სარეკლამო ადგილი

947x125



გვესაუბრება ყოფილი პარლამენტარი, უფლებადამცველი დიმიტრი ლორთქიფანიძე:

ბატონო დიმა, ამერიკის წინა პრეზიდენტები უპირობოდ უჭერდნენ მხარს საქართველოს ნატოში გაწევრიანებას. აქვე, უპირობოდ, გვბლოკავდა გერმანია, საფრანგეთი. ტრამპმა კი განაცხადა, რომ საქართველოს ადგილი ნატოში არ არის. ჩვენ, მაინც ჯიუტად გავიძახით: ნატოში შევდივართო. რისი მანიშნებელია ყოველივე?

ძალიან კორექტულად და ამომწურავად დასმული კითხვაა. ტრამპის განცხადებები, მისი პრეზიდენტობის დღიდან დღემდე, ცალკე კვლევის საგანია, რაც თავისი ღრმა შინაარსითა და რეალური პოლიტიკის კომპონენტების გათვალისწინებით, ნამდვილად, დიდ ყურადღებას და მაღალ შეფასებას იმსახურებს. ტრამპი არ არის ტიპიური პრეზიდენტი ტიპიურ გარემოში, როგორსაც ჩვენ, მაგალითად, დემოკრატთა მმართველობის ობამასა და კლინტონის დროს მოვიაზრებთ, არამედ ეს არის პრაგმატიკოსი პოლიტიკოსი, რომელიც პირველ რიგში, აშშ-ს ნაციონალური ინტერესებიდან გამოდის. მან გააკეთა განცხადებები მექსიკასთან მაღალი გალავნის აშენების ინიციატივით დაწყებული დამთავრებული ჩინეთთან, ევროკავშირთან პრეფერენცირებული ვაჭრობის საკითხების გადახედვით და ძალიან ბევრი წარმოების აშშ-ში გადმოტანის პირობის დადებით, რაც საბოლოო ჯამში, ტრამპის წარმატების გარანტორი გახდა.

თუმცა, ამასთან ერთად, ტრამპის საარჩევნო კამპანიას ყოველთვის ლაიტმოტივად გასდევდა ფრაზები რუსეთის ფედერაციასთან ახალი ურთიერთობის დაწყების პირობის შესახებ. ამიტომ, ტრამპი როგორც კრემლის მიმართ ლოიალური პოლიტიკის გამტარებელი პრეზიდენტი ისე შერაცხეს, რომელიც პუტინის და ზოგადად, კრემლის გავლენის ქვეშ ექცევა, რაც საბოლოო ჯამში, აშშ-ს დაზვერვამ გამოძიებებით დაადასტურა თითქოს, ტრამპის საარჩევნო კამპანიაში და მის წარმატებაში წვლილი ვლადიმერ პუტინს მიუძღვის. ეს არის ერთ-ერთი მთავარი ბრალდება, რომელსაც დღეს პრეზიდენტ ტრამპის ადმინისტრაცია, ხშირ შემთხვევაში, იგერიებს ფეიკ-ნიუსის მწარმოებელი მედია-საშუალებების მხრიდან. აშშ-მ კარგად უწყის, რომ დღეს, მსოფლიო ერთპოლარული აღარ არის და რუსეთის ფედერაციას, ჩინეთს მსოფლიოში თავიანთი ინტერესები გააჩნიათ. ამ თვალსაზრისით, სირიაში განვითარებული კონფლიქტი, მასში რუსეთის მონაწილეობის პოზიტიური მხარეები განმსაზღვრელი იყო იმისა, თუ რაოდენ დიდია ამ ქვეყნის ინტერესები მის ფარგლებს გარეთ და რა რეგიონებს მოიცავს.

აღმოჩნდა, რომ სირია არის შორეული ბუფერი, რომელზეც პოზიციების დათმობას რუსეთი არ გეგმავს და ახლო მომავალში არც აპირებს ამ საკითხს გადახედოს. ჩნდება კითხვა: თუ სირია და ახლო აღმოსავლეთი რუსეთის ინტერესებისთვის შორეული ბუფერია, ახლო ბუფერი სად არის? ყველასთვის კარგად და გასაგებად ჩანს, რომ ახლო ბუფერი ეს არის მთლიანად კავკასიის რეგიონი. ამ შემთხვევაში, ამიერკავკასიაზე არ გავამახვილებ ყურადღებას იმიტომ, რომ 90-იანი წლებიდან დაწყებული ჩრდილოეთ-კავკასიაში არსებული საომარი მდგომარეობა და ამ ომის ვითარების დასტაბილურება პუტინის ადმინისტრაციისთვის ერთ-ერთი, დიდი პოლიტიკური ამოცანა იყო. მას შემდეგ რაც იქ მშვიდობამ დაისადგურა, ბუნებრივია, რუსეთის ფედერაციის მხრიდან, კავკასია როგორც ერთი მთლიანი ინტერესის სფერო ისე განიხილება. ეს კარგია თუ ცუდი, ფაქტია, რომელსაც ჩვენ სამწუხაროდ, თვალს არ ვუსწორებთ. რატომღაც, ეს დაჩემებული ნატო, ნატოს ძახილი, საბოლოოდ, იმ ბალმასკარადამდე მივიდა, რომ უკვე პუტინი კი არა ტრამპიც გვეუბნება: ნატოში საქართველოს ადგილი არ არისო.

ჩვენ, მაინც არ გვინდა ამ რეალობას შევეგუოთ და როგორც თავის დროზე უსუფაშვილი აცხადებდა: უნდა ვაკაკუნებდეთ და ნატოში შესვლას ვითხოვდეთო, ეს კაკუნი კოდალას კაკუნად გადაგვექცა, რომელიც ფუტურო ხეს უკაკუნებს, იცის, რომ იქ ჭიაყელა აღარ არის, მაგრამ მაინც უკაკუნებს იმიტომ, რომ ეს მისი ერთგვარი პირობითი რეფლექსია. დიახ, ნატოს კარზე კაკუნი პირობით რეფლექსებში გადაგვეზარდა. საქართველოს რეალური პოლიტიკით დაკავების ნაცვლად, მაამებლური პოლიტიკის წარმოება ხდება მხოლოდ იმისთვის, რომ ისეთმა მარიონეტებმა, რომლებიც დღეს, სამწუხაროდ, საგარეო უწყებაში გვყავს დაშტამპული, მკვდრადშობილი განცხადებები აკეთონ. ორიოდ დღის წინ ტრამპის ადმინისტრაციამ ოფიციალური წინადადება გაუკეთა რუსეთის პრეზიდენტს, რომ შემდგომი მაღალი დონის შეხვედრა შემოდგომაზე, აშშ-ს მასპინძლობით, ვაშინგტონში წარიმართოს. იქნება თუ არა დღის წესრიგში უკრაინა, საქართველო, მოლდოვა, ეს ცნობილი არ არის. ფაქტია, რომ ჰელსინკში ჩატარებულ შეხვედრებზე საქართველო მოხსენიების ღირსი არ აღმოჩნდა. ტრამპის ხისტი განცხადება საქართველოსთან მიმართებით: ამ ეტაპზე საქართველო უნდა შეეგუოს, რომ ვერ იქნება ნატოს წევრი, ეს უკვე მეტყველებს იმაზე, რომ აშშ ამიერკავკასიაში რუსეთის გავლენებს და მის გეო-პოლიტიკურ ინტერესებს ცნობს. ეს რუსულ-ამერიკულ ურთიერთობებში ახალი ფურცელია და ჩვენ როგორც არასდროს მზად უნდა ვიყოთ ამ ახალი რეალობისთვის თვალის გასასწორებლად. რაც გულისხმობს შემდეგს: 2020 წლის მოსალოდნელი არჩევნების წინ უნდა შევეცადოთ, რომ ქართულ-რუსულ დიალოგს თუნდაც ჩვენი სტრატეგიული პარტნიორის აშშ-ს უშუალო მხარდაჭერით საფუძველი ჩაეყაროს. 

მე თუ მკითხავთ, ეს არის უმაღლესი ამოცანა, რომელსაც არა პოზიცია ან ოპოზიცია, არამედ მთლიანად ქართული კონსოლიდირებული პოლიტიკური სპექტრი უნდა ემსახურებოდეს, რაც რეალურად არ გვყავს. ჩვენ გვყავს მონურ მორჩილებაში მყოფი ნეოლიბერალური ნარატივის მატარებელი ძალთა ერთობა, რომლებიც უბრალოდ, პირობითი სახელებისგან განირჩევიან ერთმანეთისგან. თორემ, ევროპულ საქართველოს რომ ჰკითხოთ რით განსხვავდება, თავისი იდეოლოგიით, ნაცმოძრაობისგან, განა გაგცემთ თუნდაც, ერთ განმასხვავებელ ნიშანზე პასუხს? ან, რით განსხვავდება ალასანია რესპუბლიკელებისგან, ან, ორივე ერთად ბოკერიასგან ან, სამივე ერთად მიშა სააკაშვილისგან? არავითარი განსხვავება არ არის. ეს არის ერთი პოლიტიკური სისტემა, ერთი პოლიტიკური ძალა პირობითი სახელწოდებებით დაყოფილი. რა უნდა ქართველ ამომრჩეველს? მას უნდა ამ ყველაფერს წერტილი დაესვას, ქვეყანას ჰქონდეს ეროვნული ინტერესისკენ სწორი მიმართება. ამ გზაზე, პოლიტიკური თვალსაზრისით, ძალიან მნიშვნელოვანი იქნებოდა ბიძინა ივანიშვილს სახალხო, ერთიანი კონსოლიდირებული ეროვნული ინტერესის გამომხატველი პოზიციისთვის დაეჭირა მხარი. ეს იქნებოდა ძალიან მნიშვნელოვანი. ერი, სახელმწიფო, რომელსაც სარწმუნოებრივ სიმბოლოდ მართმადიდებლობა აქვს, თავისი ინტერესის დაკმაყოფილებას, აუცილებლად მიაღწევს.

