შორიდან დავიწყებ:
გასული საუკუნის სამოცდაათიანი წლების დასაწყისის პირველი საპროტესტო აქციის მონაწილე ვარ.
მას მერე მიტინგები თითქმის არ გამიცდენია.


აქვე ვიტყვი: ცუდია, რომ ლუსტრაციის კანონი არა გვაქვს მიღებული. უფრო ცუდია და სირცხვილიც, თუ ვერც ერთმა ხელისუფლებამ ეს ვერ გაბედა!

9 აპრილის შემდეგ ყველაზე სამარცხვინო და ქვეყნისთვის გამანადგურებელი რბევა, ალბათ, 2007 წლის 7 ნოემბრის დღე იყო.
დილით ტელევიზორი ჩავრთე…

სასწაულები მესმის, საშინელებები ხდება…

არ მახსოვს, რით და როგორ მივედი.
ქაშუეთის წინ ვდგავარ და კიდევ არ მჯერა, რაც ხდება…
გაშეშებული ვარ ჩემი ასაკისა და ჭაღარის იმედად…
უცებ დავინახე, სამი ნიღბოსანი მორბის ჩემკენ…

შევბრუნდი, ვიკადრე გაქცევა… ერთი და ორი ხელჯოხი კი არა, გვარიანად მომხვდა ბეჭებში, მარჯვენა ხელი საფეთქელზე ავიფარე და… თითქოს მაჯა წამაცალეს, ერთბაშად მარცხენა მუხლი ბეტონს დავკარი, ეკლესიის შიგნით შევგორდი. რომელიღაც მღვდელმა მტაცა ხელი, წამომაყენა, გრძელ სკამზე დამსვა… სამ-ოთხ წუთში მტევანი გამიშავდა, დამისივდა… ხელისგული გადმომიბრუნეს, სისხლიანი მაქვს, დამსხვრეული ძვალი ლურსმანივით მაქვს ამოსული… უცნობი ქალბატონი ცხვირსახოცით თუ თხელი კაშნეთი მწმენდს სისხლს და მიხვევს…

კარგა ხნის მერე წამოვედი. მშრალ ხიდთან, მშობლიურ "ცისკარში" ავედი. თანამშრომლები შემომეხვივნენ. დასამშვიდებელ წამლებს მასმევენ, საავადმყოფოში წაყვანა უნდათ. უარს ვამბობ. ერთადერთ სიტყვას ვიძახი _ უარესი მხვდება! რატომო? _ უკვირთ. თავს ძალად ვიბრუნებ: აბა, ამათგან სხვა რას ველოდი?!. მე ხომ ესენი (ნაციონალები) არც მაშინ მიყვარდა, როცა ხელისუფლებაში არ იყვნენ. რა ნაგვებიც იყვნენ, მაშინაც ვიცოდი! _ ლამის ვყვირი.

ტაქსი გამოიძახეს. სახლში გამიშვეს.

თითქმის ორი თვე მკლავი ბინტით მეკიდა მკერდზე.

26 მაისის ღამეს ვინც იქ იყო, ეხსომება, შეღამებულზე, 9–10 საათისთვის საშინელი თავსხმა წვიმა მოვიდა. თავი ვერსად შევაფარე. საშინლად დავსველდი. გადავწყვიტე, უფროს ძმასთან ავსულიყავი ავლაბარში, წელს ზემოთ მაინც გამომეცვალა. იქნებ გაციებას გადავურჩე, _ ვფიქრობ. ამ დროს ჩემი უმცროსი, თხუთმეტი წლის ბიჭი მირეკავს, მიტინგზე ხარო? ხო-მეთქი. ახლავე მოდი სახლშიო.მაშინვე გადავწყვიტე შინ წასვლა. დიდი დიღმის ბოლო "მარშრუტკას" მივუსწარი. სახლში რომ მივედი, უკვე კინო "რუსთაველიდან" გამოჰყავდათ თავგახეთქილი, ნიკაპებდალეწილი, გაფითრებული და დათრგუნული ადამიანები…

გადავურჩი!.. _ რომელს გადავურჩი, ცემას თუ სიკვდილს, ახლაც არ ვიცი.
ბევრს უთქვამს და მეც გავიმეორებ.

იმ ტრაგიკულ 9 აპრილს რუს ჯარისკაცებს გასაქცევი გზა მაინც არ ჩაუხერგავთ… ქართველმა (!) "ნაციონალებმა" კი ქართველები პირუტყვებივით სასაკლაოზე შერეკეს და გადარჩენის შანსი არ დაუტოვეს.

ნაცებს სინდისის ნატამალი რომ ჰქონდეთ, არც უნდა ფიქრობდნენ უკან მობრუნებაზე!


ახლა იმას ვიტყვი, ქალბატონ სალომესთვის წინა ტურში ხმა რომ არ მიმიცია!
მიუხედავად იმისა, ბატონ ჯანრის კარგად ვიცნობდი, "ცისკრის" ხშირი ავტორიც იყო. ვახლობლობდით. სტუმრადაც ვყოფილვართ მათ ოჯახში, კარგი ფრანგული ღვინო და ყავაც დამილევია… თუმცა მე ჩემს უახლოეს მეგობარს და გულმართალ ქართველ კაცს _ ბატონ თემურ შაშიაშვილს მივეცი ხმა.

ახლახან ქალბატონმა სალომემ ბრძანა _ დღეს არის არჩევანი ორ საქართველოს შორისო!
ვეთანხმები.

მხარს ვუჭერ!

მის მოწინააღმდეგეს, ბატონ ვაშაძეს, ერთი ურემი ხმა რომ მქონდეს, ერთს არ ვუწილადებდი. რაც შეეხება ქალბატონ სალომეს, ვპირდები, ათ-თხუთმეტ ხმას ოჯახში და საახლობლო-სანათესაოში მაინც მოვიპოვებ მის სასარგებლოდ!

ზაურ კალანდია
P.S.
წინა კვირას ჩემს მშობლიურ ქალაქ ზუგდიდში ვიყავი. ორი-სამი "ბრძოლა" გადავიხადე; ვიფიქრეთ, ვიკამათეთ… დავრწმუნდი, მეგრელები საღად აზროვნებენ და ფიქრობენ და 28 ნოემბერს სწორ და გონივრულ არჩევანს გააკეთებენ.
ზ.კ.

მეტის ნახვა
24-11-2018, 21:00


საუკუნე გავიდა პირველი მსოფლიო ომის დასრულებიდან, ანუ იმ ომიდან, რომელიც ისტორიკოსებმა ერთ-ერთ უდიდეს სისხლისმღვრელ ომად აღიარეს. ამ ომმა 18 მილიონი ადამიანის სიცოცხლე შეიწირა. მართალია, იმ დროს `ისპანკად~ წოდებული გრიპიც მძვინვარებდა, რომელმაც უამრავი ადამიანი იმსხვერპლა, მაგრამ საომარმა მოქმედებებმა თავისი გააკეთა. 1918 წლის 11 ნიოემბერს, დილის 5 საათზე, პარიზის შემოგარეში, კამპენსკის ტყეში, მატარებლის მარშალ პოშის ვაგონში ანტანტის წარმომადგენლებმა და გერმანიამ ხელი მოაწერეს შეთანხმებას ცეცხლის შეწყვეტაზე. დილის 11 საათიდან კი შეწყდა საომარი მოქმედებები. აღნიშნული ადგილი იმის გამო აირჩიეს, რომ გერმანიის დელეგაციისთვის დამცირება და შეურაცხყოფა აერიდებინათ. უნდა გავიხსენოთ 1940 წელი, როდესაც პირსისხლიანმა ჰიტლერმა სწორედ ამ ვაგონში მოაწერინა ხელი ფრანგებს კაპიტულაციაზე, რის შემდეგაც ის დაწვეს. თუმცა ფრანგებმა ისტორიული ვაგონი მეორე მსოფლიო ომის დასრულების შემდეგ აღადგინეს. გამარჯვებულმა მხარემ ანტანტამ გერმანიას მკაცრი რეგულაციები დაუწესა. თუმცა ისტორიკოსების მტკიცებით, პირველ მსოფლიო ომში გამარჯვებული არ ყოფილა.

ადამიანური მსხვერპლის გარდა, ომმა სხვა უმძიმესი შედეგებიც მოუტანა სამყაროს. კერძოდ, დაინგრა ოთხი დიდი იმპერია _ ოსმალეთის, ავსტრია-უნგრეთის, რუსეთისა და გერმანიის. მსოფლიოში დაისადგურა ეკონომიკურმა კრიზისმა, რუსეთში მოხდა ერთბაშად ორი რევოლუცია (გადატრიალება), რომლებმაც თავისი უარყოფითი როლი ითამაშეს სამყაროში. ისტორიკოსები იმასაც აღნიშნავენ, რომ სწორედ ომში დამარცხებამ შეუწყო ხელი გერმანიაში ფაშიზმის აღორძინებას.

პირველი მსოფლიო ომის დასრულების 100 წლისთავის აღსანიშნავად პარიზში პომპეზური ღონისძიება გაიმართა. საფრანგეთის დედაქალაქში 70-მდე ქვეყნის პირველი პირები და სხვადასხვა საერთაშორისო ორგანიზაციების ხელმძღვანელები ჩავიდნენ. ღონისძიება 11 ნოემბრამდე რამდენიმე დღით ადრე დაიწყო. თავდაპირველად პარიზს ორი დღით ადრე ბრიტანეთის პრემიერ-მინისტრი ტერეზა მეი ეწვია, რომელმაც ყვავილებით შეამკო ბრიტანელი ჯარისკაცების საძმო საფლავი. თუმცა ძირითად ღონისძბემაზე არ დარჩა. რატომ, უცნობია.

