ჰგონია, რომ ეს უცხოური ინვესტიციაა და სხვა ვინმე მოდის? – არავინ დაიჯეროს, ეს ტყუილია. ეს არის აქ შექმნილი ფული, ოფშორში დარეზერვებული და იქედან ისევ აქ შემოსული. ამისგან უნდა გავთავისუფლდეთ.

თამარ შველიძე

მეტის ნახვა
19-12-2017, 17:11


მარიხუანას მოხმარებისთვის, როგორც კანონით განმარტავენ, პირადი მოხმარებისთვის, სასჯელი გაუქმდა, თუმცა, ეს არ ნიშნავს ლეგალიზაციას, ეს არ ნიშნავს, რომ არ ისჯება პლანტაციების გაშენება, გაყიდვა, ყიდვა, დიდი დოზით შენახვა – ეს არ ნიშნავს იმას, რომ მარიხუანა ნარკოტიკი არ არისო…
ანუ, მარიხუანა ნარკოტიკია, მაგრამ თუ პირადი მოხმარებისთვის გინდათ, ანუ, თუ პირადად თქვენ გინდათ დაშტერება, ბაზარი არ არის, დაშტრედით, დაშტრედითო – გვითხრეს…

ეო, ჯაფარიძემ, მარტო ჩვენ რა პონტში დავშტერდეთო, სხვები ფხიზელი თვალით რომ გვიყურებენ – გვიტყდებაო, სხვებიც რომ არ ეწევიან – მარტონი ცუდად ვკაიფობთო, მანამდე არ მოვისმევენებთ, მანამდე არ ჩავაგებთ ხმლებს ქარქაშებში – სანამ ყველა არ მოწევთ, სანამ ყველა არ დაშტერდებითო…
ყველამ საკუთარი შვილების დაშტერებით, რომ დავიწყოთ, ბატონო ზურაბ?
შვილო, ზურაბ, სადამდე?

სადამდე უნდა იჯდე, შვილო ზურაბ, ნეხვში, სადამდე? იმ ქვეყანას რა ვუთხარი, სადაც თქვენნაირ ჭკვიან ადამიანს პლანის ლეგალიზაციისთვის უწევს ბრძოლა მომხრეების შესაძენად, იმ მთავრობას რა ვუთხარი – თქვენ რომ ისე დაგიტოვათ საქმე, რომ დაბოლილების გარდა ამომრჩეველი არა გყავთ…
თქვენი მოსაწონი ისე არც არავინ დარჩა – ნაციონალები იყვნენ და ჯერ ადიდეთ, მერე ლანძღეთ… საკუთარი პარტია სცადეთ – არ გაამართლა ეკონომიკაზე საუბრებმა, ფინანსებზე საუბრებმა, მერე წყალწაღებულმა მეორე წყალწაღებული იპოვნეთ და ბურჭულაძეს დაუკავშირეთ ბედკრული ბედი… კიდევ კარგი, ბურჭულაძემ თქვენც გადაგაგდოთ, თორემ ვის დააბრალებდით თქვენს პოლიტიკურ კრახს…
და მაშინ დაიწყეთ ძებნა – რა ველი იყო დაუკავებელი, ვისი უფლებების დაცვა იქნებოდა მომგებიანი… ლესბო და გეი სასტავი დაკავებული დაგხვდათ – ნარკოტიკის დამცველი რაინდის ადგილი ცარიელი…

ვაღიაროთ, ჭკუა ხომ სჭირდება იმის მოფიქრებას, რომ დაბოლილები საკმაოდ დიდი ძალაა საქართველოში?
ხოდა, ბოლო აქციაზე პირადი მოხმარებისთვის კანონით უკვე არადასჯადი დაბოლილები თამამად გამოეფინენ და ხმა ამოიდგა ჯაფარიძემ…
ერთკაციან პარტიებს ორი ძმაკაცი რომ მოგყვებათ აქციაზე და ყველა აქციის ორგანიზება ექვსნიშნა ციფრი გიჯდებათ – აბა, მიყურეთ, აბა, შემომხედეთო…
ჯერ ერთი, შვილო ზურაბ, დიდი ხანია ორი ძმაკაცის იქეთ კიდევ ვინმე დაგტრიალდებს თავს? და მეორეც, ნეხვი ყოველთვის უფასო იყო და რაღა ახლა დაედებოდა ექვსნიშნა ციფრის ფასი?