_ ბატონო დიმა, როგორ ფიქროფთ, წაადგება საქართველოს ტრამპის და პუტინის შეხვედრა?

_ ამ კითხვაზე პასუხის გასაცემად, აუცილებლად, უნდა გავიხსენოთ ტრამპის განცხადების კვალდაკვალ პუტინის მიერ გაკეთებული განცხადება. მან, ამ შეხვედრის შემდეგ, ღიად თქვა: რუსეთი არ დაუშვებს მის საზღვრებთან ნატოს ინფრასტრუქტურის ფართომასშტაბიან გაშლას და იქ, სამხედრო ბაზების შექმნის მცდელობას. თუკი ამას ადგილი მაინც ექნება, ეს იქნება ყველაზე კრიტიკული გამოძახილი, რაზეც რუსეთი რეაგირებას მოახდენსო. რა თქმა უნდა, ასეთი მძიმე განცხადება ძალიან სწორად, პირდაპირ და იმის მიმანიშნებლად უნდა აღვიქვათ, რომ ეს სამხედრო კონფრონტაციის 

გაჩენის შესაძლებლობას ნიშნავს. როგორც ყოველთვის საქართველო მარტო აღმოჩნდებახოლმე ასეთი კონფრონტაციის პროცესში და შესაძლოა წყლისა და პამპერსების შემოწოდებაც კი ვეღარ შეძლოს ვერავინ ნიშნად იმისა, რომ თითქოს, საქართველოს ფორმალური პარტნიორები ჰყავს. მიუხედავად იმისა, რომ აშშ საქართველოს სტრატეგიული პარტნიორია, ვფიქრობ, ეს პარტნიორობა ქართველი ამომრჩევლის მიერ სწორად უნდა იყოს გაანალიზებული და პარტნიორული ურთიერთობების ფარგლებში, მით უმეტეს, ტრამპის ბოლოდროინდელი განწყობების გათვალისწინებით, ჩვენ, სწორედაც რომ აშშ-ს უნდა ვთხოვოთ, იგი, მინიმუმ არ იყოს წინააღმდეგი იმისა, რომ საქართველო რუსეთის პირისპირ დადგეს ყველაზე უფრო მნიშვნელოვანი სტრატეგიული მოლაპარაკებების საკითხებში, პუტინისა და ტრამპის მოლაპარაკებების საბოლოო შედეგად ჩვენ, ვხვდებით, რომ აშშ რეგიონიდან უკან იხევს და სწორ ვარაუდს აკეთებს, თუ რა ინტერესები გააჩნია რუსეთს ამიერკავკასიაში. აი, სწორედ აქედან გამომდინარე უნდა ვიმოქმედოთ.

_ ბატონო დიმა, რუსეთში ნახევარ მილიონზე მეტი ქართველია წასული და აქ, საკუთარ ოჯახებს ეხმარება. პარალელურად, გვინდა, რომ რუსეთმა ჩვენი პროდუქცია საკუთარ ბაზარზე გაიტანოს და თანაც, ამ ქვეყნის ლანძღვა-გინებაში ვართ. ასეთი დამოკიდებულებით რას მივაღწევთ?


_ აბსოლუტურად გეთან- ხმებით. დასავლეთის მხრიდან განხორციელებული სანქციების ფონზე იტალიამ უდიდესი ზიანი მიიღო, რომელიც დღეში 7 მილიონ ევროს კარგავს. 34%-ით შემცირდა სავაჭრო ეკონომიკური ბრუნვა ფინეთსა და რუსეთის ფედერაციას შორის, რამაც შეუქცევადი და გამოუსწორებელი ზიანი მიაყენა ფინეთის სოფლის მეურნეობას, ისევე როგორც ნორვეგიას და შვედეთს შეექმნა პრობლემები.

რუსეთი მხოლოდ დედამიწის 1/8 არ არის. იგი ბევრი ქვეყნისთვის მნიშვნელოვანი სამომხმარებლო ბაზარი, ეკონომიკის მიმღები, შემკრები ჰაბია. ის, რომ აშშ-მ სანქციების ეს სერია განახორციელა, არ ნიშნავს, რომ ამით ევროპა არ დაზარალდა. რა თქმა უნდა, ევროპა გრძნობს ამ ზიანის მასშტაბებს და იმიტომაც არის, რომ უკვე იტალიამ, ავსტრიამ, ჩეხეთმა, უნგრეთმა, ფინეთმა დაიწყეს საუბარი იმაზე, რომ მათ, სანქციების ნაწილში, რუსულ-ევროკავშირულ ურთიერთობებს უნდა გადახედონ. ანაოგიურად შეიძლება ითქვას საქართველოზე.

ბუნებრივია, პატარა საქართველო პატარა ეკონომიკით მსოფლიო დიდ ეკონომიკაში არ არის ინტეგრირებული და თავის გადარჩენისთვის იბრძვის. გადარჩენის პროცესში ლომის წილი რუსეთზე მოდის. ჩვენი საგარეო ეკონომიკური ბრუნვა მილიარდ 200 მილიონამდე გაიზარდა სწორედ, სოფლის მეურნეობის პროდუქციის, მირნერალური წყლების, ღვინის და ა.შ. გატანის ხარჯზე. დღეს, სხვათა შორის, ორგანიზაციამ, რომელიც ყოველთვის დაკავებულია სოფლის მეურნეობის პროდუქტების ხარისხის შემოწმებით, მას შემდეგ რაც საქართველოს მხრიდან კვლავ გაკეთდა ნატოს მხარდამჭერი განცხადებები, ღიად თქვა, რომ საქართველოს ღვინის ხარისხის შემოწმება დაიწყო. ეს რას ნიშნავს? ჩნდება საფრთხე იმისა, რომ ხვალ, პოლიტიკურ დონეზე მიიღონ გადაწყვეტილება და საქართველოს შეუჩერდეს რუსეთის ბაზარზე ღვინის შეტანა. ეს სიგნალი იყო. ეს იმ პირობებში, როდესაც 67% ექსპორტისა რუსეთის ფედერაციაზე მოდის. ღვინოების 80%-ს რუსეთის ფედერაციაში ვყიდით. ეს არის ფაქტი, რომელსაც ვერ გავექცევით. სრულიად გეთანხმებით შეკითხვაში: რუსეთს, ერთი მხრივ, ოკუპანტს ვეძახით, ვაგინებთ, არ ვაკლებთ ნეგატიურ ემოციას, გასა- გებია, რომ ფაქტობრივი ოკუპაცია არაკეთილისმოსურნეს ამის საბაბს აძლევს. სინამდვილეში, რუსეთის ფედერაციის მხრიდან, მილიონზე მეტი ტურისტი შემოდის, წელს რეკორდი მოიხსნება, ბუმია საქართველოზე ატეხილი. ფაქტია, რომ ქართულ-რუსულ ურთიერთობებში არავითარი ქსენოფობია არ არსებობს. რუსები აქ თავს მშვიდად გრძნობენ. პირიქით, ჩვენი ქვეყნის არაკეთილისმოსურნეები აფინანსებენ იმგვარ კამპანიებს, რომელმაც ყველანაირად უნდა შეუშალოს ხელი ქართულ-რუსულ ურთიერთობებს, რაც საჯარო პოლიტიკის საწინდარია.

არაკეთილისმოსურნეებმა დაინახეს, რომ სახალხო დიპლომატია იმარჯვებს. სხვათა შორის, ჩვენი "ქართულ-რუსული საზოგადოებრივი ცენტრიც", ამ მიმართულებით, პატარა წვლილის შემტანია. ცენტრში უფასო რუსული ენისა და ლიტერატურის გაკვეთილებს ვატარებთ, მათ შორის, რამოდენიმე უნივერსიტეტის ბაზაზეც. უზარმაზარი რიგი დგას ბავშვების, რომლებიც თვლიან: ქართველმა უნდა იცოდეს როგორც ინგლისური ისე რუსული. რუსული ენა ეს არის ჩვენი სამეზობლო ურთიერთობის ენა. ქვეყნის მტერი უნდა იყო, რომ სკოლებში რუსულ ენას ებრძოდე, როგორც ეს დღეს ჩვენთან ხდება. საჭიროა მტრობით დანგრეული ურთიერთობა ახალი პერსპექტივებით შეიცვალოს. რა თქმა უნდა, ეს ყველაფერი, საქართველოს ტერიტორიული მთლიანობის აღდგენის გათვალისწინებით.

დღეს, კონფედერაციების შექმნაზე არ უნდა ვიმსჯელოთ, არამედ ვისაუბროთ შემდეგზე: რუსეთი უნდა შეეგუოს იმას, რომ საქართველოში არცერთი ქართველი არ იცხოვრებს აფხაზეთის და ცხინვალის გარეშე. უბრალოდ, ჩვენს არსებობას და ქართველობას აზრი დაეკარგება. თავად პუტინმა თქვა: არ არსებობს მოულაპარაკებელი საკითხებიო. მან მიუნხენის კონფერენციაზე ისიც თქვა: აფხაზეთი სახელურის გარეშე ჩემოდანს მაგონებს, რომლის ტარებაც რთულია, მაგრამ დატოვებაც გენანებაო. ეს არის მესიჯები იმისა, რომ საქართველოს შეუძლია რუსეთთან გადაიკვეთოს და რაღაცაზე მოვილაპარაკოთ.

_ ივანიშვილმა პოლიტიკაში კვლავ მოსვლისას განაცხადა, რომ აფხაზეთსა და სამაჩაბლოს დაიბრუნებს. როგორ გესახებათ ეს პერსპექტივა?