ცეცხლის შეწყვეტის შეთანხმების დღეს, 11 ნოემბერს დილით საფრანგეთის პრეზიდენტმა ემანუელ მაკრონმა და გერმანიიც კანცლერმა ანგელა მერკელმა კამპენსკის ტყეში დადგეს მემორიალური დაფა, ისტორიულ ვაგონში ისაუბრეს და მემორანდუმსაც მოაწერეს ხელი. როგორც უკვე აღვნიშნეთ, საზეიმო ცერემონია მართლაც პომპეზური და სანახაობრივადაც ლამაზი იყო. მიმომხილველები აღნიშნავენ, რომ მაკრონისთვის საუკუნის ღონისძიება იყო, მან შეძლო დაპირისპირებული ქვეყნების თუნდაც ერთი დღით შეკრება. მშვიდობის ფორუმზე სიტყვით გამომსვლელი პოლიტიკოსები ერთხმად აღნიშნავდნენ, რომ მშვიდობას ალტერნატივა არ აქვს.

მიუხედავად საუკეთესოდ გამართული საზეიმო ცერემონიისა, მაკრონს გულში ხინჯი მაინც დარჩა _ ამერიკის შეერთებული შტატების პრეზიდენტი დონალდ ტრამპი ამჯერად აშკარად ცივად შეხვდა, ხელიც არ ჩამოართვა, რაც შეუმჩენეველი არ დარჩათ ექსპერტებს. მიმომხილველები აღნიშნავენ, რომ მაკრონის იდეა ევროკავშირში შეიქმნას დამოუკიდებელი თავდაცვის სისტემა, ტრამპმა შეურაცხყოფად მიიღო. მით უფრო, მაკრონმა განაცხადა, ევროკავშირს დამოუკიდებელი სამხედრო შენაერთი რუსეთის, ჩინეთის და აშშ-სგან თავდაცვისთვის სჭირდებაო. ტრამპმა უკმაყოფილება ჯერ კიდევ პარიზში გამგზავრებამდე აშკარად გამოთქვა სოციალურ ქსელებში. ექსპერტები მიიჩნევენ, რომ ევროპას დასახელებული ქვეყნებიდან არავინ შეუტევს, მაკრონმა ტრამპს ამით პასუხი გასცა ნატოს საწევრო გადასახადის გაზრდაზეო. როგორ დასრულდება ტრამპის და მაკრონის დაპირისპირება, მომავალი გვიჩვენებს. თუმცა ძალა აღმართს ხნავსო, ნათქვამია.

პარიზში საზეიმო ღონისძიებას პოლიტოლოგები განსაკუთრებულად ელოდნენ. ჯერ კიდევ ორი კვირის წინ დაანონსებული იყო, რომ საფრანგეთის დედაქალაქში ერთმანეთს პირისპირ შეხვდებოდნენ დონალდ ტრამპი და რუსეთის პრეზიდენტი ვლადიმირ პუტინი. თუმცა საზეიმო ცერემონიამდე ემანუელ მაკრონმა მხარეებს სთხოვა, მათი შეხვედრა პარიზში არ გამართულიყო, რათა ამას საზოგადოების ყურადღება ძირითადი ღონისძიებიდან სხვა თემაზე არ გადაეტანა. მასპინძელ მხარეს პროტოკოლის შეცვლაც მოუხდა _ ელისეის სასახლეში საზეიმო სადილზე ტრამპი და პუტინი არა გვერდიგვერდ, არამედ პირისპირ დასვეს. ასეთ პირობებში პირისპირ საუბარი შეუძლებელი იყო. თუმცა სადილის შემდეგ სასახლე ყველაზე ბოლოს, საკმაოდ მოგვიანებით, ტრამპმა და პუტინმა დატოვეს. ჟურნალისტები თავდაპირველად ვარაუდობდნენ, რომ მათ ისაუბრეს. მათი ვარაუდი დაადასტურა პუტინის წარმომადგენელმა დიმიტრი პესკოვმა. თუმცა მას არ დაუზუსტებია, რა თემაზე ისაუბრეს პრეზიდენტებმა. ცნობილი გახდა, რომ ტრამპი-პუტინის შეხვედრა თვის ბოლოს არგენტინაში, `დიდი ოცეულის~ სამიტზე გაიმართება. არგენტინის პრესის ინფორმაციით, ტრამპმა ორგანიზატორებს სთხოვა, მისი არგენტინაში ვიზიტი ერთი დღით შეემცირებინა თ. პუტინი-ტრამპის პირისპირ შეხვედრა არგენტინაში კვლავ სათუო გახდა. მართალია თუ არ არგენტინული პრესის ინფორმაცია, უცნობია. თუმცა მიმომხილველები იმასაც აღნიშნავენ, რომ ორივე პრეზიდენტის მოქმედების წინასწარ გათვლა შეუძლებელია.

პოლიტოლოგები ვარაუდობდნენ, რომ გასულ კვირას აშშ-ში გამართული არჩევნები ტრამპისთვის ერთგვარი რეფერენდუმიც იქნებოდა. რესპუბლიკური პარტია ცდილობდა პროვინციული ქალაქების ამომრჩეველთა მხარდაჭერა მოეპოვებინა, დემოკრატები სხვადასხვა ელექტორატზე მუშაობდნენ. არჩევნები დასრულდა, მაგრამ ვინ გაიმარჯვა, ტრამპმა რესპუბლიკურ პარტიასთან ერთად თუ დემოკრატებმა, გაურკვეველია. ექსპერტები მიიჩნევენ, ანგარიში საყაიმოაო. დონალდ ტრამპს სენატში უმრავლესობა აქვს, კონგრესში კი დემოკრატებმა მოიპოვეს უპირატესობა. ექსპერტების განცხადებით, ძალთა ასეთი გადანაწილებით დემოკრატები პრეზიდენტის იმპიჩმენტს ვერ შეძლებენ, რადგან კონგრესის გადაწყვეტილებას სენატი დაბლოკავს. თუმცა იმასაც აღნიშნავენ, რომ დამოუკიდებელი საგარეო პოლიტიკის გატარებაში ტრამპს კონგრესი შეუშლის ხელს, რადგან ეს უწყება კურირებს საგარეო პოლიტიკას.

მრავალი ათწლეულის მანძილზე აშშ-ში რომ მწვავე პერიოდია, ამას თავად ამერიკელი პოლიტოლოგებიც ადასტურებენ. იმასაც ამბობენ, რომ 2020 წლის საპრეზიდენტო არჩევნები, შესაძლოა, 1860 წლის არჩევნებს დაემსგავსოს (იმ წლებში მოხდა აშშ-ში სამოქალაქო დაპირისპირება). ექსპერტები შიშობენ, რომ საზოგადოების დაყოფამ, შესაძლოა, ამერიკაში ახალი სამოქალაქო ომი გამოიწვიოს. ასევე აღნიშნავენ, რომ დღეს აშშ-ში `ცივი სამოქალაქო ომი~ უკვე მიმდინარეობს. ტრამპი დანებებას არ აპირებს. არჩევნების შემდეგ მან უკვე შეცვალა მთავარი პროკურორი. ამასთან, უკვე დააანონსა, რომ მეორე ვადითაც აპირებს პრეზიდენტობას, რისთვისაც უკვე დაიწყო ფინანსების მოძიება.

ახალი კონგრესი, რომელიც მუშაობას იანვრიდან შეუდგება, მრავალფეროვანია. იმის გარდა, საკანონმდებლო ორგანოში რომ ბევრი ქალია, არიან მუსულმანები, არატრადიციული სექსუალური ორიენტაციის წარმომადგენლებიც. არჩევნების დროს მოხდა კურიოზული შემთხვევა _ ერთ-ერთ შტატში გაიმარჯვა პირმა, რომელიც არჩევნებამდე ორი თვით ადრე გარდაიცვალა. ფლორიდასა და ჯორჯიის შტატებში გუბერნატორების გამოსავლენად ხმების ხელახალი დათვლა მიმდინარეობს. რას მოუტანს აშშ-სა და სამყაროს იქ არსებული ფაქტობრივი ორხელისუფლებიანობა, სავარაუდოდ, მალე გამოჩნდება.
გერმანიაში გასულ კვირას გამოააშკარავეს მოქმედი სამხედრო მოსამსახურეთა რადიკალური დაჯგუფება, რომელიც პოლიტიკურ მკვლელობებს გეგმავდა. დაწვრილებით საქმის დეტალები გერმანულ პრესას ჯერ არ გაუშუქებია.

პოლიტიკური ვითარება ბუნდოვანი რჩება არა მხოლოდ ცალკეულ რეგიონებში, არამედ მსოფლიოში. გაითვალისწინებენ თუ არა პოლიტიკოსების საუკუნის წინანდელ შეცდომებს დღევანდელები და ააცილებენ თუ არა სამყაროს კატასტროფას, საკითხავია. პოლიტოლოგების ნაწილი მიიჩნევს, რომ მთელმა რიგმა პოლიტიკოსებმა ბოლო 30 წლის განმავლობაში უკვე გაიმეორეს საუკუნის წინანდელი შეცდომები. როგორც ჩანს, ისტორია მართლაც მეორდება.