ნეტა რამდენი ნერგი მარიხუანა დაგიჯდა აქცია, შვილო ზურაბ?
იმ ზურაბმა ციხე მაინც ააშენა, იმის სიცოცხლემ ლეგენდა მაინც დატოვა – რა ტყუილად იღუპავ თავს, რა ტყულად ისუნთქავ ნარკოტიკს, რა ტყუილად ზიხარ ნეხვში…

ან რა მოწიე ეგეთი, ფეისბუქზე რომ დაგიწერია, ვისაც ჩემი აქცია არ მოეწონება დიდი ადგილი გაანთავისუფლა მთაწმინდაზე ხანძარმა და დაუყევით რივოკითო… ფრაზის დაბოლოების ერთი ადგილი მაინც გქონდეს, შვილო ზურაბ…
ჯერ ერთი, კი არ გაათავისუფლა ხანძარმა ადგილი, გადაწვა, შვილო ზურაბ, ტყე გადაწყვა და დაბოლილი რომ არ ყოფილიყავი, ჩემსავით საკუთარი თვალით ნახავდი, როგორ მართლა სიცოცხლის ფასად ჩააქრეს მეხანძრეებმა… მეორეც, ზუსტად იმიტომ გაათავისუფლა ის ადგილები ხანძარმა, ნუ, როგორც ამბობ, რომ იქედან დავეშვეთ და იქედანაც ზუსტად იმიტომ უნდა დავეშვეთ, თურმე, შენ რომ დაგასკდეთ… მანამდე არაფერი ჭამო კი არადა, მანამდე არაფერი მოწიო, შვილო ზურაბ, დასკდომასაც დამსახურება უნდა… ზუსტად იმიტომ გამოვექანები ახლა ჩემი გადამწვარი მთაწმინდიდან, რომ ნეხვში მოვადინო ზღართანი…

ხო, არ მომეწონა და მაქვს მგონი ჩემი კონსტიტუციური და მორალური უფლება არ მომწონდეს რაღაცეები და ვთქვა საკუთარი აზრი… ამიტომ ასე უნდა მიპასუხო?? კაცს პოლიტიკოსად მოგაქვს თავი, უკვე ორ ძმაკაცზე მეტიც გიდგას გვერდით და ის ორძმაკაციანი დრო აღარ გახსოვს, კაცს პოლიტიკოსად მოგაქვს თავი და პლანის გარდა არაფერზე საუბრობ – მაინც არ გეძახი ნარკომანს, კაცს პოლიტიკოსად მოგაქვს თავი და ოფისში პლანის პლანტაციას აშენებ – მაინც არ გეძახი ბარიგას და ახლა თავზეც კი არ უნდა მიყო, ყველაფერს აქვს საზღავრი.
როგორ მითხრეს, რა დროს მარიხუანააო…
რა სინდისით გითხრეს, შვილო ზურაბ?

ბევრჯერ დაგინდე, შვილო ზურაბ, ბევრჯერ არ ვთქვი სათქმელი ბოლომდე, რადგან, ვიცი ჭკვიანი ხარ, ვიცი ეკონომიკისა და ფინანსურ სამინისტროის გამოადგებოდა ჩემს ქვეყანაში შენნაირი კაცი, ვიცი რომ კარგი ადამიანიც ხარ და ოჯახსაც ტრადიციულად მიჰყვები და მიგყავს…
მაგრამ ნეხვს თავზე მაყრი და გადავაქოთე ძველი წიგნები და რეცეპტები და ვერსად ვიპოვნე ნეხვი თმებს უხდებოდეს და ნეხვის სუნი ბუზის გარდა ვინმეს იზიდავდეს, თორემ, ახლაც გავჩუმდებოდი…
ხოდა, რა დროს მარიხუანაა, როგორ აპირებ მარიხუანის გაკონტროლებას – როცა ჩემი სახლის წინ 15 წლის მოზარდები ფსიქოტროპული წამლებით იჭყიპებიან?