_ თუ ბატონი ივანიშვილი აფხახეთს და სამაჩაბლოს დაიბრუნებს, არ მოიძებნება ქართველი, რომელიც არ მოისურვებს, მცირედი მატერიალური წვლილი შეიტანოს, რათა მას სიცოცხლეშივე ოქროს ქანდაკება ჩამოუსხას და უკვდავყოს. თუ ივანიშვილს ამის გეგმა აქვს, მთელი საქართველო მის ერთიც არის, გვერდით დადგება. თუ ჩვენ გულზე ხელი და ერთი ივანიშვილის იმედზე ვიქენით, არაფერი არ გვეშველება. მთელმა ერმა ხელები უნდა დავიკაპიწოთ. საჭიროა, დაიწეროს თუნდაც, ათი თეზა ჩვენი ეროვნული ინტერესების შესაბამისობაში და ყველამ მოვაწეროთ ხელი იმას, თუ როგორ გადავრჩეთ. მერე, ვინ პარტიული იქნება და ვინ უპარტიო, ყველაფერი აზრს დაკარგავს, იქნება მხოლოდ ერთი პარტია – საქართველო, იქნება ერთი პარტიის წევრი – 
საქართველოს მოქალაქე და როცა სანუკვარ მიზნებს მივაღწევთ მერე გავიყოთ მწვანეებად, ლურჯებად, წითლებად, თეთრებად.

ეს ათი თეზა უნდა იყოს ეროვნული ინტერესი: ტერიტორიული მთლიანობა, ქვეყნის განვითარება, მისი პრიორიტეტები, ქვეყნის ეკონო- მიკას უნდა განსაზღვრავდეს მისი ინტელექტუალური პოტენციალი, განათლება და მეცნიერება იყოს უმთავრესი პრიორიტეტი. ეს უნდა იყოს კონკრეტული თეზები და არა დემაგოგია. ვთქვათ, როგორ შეიძლება საზღვაო ქვეყანას არ ჰყავდეს თავისი სანაოსნო. ჩვენ ჯვარსახოვანი პოლიტიკა უნდა გვქონდეს და არა ნატო, ნატო ან რუსეთი, რუსეთი, ყველასთან უნდა ვიმეგობროთ. საქართველო მთელი მსოფლიოსთვის ახალი დემოკრატიის ბიძგის მიმცემი უნდა იყოს, ისიც კი უნდა შევძ- ლოთ, რომ მსოფლიოს წინაშე დავაყენოთ საკითხი _ გაეროს შტაბბინა სწორედ ამ ცივილი- ზაციათა გზაჯვარედინზე იყოს. საქართველო
უნდა იყოს ახალი შვეიცარია, ფინანსური ჰაბი, სატრანსპორტო დერეფნები ყველა მიმართულებით. ეს ყველაფერი უნდა ემსახურებოდეს საქართველოს სუვერენიტეტს.

_ მარია ზახაროვამ გააკეთა განცხადება რუსულ-ქართული ურთიერთობების აღდგენის შესა- ხებ. რას იტყვით
ამის თაობაზე?


_ მარია ზახაროვა ძალიან საინტერესო სპიკერია. ის შემოქმედებითი ნატურაა, ჩვენ, საქართველოშიც გვჭირდება ასეთი პოლიტიკოსები. მისი მოსაზრებები რუსულ საგარეო პოლიტიკას პოპულარულს ხდის. ამას, რა თქმა უნდა, პროპაგანდის ხასიათი აქვს. ზახაროვა მაღალი დონის დიპლომატია. მას საქართველო ნეგატიურ კონტექსტში არასდროს უხსენებია. მისი ნებისმიერი განცხადება ეს არის ქართულ-რუსული პოლიტიკის დაახლოების მცდელობა, რაზეც ჩვენი აქამდე არსებული მარიონეტული მთავრობები უფლებამოსილნი არ იყვნენ რომ მხარი დაეჭირათ. ჩემი აზრით, რომ ივანიშვილის მისია ჯერ არ დაწყებულა, ეს ყველაფერი ახლა დაიწყება.

_ ბატონო დიმა, ბოლოს საშინაო პოლიტიკაზეც მინდა გკითხოთ. ახლოვდება საპრეზიდენტო არჩევნები. რას ფიქრობთ, წარდგენილ კანდიდატურებზე?

_ პირველად ჩემს მიერ მოცემულ ინტერვიუში პერსონებზე არ ვისაუბრებ. ის კანდიდატია მნიშვნელოვანი, რომელიც მისა- ღები იქნება როგორც რუსეთის ფედერაციისთვის, ისე აშშ-სთვის. პირდაპირ ვთქვათ: ისეთი პრეზიდენტი გვჭირდება, რომელიც ერთიანი წარმატებით იქნება მიღებული ბრიუსელშიც, მოსკოვშიც, ვაშინგტონშიც და პეკინშიც. მოდით, ასეთი ტიპის პრეზიდენტზე ვიოცნებოთ, რისი რესურსიც გვაქვს. ჩემი აზრით, ქვეყანას ასეთი ადამიანი მინიმუმ სამი ჰყავს, პერსონების დასახელებისგან თავს შევიკავებ. ოღონდ, ამაში ვაშაძეს არ ვგულისხმობ. როცა გრიგოლ ვაშაძე 2012 წლის ოქტომბრის არჩევნებამდე საგარეო მინისტრი გახლდათ, მან არჩევნებამდე თვენახევრით ადრე გამოსცა ბრძანება, რომლითაც ჩვენს არალეგალ მოქალაქეებს (მაგალითად, ათენში აპირებდნენ არჩევნებში მონაწილეობის მიღებას) ამის შესაძლებლობა აღუკვეთა.

ანუ, ამ ადამიანების მიმართ პოლიტიკური დისკრიმინა- ცია ჩაიდინა. ასეთი ადამიანი დღეს ამბობს, რომ ჩვენი კონსტიტუცი- ური უფლებების დაცვის გარანტი იქნება. იგი ვერაფრით იქნება კონსტიტუციის გარანტი, რამეთუ მას ერთხელ უკვე აქვს მონაწილეობა მიღებული მასშტაბურ აქტში საკუთარი მოსახლეობის წინააღმდეგ და თავისი ბუნებით, ხასიათით ვოლუნტარისტია.


თამარ შველიძე

მეტის ნახვა
26-07-2018, 10:30


გურჯაანის  მუნიციპალიტეტში

მუნიციპალიტეტის მერი არჩილ ხანდამაშვილი სოფელ ახაშენში მიმდინარე გზის სარეაბილიტაციო სამუშაოებს გაეცნო. პროექტის ფარგლებში, რომელიც რეგიონებში განსახორციელებელი პროექტების ფონდის და ადგილობრივი ბიუჯეტის თანადაფინანსებით ხორციელდება, მოასფალტდება 881 მეტრი სიგრძის გზა და მოეწყობა სანიაღვრე არხი. გზის მოასფალტების სამუშაოების დაწყებამდე, გურჯაანის მუნიციპალიტეტის მერია და ააიპ "გურჯაანის მუნიციპალური სერვისი" წყლის ქსელს აწესრიგებენ.

გურჯაანის მუნიციპალიტეტის მერი არჩილ ხანდამაშვილი სოფელ კარდენახში, ე.წ. ტეტელოანთ უბნის მოსახლეობას მერის წარმომადგენელთან და დეპუტატთან ერთად შეხვდა. კარდენახელებმა ძირითად გადასაჭრელ საკითხად გზა დაასახელეს.

დედოფლისწყაროს მუნიციპალიტეტში

მუნიციპალიტეტის მერიაში ტრადიციულ ყოველკვირეულ თათბირს მუნიციპალიტეტის მერი ნიკოლოზ ჯანიაშვილი სიღნაღი-დედოფლისწყაროს მაჟორიტარ დეპუტატ ირაკლი შიოლაშვილთან ერთად უძღვებოდა. სამუშაო შეხვედრას ესწრებოდნენ მერის მოადგილეები, პირველადი სტრუქტურული ერთეულების ხელმძღვანელები და სოფლებში მერის წარმომადგენლები.
ირაკლი შიოლაშვილმა და ნიკოლოზ ჯანიაშვილმა მოისმინეს ინფორმაცია მუნიციპალიტეტში არსებულ პრობლემებზე და შეხვედრის მონაწილეებთან ერთად მათი გადაჭრის გზებზე იმსჯელეს. საუბარი შეეხო ალოობის პროცესს. აღინიშნა, რომ მუნიციპალიტეტში თავთავიანი კულტურის აღების პროცესი დასასრულს უახლოვდება და უხვმოსავლიანობით არც მიმდინარე წელია გამონაკლისი. თათბირზე მიმდინარე და დაგეგმილი ინფრასტრუქტურული პროექტებიც განიხილეს და მუნიციპალიტეტისთვის მათ მნიშვნელობაზე ისაუბრეს.

სიღნაღის მუნიციპალიტეში

ამინდის გაუარესებისა და სტიქიის გამო სიღნაღის მუნიციპალიტეტის სოფლებში — ანაგაში, ვაქირსა და მაშნაარში შიდასაუბნო და სავარგულებთან მისასვლელი გზები დაზიანდა. სოფელ ანაგასა და ვაქირში დაზიანებულია წყალსადენი მაგისტრალი, სავარგულებთან მისასვლელი და შიდასაუბნო გზები, დაზიანებულია ელექტროსადენების ბოძები. სოფელ ილიაწმინდაში მოვარდნილმა წყალმა დატბორა სახლები.

ვითარება ადგილზე შეისწავლეს მუნიციპალიტეტის მერმა გიორგი გოგილაშვილმა, მაჟორიტარმა დეპუტატმა ირაკლი შიოლაშვილმა, საკრებულოს თავმჯდომარემ ილია ხატიაშვილმა ადგილობრივი თვითმმართველობის წარმომადგენლებთან ერთად. სტიქიის შედეგების აღმოსაფხვრელად ყველა შესაბამისი სამსახური ჩართული, მიმდინარეობს ზარალის შესწავლა. ამ დროისთვის სოფელ ანაგასა და ვაქირში გზების გასაწმენდად ტექნიკა მუშაობს.