გია ბურდული

მეტის ნახვა
24-11-2018, 16:00


ალბათ, სულ რაღაც ორი-სამი თვის წინ ბიძინა ივანიშვილი ვერც კი წარმოიდგენდა, რომ საპრეზიდენტო არჩევნების მეორე ტურში ამდენი ბრძოლა დასჭირდებოდა, ამდენი ხარჯის გაღება მოუხდებოდა და მეტიც, ნოემბრის შუა რიცხვებში ტელე "იმედის" ეთერში ისევ მოუწევდა ბოდიშნარევი მტკიცება, რომ ხალხი სამართლიანად არის გაბრაზებული. გრძნობადობა არ იყო პარტიაში, მთავარი გუნდი მოსწყდა ხალხსო. იქამდე მიმიყვანეს, რომ მეც კი გამამწარეს და გამომიყვანეს მწყობრიდან, მკაცრი საუბრები მქონდა, წინასაარჩევნო კვლევებიც კი ვერ ჩაატარეს ხეირიანად, რა ცდომილებაც იყო, თავად ნახეთო. რასაკვირველია, ბიძინა ივანიშვილი ვერ წარმოიდგენდა, თუ მეორე ტურის წინა დღეებში თეონა გეგელიას და ნიკა ლალიაშვილის წინაშე მოუწევდა თავის მართლება. არადა, ამ კაცს არაფერი აქვს საბოდიშო და თავის გასასამართლებელი, ამდენი სიკეთე ქვეყნისთვის არავის გაუკეთებია. ჩვენ არ უნდა ვიყოთ უმადურები, როგორც ბატონი ბიძინა ამბობს, ყველაფერს უნდა დავარქვათ თავისი სახელი.

ბიძინა ივანიშვილის ახალი იდეა: აღარ არის ყალბი გუნდურობის დრო, მხოლოდ ერთგულებაზე ორიენტირება არ არის სამართლიანი. ჩვენ გვჭირდება მხოლოდ პროფესიონალები. იმედია, პროფესიონალები მხოლოდ "ნაციონალები" არ აღმოჩნდებიან.

ივანიშვილის აზრით, ძალიან ცუდია, რომ დღეს ბრძოლა ისევ მიდის თეთრსა და შავს შორის. "ოცნებას" არ ჰყავს ღირსეული ოპონენტი, "ნაცმოძრაობა" არის დესტრუქციული ძალა. სწორედ ამიტომ დაიწყო რღვევის პროცესი "ქართულ ოცნებაში". დიახ, მმართველმა ძალამ უნდა შეძლოს, რომ სიცრუის მძევლად არ დატოვოს მოსახლეობა, ანუ "რუსთავი 2"-ის მძევლად. ყოფილი პრემიერ-მინისტრი ნათლად და ჯანსაღად აფასებს მოვლენებს, ეს კი იძლევა იმის იმედს, რომ მეორე ტურის შემდეგ ყველაფერი სხვანაირად იქნება.

რაც შეეხება 600 ათასი ვალჩამოწერილის ხსენების დღეს, ანუ მთავრობის გადაწყვეტილებას, მისი აზრით, ხალხს უნდა შევუმსუბუქოთ ყოფა. ეს პროცესი გაგრძელდება ადგილობრივი მმართველობების დონეზე. ესეც მართალია, ხალხზე ზრუნვა არ უნდა იყოს ერთჯერადი. დაქირავებული ხელისუფლება უნდა იყოს მუდმივად აქტიურ რეჟიმში. ბიძინა ივანიშვილი გვარწმუნებს, რომ პარტია და მთავრობა იზრუნებს ხალხზე, ერთ წელიწადში, უფრო ადრე, მე ყველაფერს გავაკეთებ იმას, რაც შესაძლებელია.

ბიძინა ივანიშვილს, როგორც თვითონ ამბობს, შეხვედრა ჰქონია საარჩევნო შტაბების უფროსებთან და უთქვამს, ან იმუშავეთ განსაკუთრებულ რეჟიმში, ან დატოვეთ თანამდებობებიო. მოგეხსენებათ, შტაბების ხელმძღვანელებად არჩევნების წინ ავტომატურად გახდნენ რაიონების მერები. სხვათა შორის, უკვე არის კულუარული ინფორმაცია, რომ მეორე ტურის შემდეგ მერების უმეტესობა დაემშვიდობება თანამდებობას, შესაბამისად, "ბორჯომისა" და ყავის სმას, აღარაფერს ვამბობ "ნაშებსა" და რესტორნებზე.

ბიძინა ივანიშვილს არ შეცვლია აზრი "ნაცმოძრაობაზე". ამ დესტრუქციულ ძალას ძალიან ღრმად ჰქონდა ფესვები საერთაშორისო არენაზე. დღეს ევროპამაც და ამერიკამაც იცის, ვინ არიან ესენი. ჩვენ ვერ დავუშვებთ, რომ ეს ძალა ისევ შემობრუნდეს, ასე დავაბნევთ საერთაშორისო თანამეგობრობას. ესენი ვერ მობრუნდებიან, ამის პირობას გაძლევთ, უბრალოდ ამათი მოქმედება აფერხებს ინვესტიციების შემოდინებას. თუმცა, ნიკა ლალიაშვილის შენიშვნის თანახმად, ყველაფერი მზადაა რევოლუციისთვის. ივანიშვილის თქმით, "ნაცმოძრაობას" კი აქვს მზად რევოლუციური სცენარი, მაგრამ არ გააჩნია რესურსი, 8 ათას კაცზე მეტის გამოყვანა არ შეუძლიათ. საზოგადოებამ კარგად შეაფასა მოვლენები, როგორ მოვახერხეთ, რომ ამხელა ნდობა აქამდე მივიყვანეთ? ხალხი ნაწყენია, მაგრამ არა გაბრაზებული. ზუსტი შეფასებაა, ხალხი ნაწყენია და არა გაბრაზებული. დასკვნა, რევოლუციის "მამებს" აქვთ სურვილი, მაგრამ არ აქვთ რესურსი და დასავლეთის მხარდაჭერა.

ბიძინა ივანიშვილი მოუწოდებს მოსახლეობას, ყველა გამოვიდეს საარჩევნო უბნებზე, ნუ დავსხდებით სახლში. ყველამ ვიცით, ვინ არიან ესენი და რას წარმოადგენენ. რატომ დაბრუნდა პოლიტიკაში ბატონი ბიძინა? აქ თვალშისაცემია ისიც, რომ ეს კაცი უფრო თვითკრიტიკულია, ვიდრე ოდესმე:
„ჩართულობა გუნდის წევრებისა იყო ძალიან დაბალი. იგივე ხდებოდა ზუსტად რეგიონებშიც. სანამ მეორე ტური დადგებოდა, პირველი ტურის შემდგომ უფრო სწორად, მრავალჯერადი შეხვედრა მქონდა ყველა მუნიციპალიტეტთან, მერების, საკრებულოს თავმჯდომარეები, შტაბების უფროსების, სამწუხაროდ რასაც ვხედავდი, იგივე იკვეთება, რომ ძალიან ბევრ მათგანში იგრძნობოდა მსგავსი პრობლემა, რაც იყო მთავრობასა და პარლამენტს შორის ურთერთობა, უფრო სწორად, არ იყო კარგი, ისეთივე დამოკიდებულება იკვეთება ბევრ რეგიონში. პრობლემაა მერსა და საკრებულოს თავმჯდომარეს შორის ურთიერთობაზე. ნაცვლად იმისა, რომ ის პრობლემები, რომლებიც უხვადა გვაქვს ჩვენ და უხვად აქვს ჩვენს ქვეყანას, გუნდი გაერთიანდეს, მხარი მხარს შეუდგან და ამ შემთხვევაშიც კი რთულია პრობლემის დაძლევა, დაეხმარონ ერთმანეთს და მაქსიმალურად შეუმსუბუქონ ხალხს ის გაჭირვება, რაც აქვს ჩვენს მოსახლეობას, ჩვენ ამას არც ვმალავდით, დღესაც კარგად ვაცნობიერებთ, რომ ასეთი ეკონომიკა გვაქვს, როგორიც გვაქვს. ჩვენ ღარიბი ეკონომიკა გვაქვს, ჩვენ ღარიბ ქვეყნებში გავდივართ და ამ დროს ხელისუფლებას მართებს განსაკუთრებული მცდელობა იმისა, რომ საზოგადოებას ამ გაჭირვების ფონზე მაქსიმალური გრძნობადობა უნდა ჰქონდეს იმისა, რომ ეს არის მისი ხელისუფლება, რომ ეს მის განცდებშია და მაქსიმუმს აკეთებს იმისთვის, რომ მათ ყოფა შეუმსუბუქოს".

როგორც ხედავთ, ივანიშვილს გაცილებით ადრე სცოდნია იმ პრობლემების შესახებ, რამაც მეორე ტურამდე მიგვიყვანა. მე ხშირად ვამბობ ხოლმე, ზოგი ჭირი მარგებელია-მეთქი, ალბათ სხვანაირად "ქართული ოცნება" ვერც გამოცოცხლდებოდა 2020 წლის საპარლამენტო არჩევნებს კრახით დაასრულებდა. ეს იქნებოდა მოულოდნელი კატასტროფა ქვეყნისთვის. იგივე გაიმეორა ბიძინა ივანიშვილმაც — ზოგი ჭირი მარგებელია:

"აშკარად ჩანს, რომ გუნდმა დაკარგა გრძნობადობა ხალხთან ურთიერთობის. გაჩნდა ბზარი ხელისუფლებასა და საზოგადოებას შორის. ამას მრავალგვარი მიზეზები აქვს, მე ყველას არ ჩამოვთვლი. ერთ-ერთზე გეტყვით, რომ გუნდი, რომელიც ხელისუფლების ყველა რგოლს და ყველა შტოს ფლობს, როგორც წესი, თვითდაჯერებულობა ემატება, ერთ-ერთზე გავაკეთებდი მე მახვილს, რომ ზედმეტი თვითდაჯერებულობა ერთ-ერთი მიზეზი იყო იმისა, როგორც ვითარდებოდა და როგორც ხდებოდა ურთერთობა საზოგადოებასთან. ამის კარგი გამოხატულება გახლდათ თუგინდ ის, რომ პირველ ტურში შედეგებს, რასაც ველოდებოდით და რაც თქვენს კითხვაშიც ჩანს, მე ვიყავი ჩართული რა თქმა უნდა, მაგრამ ისევ ძველ გუნდზე და ძველ ინფორმაციაზე დაყრდნობით. იმ დონეზე იყო გუნდი დარწმუნებული საკუთარ ძალებში, რომ კვლევებიც კი პროფესიონალური არ ჩაუტარებია თ. რეალურად პარტიული რესურსით ახერხებდნენ კვლევების ჩატარებას და ასეთი ცდომილება, ეს იყო სირცხვილი. ის, რასაც ელოდნენ, ეგზიტპოლების შედეგების შემდეგ მეც კი გამომიყვანეს მწყობრიდან, ეს იყო სირცხვილი. ძალიან მკაცრი საუბარი მქონდა ამის შემდგომ და არათუ გრძნობადობა, მოლოდინი ჰქონდათ აბსოლუტურად აცდენილი რეალობასთან. 14% სხვაობა სირცხვილია, ამას კვლევა აღარ ქვია, დამეთანხმებით. ძირითადზე ვსაუბრობ მე. მე კარგად დავინახე, ვხედავდი, ზოგი ჭირია მარგებელია, მე ძალიან მიყვარს ეს გამონათქვამი. თვითონ გუნდმაც მიიღო ცივი შხაპი და ყველაზე სასიამოვნო რაცაა, დავინახეთ რომ თურმე საზოგადოება აფასებს, როგორ იქცევი და მათ გააკეთეს შესატყვისი რეაქცია".

აი, ეს გახლდათ ძირითადი შინაარსი ამ ინტერვიუსი. რაღა დაგიმალოთ და… მე პირადად კმაყოფილი დავრჩი იმის გამო, რომ ბიძინა ივანიშვილმა კიდევ ერთხელ მოუხაზა "ნაცბანდელებს". პრინციპში, ამას მოხაზვა კი არა, "მოყომარება" უფრო ჰქვია. ისე, ვერც იმას დაგიმალავთ, რომ ბატონმა ბიძინამ საკუთარ გუნდსაც კარგა გვარიანად მოუხაზა. ეს კი, გამოგიტყდებით და უფრო სასიამოვნო იყო...

გელა ზედელაშვილი

მეტის ნახვა
22-11-2018, 14:30


ნაციონალურმა მოძრაობამ“ კამპანია დაიწყო ქსენოფობიით, გააგრძელა ტერორიზმითა და ბოლოს დააგვირგვინა ანტისემიტიზმით, – ამის შესახებ დამოუკიდებელი საპრეზიდენტო კანდიდატის, სალომე ზურაბიშვილის მიერ გავრცელებულ განცხადებაშია აღნიშნული. მისი თქმით, „ნაციონალური მოძრაობა“ ევროპული კამპანიისთვის კატეგორიულად მიუღებელ მეთოდებს იყენებს.

„ამ დღეებში საქართველოს ყოფილი პრეზიდენტის მიხეილ სააკაშვილის ანტისემიტურმა გამონათქვამებმა კიდევ უფრო ნათელი გახადა, თუ რატომ არის ქვეყნისთვის მნიშვნელოვანი 28 ნოემბერს პრინციპული არჩევანის გაკეთება.

მთელი წინასაარჩევნო პერიოდის განმავლობაში „ნაციონალური მოძრაობა“ იყენებს ევროპული კამპანიისთვის კატეგორიულად მიუღებელ მეთოდებს. მან ეს კამპანია დაიწყო ქსენოფობიით, გააგრძელა ტერორიზმითა და ბოლოს დააგვირგვინა ანტისემიტიზმით.
მინდა საზოგადოებას შევახსენო, რომ ჩვენი ქვეყნის სტუმრების მოხსენიება „გაძვალტყავებულ ჯღანებად“ არის ქსენოფობიის ნათელი მაგალითი. სიცოცხლის მოსპობის მუქარა, რომელსაც სულ ცოტა ხნის წინ „ნაციონალურ მოძრაობასთან“ დაკავშირებული ადამიანისგან ვიღებდით მე და ჩემი შვილები, არის ტერორიზმის მაგალითი.

შეურაცხმყოფელი გამონათქვამები, რომლებიც მიხეილ სააკაშვილმა გამოიყენა ჩემს კამპანიაში ჩართული ისრაელიდან მოწვეული პიარ სპეციალისტის – ბ-ნ მოშე კლუგჰაფტის მიმართ, არის ანტისემიტიზმის სამარცხვინო მაგალითი.
ქსენოფობია, ტერორიზმი და ანტისემიტიზმი – ეს არის გზა ტოტალიტარიზმამდე“, – აცხადებს სალომე ზურაბიშვილი.

მისივე თქმით, „ნაციონალური მოძრაობა“ მისი სახელითაც ავრცელებს ცრუ ინფორმაციას, რომელიც შუღლს აღვივებს ქვეყანაში.

„გარდა ამისა, უნდა აღვნიშნო, რომ მთელი წინასაარჩევნო კამპანიის განმავლობაში „ნაციონალური მოძრაობა“ ავრცელებდა ცრუ ინფორმაციას ჩემი სახელით, თითქოს მე რაღაც გაუგონარ, აბსურდულ განცხადებებს ვაკეთებდი კახელებზე, მეგრელებზე. ეს არის შუღლის გაღვივება ქვეყანაში, ხოლო კუთხურობის ნიშნით დაპირისპირების მცდელობა ასევე არის გზა ტოტალიტარიზმისკენ.

მინდა საპრეზიდენტო არჩევნებამდე რამდენიმე დღით ადრე კიდევ ერთხელ განვაცხადო, რომ: არც მე და არც ქართველ ხალხს არ გვეშინია მუქარის; სააკაშვილის შეფასებები ვერ მოახდენს გავლენას ქართულ-ებრაულ მრავალსაუკუნოვან მეგობრობაზე; დარწმუნებული ვარ, რომ მიხეილ სააკაშვილი და მთელი „ნაციონალური მოძრაობა“ ვერ შეცვლის ქართველი ხალხის საბოლოო გადაწყვეტილებას.

მტკიცედ მწამს, რომ 28 ნოემბრის არჩევნებზე საქართველო გააკეთებს პრინციპულ არჩევანს“, – აღნიშნულია სალომე ზურაბიშვილის მიერ გავრცელებულ განცხადებაში.

მეტის ნახვა
20-11-2018, 13:30


ნაციონალური ხელისუფლების არჩევნების გზით ქვეყნის სადავეებიდან მოშორების შემდეგ, საზოგადოებამ ნახა ამ ხელისუფლების მიერ ჩადენილი ისეთი დანაშაულობების ამსახველი ვიდეო-მასალა (რასაც თავად მწამებლები იწერდნენ), რაც პირდაპირ ამხელდა ნაცხელისუფლების ფაშისტური რეჟიმს, მაგრამ ხელისუფლებამ, რომლითაც ნაცები ხალხმა ჩაანაცვლა და რომელსაც ენდო, ეს ფირები „გაანადგურა“, ყოველშემთხვევაში ასე განაცხადეს.

რაოდენ გასაოცარიც არ უნდა იყოს, ევროპისაკენ მომზირალი ხელისუფლება, მოიქცა „აფრიკულად“, კრიმინალს ხელი დააფარა! ეს მოხდა „ქართული ოცნების“ ხელისუფლებაში მოსვლის გარიჟრაჟზე და ამით გაცხადდა ხელისუფლება შემდეგ რა ნაბიჯს გადადგამდა და ეს ნაბიჯი იყო – კოჰაბიტაცია. საზოგადოების ის ნაწილიც კი, რომელიც დღემდე მხარს უჭერს ხელისუფლებას, კოჰაბიტაციას და კრიმინალზე ხელის დაფარებას, არ და ვერ შეეგუა, რაც „ვერ გაიგო“ ხელისუფლებამ, იმ ფონზე, როცა მისი წინამორბედი ხელისუფლების პირობებში, ნაცების მომხრეები, კრიმინალის არსებობის მიუხედავად, ნაცების მომხრეებად დარჩნენ. ამიტომ, როცა დღეს, მკვლელის დაკავების მოტივით, ზაზა სარალიძემ კარვები გაშალა თბილისის ცენტრში, ხელისუფლება, ამ საპრეზიდენტო არჩევნების მეორე ტურის წინ, დაიბნა. ეს ყველაფერი კი გამოიწვია, იმან, რომ როცა კანონის აღსრულების მოთხოვნით ქუჩაში გამოსულმა, შვილმკვდარმა მამამ და მისმა მომხრეებმა ნაციონალური მოძრაობიდან (ნაცებისაგან ვითომ გამოყოფილმა პარტიებმა და არასამთავრობოებმა) შეურაცხყოფა მიაყენეს პოლიციას და ამაზე სათანადო რეაგირება ხელისუფლებას არ მოუხდენია. ეს გამოიწვია იმან, რომ როცა ზაზა სარალიძემ აგინა, აფურთხა და თავი გაუტეხა პოლიციელს, ხელისუფლებამ ესეც „გადაყლაპა“. ამიტომ მივიღეთ დღეს კარვები ქალაქის ცენტრში. ეს იმ დროს, როცა სასამართლო პროცესი მიმდინარეობს ხორავას ქუცაზე მომხდარი მკვლელობის საქმეზე და როცა დაკავებულია ყველა, ვისაც კი ოდნავ შემხებლობა ჰქონდა ამ ფაქტთან.