რა დროს მარიხუანაა, როცა ეკლესიას თავზე გვანგრეენ და გკიდია, იმიტომ რომ დაბოლილების გარდა სხვა ამომრჩეველი ვერ დააინტერესე?
რა დროს მარიხუანაა, როცა ამდენი კარგი იდეა და პროექტი გაქვს, მაგრამ იმხელა ამბიცია, რომ არავისთვის გინდა გაზიარება, არავისთვის გემეტება, ერთი მოკავშირეც ვერ იპოვნე, ხო ვერც ის ექვსნიშნა ფიცრის ინვესტიცია მოიპოვე და ამიტომ რაზეც ხელი მიგიწვდა, იმას დასჯერდი? რატომ, მარიხუანას არც ინვესტორი უნდა, არც მეკავშირე, ხო? მხოლოდ დაბოლილები და ზურაბა…

რა დროს მარიხუანაა, როცა მოზარდები ისევ ქუჩებში გადიან, როცა მოზარდების დედები საზღვარგარეთ მიდიან, რათა უპატრონონ რომელიმე ნარკომან მოხუცს, რომელმაც ახალგაზრდობაში იმდენი მოწია და გაიკეთა, ახლა ისიც აღარ ახსოვს, როდის უნდა ჭამოს და როდის უნდა მოისაქმოს…
რა დროს მარიხუანაა, როცა ქვეყანაში ასე ღიად, ასე დაუფარავად მიდის ტრადიციული ორიენტაციის დევნა და სექსუალური უმცირესობის პროპაგანდა?
სხვათა შორის, მე თქვენ გკითხეთ ერთხელ, თქვენი ოჯახის წევრები როგორ გინდათ რომ ცხოვრობდნენ და გინდათ თუ არა, რომ ეწეოდნენ-თქო და მაშინ არ დავბეჭდე თქვენი პასუხი, არჩევნები იყო კარზე მომდგარი და დაგინდეთ, არჩევნები იყო კარზე მომდგარი და გულწრფელად მინდოდა გაგემარჯვათ, იმდენი ბევრი კარგი პროექტი გქონდათ…

ხოდა, ახლა გიწვევთ, გამოიყვანეთ თქვენი ოჯახის წევრები, მოდით, ერთი კვირის მანძილზე დღეში სამჯერ მოვაწევინოთ მარიხუანა და დავაკვირდეთ – რამდენად ადეკვატურები იქნებიან, შეძლებენ თუ არა სწავლას, მუშაობას, მანქანის ტარებას, ურთიერთობებს, მეხსიერების ჩავარდნები პროცენტულად როგორ ექნებათ, რამდენად ხშირად იქნებიან გაღიზიანებულნი, განერვიულებულნი… თუ თანახმა იქნებით და თუ ამ ერთკვირიანი მარათონისთვის გამოიყვანთ თქვენს ოჯახს – ჩავთვლი რომ გულწრფელად გწამთ იმის, რასაც აკეთებთ, თორემ, ასე, სხვისი შვილების, სხვისი ქმრების, სხვისი ძმების, სხვისი მამების, სხვისი ცოლების, სხვისი დედების, სხვისი შვილების ხარჯზე მარიხუანასაც გაამართლებთ და ციანიდსაც…
ოჯახი რატომ გარიეო, ვინც იფიქრებს და მეტყვის, რატომ, ბატონი ზურაბი ევროპული ყაიდის პოლიტიკოსობას ხომ იბრალებს და ევროპაში და ამერიკაში აპრობირებული მეთოდია, როცა პოლიტიკოსი ასე ღიად ლობირებს რაიმეს, აუცილებლად აჩვენებს ამომრჩეველს, რომ თავად და მისი ოჯახიც ამის მომხმარებელია, ასე რომ… დავკვალიანდეთ, ამერიკული ყაიდის პოლიტიკოსი ვართ თუ კომუნისტური პოლიტიკის – სამსახურში აღდგომა დღეს ხელებს რომ უმოწმებდნენ თანამშრომლებს, წითელი კვერცხის კვალი ხომ არ ატყვიათო და სახლში პასკას ჯვარს გადადაწერდნენ და სანთელს ჩუმად ანთებდნენ… მე მაინც მგონია, რომ ზუსტად ასეთი კომუნისტური, ორმაგი მორალის პოლიტიკოსი ხართ და თუ დამიმტკიცებთ საწინააღმდეგოს, მთაწმინდიდან გამოქანების რა გითხრათ, მაგრამ საჩვენებლ თითს მოვკაკვავ…