სალიკვიდაციო სამუშაოებში ჩაერთვება რეგიონული განვითარებისა და ინფრასტრუქტურის სამინისტრო. ხევების პრობლემა საჭიროებს სისტემურ მიდგომას.

სიღნაღის მუნიციპალიტეტის სოფელ ანაგაში სტიქიის სალიკვიდაციო სამუშაოების და შექმნილი ვითარების ადგილზე გასაცნობად საქართველოს რეგიონული განვითარებისა და ინფრასტრუქტურის მინისტრის მოადგილე ილია ბეგიაშვილი, კახეთის მხარეში სახელმწიფო რწმუნებულ-გუბერნატორი ირაკლი ქადაგიშვილი, პარლამენტის წევრი ირაკლი შიოლაშვილი და სიღნაღის მუნიციპალიტეტის მერი გიორგი გოგილაშვილი იმყოფებოდნენ


დუშეთის მუნიციპალიტეტში

სტიქია დუშეთის მუნიციპალიტეტში: უხვმა ნალექმა და მოვარდნილმა მეწყერმა რამდენიმე სოფელთან მისასვლელი გზა დააზიანა. სტიქიის ეპიცენტრს წარმოადგენდა ბოსლის ხეობა სოფ. ჩოხში, სადაც ინტენსიური წვიმის შედეგად კალაპოტიდან გადმოვიდა შავი არაგვი და დატბორა მიმდებარე ტერიტორიები.

ამ ეტაპზე, ადგილობრივი წარმომადგენლობის ძალისხმევით სოფლებთან მისასვლელი დროებითი გზა უკვე აღდგენილია. მუშაობს სტიქიის შემსწავლელი კომისია, რომელიც უმოკლეს ვადებში დაადგენს ზარალის ოდენობას.

სტიქიის ზონაში იმყოფებოდნენ მცხეთა-მთიანეთის სახელმწიფო რწმუნებული — გუბერნატორი ლევან ზაუტაშვილი, დუშეთის მუნიციპალიტეტის მერი ზურაბ სეხნიაშვილი და ადგილობრივი ხელისუფლების სხვა პასუხისმგებელი პირები.
მობილიზებულია ტექნიკა, მიმდინარეობს დაზიანებული საგზაო ინფრასტრუქტურის ადღგენითი სამუშაოები.

ზუგდიდის მუნიციპალიტეტში

მუნიციპალიტეტში დასრულდა ინოვაციებისა და ტექნოლოგიების სააგენტოს რუხის ინოვაციების ცენტრის მშენებლობა. რუხის სავაჭრო ცენტრის ტერიტორიაზე მდებარე ცენტრი მიმდინარე წლის სექტემბერში გაიხსნება.
ცენტრი აღიჭურვება ყველა იმ სერვისით, რომლებსაც თბილისისა და ზუგდიდის ტექნოპარკები სთავაზობენ მომხმარებელს. ცენტრის მეშვეობით ადგილობრივ ახალგაზრდებს, კერძო კომპანიებსა თუ მოსახლეობას მიეცემათ შესაძლებლობა, გამოიყენონ აქამდე ძნელად ხელმისაწვდომი ტექნოლოგიები საკუთარი საქმიანობის განვითარებისთვის, მიიღონ ცოდნა როგორც ინოვაციებისა და ტექნოლოგიების სფეროში, ისე მეწარმეობის მიმართულებით.

ლაგოდეხის მუნიციპალიტეტში

მუნიციპალიტეტის მერი მოსახლეობასთან საინფორმაციო შეხვედრებს განაგრძობს. სოფელ ფიჩხიბოგირში ჩასულმა ჯონდო მდივნიშვილმა უშუალოდ მოსახლეობისგან მოისმინა, თუ რა აწუხებთ მათ. ადგილობრივები ძირითად პრობლემად სასმელ წყალს და მოსაწესრიგებელ სატრანსპორტო გზას ასახელებენ. მერი ფიჩხიბოგირელებს კომპეტენციის ფარგლებში დახმარებასა და პრობლემების გადაჭრას დაჰპირდა.

ჯონდო მდივნიშვილმა ვაშლოვნის ქუჩაზე მიმდინარე სარეაბილიტაციო სამუშაოები დაათვალიერა. გზის აღდგენის მეორე ეტაპი დასასრულს უახლოვდება და სულ მალე ამ ქუჩის მცხოვრებლებს კომფორტული საგზაო ინფრასტრუქტურა ექნებათ.

მარტვილის მუნიციპალიტეტში

ქალაქ მარტვილში წერეთლის ქუჩაზე გზის სარეაბილიტაციო სამუშაოები დაიწყო. პროექტი ასევე მოიცავს თამარ მეფის, ოქტომბრის, ნ. გეგიას, შეროზიას, დადიანისა და კალინინის ქუჩების რეაბილიტაციას. ჯამში დაიგება 3 500 მეტრი ასფალტბეტონის საფარი. პროექტის ღირებულება, რომელიც რეგიონებში განსახორციელებელი პროექტების ფონდისა და ადგილობრივი მუნიციპალიტეტის დაფინანსებით ხორციელდება, 607 995 ლარს შეადგენს მიმდინარე სამუშაოებს მარტვილის მუნიციპალიტეტის მერის პირველი მოადგილე დავით სურმავა გაეცნო.

ჩხოროწყუს მუნიციპალიტეტში

მუნიციპალიტეტის მერი დათო გოგუა, მერის პირველი მოადგილე გოჩა ჩიქოვანი, მერიის ჯანმრთელობისა და სოციალური დაცვის სამსახურის უფროსი კახა შელია ფონდ "აფხაზინტერკონტის“ წარმომადგენლებს შეხვდნენ. შეხვედრაზე განიხილეს ის სერვისები, რომლებსაც მოიცავს პროექტი "რეგიონში დაბრუნებული მიგრანტებისთვის ეფექტიანი მხარდაჭერის გარემოს შექმნა".

პროექტის მიზანია სამშობლოში დაბრუნებული მოქალაქეების ისეთი სერვისებით უზრუნველყოფა, რაც ხელს შეუწყობს მათს გრძელვადიან და მდგრად რეინტეგრაციას, ჯანმრთელობის პრობლემების გადაჭრის, შემოსავლების გაჩენისა და რეინტეგრაციის მდგრადი საფუძვლის შექმნას.

"აფხაზინტერკონტმა“ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ფინანსური მხარდაჭერით, სამეგრელო-ზემო სვანეთის რეგიონში მიგრანტთა მხარდამჭერი პროექტის განხორციელება 2018 წლის მაისიდან დაიწყო.

ქ. ფოთის მუნიციპალიტეტის  მერიაში

ფარნავაზ მეფის ქუჩაზე მიმდინარეობს ტროტუარების კეთილმოწყობა ბაზალტის ბორდიურებით, გადასასვლელებზე იგება რკინაბეტონის საფარი, მონტაჟდება გარე განათების ბოძები. სამუშაო პროცესს გაეცნენ ქალაქ ფოთის მერი გოჩა კურდღელია და მერის მოადგილე ირაკლი თოფური. ფარნავაზ მეფის ქუჩის ტროტუარების რეაბილიტაცია ცოტნე დადიანის მოედნამდე გაგრძელდება.

ბოლნისის მუნიციპალიტეტში

20 ივლისის საღამოს სოფელ დისველში მოსული ძლიერი წვიმისა და სეტყვის შედეგად საკარმიდამო ნაკვეთები დაზიანდა. სტიქიამ, რომელიც დაახლოებით ნახევარი საათის განმავლობაში გაგრძელდა, ადგილობრივების რამდენიმე საცხოვრებელი სახლის სახურავი მსუბუქად დააზიანა, ხოლო მერაბ ქედელიძის სახლს სახურავი მთლიანად გადახადა.

მეორე დღესვე სტიქიის ადგილზე ვითარების შესასწავლად ბოლნისის მუნიციპალიტეტის მერი, დავით შერაზადიშვილი ინფრასტრუქტურის სამსახურის უფროსთან ერთად იმყოფებოდა. ადგილობრივი თვითმმართველობის წარმომადგენლებმა სოფელი მთლიანად დაათვალიერეს და დაზარალებულ ოჯახებს დახმარება აღუთქვეს.

მერაბ ქედელიძემ უკვე გამოიძახა კერძო აუდიტი, რომელიც ზარალს შეაფასებს და შესაბამისი დასკვნის წარმოდგენის შემდეგ ბოლნისის მუნიციპალიტეტის მერია დაზარალებულს დახმარებას აღმოუჩენს.

დმანისის  მუნიციპალიტეტში

მუნიციპალიტეტში გამართულ სამუშაო შეხვედრაზე ევროკავშირის პროექტი — "წყალი სიღარიბის აღმოსაფხვრელად". პროექტი, რომელსაც ქვემო ქართლის რეგიონის მუნიციპალიტეტებში CENN ახორციელებს, ითვალისწინებს Wash ტექნიკურ შეფასებებს. პროექტის ფარგლებში წყლის, სანიტარიისა და ჰიგიენის მდგომარეობა ფასდება მუნიციპალიტეტის სკოლებში, ბაღებში, თავშესაფრებსა და ამბულატორიებში.

წალკისა და თეთრიწყაროს მუნიციპალიტეტების შემდეგ მუშაობა ამჯერად დმანისის მუნიციპალიტეტში მიმდინარეობს.
ტექნიკური შეფასების შემდგომ დამოუკიდებელი ექსპერტი ანგარიშში წარადგენს როგორც ობიექტზე არსებულ ვითარებას, ისე რეკომენდაციებს.