სარალიძე ამბობს, რომ მას უნდა მკვლელის დაკავება და მან იცის ვინ არის ეს, მაგრამ არც სარალიძე და არც მისი მომხრეები, „გამომძიებლები“ კააა და ზვიად კუპრავა მკვლელის ვინაობას, რომელიც თურმე „გამოძიებით“ დაადგინეს, არ ასახელებენ. მაშ, რატომ დგას ქუჩაში სარალიძე და სანაცეთი? რატომ შლიან კარვებს? სრულიად საქართველო ციხეში რომ ჩასვან? რას ითხოვენ? და, აი, აქაც, როცა ხელისგულზე დევს ყველაფერი, ხელისუფლება უძლურია შეაჩეროს პროცესები, რომელიც რბილად რომ ვთქვათ, მკვლელობაში დამნაშავის დაკავებას, ნამდვილად არ ეხება. საოცარია, მაგრამ ხელისუფლების წინააღმდეგ, ამ კონკრეტულ საქმეში, ამ ხელისუფლების მომხრეებიც აფიქსირებენ თავიანთ პოზიციას, ისე, რომ არავინ აქცევს დეტალებს ყურადღებას.

აქციის დროს სარალიძის დედას გული რომ შეუწუხდა, სიმართლის მაძიებლებმა გამოაცხადეს, პოლიციამ სცემაო, ამ დროს სარალიძის დედა აცხადებს, რომ მას გული შეუწუხდა და თავად დაეცა. მაგრამ ეს არაფერია, ამას არავინ აქცევს ყურადღებას, მთავარია ითქვა რომ ხელისუფლება შვილმკვდარ მამას დედა გაულახეს. რაც ეხება კარვების გაშლას, რაზედაც ჩუგოშვილმა განაცხადა, რომ თურმე კანონში აკრძალვა არ არსებობს. თბილისის მერიის ოფიციალური წერილიდან ირკვევა, რომ სარალიძისათვის არავის აუკრძალავს პროტესტის გამოხატვა, მას შესთავაზეს მოახლოებული ახალი წელი რომ არ ჩაეშხამოთ თბილისელებს, კარავი სხვაგან, სადაც თავად მოისურვებდა იქ გაეშალა. თუ სამართალზე და სამართლიანობაზე საუბრობს სარალიძე, წესით სასამართლოს წინ უნდა გაშალოს კარავი, იქ, სადაც საქმე განიხილება. მაგრამ არა, სარალიძეს იქ უნდა სადაც უნდა და სულ არ აინტერესებს, ახალ წელს, ბავშვები ნაძვის ხის ზეიმზე თუ მივლენ. რას აკეთებს ამ დროს ხელისუფლება? არაფერს! რას გააკეთებდა სააკაშვილი? ყველაფერს. განა 26 მაისის აღლუმი სისხლით მორწყულ რუსთაველზე არ ჩაატარა?

რა ხდებოდა "გუშინ", ნაცმოძრაობის დროს. გავიხსენოთ 2009 წლის თუნდაც ერთი თვის, აპრილის, ამბები.

2009 წლის 9 აპრილს მოჰყვა შემდეგი დღეები: 10 აპრილს მოძრაობის – „რატომ?“ – წევრებს: ირაკლი ხუხუნეიშვილს, ლაშა კოპალიანს, ოთარ ჭელიძეს, ნათია არჩვაძესა და ელენე ბარამიძეს ნიღბიანები მაშინ დაესხნენ თავს, როდესაც ისინი აქციიდან შინ ბრუნდებოდნენ. თავდამსხმელები ხელკეტებითა და ელექტროშოკით იყვნენ შეიარაღებული და მოძრაობის წევრებს ფიზიკურად გაუსწორდნენ. ცემის შედეგად მოძრაობის ერთ-ერთ წარმომადგენელს ირაკლი ხუხუნეიშვილს ტვინის შერყევა დაუდგინდა.

10 აპრილს ავლაბრის მეტროსთან დავით ახალაძეს ნიღბიანმა პირებმა მანქანა დაუმტვრიეს და მანქანაში მჯდომ ერთ-ერთ მგზავრს ფიზიკური შეურაცხყოფა მიაყენეს.
10 აპრილს შარაშიძის ქუჩა N 24-ის მიმდებარე ტერიტორიაზე ყოფილ პარლამენტარ ბაკურ გულუას კუთვნილ ავტომანქანას მინები ჩაუმსხვრიეს. ყოფილი დეპუტატი მომხდარს პოლიტიკურ საქმიანობას უკავშირებს.
12 აპრილს, დაახლოებით ღამის სამ საათზე, პარლამენტის შენობის წინ მიმდინარე აქციაზე გამოჩნდა ხელკეტებით აღჭურვილი 50-მდე პირი. დაიწყეს ჩხუბი, დაამტვრიეს აპარატურა და მოშალეს სცენა.
12 აპრილს "დემოკრატიული მოძრაობა – ერთიანი საქართველოს"~ სამ წევრს სცემეს.
70 წლის მომიტინგეს თავდამსხმელებმა თავი გაუტეხეს და მას პირველადი სამედიცინო დახმარება ექიმთა კომიტეტის ხელმძღვანელმა აღმოუჩინა.
13 აპრილს "დემოკრატიული მოძრაობა – ერთიანი საქართველოს" წევრებზე თავდასხმა მოხდა. სცემეს გოჩა თევზაძეს, ლაშა კუჭავასა და ლევან კოტეტიშვილს, ასევე ტაქსის მძღოლ თემურ ბუნტურს. დაზარალებულებს საკვები მიჰქონდათ მომიტინგეებისთვის. ისინი პეკინის ქუჩიდან მიემართებოდნენ რუსთაველის გამზირისკენ. ტაქსიში ჩასხდომის დროს მათ თავს დაესხა 10-მდე პიროვნება და სცემეს.
ტაქსის მძღოლის განმარტებით, თავდამსხმელები იყვნენ “ BMW”-ს მარკის ავტომობილით, რომლის სერიაა LAS433. თავდამსხმელებმა დაამტვრიეს ტაქსი.
13 აპრილს ორგანიზაციის "ალიანსი – საქართველოსთვის"~ – სამგორის რაიონის ახალგაზრდული შტაბის უფროსს შმაგი გელბახიანს სასტიკად სცემეს, რომელიც საავადმყოფოში გადაიყვანეს.
14 აპრილს ავლაბრის მეტროსთან სამოქალაქო ფორმაში ჩაცმულმა მამაკაცმა სცემა ჰამლეტ გულორდავას, რომელიც აქციიდან სახლში მიდიოდა. თავდამსხმელი "მერსედესის" მარკის "ჯიპიდან" გადმოვიდა.
14 აპრილს პარლამენტის მიმდებარე ტერიტორიაზე ორი ახალგაზრდა – გიორგი ონიანი და მამუკა გირგვლიანი დაჭრეს.
15 აპრილს ძმები იოსებ, ოთარ და ზურაბ მანჯავიძე ნიღბიანმა და ხელკეტებით შეიარაღებულმა პირებმა, (დაახლოებით 8–9 კაცი) ხელკეტებით შეამტვრიეს მანქანის წინა მინა და მანჯავიძეები სასტიკად ცემეს.

ზვიად ლიჩელისა და ვახტანგ ივანიშვილის განმარტებით, ისინი იმყოფებოდნენ პრეზიდენტის რეზიდენციის წინ მიმდინარე აქციაზე. დაახლოებით 24 საათზე მათ დატოვეს აქცია. საკვების საყიდლად წასულებმა შენიშნეს თეთრი ფერის “ნივა”, რომელიც მათ სიახლოვეს საეჭვოდ მოძრაობდა. ზვიად ლიჩელმა და ვახტანგ ივანიშვილმა გადაწყვიტეს უკან, აქციაზე დაბრუნება. ამ დროს ავტომანქანიდან უცნობმა პირმა დაუძახა: – “ერთი წუთით, ბიჭებო”… ამის შემდეგ მათ წინ გადაუდგათ “მერსედესის” მარკის ავტომანქანა, საიდანაც გადმოვიდა ხელკეტებით შეიარაღებული ოთხი უცნობი პირი. შემთხვევის ადგილზე ოთხი ავტომანქანა იმყოფებოდა. თავდამსხმელებმა ზვიად ლიჩელსა და ვახტანგ ივანიშვილს სცემეს.

15 აპრილს საქართველოს სახალხო დამცველს ახსნა-განმარტება მისცა საპროტესტო აქციების საორგანიზაციო კომიტეტის წევრმა გოჩა სახლთხუციშვილმა. მისი განმარტებით, 15 აპრილს, დაახლოებით 23 საათსა და 30 წუთზე მას თავს დაესხა 3–4 ადამიანი, რომელთაც გადმოაგდეს სახლთხუციშვილი მანქანიდან და სცემეს.

15 აპრილს ხალხის პარტიის, თავისუფლების პარტიისა და გაერთიანების – “ალიანსი საქართველოსთვის” – სამ წევრს: გიზო სართანიას, ჰამლეტ გულორდავასა და მალხაზ ჩარკვიანს სცემეს. შემთხვევა ავლაბრის მეტროსთან მოხდა. მიტინგის მონაწილეები მანქანაში ჩასხდომას აპირებდნენ. მათ თავს დაესხნენ “მერსედესისა” და “ტოიოტას” მარკის ავტომანქანებით და სასტიკად გაუსწორდნენ. დაზარალებულები რესპუბლიკურ საავადმყოფოში გადაიყვანეს. მათი განმარტებით, თავდამსხმელები შეიარაღებულები იყვნენ.