და ბოლოს – ზოგჯერ შუაღამისას, როცა ძილი მიფრთხება, როცა ეგოიზმი და ამბიცია ზენიტში ადის – მეც ვფიქრობ ხოლმე, რომ ჩემი ადგილი სადღაც ზემოთაა, სადღაც პარლამენტში, მინისტრად, პრეზიდენტად, რატომაც არა… ვფიქრობ, რომ არავისზე ნაკლები იდეები არ მაწუხებს და იმ მომენტში მეც მგონია, რომ სხვებზე უკეთ გავაკეთებ საქმეს… მაგრამ, პარლამენტში მოსახვედრად, არც ბოზობა დამიწყია, არც ნარკომანობა, არც აფერისტებს ჩავხუტებივარ, არც აფერისტობა დამიწყია, არც ნეხვში ჩავმხტარვარ, არც არავინ მომიტყუებია, სახლში აღდგომას კვერცხსაც ვღებავ და ნააღდგომებს წითელი თითების გამოჩენისაც არ მრცხვენია, როცა რამეს ვამბობ და ვაკეთებ, სულ იმას ვფიქრობ, საკუთარი ოჯახისთვისაც ხომ იგივეს ვიტყოდი და გავაკეთებდი…
ამიტომ დამყვება მე ორიოდე მეგობარი და თქვენ დაბოლილების არმია…

თამო კეშელავა

მეტის ნახვა
19-12-2017, 17:07


გვესაუბრება მწერალი მერაბ შათირიშვილი

– ბატონო მერაბ, რამდენადაც ვიცით, თქვენ საეკლესიო წრეებთან დაახლოებული ბრძანდებით. რას იტყვით, რა კრიტერიუმით გამოარჩია პატრიარქმა თანამოსაყდრედ მეუფე შიო?

– პირველ რიგში, აღვნიშნავ იმას, რომ მეუფე შიო არ მიეკუთვნება არც ერთ საეკლესიო დაჯგუფებას…

– რას ამბობთ, საპატრიარქოში დაჯგუფებები და კლანებია? ვინ და რატომ შექმნა ეს დაჯგუფებები?

– დიახ, ბატონო, არის კლანები. ახლა კონკრეტული პირების დასახელებისგან თავს შევიკავებ, მაგრამ ვიტყვი იმას, რომ ეს კლანები ერთმანეთთან მკვეთრად არიან დაპირისპირებული, თუმცა საჭიროების შემთხვევაში, ერთიანდებიან და ხან პატრიარქს უტევენ, ხან მის რჩეულს. არაა გამორიცხული, მეუფე შიოს რაიმე მოუწყონ. ის რისკისა და საფრთხის წინაშე დგას.
ხაზგასმით აღვნიშნავ, რომ მეუფე არის უპატიოსნესი ადამიანი.

— თქვენ ამბობთ, რომ საპატრიარქოს მართავენ კლანები. თუ ასეა, უპატიოსნესი მეუფე როგორ აღზევდა?

– აქ იმ ღვთიურმა ფორმულირებამ გაიმარჯვა, რომელიც გულისხმობს: უკანანი წინ აღმოჩნდებიანო. მეუფე შიო უპრეტენზიოდ, ჩრდილში მოღვაწეობდა, მაგრამ ჩრდილში დგომა არ ნიშნავს იმას, რომ უფალი ვერ გხედავს.
"ციანიდის საქმემ" იმის პროვოცირება და ილუსტრირება მოახდინა, რაც სინამდვილეში ხდება ეკლესიაში.
უწმიდესისთვის მძიმედ წარმოსადგენია ის, რომ ვინმეს მისი ან რომელიმე საეკლესიო იერარქის მოწამვლა უნდოდა, მაგრამ უფრო მძიმე არის ის, რომ მავანი დამნაშავე, რომელიც იგივე მისი შვილია, საპატიმროში იმყოფება. მას ყველა უყვარს, არავის დასჯა არ უხარია. სამწუხაროდ, "ციანიდის საქმის" გამომჟღავნებით ნათელი მოეფინა იმას, რომ საპატრიარქოში არიან ადამიანები, რომლებიც საფრთხეს უქმნიან პატრიარქის სიცოცხლეს, იბრძვიან კვერთხისთვის, პატრიარქობისთვის.
ჩემი აზრით, ამ ამბავმა უკარნახა უწმიდესს, თავის სიცოცხლეში დაესახელებინა თანამოსაყდრე და გადაერჩინა ქართული ეკლესია. ეს იშვიათი და მისასალმებელი პრეცედენტია.
მისი გადაწყვეტილება, ფაქტობრივად, უფლის მიერ ნაკარნახევია და ამას ვერც ვერავინ შეეწინააღმდეგება აშკარად, თუმცა წინააღმდეგობის სხვა ხერხი გამონახეს.