მარნეულის მუნიციპალიტეტში

მუნიციპალიტეტის მერიაში გაიმართა სამუშაო შეხვედრა, რომელიც სოფელ თამარისში გერმანული კულტურული მემკვიდრეობის დაცვის, გადარჩენისა და პოპულარიზაციის მიზნით შემუშავებული პროექტების განხილვას, აგრეთვე თამარისის ისტორიულ ცენტრში გამავალ ქუჩაზე ტრაუბენბერგის სახელის დარქმევის საკითხს მიეძღვნა.

შეხვედრას მარნეულის მუნიციპალიტეტის ხელმძღვანელი პირები და სამხრეთ კავკასიაში გერმანული კულტურული მემკვიდრეობის დაცვის კავშირის წარმომადგენლები ესწრებოდნენ.

შეხვედრაზე განიხილეს კიდევ ერთი მნიშვნელოვანი პროექტი, რომელიც მიზნად ისახავს სოფლის ისტორიულ ნაწილში, გერმანელი პარტნიორების დახმარებით, გერმანული საცხოვრებელი სახლის შესყიდვას, რომელიც შეიძენს საზოგადოებრივ ფუნქციას და სასარგებლო იქნება ადგილობრივი მოსახლეობისთვის.


მეტის ნახვა
25-07-2018, 20:30


საქართველოს ფინანსთა სამინისტროს საგამოძიებო სამსახურის თანამშრომლებმა, გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, სხვისი სასაქონლო ნიშნის მართლსაწინააღმდეგო გამოყენების ორი ფაქტი გამოავლინეს.

სამსახურის ინფორმაციით, გამოძიებით დადგინდა, რომ ქვემო ქართლის და იმერეთის რეგიონებში, მობილური ტელეფონებითა და მისი აქსესუარებით მოვაჭრე ორი მეწარმე სუბიექტი ჩინური წარმოების იაფფასიანი მობილური ტელეფონების ნიშანდებას NOKIA-ს სასაქონლო ნიშნით ახდენდა და მის რეალიზაციას ბრენდირებული ტექნიკის სახით ახორციელებდა.

გატარებული საგამოძიებო მოქმედებების შედეგად, საგამოძიებო სამსახურმა ჯამში NOKIA-ს სასაქონლო ნიშნით უკანონოდ ნიშანდებული 3 791 მობილური ტელეფონი ამოიღო.

გამოძიება  საქართველოს სისხლის სამართლის კოდექსის 196-ე მუხლის პირველი ნაწილით მიმდინარეობს, რაც სასჯელის სახით ითვალისწინებს თავისუფლების აღკვეთას 2 წლამდე ვადით.

1tv.ge

მეტის ნახვა
20-07-2018, 13:30


იაკობ გოგებაშვილის „იავნანამ რა ჰქმნა“ გერმანულ ენაზე გამოიცა.

ამის შესახებ ინფორმაციას ქართული წიგნის ეროვნული ცენტრი ავრცელებს. მათივე ცნობით, წიგნი შვეიცარულმა გამომცემლობა Daltas Verlag-მა გამოსცა, გერმანული ტექსტის თარგმანზე კი ჰელმუტ კუნკელმა იმუშავა.

წიგნში მოთხრობილია პატარა ქეთოს ისტორია, რომლიც მშობლებისგან შორს გაიზარდა. მრავალი წლის შემდეგ, შინ დაბრუნებული გოგონა დედ-მამას ვეღარ სცნობს. მშობლები მას სწორედ დედის მიერ ნამღერმა „იავნანამ“ გაახსენა.

მეტის ნახვა
20-07-2018, 11:00


გვესაუბრება ძალოვანი სტრუქტურების ვეტერანი პოლკოვნიკი, ბატონი რეზო რომანაძე

- ბატონო რეზო, მნიშვნელოვანი ძვრები მიმდინარეობს აჭარის მთავრობაში, მაგრამ სანამ ამაზე ვისაუბრებდეთ, რას იტყვით, ივანიშვილი აჭარასაც „კულისებდან“ მართავდა?

- სატირალი რომ არ იყოს, სასაცილოა ზოგიერთი პოლიტიკოსის და ე.წ. საზოგადო მოღვაწის მოსაზრება, თითქოს ბიძინა ივანიშვილი კულისებიდან მართავდა პროცესებს. ივანიშვილი რომ პერიოდულად ჩარეულიყო სახელმწიფოს მართვაში, დღევანდელ მდგომარეობაში არ აღმოვჩნდებოდით. სწორედ ამან განაპირობა მისი პოლიტიკაში დაბრუნება.

მინდა შევახსენო ზოგიერთებს, რომ სწორედ ბატონმა ბიძინამ პრემიერ-მინისტრის რანგში გადადგა უაღრესად პრინციპული და ჭეშმარიტად დემოკრატიული ნაბიჯი: –2013 წლის თებერვალში ხელი მოაწერა საქართველოს მთავრობის განკარგულების პროექტს სახელწოდებით:,, საქართველოს მთავრობის დეცენტრალიზაციისა და თვითმმართველობის განვითარების სტრატეგიის ძირითადი პრინციპები 2013-2014 წლებისთვის.“ ამ მხრივ მთავრობისთვის პრიორიტეტებად უნდა წარმოდგენილიყო დეცენტრალიზაციისა და თვითმართველობის განვითარებების მიმართულებით არსებითი რეფორმების განხორციელება, რომელსაც მართვის დემოკრატიულობა და მოსახლეობისათვის საჯარო მომსახურების მიწოდების ეფექტიანობის მნიშვნელოვანი ზრდა უნდა განეპირობებინა. 

დარწმუნებული ვარ, რომ ბატონი ბიძინა ივანიშვილი, როგორც ერთი რიგითი მოქალაქე, რეფორმატორი და პატრიოტი, ღრმად არის შეწუხებული არსებული მდგომარეობით, მაგრამ თავს იკავებდა აშკარა ჩარევებისაგან.

- რას ფიქრობთ, რა უნდა გაეკეთბინა ხელისუფლებას მისი მმართველობა მეტად ეფექტური რომ ყოფილიყო?

- ხელისუფლებამ ვერა და ვერ შეძლო ისეთი ქმედითი მექანიზმის შექმნა, რომელიც უზრუნველყოფდა სახელმწიფოს ეკონომიურ უსაფრთხოებას. საუბარი მაქვს მრავალმილიონიან არამიზნობრივ ხარჯებზე, აგრეთვე, წინა ხელისუფლების დროს გაქურდულ, გაფლანგულ, მიტაცებულ და მითვისებულ ასტრონომიულ თანხებზე, რომლის ნაწილის მობრუნება რეალურად წაადგებოდა ქვეყნის სწრაფ განვითარებას და მოსახლეობის კეთილდღეობას. 
ერთხელ და სამუდამოდ უნდა დამკვიდრდეს ის პრეცედენტი, რომ სახელმწიფო მოსახლეობის კუთვნილ დოვლათს არავის შეარჩენს.

- რაც შეეხება აჭარას?

- უნდა აღინიშნოს, რომ აჭარაში არსებობს უამრავი სოციალურ-ეკონომიკური პრობლემა, რომლის დაუნახავობა არ შეამცირებს მათ რაოდენობას. მოჩვენებითი კეთილდღეობა არ ასახავს რეალურ მდგომარეობას. აჭარა არის საქართველოს ფორპოსტი და მას განსაკუთრებული ყურადღება და ზრუნვა სჭირდება.
არ დავწრილმანდები ყველა პრობლემების ჩამოთვლით, შევეხები მხოლოდ რამდენიმეს:
_ ბათუმის მოსახლეობაში ჩამოყალიბდა აზრი იმის შესახებ, რომ აჭარის უმაღლესი საბჭოს დეპუტაციის ნაწილი დაუმსახურებლად სარგებლობს ხალხის სახელით და ზოგიერთის კომპენტეციაში და განათლებაში შეაქვს სამართლიანი ეჭვი. უმაღლესი საბჭო დისტანცირებულია მოსახლეობისაგან და დაკავებული არის რუტინული საქმიანობით. იმავდროულად ვერ მივიდა იმ დასკვნამდე, რომ გააჩნია ავტონომიური უფლება შეიტანოს დამატებითი ცვლილებები იმ რეგულაციებში, რომლის აუცილებლობა კარგა ხანია მომწიფებულია.

- აჭარის მოსახლეობაში დომინირებს აზრი იმის შესახებ, რომ ადგილობრივმა ხელისუფლებამ ვერ უზრუნველყო კვალიფიციური კადრების ჩართვა გადაწყვეტილებების მომზადების და მიღების პროცესებში, რამაც განაპირობა კიდევაც აჭარის მმართველობის ცვლილება.

- მართლია და ამიტომაც ხშირად ღებულობდა საეჭვო გადაწყვეტილებებს. ერთ მაგალითს მოვიტან: ცნობილია, რომ თურქულ ფირმა,, მეტროს“ მიენიჭა ექსკლუზიური უფლებები აჭარაში საკვანძო ობიექტების შეძენაზე, მათ შორის ისეთ მნიშვნელოვან ადგილას, როგორიც არის ზღვისპირა პარკი. ამით საერთოდ ამოღებულია დღის წესრიგიდან გადაწყვეტილებების მიღების ისეთი მნიშვნელოვანი პრინციპები, როგორიც არის ეროვნული ინტერესების გათვალისწინება.

მოსახლეობის აზრით, ადგილობრივი ხელისუფლება უნდა ჩარეულიყო ბათუმის ზღვისპირა პარკში უცხოელებისთვის ისეთი ობიექტების გადაცემაზე, როგორებიც არის რესტორნები ,,შავი ზღვის მარგალიტი“ და ,,ძველი გემი“. მართალია, `შავი ზღვის მარგალიტი“ ეკუთვნოდა კონკრეტულ პირს, კერძოდ, არჩილ ხაბაძის სიმამრს მერაბ სირაბიძეს და ბიზნესმენ ალექსანდრე ინწკირველს, მაგრამ აუცილებლად გამოიძებნებოდა ისეთი არგუმენტაცია, რომელიც საკმარისი იქნებოდა, ეს ობიექტები დარჩენოდა აჭარის მოსახლეობას, ვინაიდან არსებობს გარკვეული ეჭვი პრივატიზაციის და გასხვისების სამართლიანობაზე. 