15 აპრილს, დაახლოებით 16 საათზე, ყოფილი პარლამენტარი, “ახალი მემარჯვენეების” წევრი დავით უჯმაჯურიძე გაიტაცეს. მას პირზე “სკოჩი” ააკრეს და სცემეს, წაიყვანეს ქალაქგარეთ და საგურამოში დააგდეს, ხოლო მისი ცეცხლწაკიდებული მანქანა ვაშლიჯვარში გადააგდეს.
16 აპრილს შალვა სადაღაშვილსაც დაესხნენ თავს. მისი განმარტებით, იგი “ეროვნული ფორუმის” წევრია და 16 აპრილს, გამთენისას, მორიგეობდა აქციაზე. ნიღბიანმა მამაკაცებმა სადაღაშვილი გადმოიყვანეს მანქანიდან და ხელკეტებით სცემეს.

16 აპრილს პრეზიდენტის ავლაბრის რეზიდენციასთან შეკრებილი აქციის მონაწილეებმა ის პიროვნება ამოიცნეს, რომელმაც რამდენიმე დღის წინ მათ ფიზიკური შეურაცხყოფა მიაყენა. იგი სისხლის სამართლის სამძებროს რუსთავის სამსახურის უფროსი იყო, თუმცა პირადობის დამადასტურებელი საბუთები არ წარმოუდგენია. სიტყვიერი შელაპარაკება ჩხუბში გადაიზარდა და რაზმაძე ტერიტორიიდან აქციის მონაწილეებმა მას შემდეგ გაიყვანეს, რაც იგი გაილახა.
18 აპრილს ინციდენტი მოხდა ქუთაისის მახლობლად. “დემოკრატიული მოძრაობა – ერთიანი საქართველოს” აჭარის ორგანიზაციის წევრები: მალხაზ ბალაძე, თეიმურაზ მდივანი, ჯონი ტერეიშვილი და გელა დათუნიშვილი თბილისიდან ბათუმში ბრუნდებოდნენ. თერჯოლის რაიონის სოფელ გოდოგანთან ისინი ოთხმა ავტომანქანამ ალყაში მოაქცია. 15-ოდე ნიღბიანმა მათ მანქანის ტყეში შეყვანა მოსთხოვა, თუმცა, ოპოზიციის აქტივისტებმა მოასწრეს საპატრულო პოლიციის გამოძახება.

25 აპრილს თბილისში, ჩიტაძისა და ინგოროყვას ქუჩების კუთხეში, განსაკუთრებული შემთხვევა მოხდა. შინაგან საქმეთა სამინისტროს გენერალური ინსპექციის უფროსი ვასილ სანოძე, რომლის მოვალეობაა, გააკონტროლოს, პოლიციელები იცავენ თუ არა კანონსა და პოლიციის ეთიკის კოდექსს, თავად „ნადირობდა“ თანამშრომლებთან ერთად პოლიტიკური ოპოზიციის წარმომადგენლებზე. მოქალაქე თენგიზ ბერიძეს ესროლეს ე.წ. „კისტის“ თოფი, ხოლო გენერალური ინსპექციის უფროსი ვასილ სანოძე მომიტინგეებისთვის წყლით სავსე პარკების სროლით „ერთობოდა“. თუმცა 2008 წლიდან იგი კვლავ განაგრძობს მუშაობას.

ეს არის ერთი საპროტესტო აქციის მოკლე ქრონოლოგია, მსგავსი არა ერთი აქციის შედეგების გახსენება შეიძლება. არაფერს ვიტყვით, 26 მაისის, 7 ნოემბრის დარბევებსა და უკანონობაზე, ამ თემებზე ბევრი ითქვა და დაიწერა.

"ნაცმოძრაობა" არბევდა თავის ამომრჩეველს, მაშინ, როცა ხედავდა, რომ ამომრჩეველი არ ეგუება უკანონობას, უსამართლობას, კორუფციას, ჩინოსანთა ჩადენილ ყველა იმ დანაშაულს, რასაც ზიანი მოაქვს ხალხისთვის, "ნაცმოძრაობა" საპროტესტო განწყობის ჩასახშობად მიდიოდა ყველა სახის დანაშაულზე, მათ შორის, ისეთზეც, რასაც უმძიმესი დანაშაული – სიცოცხლის მოსპობა ქვია.

ქეთევან ზარნაძე

მეტის ნახვა
19-11-2018, 13:30


შერიგდნენ, ხალხო, შერიგდნენ, ჩაეხუტნენ, მპუა, მპუა, მპუაო, ერთმანეთს ნაღვლის ბუშტებიდან წვენები ამოუღეს, ვახტანგურად გადაჰკრეს. ამან უთხრა, ბიჭო, როგორ მომნატრებიხარო, ბოდიში, მაპატიე, ჯართი რომ გიწოდეო. ამან ჩაიცინა, კბილებიდან დორბლი გადმოუვიდა, თითი ცხვირთან ვიოლინოს ჯოხივით გაისვ-გამოისვა და მიუგო – არაუშავს, ძმაო, მაგაზე უარესები უთქვამთ ჩემთვის, მაგრამ როცა საქმე სამშობლოს ეხება, ყველაფერს ვივიწყებო.

ეს ეშხში შევიდა, მართლა მაგარი ყოფილხარ, რა ჯართი, რომელი ნაგავი, ამიერიდან ფოლადს დაგიძახებო. ვერ შეჰკადრა, სტალინს დაგიძახებო, ნამეტნავი არაევროპული გამოვიდოდა. მოდი, ბიჭო, ერთი გადავამოწმო, ბეჭზე ხალი რომ გქონდა, ისევ გაქვს თუ ციხეში წაგიშალესო? – ჭყლოპინებდა მიხო თავისებურად. გადაამოწმა, ცოტა გაცრეცილიყო, მაგრამ ისევ ჰქონდა. ჰი, ჰი, ჰი, – სვიხვინებდა გიგილო და იყო ერთი სიამტკბილობა.
აი, ასეთი სცენა გათამაშდა ამ დღეებში ჰელსინკში, სადაც "ევროპის სახალხო პარტიის" ცნობილმა "ჟულიკებმა" ყრილობა გამართეს და ასევე ცნობილი "ჟულიკები" მიიწვიეს სხვადასხვა ქვეყნებიდან, მათ შორის, "ცოცხიონალური მოძრაობა" და "ძონძიონალური მოძრაობა" (რატომღაც "ევროპიული საქართველო" რომ დაარქვეს). ჰელსინკში ჩავიდნენ ძველი ძონძები – გრიგოლეტო ვაშაძე, გიგილო უგულავა, კობა ნაყოფია (ამ ფულის მუთაქას დასაფინანსებლად დაათრევენ), აფრასიძეთა მჟლეტი გიორგი ბარამიძე და კიდევ ვიღაც უსახურები, ყველას ვერ დაიმახსოვრებ.

"მნიშვნელოვანია, რომ „ევროპის სახალო პარტიის" ყრილობაზე ვხვდებით, იმიტომ რომ „ევროპის სახალხო პარტიამ" გადამწყვეტი როლი ითამაშა "ევროპული საქართველოს" და "ნაციონალური მოძრაობის" დაახლოებაში, საერთო პლატფორმის შექმნაში. გიგი უგულავას მადლობა ვუთხარი მართლა ძალიან მაგარი პოზიციის გამოხატვისთვის, რაც გააკეთეს გიგიმ და სხვა ლიდერებმა. ეს არის ახალი პოლიტიკური კულტურის ბოლომდე დამკვიდრება საქართველოში. მათ ჰყავთ ძალიან ბევრი აქტივისტი, მათ ჰყავთ ძალიან ბევრი გულწრფელი მომხრე და ყველანი მივხვდით, რომ საბოლოო ჯამში, ჩვენ ვართ ერთი ოჯახი, ჩვენ გვაქვს ერთი სამშობლო, გვაქვს ერთი სამიზნე, გვყავს ერთი მტერი და ჩვენი ქვეყანა გვაქვს გადასარჩენი. ახალი ერთობა იქმნება, ბევრად უფრო ფართო, ვიდრე ეს ორი პარტია და ბევრად უფრო ფართო, ვიდრე ჩვენი ურთიერთობებია".