– კერძოდ?

– სინოდის წევრთა ერთი ჯგუფი გაემგზავრა ამერიკაში. ქართული მართლმადიდებელი ეკლესიის უმაღლესი სამღვდელო პირები, კერძოდ, ჩემდა გასაოცრად, მეუფე იაკობი (იაკობიშვილი), რომელიც ლგბტ საზოგადოების წინააღმდეგ გამოდიოდა, იმ მღვდელთმთავრებს ჩაუდგა სათავეში, რომლებიც თეთრ სახლში გაემგზავრნენ ამერიკელ პოლიტიკოსებთან შესახვედრად და სათათბიროდ. მოგეხსენებათ, ამერიკელ პოლიტიკოსთა უმრავლესობა მხარს უჭერს და ფინანსურად აძლიერებს არამართლმადიდებლურ იდეოლოგიებს, ლგბტ საზოგადოებებს.
ახლა მე ვსვამ კითხვას: კერძოდ, მეუფე იაკობი (იაკობიშვილი) დღესაც წინააღმდეგია ლგბტ საზოგადოების თუ აღარა?
ძალიან მაინტერესებს ის მეუფეები, რომლებმაც განაცხადეს, რომ აშშ-ი მართლმადიდებლობის გადამრჩენელია, ხოლო რუსეთი არის აგრესორიო, ადრეც ასე ფიქრობდნენ თუ ახლა შეიცვალეს პოზიცია?
ვეთანხმები, რუსეთი არის აგრესორი, მაგრამ მიჩნდება ეჭვი, რომ ამერიკაში ნამყოფი მეუფეები ერთსქესიანთა ქორწინების წინააღმდეგ აღარ ან ვეღარ წავლენ.

– ოპონენტები გვეტყვიან, რომ ძალიან რადიკალურად ვმსჯელობთ და ამერიკა მართლმადიდებლობის წინააღმდეგი არ არის.

– ამერიკა მართლმადიდებელი ქვეყანა არაა, ჩემო კარგო, ხოლო ეს ვიზიტი აშშ-ში კიდევ ერთი დასტურია იმისა, თუ როგორ აფუთფუთდა, ამჯერად, მეორედ საპატრიარქო. მეუფე შიოს დასახელება `ციანიდის საქმის~ შემდეგ მეორე მაპროვოცირებელი ფაქტორი იყო. ამას ღიად ვეღარ შეეწინააღმდეგნენ პატრიარქობის მსურველთა ჯგუფები და ამ პოლიტიკური ნაბიჯით გამოხატეს წინააღმდეგობა. ამ ნაბიჯით უთხრეს ხელისუფლებას, ეკლესიაში ჩვენ ვართ პროდასავლური პოლიტიკის მხარდამჭერები და იქნებ ჩვენს შორის აარჩიოთ ვინმე პატრიარქობის ტახტისთვისო.

– კი, მაგრამ, პატრიარქს ხელისუფლება ირჩევს?

– ყველას გვახსოვს, ზოგ მეუფეს თავთან პრეზიდენტის ფოტო ეკიდა, ზოგი დღემდე ძველზე ლოცულობს, ზოგი ახლის მეხოტბეა. მგონი, ხვდებით, რას ნიშნავს ეს. ყველას სურს პრივილეგია და კომპენსაციები `ძლიერთა ამა ქვეყნისათაგან~. ამას ჰქვია სახელად ანგარება. რაც ცოდვაა მართლმადიდებლური რწმენის მიხედვით.
მეუფე შიოს თანამოსაყდრედ გამოცხდებამ თვალწინ წამომიყენ ლეო ტაქსილის ვატიკანისებური საშიში ტენდენციები ტახტისთვის ბრძოლაში…
90-იანი წლებიდან, რაც ქვეყანამ დამოუკიდებლობა და თავისუფლება მოიპოვა, ეკლესია გაივსო მკვლელებით, ნარკომანებით, ყოფილი `მხედრიონელებით~ და გვარდიელებით.