დღესაც ბურუსითაა მოცული აჭარის სამთავრობო რეზიდენციის უცხოელებზე გასხვისების ფაქტი, რომელიც მდებარეობდა ხელვაჩაურის რაიონის სოფ. სალიბაურში.

გასულ წელს პრესაში გაშუქდა ინფორმაცია და თქვენც იცით ამის შესახებ, რომ ხელისუფლებასთან დაახლოებული ერთი ბიზნესმენი, ყველა ნორმატივების და კანონის იგნორირებით აპირებდა გონიოში ზღვისპირა ზოლში კორპუსების მშენებლობას. ამის შემდეგ გაჩნდა მოლოდინი, რომ უკანონობას შეაჩერებდნენ, მაგრამ ნურას უკაცრავად, კორპუსები აშენებულია კანონის დარღვევით, ხოლო მოსახლეობის მოთხოვნა იგნორირებულია. ეს არის ანომალია. იზეიმეთ უკუღმართო ჩინოვნიკებო. პრეცედენტი დაშვებულია. ამის შემდეგ მიაყოლებენ მრავალ კორპუსს. უფრო მეტად გამრავლდებიან უცხოელები. გამდიდრდებიან გათავხედებული ბიზნესმენები და სახელმწიფო ბიუჯეტს კიდევ მეტად შეუმცირებენ რეალურ შემოსავალს.

მოსახლეობა კარგა ხანია ელოდა, რომ აჭარის ხელისუფლება შეძლებდა რედაქციის შენობის დაბრუნებას, რომელიც შეიძინა ,,პროკრედიტ ბანკმა“ და იქ ყველა ბეჭდვითი მედიის საშუალებას მოათავსებდა, დააბრუნებდა ფოსტას თავის ძველ ადგილზე, სადაც ახლა უცხოელების სამორინე ფუნქციონირებს, მაგრამ ასე არ მოხდა. ორივე შემთხვევაში მოიძებნებოდა საშუალებები, რომლებიც ხელს შეუწყობდა ამ საკითხების სამართლებრივ დარეგულირებას და ხელისუფლების ავტორიტეტი აიწევდა.

ახლახან ბათუმის ,,წყალკანალში“ ერთ-ერთ თანამდებობაზე აჭარის ,,კუდის“ ყოფილი უფროსის, ავადხსენებული თემურ პატარიძის მოადგილე ალექსანდრე ბალაძე დაინიშნა, რომელიც განერიდა სამართლებრივ დევნას და თავს მეზობელ სახელმწიფოს აფარებდა. ბალაძესთან საზოგადოებას სერიოზული და მკაცრი შეკითხვები გააჩნია მის საქმიანობასთან დაკავშირებით, მათ შორის გახმაურებულ როინ შავაძის მკვლელობასთანაც კი. რომ არა საქართველოს პარლამენტის ერთ-ერთი დეპუტატის ჩარევა, ბატონი ბალაძე დღესაც დაუმსახურებლად ისარგებლებდა საჯარო სამსახურის უპირატესობებით. რომელი ერთი ჩამოვთვალო ამ პატარა საუბარში. საკითხები და პრობლემები გაცილებით მეტია, ვიდრე წარმოგიდგენიათ. ტრაგედია იმაში მდგომარეობს, რომ ანომალია, ანუ უკუღმაღთობა ჩვენს ირგვლივ საფუძვლიანად არის ფეხმოკიდებული.

- საინტერესოა, რა ფორმით არის დაკავშირებული ბალაძე როინ შავაძის მკვლელობასთან? 

- ბალაძის უწყებაში დაიგეგმა როინ შავაძის წინააღმდეგ სპეცოპერაცია. მოგეხსენებათ, როინ შავაძე მზვერავი გახლდათ, პატრიოტი კაცი იყო, თუმცა, ზოგიერთებს მის ერთგულებაში ეჭვი ეპარებოდა. დაგეგმეს სპეცოპერაცია, რის შესახებაც მშვენივრად იცის ბატონმა ბალაძემ და ჩემი აზრით, ისიც იცის, ვინ ესროლა პირველმა შავაძეს, გამოსაძიებელია ეს საკითხები. კიდევ ვიმეორებ, ამის შესახებ ინფორმაციებს ფლობს ალექსანდრე ბალაძე. შავაძის მკვლელობაში ათამდე ადამიანს აქვს მონაწილეობა მიღებული და ამ საქმის გამოიძიება არავითარ პრობლემასთან არ იყო დაკავშირებული. კაცი სულ ტყუილად გასწირეს, შეეშინათ ბალაძეს და პატარიძეს, არ გაეთქვა მათი ბნელი საქმიანობის შესახებ და მოიცილეს...

მინდა ოპონენტებს მარტივი შეკითხვა დავუსვა: რაო, ბატონებო, რაც ჩამოვთვალე და ბევრი სხვაც, რაც არ ჩამომითვლია, ბიძინა ივანიშვილის დავალებით და ჩარევით ხდებოდა? უკუღმართო ხელმძღვანელებო და ჩინოვნიკებო, ყველაფერი თქვენი უყაირათობის და ვინ იცის კიდევ რისი ბრალია.
ჩემი აზრით, სახელმწიფოში უნდა შეიქმნას პასუხის მოთხოვნის მექანიზმი, რომელიც დროულად შეუფასებს ნებისმიერ საჯარო მოხელეს გაკეთებულს და გაუკეთებელსაც, და იმავდროულად იქნება მნიშვნელოვანი რგოლი სამართლიანობის აღდგენის საქმეში.

- ბატონო რეზო, კვლავ შეგეკითხებით, რას იტყვით აჭარის მთავრობის ახალი ხელმძღვანელის კანდიდატურასთან დაკავშირებით. გაქვთ იმედი, რომ უკეთესი მმართველი იქნება?

- აჭარის მთავრობის ხელმძღვანელობის კანდიდატი ახალგაზრდა კაცია და ხელის შეწყობა სჭირდება, ჩვენ მზად ვართ მას მხარში ამოვუდგეთ. აჭარის ხელმძღვანელობამ აჭარის პრობლემები რეალურად უნდა დაინახოს და ქმედითი ნაბიჯები გადადგას, თორემ სიტუაცია აჭარაში საგანგაშოა. 
ლოიალურ, ფასადურ მმართველს აჭარა ვეღარ აიტანს და თუ ახალი მმართველიც იმავე გზას გაუყვება, რასაც პატარაძე დაადგა, მასაც მოუწევს აჭარის დატოვება.

ირანდა კალანდაძე

მეტის ნახვა
19-07-2018, 11:30


ბატონო ბიძინა,
საქართველოს ხელისუფლების მიერ 2017 წლის 27 ოქტომბერს გაკეთებული განცხადების-“აფხაზური ენის დაცვისა და განვითარების სახელმწიფო პროგრამის შექმნის შესახებ”- შემდეგ არ დამიტოვებია თითქმის არც ერთი სახელმწიფო სტრუქტურა, ვისთვისაც არ გამეგზავნა ამავე შინაარსის წერილი, თუმცა, სამწუხაროდ, შედეგი ჯერჯერობით არ ჩანს.


ბოლო 25 წელია სრულიად საქართველო, ერი და ბერი, ძალისხმევას არ იშურებენ, რომ აღდგეს კეთილგანწყობა ქართველებსა და აფხაზებს შორის. სასურველია, გაცხადებულ პროგრამაში ერთ-ერთ საკითხად შევიდეს საქართველოს ეროვნული ვალუტის კუპიურებზე (მათი განახლების კვალობაზე) ნომინალის აღმნიშვნელ, ქართულ და ინგლისურ ენებზე წარწერებთან ერთად, აფხაზური წარწერის დატანაც. ამას განსაკუთრებული სახელმწიფოებრივი მნიშვნელობა აქვს, თუნდაც იმის გამო, რომ აფხაზ ხალხს საქართველოში სახელმწიფო წარმონაქმნი აქვს და თავიანთ სახელმწიფო ენაზე – აფხაზურად – უნდა შეეძლოს ფულის ნიშანზე გამოსახული ნომინალის წაკითხვა. ახლო წარსულს თუ გავიხსენებთ, ფაქტობრივად უნიტარულ სახელმწიფოში, სადაც ჩვენ ვცხოვრობდით, ფულის ნიშანზე თხუთმეტივე რესპუბლიკის ენაზე იყო სათანადო წარწერა.

რამდენადაც ვიცი, ამჟამად განახლების პროცესშია 10 ლარიანი კუპიურა აკაკი წერეთლის პორტრეტით. თუ მოესწრება (ეროვნული ბანკიდან მიღებული ოფიციალური ინფორმაციით დასაბეჭდად არის ჩაშვებული), ჩემი ღრმა რწმენით, აფხაზური წარწერის დატანას პირველად ამ ბანკნოტზე დიდი სიმბოლური დატვირთვა ექნება – „გამზრდელის“ ავტორის მიმართ აფხაზი ხალხის განსაკუთრებული დამოკიდებულების გათვალისწინებით.