ხედავთ? როგორც მიხო ამბობს, ყველანი მიხვდნენ, რომ საბოლოო ჯამში არიან ერთი ოჯახი და ჰყავთ ერთი მტერი, ბიძინა ივანიშვილი და სამშობლო აქვთ გადასარჩენი. ახლა მთავარია, ვის მხარეზე დადგებიან გიგილოს ყოფილი და ახლანდელი ცოლები, რას იტყვიან ამ ყოფილი და ახლანდელი ცოლების ყოფილი და ახლანდელი ქმრები. პრინციპში, რა უნდა თქვან? ყველაფერი ისე იქნება, როგორც ბელადი მიხო იტყვის და გადაწყვეტს. ამათი ოჯახი იმიტომ არის მტკიცე, რომ ცოლებიც საერთო ჰყავთ და ქმრებიც, ერთმანეთთან "კრუგზე" დადიან. შეიძლება რაღაც პეროოდში, პოლიტიკური მოსაზრებების გამო გაიყარონ, მაგრამ ბოლოს, რაღაც მომენტში მიდის ჩახუტება და ცრემლების ღვარღვარი. ეტყობა, ძაან მაგარია, როცა შენი ახლანდელი ცოლის ყოფილ ქმარს ჰელსინკში შეხვდები, აყივყივებულ თვალებში ჩახედავ და ეტყვი: ძმაო, მართალია, ცოლი წაგართვი, გული გატკინე, მაგრამ ყველაფერი უნდა დავივიწყოთ, ახლა სამშობლო გვაქვს გადასარჩენი, ერთი მტერი გვყავს, როცა ეს ყველაფერი ჩაივლის და ჩვენ ისევ მოვალთ ხელისუფლებაში, დავსხდეთ, ვილაპარაკოთ და შეიძლება ცოლი დაგიბრუნო კიდევაც, თუ ვერ დაგიბრუნებ, აგერ, ბელადს ვეტყვი, ან სხვის ცოლს მოგგვრის, ან ჩემს რომელიმე ყოფილსო. ისიც, ის ცალად დარჩენილი, ლამის "ბომჟად" ქცეული, მაგრამ ძალაუფლების მოყვარული ასლუკუნდება – ჰო, ძმაო, არ არი ბაზარი, როგორც პარტია გადაწყვეტს, ისე იყოს, ჩემთვის მთავარი სამშობლოაო. ეგრეც უნდა იყოს, ხალხო, თუ გინდათ, რომ ოჯახი შეინარჩუნოთ, თუ გინდათ, რომ თქვენი ოჯახი მტკიცე იყოს, ყველა წევრს უნდა მისცეთ მუდმივი განახლების უფლება, ოღონდ ეს განახლება უნდა ხდებოდეს პარტიის ფარგლებში! დიახ, ეს ამბავი ძალიან კარგად გააცნობიერა "ქართული ოცნების" ხელმძღვანელობამ და ამიტომაც არ შეეხო ამ თემას, მეტიც, ყველანაირად შეუწყო ხელი "მიშმაკაკების" ერთიანობას, ანუ შიდა ცოლ-ქმრულ გადაჯგუფება-გადმოჯგუფებას. ესაო, ეს ყველაფერი პირადი ცხოვრებაა და ვერაფერს ვიტყვითო. გარდა ამისაო, როგორც იცით, ოჯახი ხრამია, მაგათ კაი სამსახურებიც უნდა მივცეთ, ყველა დავასაქმოთ, რათა იდილია არ დაერღვეთო. ერთი ეგ არი, იდილიას კოჰაბიტაცია უწოდეს და ჩვენც, უბრალო მოკვდავთ გულები აგვიჩუყდა. ან კი რატომ არ უნდა აგვჩუყებოდა, განა რამე გვაქვს საწინააღმდეგო დიდი, ფართო და მტკიცე ოჯახებისა? იარონ, იარონ, იარონ… თუმცა თითო უგვანო ყველგან თუ არ გამოერია, რაა მამული და ქართული საზოგადოება? აგერ, თამარ ჩერგოლეიშვილი, რომელსაც ნიკოლოზ გვარამია ყ…ქალას ეძახის და მისი ქმარი გიგა ბოკერია იმავე ნიკოლოზთან ძმაკაცობს, საქვეყნოდ აცხადებს, სააკაშვილის ნდობა რომ წარმოუდგენელია, იქიდანაც გამოჩნდა, რა განცხადებაც გააკეთა ერთ ოჯახზეო:

"ის, რომ ჩვენი ინტერესები სალომე ზურაბიშვილის დამარცხებასთან მიმართებით ერთმანეთს დაემთხვა, მასთან ერთ ოჯახად არანაირად არ გვაქცევს, მაგრამ სასურველის რეალობად გასაღება, მისი საყვარელი სპორტია. არსებობენ წებოვანი ადამიანები, რომლებსაც კარს რომ უკეტავ, ფანჯრიდან მოძვრებიან და იმათ ფანჯარაც დაკეტილი უნდა დაახვედროო. ბებიაჩემმა მასწავლა ჰალსტუხის შეკვრასთან ერთად და ძალიან გამომადგა".

ამას მოჰყვა ბოკერიას განცხადება, ჯერ ზურაბიშვილი დავამარცხოთ, მერე ისევ `ნაცმოძრაობისა და მიხოს ოპონენტები ვიქნებითო. ავი ენები ამბობენ, თამარა გიგას შორდებაო, გაშორების მიზეზი მიხოსთან გარიგებააო. არ ვიცი, შეიძლება ეს შავი ჭორია, მაგრამ აშკარად ვხედავ, გიგა კბილებით იცავს ოჯახის სიმტკიცეს – თამარას ანუგეშებს, მაიცა, ქალო, ჯერ სალომე დავამარცხოთ და მერე ისევ ოპონენტები ვიქნებითო. იმასაც ვხედავ, თამარას რაღაც-რაღაცები არ ესმის, ვერ აცნობიერებს და ნებით თუ უნებლიედ არღვევს ერთიან, ძმურ ოჯახს. ისე, რაღა დაგიმალოთ და… თუ "ჩერგო" გიგოს გასცილდება, არც ეგ იქნება პრობლემა, მიხო უგულავას ან რომელიმე მიშმაკს ჩამოართმევს ცოლსა და შერთავს ბოკერიას, მერე ყველაფერს ისე მოაწყობს, თამარასაც გაათხოვებს რომელიმე მიშმაკზე და ისევ დაისადგურებს სრული იდილია. იცით, აქ მთავარი რა არის? სისხლი უნდა გქონდეს "ნაცმაცური", რაც შემდეგ გადადის გენეტიკაში. თუ შენ გენეტიკურად ხარ `ნაცი~ და გაქვს გაწყვეტილი შუბლის ძარღვი, ვერც ბიძინა ივანიშვილი მოგერევა, ვერც "ქართული ოცნება~" და ვერც ხალხი!

ჰოდა, იმას ვამბობდი, ჩემო მურაბა ხალხო, ჩვენ იმდენად მიმტევებელი და გულაჩუყებული ხალხი ვართ, გიგილო უგულავამ 50 მილიონი დოლარი ჩამოიჭრა ბიუჯეტიდან, სახლში წააიმასქნა და დაიჭირეს, განცხადებები ვაკეთეთ: კი, ჰო, ეგ კაცი ნაძირალაა, ყველაფრის ღირსია, მაგრამ დასაჭერად ყველა ცოდოაო. დღეს საქართველოში ერთი უცნაური ტენდენცია მკვიდრდება – ვიღაცამ ბავშვი რომ გააუპატიუროს, აკუწოს, ცელოფანში გაახვიოს და მტკვარში გადააგდოს, იმ ვიღაცასასაც კი გამოუჩნდებიან ხოლმე დამცველები და გულშემატკივრები. გამოვარდება მკვლელის დედა ან ბებია, დაიძახებს, ჩემი შვილი მაგას არ იზამდაო და მორჩა, იწყება `გაპრავება~, ნამდვილად აბრალებენ, მაგას ბიძინა ივანიშვილის მეტი არავინ ჩაიდენდა, მავანს დაავალა და იმან გააკეთაო. ჩვენც ვაპატიეთ გიგილოს, სამ წელიწადში გამოვუშვით თავისუფლებაზე, ზის ახლა და ლამის ყოველდღე გვიკითხავს მორალს პატიოსნებასა და ოჯახურ სიწმინდეებზე. ქართველი საზოგადოების ნაწილს ისედაც ნაღრძობი აქვს ტვინი და ამათ ხომ უარესად აურიეს და გამოურეცხეს. სამწუხაროდ, ამ ტვინგამორეცხილებსაც იგივე უფლებები აქვთ, როცა საარჩევნო უბანზე მიდიან, როგორც ტვინგამოურეცხავებს.

სიტყვა გამექცა… მე ერთიან და მტკიცე ოჯახზე გიყვებოდით, რომლის საზეიმო ცერემონია ამ დღეებში გაიმართა ჰელსინკში. რა იქნება შედეგი? ეს ჩვენზეა დამოკიდებული… იყვნენ ერთად, ჩვენში ზოგიერთ ბრიყვს მათი დროებითი ე.წ. განშორება მართალი ეგონა და ნიშნისმოგებით ყვიროდა, ხომ დაგშალათ ბიძინამო? მერე წამოვიდა კულუარული ინფორმაცია, `ევროპულ საქართველოს~ ივანიშვილი აფინანსებსო. თუ აფინანსებს, მაშინ ამათი ოჯახი იმათ ოჯახს არ უნდა შეერთებოდა. ნუ, კაცურ `პონტში~ ეგრეა და ბარემ იმასაც შეგახსენებთ, რომ ამათ კაცობასთან საერთო არაფერი აქვთ!
ჩვენ რა ვქნათ, ჩვენ? ჩვენ ისევ ის უნდა ვქნათ, რასაც აქამდე ვშვრებოდით, უნდა ვიბრძოლოთ სამართლიანობის აღდგენისა და სინდისის დამკვიდრებისთვის. მართალია, გაგვიჭირდება, მაგრამ აბა, ვარდი უეკლოდ ვის მოუკრეფია, დალოცვილებო?!

გელა ზედელაშვილი

მეტის ნახვა
19-11-2018, 11:00


გვესაუბრება მწერალი ერეკლე საღლიანი:

_ ბატონო ერეკლე, საზოგადოება მეორე ტურის მოლოდინშია. რა უნდა გაკეთდეს, რათა ქვეყანა უფსკრულში არ გადაიჩეხოს?


_ მეორე ტურს დიდ უბედურებად არ მივიჩნევდი, რომ არა ერთი ფაქტორი: პოლიტიკურ ძალას, რომელმაც საქართველო გააცამტვერა, საშუალება მიეცა ხელისუფლებაში ისევ მობრუნდეს. რასთან გვაქვს საქმე? _ "ქართული ოცნების" არასწორმა მიდგომამ, სტრაგეგიული გეგმის უქონლობამ, უნიათობამ პირდაპირ გაუხსნა გზა "ნაციონალურ მოძრაობას". ნურავინ დაიჯერებს, რომ 600 ათასმა კაცმა "ნაციონალებს" მისცა ხმა. ამ 600-ათასიდან 400-ათასამდე პირი "ქართულ ოცნებაზე" განაწყენებულია, მაგრამ მათ, მინდა ერთი რამ ვუთხრა: როცა გვინდა რამე შევცვალოთ, ეს უკეთესობისკენ უნდა იყოს მიმართული. თუ რამეს ვცვლით და არჩევანი უარესობისკენაა, ამ შემთხვევაში, ქვეყანას ვღუპავთ. გავიხსენოთ, რა მოხდა "ვარდების რევოლუციის" დროს: სამწუხაროდ, ქვეყნის, სამშობლოს სიყვარულს იმდროინდელი ხელისუფლებისადმი სიძულვილმა აჯობა, რამაც, საბოლოო ჯამში, მიგვიყვანა ტერიტორიების დაკარგვამდე, ზნეობის მოშლამდე და ა.შ. ნუღარ გავიმეორებთ ერთიდაიმავე შეცდომას თორემ, ისტორია აღარ გვაპატიებს.