– ბატონო მერაბ, როგორ აღწევდნენ ეს ადამიანები ეკლესიის წიაღში? საპატრიარქოს და პატრიარქის გარეშე ხდებოდნენ ისინი საეკლესიო პირები და შემდეგ უმაღლესი იერარქები?


– როდესაც სახელმწიფო ვერ არეგულირებს შავბნელი იდეოლოგიის ადამიანების შესვლას ეკლესიაში, ვაწყდებით ასეთ პრობლემებს.

– სახელმწიფო რა შუაშია?


– სახელმწიფო ყველაფერს განაგებს.
მაგრამ თქვენ გინდათ, ალბათ, უწმიდესის პასუხისმგებლობა გამოკვეთოთ. მე გეტყვით, უწმიდესი თავისუფლების სახელით მოსულ ამ ტალღას ვერ შეაჩერებდა, დიახ, რამდენიმეჯერ ნასამართლევი ხალხი მოხვდა ეკლესიაში…
კი, ბატონო, სავლე პავლედ იქცა, მაგრამ წარსულისგან მოწყვეტა უნდა დაგვანახონ. ყველამ უნდა დაინახოს, რომ ფერი იცვალეს, მაგრამ მე ვხედავ, რომ კვლავ სავლეებითაა სავსე ეკლესია და ფერის ცვალება მათ არც კი შეხებიათ.
როგორც კი არასამთავრობოებმა დაიწყეს ყაყანი, მეუფე შიოს რუსეთში აქვს საეკლესიო განათლება მიღებულიო, მაშინვე წავიდნენ მეუფე იაკობის მეთაურობით მღვდელმთავრები ამერიკაში — ქართული ეკლესიის საჭეთმპყრობელი არ შეიძლება იყოს რუსული განათლების მქონე კაცი, იმ ქვეყანაში, რომელსაც კონსტიტუციაში ევროატლანტიკური კურსის ერთგულება უწერიაო და უგალობეს თეთრ სახლში იმ იდეოლოგიას, რომელსაც ტაბურეტკებით ებრძოდნენ არცთუ ისე დიდი ხნის წინათ.
ხედავთ, როგორ ყველაფერზე მიდიან?
ახლა თანდათან ვრწმუნდები, რომ "ციანიდის საქმეში" ბევრი რეალობაა. უნდა ვთქვა, რომ ამერიკული ვოიაჟი "ციანიდის საქმეზე" ნაკლები არაფრით არაა. გამომჟღავნდა ეს ხალხი — დასავლური გარყვნილი იდეოლოგიის ტაშის დამკვრელები გვყოლია ეკლესიაში და არ გვცოდნია.
ამერიკა მართლმადიდებლობის გადამრჩენელიაო.
როგორ არის მართლმადიდებლობის გადამრჩენელი, როცა ქრისტიანული სარწმუნოების პირდაპირი მტერი სექტები აშშ-ში იშვა და იქიდან ფინანსდება?
ეს ფარისეველი სავლეები ისე არიან ვატიკანიზმით დაავადებული, რომ ყველაფერზე მიდიან.
ქართულ ეკლესიას დღეს განწმენდის აუცილებლობა უდგას. შიგნიდან უნდა მოხდეს ეს განწმენდა და საზოგადოებამაც უნდა ამოიღოს ხმა.
სიმართლის თქმა უნდა ვისწავლოთ, არ უნდა შეგვეშინოს ამ სიმართლის ხმამაღლა გამომჟღავნების. ვიდრე ხმამაღლა მხილებას არ დავიწყებთ, არც საზოგადოებაში დაიწყება გაჯანსაღება, არც ეკლესიაში და ჩვენს ქვეყანასაც არ ეშველება არაფერი.

ირანდა კალანდაძე

მეტის ნახვა
19-12-2017, 16:55