ამასთან ერთად, მიზანშეწონილად მიგვაჩნია კიდევ ერთი ნაბიჯის გადადგმა და გაერთიანებული საქართველოს პირველი მეფის ბაგრატ III-ის (ის საქართველის ეკლესიის მიერ წმინდანად არის შერაცხული) და აფხაზური ლიტერატურის კლასიკოსის დიმიტრი გულიას პორტრეტით, აფხაზეთის სხვადასხვა ღირშესანიშნაობებით (ბედიის მონასტერი, ბიჭვინთის სანაპირო, რიწის ტბა და ა.შ.) ოცდახუთლარიანი ბანკნოტის გამოშვება. როგორც ცნობილია, ასეთი ნომინალის ლარის კუპიურის დაბეჭდვა არ არის გათვალისწინებული და ამ წინადადებას გარკვეული წინააღმდეგობები შეიძლება შეხვდეს, მაგრამ ეროვნულმა ბანკმა, შესაძლოა, ამ შემთხვევაში გაითვალისწინოს ის გარემოება, რომ ამ ნომინალის კუპიურა საკმაოდ მოთხოვნადი იყო ახლო წარსულში და მისი გამოშვება არ უნდა იყოს ურიგო.

ჩვენი აზრით, ამ ინიციატივის რეალობად ქცევა, გარკვეულწილად, ხელს შეუწყობს ქართველთა და აფხათა შორის ნდობისა და, როგორც, აღნიშნული განცხადების გაკეთების დროს ითქვა, დამწვარი ხიდების აღდგენას.

ღრმა პატივისცემით,
ვასილ ჯიშკარიანი,
სს „საქართველოს ბანკის“
აფხაზეთის ფილიალის ყოფილი მმართველი.

ამ სტატიას ავტორი უძღვნის აფხაზეთის ცენტრალური ბანკის პირველი თავმჯდომარის, დიდი პატრიოტისა და ინტერნაციონალისტის სვეტლანა შამბას ნათელ ხსოვნას.

მეტის ნახვა
18-07-2018, 13:00


განმანათლებელთა და გონების საუკუნეში დაბადებული გერმანელი ექიმი ფრანც ფრიდრიხ ანტონ მესმერი (1734–1815) პარადოქსი იყო ამ ხანისთვის.

ვოლტერის, დიდროს, და კალიოსტროს თანამედროვე მესმერი, ერთდროულად რაციონალისტიც იყო და ინტუიტიურიც. იგი სწავლობდა ავსტრიის დედაქალაქ ვენის სამიდიცინო სკოლაში. ძირფესვიანად შეისწავლა ოკულტური მეცნიერებები. ასევე ფილოსოფია, თეოლოგია და სამართალი.
1766 წელს მან დაწერა ნაშრომი "`ადამიანის სხეულზე პლანეტების გავლენის შესახებ“. მესმერი ამბობდა რომ ციური სხეულები, დედამიწა და ცოცხალი არსებები გავლენას ახდენენ ერთმანეთზე მაგნიტური ნაკადის მეშვეობთ. მაგრამ მესმერი მისდა საუბედუროდ ძალიან ადრე და ძალიან გვიან, დაიბადა სუპერგონიერ განმანათლებელთა საუკუნეში. ვოლტერს მოსწონდა რუსეთის იმპერატორი ეკატერინე მეორე და არა მესმერი.

ეს იყო თავისი ყოვლისმცოდნეობით მკვეხარა ენციკლოპედისტების ხანა. იყო მატერიალისტების ფაქტიური დიქტატურა.

ასეთი პროფესორებისთვის მესმერი რა თქმა უნდა სულელი და შარლატანი ყბედი იყო, მაგრამ მესმერი არ დანებდა. მან გაცურა დინების წინააღმდეგ. მესმერმა თქვა რომ მთელ სამყაროს სერავენ უხილავი და მოუხელთებელი ტალღები რომელთაც აღიქვამს მარტო ინტუიცია. ეს წინ და უკან მოძრავი იდუმალი ტალღები მიდიან ასე ვთქვათ სულიდან სულამდე, ადამიანიდან ადამიანემდე.

მესმერს არ შეეძლო ამ ტალღების, ამ იდუმალი ძალის წარმომავლობის ნამდვილი სახელის და შემადგენლობის დადგენა. მაგრამ მან ანალოგიით ამ ძალას უწოდა მაგნეტიზმი. მესმერმა სთხოვა აკადემიებს, პროფესორებს თვითონ მათ შეემოწმებინათ საოცარი შედეგები რომლებსაც მან მიაღწია ამ მკურნალობით რომელიც უბრალოდ თითების ოდნავ შეხებით ხდებოდა. მესმერი ურჯულო მატერიალისტ პროფესორებს ემუდარებოდა წინასწარ აკვიატებული აზრის გარეშე შეემოწმებინათ ის საოცარი შედეგები რომლებსაც მან მიაღწია, განსაკუთრებით ნერვიულ ავადმყოფობათა განკურნების შემთხვევები. როგორც ირკვევა მესმერი კურნავდა შთაგონებით, ჩაგონებით.

მაგრამ პროფესორულმა აკადემიურმა მეცნიერებამ ჯიუტად უარყო წინადადება. მან თვალიც კი არ შეავლო მესმერის მიერ წარმოდგენილ და ასჯერ შემოწმებულ ფენომენებს. უცნობი ბუნების ეს უხილავი ენერგია, რომლის გადაცემაც შეიძლება, არ ჯდებოდა განმანათლებელთა და ენციკლოპედისტთა კონცეფციებში. მესმერი მოვიდა ერთი საუკუნით ადრე და რამოდენიმე საუკუნით გვიან.

თავისი ხრწნადი და მოკვდავი ტვინის ყოვლისშემძლეობაში დარწმუნებულ პროფესორებს არ ესმოდათ თუ რა ხდება ადამიანის შიგნი თ. არ ესმოდათ ცნობიერის და არაცნობიერის ურთიერთობისა. ამ პროფესორთა მეცნიერება არ აღიარებს სულის როგორც მოქმედებითი ძალის არსებობას. ასეთი პროფესორების მედიცინა ადამიანს თვლის მექანიზმად და ხედავს მარტო ფიზიკურ ავადმყოფობებს. ის ვერ გრძნობს ფსიქიურ ძვრებს. ის სულით ავადმყოფებისთვის აღიარებს მხოლოდ დალაქის ბარბაროსულ სიბრძნეს: კუჭის აშლას, სისხლის გამოშვებას, ცივ წყალს… სულით ავადმყოფებს აბავდნენ ბორბალზე და ატრიალებდნენ მანამდე სანამ ქაფი არ ამოვიდოდა ამ უბედურთა პირიდან. იყო მკურნალობად გამოცხადებული წამების სხვა ხერხებიც. ეპილეპტიკოსებს ტენიდნენ ნარკოტიკებით. ნერვიულ ავადმყოფობებს ვერაფერს შველიდნენ და აცხადებდნენ რომ ასეთი ავადმყოფობები საერთოდ არ არსებობს და როდესაც მესმერმა თავისი მაგნიტური გავლენით პირველად უშველა ამ უბედურებს აკადემიურმა მედიცინამ მესმერი გამოაცხადა შარლატანად!
ამ ნათელმხილველმა და გამჭრიახმა ადამიანმა მოიარა კრეტინი და ყოყოჩი მატერიალისტების აკადემიები ის ითხოვდა უბრალოდ დაინტერესებას მისი იდეით, დახმარებას და ამ ავანგარდულმა, ყოყოჩი კრეტინების მიერ შარლატანად გამოცხადებულმა მებრძოლმა აღმოაჩინა ბევრად მეტი, ფსიქოთერაპია, ჰიპნოზი, შთაგონება, ტელეპატიაც კი ფესვგადგმულია ტრაღიკული მესმერის ძიებებში და მიღწევებში…

მაგრამ ამით არ მთავრდება ყველაფერი იგი მოცარტის მეგობარი გახლდათ. 1773 წელს ლეოპოლდ მოცარტმა მისწერა წერილი თავის მეუღლეს რომელიც ცხოვრობდა ზალცბურგში. "ბოლოს არ მომიწერია იმიტომ რომ ჩვენ გვქონდა დიდი კონცერტი ჩვენს მეგობარ მესმერთან ლანდშტრასსეზე გაშენებულ მის ბაღში...“ ავანგარდისტი ექიმი, მაგნეტიზორი მესმერი და მამა-შვილი მოცარტები კარგი მეგობრები იყვნენ. უკვე რამოდენიმე წლის შემდეგ, მოხდა ისე რომ კარის ოპერის სახელგანთქმულმა დირექტორმა, იმპერატორის ბრძანების საწინააღმდეგოდ არ მოინდომა მაშინ 14 წლის ვოლფგანგ ამადეუს მოცარტის ნაწარმოები ლა Fინიტა სიმპლიცე-ს შესრულება. აი აქ გამოჩნდა ალღოიანი მესმერის გულუხვობაც. მან ახალგაზრდა კომპოზიტორს მის განკარგულებაში გადასცა თავისი ღია პატარა თეატრი რათა იქ დადგმულიყო მოცარტის პირველი ოპერა Bastien und Bastienne პატარა მოცარტმა არ დაივიწყა მეგობრობის ეს ნიშანი. ის თავის წერილებში სულ ლაპარაკობდა თავის „ძვირფას მესმერზე“ სწავლული, ხელოვნებათა მოყვარული, ფილანტროპი მესმერი მდიდარიც იყო. ის ხომ დაქორწინდა ფინანსთა მრჩეველი ვან ბოშის ქვრივზე, რომელმაც მას დიდი ქონება მოუტანა. შარლატანად გამოცხადებული მესმერის დიდებულ სახლში მუდამ იყო გაშლილი სუფრა მისი მეგობრებისთვის და ახლობლებისთვის. შესანიშნავად სვამდნენ და ჭამდნენ სტუმრები ამ სწავლული, განათლებული და როგორც გულუხვი ისე ფულუხვი და სტუმართმოყვარე მესმერის სახლში. ამ სახლში ინტელექტუალურადაც ხალისობდნენ და ხარობდნენ. იქ ხშირად თვითონ ავტორები, სახლის ახლო მეგობრები, ანუ ჰაიდნი, მოცარტი, გლიუკი, ასრულებდნენ თავის ახალ და ჯერაც გამოუქვეყნებელ ნაწარმოებებს. იქ ისმოდა პუჩინის და რიგინის მუსიკაც. ამას გარდა ამ სახლში დაუღალავად საუბრობდნენ სულიერ პრობლემებზეც. მოკლედ მესმერის სახლი იყო მატერიალისტი აკადემიკოსების აკადემიის პარალელური აკადემია…

მესმერმა მონმარტრის ქუჩაზე მდგარ თავის სახლში გახსნა კლინიკა სადაც მიდიოდა ყველა კლასის ავადმყოფთა ბრბოები. მესმერის კაბინეტში ყოველ დღე ხდებოდა საოცარი სცენები. ბევრი ავადმყოფი ხტოდა და ყვიროდა რომ ისინი განიკურნენ.

სხვები ვარდებოდნენ მუხლებზე და უკოცნიდნენ დიდ მესმერს ხელებს. კიდევ სხვები მესმერს სთხოვდნენ მაგნიტური ნაკადის გაძლიერებას და მისი ხელების მკურნალი მოძრაობების გამეორებას. ამის შემხერდვარე მატერიალისტი პროფესორები და აკადემიკოსები სულ გადაირივნენ და გააფთრდნენ. მესმერი იძულებული იყო წასულიყო პარიზიდან.

მესმერს სჯეროდა უხილავისა, იმისა რომ სამყაროს მსჭვალავს მკურნალი ნაკადი თუ ენერგია რომელიც მოქმედებს ადამიანის სხეულზე. მესმერი დიდად იყო შთაგონებული ისააკ ნიუტონის ნაშრომებით და მიზიდულობის თეორით. ის ამბობდა პლანეტები მოქმედებენ ადამიანის სხეულზეც ძალით რომელსაც ის უწოდებდა ცხოველურ მაგნეტიზმს.

მესმერი დიდ დროს და ენრგიას ხარჯავდა იმისთვის რომ მოეხერხებინა სამყაროს გამმსჭვალავი უხილავი ენერგიების მართვა. მან დაიჯერა რომ მაგიური მკურნალი ძალა აქვს. პარიზში მოდურად ქცეული მისი სეანსების დროს მესმერი თავის პაციენტებს შთაგონებით აძინებდა და აცეკვებდა კიდევაც.

პაციენტების ასეთი რეაქციები გამოწვეული იყო მესმერის ჰიპნოტური ძალით. თვითონ მესმერმა თავიდან არც იცოდა რომ მას ჰქონდა ეს ძალა. ინტენსიური ექსპერიმენტები – მესმერს თავისი მეთოდით შეეძლო პიროვნების თუ ბრბოს ემოციური მდგომარეობის გაძლიერება არანორმალურ მაგრამ კონტროლირებად მდგომარეობამდე. მესმერი პიროვნებათა ემოციური მდგომარეობის გასაძლიერებლად და ასამაღლებლად იყენებდა მუსიკას.

ჰიპნოტური შთაგონების შედეგად მესმერმა მრავალ პაციენტს უშველა. ის ამბობდა რომ შეუძლია სიბრმავის, პარალიჩის, კონვულსიების და სხვა ავადმყოფობების შველა.

მესმერმა სახელი გაითქვა სხვა ქვეყნებშიც. ის ბევრს მოგზაურობდა და ევროპულ არისტოკრატიას შთამბეჭდავად წარუდგენდა თავის ტექნიკას და შესაძლებლობებს. მართალია, მაშინდელმა ოფიციალურმა მატერიალისტურ-პროგრესისტულმა მედიცინამ მესმერი განდევნა, მაგრამ დღეს უკვე ვიცით რომ ჰიპნოზი და ტრანსი კაცობრიობისთვის სულაც არაა უცხო.

ქეთევან ზარნაძე


მეტის ნახვა
18-07-2018, 09:30


საქართველოს პრემიერ-მინისტრ მამუკა ბახტაძის გადაწყვეტილებით, ტყიბულის შახტში მომხდარ ტრაგედიასთან დაკავშირებით, 16 ივლისი გლოვის დღედ გამოცხადდა. საქართველოს ტერიტორიაზე ყველა ადმინისტრაციულ შენობაზე სახელმწიფო დროშა დაშვეს.

მინდელის შახტში დღეს დილით ტრაგედია მოხდა. შემთხვევას ოთხი ადამიანი ემსხვერპლა, დაშავებულია ექვსი ადამიანი. როგორც შსს-ში აცხადებენ, გამოძიების პირველადი ინფორმაციით, მინდელის შახტის ერთ-ერთ გვირაბში, სავარაუდოდ მეთანის აფეთქების შედეგად კედლების დეფორმაციას ჭერის ჩამოშლა მოჰყვა. ფაქტზე გამოძიება საქართველოს სისხლის სამართლის კოდექსის 240-ე მუხლის მეორე ნაწილით მიმდინარეობს. ტყიბულში არსებული ყველა შახტი გამოძიების დასრულებამდე დაილუქება.

საქართველოს პრეზიდენტმა ტყიბულში, მინდელის შახტში დაღუპული მეშახტეების ოჯახს მიუსამძიმრა. გიორგი მარგველაშვილის თქმით, შრომის უსაფრთხოების მიმართულებით არსებული მდგომარეობა მიუღებელია.

„ღრმა მწუხარებას გამოვთქვამ ტყიბულში მეშახტეების დაღუპვის გამო და ვუსამძიმრებ მათ ოჯახებს ამ უმძიმეს წუთებში. უკვე რამდენიმე წელია აღვნიშნავთ, რომ შრომის უსაფრთხოების მიმართულებით არსებული მდგომარეობა მიუღებელია.
აუცილებელია, კანონმდებლობის გამკაცრება და შრომითი უსაფრთხოების მაღალი სტანდარტის დანერგვა.
ის, რომ 2018 წელს შახტებში 11 ადამიანია გარდაცვლილი და 10 დაშავებული, იმის მაჩვენებელია, რომ სახელმწიფოს მხრიდან მსგავს შემთხვევებზე ადეკვატური რეაგირება არ მომხდარა.
მისასალმებელია, ის ფაქტი, რომ შახტი არ განაახლებს მუშაობას, ვიდრე არ დასრულდება როგორც სისხლის სამართლებრივი გამოძიება, ისე მაღალკვალიფიციური საერთაშორისო საინჟინრო-ტექნიკური ექსპერტიზა და შახტში დასაქმებულებს ამ პერიოდის განმავლობაში აუნაზღაურდებათ ხელფასი.
დღეს ისევ რჩება მთავარი კითხვაა - შესაძლებელი იქნება თუ არა, მინდელის შახტაში უსაფრთხოდ მუშაობის გაგრძელება? ყველამ უნდა აიღოს თავისი წილი პასუხისმგებლობა და გადაიდგას ქმედითი ნაბიჯები, იმისთვის, რომ სამუშაო ადგილებზე სიცოცხლის უფლება იყოს დაცული“, - ნათქვამია პრეზიდენტის მიერ გავრცელებულ განცახდებაში.

ტყიბულში მომხდარი ტრაგედიის გამო პრეზიდენტის ადმინისტრაციამ გააუქმა იტალიის პრეზიდენტის დახვედრის ოფიციალური ცერმონია და ვიზიტთან დაკავშირებული ყველა საზეიმო ღონისძიება.

იტალიის პრეზიდენტმა მადლობა გადაუხადა გიორგი მარგველაშვილს მასპინძლობისთვის და მწუხარება გამოთქვა მეშახტეების დაღუპვის გამო. "სამუშაო ადგილებზე ადამიანების დაღუპვა ყოველთვის სამწუხაროა. იტალიელები გიცხადებთ სოლიდარობას", - განაცხადა იტალიის პრეზიდენტმა სერჯიო მატარელამ.

მეტის ნახვა
16-07-2018, 13:30


როგორი პუბლიცისტი იყო თამაზ წივწივაძე, როგორი ლიტერატორი და როგორი რედაქტორი, მკითხველმა შესანიშნავად იცის, მაგრამ შეიძლება ბევრმა არ იცის, როგორი ადამიანი იყო იგი.

ვინც მას მხოლოდ მისი ნაწერებით იცნობდა, შეიძლება არც დამიჯეროს, რომ თამაზი უაღრესად თავმდაბალი, მოკრძალებული და მორიდებული პიროვნება გახლდათ, რომელსაც ყველას ჭირ-ვარამი გულთან ახლოს მიჰქონდა, ყველას გვერდით ედგა და ყველას ეხმარებოდა, რითაც შეეძლო.
ნაცნობ-მეგობრებს და ახლობლებს კი არა, სრულიად უცნობ ადამიანს რომ ეთხოვა რამე, არ დაიზარებდა, ათასგან დარეკავდა, ათას ვინმეს შეაწუხებდა და საქმეს ბოლომდე მიიყვანდა.

90-იან წლებში, როცა ქართულ მწერლობას ძალიან გაუჭირდა, სწორედ თამაზ წივწივაძის ინიციატივით დააარსდა ფონდი, რომელმაც ბევრი მწერალი იხსნა შიმშილით სიკვდილისაგან.

შემდეგშიც ასე იყო _ სიცოცხლის ბოლომდე პირადი "სტიპენდიანტი"

ჰყავდა, რომელსაც საკუთარი ჯიბიდან უხდიდა "სტიპენდიას".

ყველაფერი ეს კი ჩუმად და უხმაუროდ, მოკრძალებით და მორიდებით კეთდებოდა.

სიკვდილშიც მორიდებული და მოკრძალებული კაცი აღმოჩნდა თამაზი. მხოლოდ მისმა ახლობლებმა იცოდნენ, ძალიან ცუდად რომ იყო, არ უწუწუნია, არავინ შუწუხებია _ ჩუმად გამოაღო კარი და წავიდა.

ღმერთმა ნათელში ამყოფოს მისი სული.

ვახტანგ ხარჩილავა

მეტის ნახვა
14-07-2018, 22:30