_ "პატრიოტთა ალიანსი" ამ დამნაშავე რეჟიმის გასამართლებას ყოველთვის ითხოვდა. როგორ ფიქრობთ, ამჟამინდელმა ხელისუფლებამ შეცდომა დაუშვა, როცა მათი სამართლებრივი პასუხისმგებლობის საკითხი არ დააყენა?

_ პირდაპირ გეტყვით: ქალბატონი ირმა, მოუწოდებს ხელისუფლებას ყველაფერს თავისი სახელი დაერქვას, მიეცეს სწორი შეფასება, თუ გასამართლებას არ იმსახურებენ, ესეც საზოგადოებამ გადაწყვიტოს, ფაქტებით ვიმსჯელოთ: რა მოხდა, რა გაკეთდა იმ პერიოდში და ამის მიხედვით მოხდეს შეფასება. რაც შეეხება, ამ კუთხით, ხელისუფლების შეცდომას, შემდეგნაირად გეტყვით: საწყის ეტაპზე, მას სხვაგვარად მოქცევა არ შეეძლო, რადგან ქვეყანაში არეულობა რომ აგვეცილებინა, ამისათვის გარკვეულ კომპრომისზე წასვლა გახდა საჭირო, მაგრამ ეს პროცესი ძალიან დიდხანს გაგრძელდა. შემდგომ უკვე კოაბიტაცია პირდაპირ ჩახუტებაში გადაიზარდა. ანუ, მექმნება შთაბეჭდილება, რომ ხელისუფლებას აწყობს ისეთი სახელგატეხილი ოპოზიცია როგორიც "ნაცმოძრაობაა". არადა, წმენდა თანდათანობით უნდა მომხდარიყო, რაც არ გაკეთდა. ქალბატონი ირმას რეაქციაც აქედან გამომდინარეა.

_ "პატრიოტთა ალიანსმა" შეიმუშავა საგანგებო რეზოლუცია. რას გვეტყვით, მის შინაარსზე?

_ ქვეყნის წინსვლას ყველაზე მეტად ის აბრკოლებს, რომ წარსულის გაანალიზება არ ხდება. მოდით, გავიხსენოთ: რამ გადაარჩინა გერმანელი ერი? _ მათ გააცნობიერეს, რა უბედურების მომტანი იყო ფაშიზმი. ამის გაცნობიერება რომ არ მომხდარიყო, გერმანელი ერი დაიღუპებოდა. შედეგად, სინათლემ სიბნელეზე გაიმარჯვა. სამწუხაროდ, დღეს, რუსეთს ყველაზე მეტად სწორედ ეს უჭირს _ როგორც კი გააცნობიერებს რა დანაშაული ჩაიდინა და დღემდე სჩადის კაცობრიობის წინაშე, მას, ამ შემთხვევაში, ძალიან დიდი მომავალი უწერია. თუმცა, პირველ რიგში, ჩემი ქვეყანა, ხალხი მადარდებს. ჩვენ, არაფერს არ დავარქვით თავისი სახელი. ეს გახლავთ ამ რეზოლუციის არსი, სხვა არაფერი. მასში ის კი არ არის წამყვანი, რომ მაინცდამაინც ადამიანები დაისაჯონ, არამედ მათი მოღვაწეობა სამართლიანად შეფასდეს. ქვეყანაში სამართლიანობა უნდა აღდგეს.

_ ჩვენ თუ ვაცნობიერებთ, რა გვჭირს?

_ სამწუხაროდ, ვერ ვაცნობიერებთ, დღეს, ყველაფერს ამღვრეული გულის კარნახით ვწყვეტთ. მეორეც, პირდაპირ ჩაწერეთ: სანამ საარჩევნო ყუთებთან მივალთ, "ქართულმა ოცნებამ" ქართველ ხალხს აღსარება უნდა ჩააბაროს. აი, რა უნდა გაკეთდეს პირველ რიგში _ ვიმეორებ, მათ ქართველ ხალხს აღსარება უნდა უთხრან თუ არადა, სხვა შემთხვევაში, ქვეყნის ბედს სასწორზე შევაგდებთ.

_ ვაშაძის გაპრეზიდენტდების შემთხვევაში, რა მომავალი გველის?

_ ვაშაძე სააკაშვილის და სხვა ქვეყნიდან გაქვეული დამნაშავეების შეწყალებას გვპირდება. იმ შემთხვევაში თუ "ნაცმოძრაობის" ეს ლიდერები, რომლებიც ახლა სხვადასხვა მხარეს არიან დაფანტულნი, ქვეყანაში შემოვლენ, ეს ახალი არეულობის საფუძველი იქნება. ყველაზე მეტად რაც ჩემს ქვეყანას სჭირდება, ეს არის სიმშვიდე. ამ ხელისუფლებით რაოდენ უკმაყოფილოც არ უნდა ვიყო, მასთან ბრძოლა იმად არ მიღირს, რომ ჩემი ქვეყანა შევწირო. ვიბრძოლებ სამართლიანობისთვის, მაგრამ ისე როგორც ეს მწერალს შეეფერება. პოლიტიკოსი არ გახლავართ, მაგრამ აშკარაა, რომ ვაშაძის მოსვლის შემთხვევაში, ქვეყანაში სამოქალაქო დაპირისპირების საწინდარი იქმნება, ამის რეალური საშიშროება არის. როგორც ზემოთ აღვნიშნე, პირველი განცხადება, რაც ვაშაძემ გააკეთა იმ პირების შეწყალებაა, ვინც იმ 9 წლიანი რეჟიმის დროს ყველაზე მეტი დანაშაული ჩაიდინა. ღმერთმა იცის, საერთოდ, ადამიანის დასჯას არ მივესალმები, მაგრამ სამართლიანობის მომხრე ვარ. სიმართლე უნდა დადგინდეს. რატომ გაურბიან სიმართლის გამოაშკარავებას? ეს ყველაფერი რიგითი მოქალაქეებისთვის თვალნათელი, ხელშესახები უნდა გახდეს. რატომ წყდება ესა თუ ის საკითხი ყოველთვის კულისებში?!

_ როგორ ფიქრობთ, მთავარი განმაპირობებელი რა არის, რამაც ხალხში ნიჰილიზმი გააჩინა?

_ მოგახსენებთ: ხელისუფლება ხალხს დაშორდა, მან საკუთარი სამეტყველო, სალაპარაკო ენა შექმნა, რომელიც ხალხს არ ესმის. ეს არის ყველაზე დიდი შეცდომა, თუმცა გამოსწორებადი. შეიძლება არსებული შეცდომები ერთბაშად, ერთ თვეში ვერ გამოასწორონ, მაგრამ იმედია, მნიშვნელოვან ნაბიჯებს გადადგამენ.

_ მეორე ტურის წინ სამოქალაქო საზოგადოება საკმაოდ გააქტიურდა, რასაც ვერ ვიტყვით "ქართულ ოცნებაზე".

_ მართალი ბრძანდებით. იცით, ასე რატომ მოხდა? _ ხალხმა უფრო მეტად დაინახა მოსალოდნელი საფრთხე, ვიდრე თავად მმართველმა გუნდმა. დიახ, მოსახლეობამ საფრთხე იგრძნო. ხელისუფლებას ვურჩევდი: ცოტა მეტად მიაყურადონ ხალხის მაჯისცემას, მეტი ურთიერთობა, კონტაქტი იქონიონ ხალხთან. ეს გახლავთ დღევანდელი მმართველი გუნდის ყველაზე დიდი ხარვეზი.

_ რა მოლოდინი გაქვთ მეორე ტურზე?

_ ამის თქმა ცოტა ძნელია, მაგრამ იმედია, ქალბატონი სალომე გაიმარჯვებს.

_ მთავარი ბრალდება რაც "ნაცმოძრაობამ" ხელზე დაიხვია, სალომე ზურაბიშვილის მიერ ომის თემასთან დაკავშირებულ განცხადებას მოჰყვა. როგორია თქვენი დამოკიდებულება ამ საკითხზე?

_ ქალბატონი სალომე გამოცდილი პოლიტიკოსია. მან ომის დაწყებაში საქართველო კი არა, არამედ მის პროვოცირებაში სააკაშვილი დაადანაშაულა. ამ თემაზე შემიძლია შემდეგი ვთქვა: ომი რუსეთმა დაიწყო. სხვათა შორის, ვინც ფიქრობს, რომ რუსეთმა ეს ომი 2008 წელს დაიწყო, ძალიან მწარედ ცდება. რუსეთმა საქართველოს წინააღმდეგ ომი ჯერ კიდევ პეტრე I დროიდან მოყოლებული დაიწყო, როდესაც ჩვენი გასაცოდავებული მეფე _ ვახტანგVI გააცუცურაკა. შემდგომ, 1795 წელს აღა-მაჰმად-ხანი შეაგულიანეს და პირდაპირ წააქეზეს, რომ თბილისში შემოსულიყო. აი, ეს პროცესი, აქედან მოყოლებული დღემდე გრძელდება. სალომე ზურაბიშვილმა აღნიშნული განცხადებით თქვა, რომ მაშინ პროვოკაციას არ უნდა ავყოლოდითო. ერთი რამ არის: ყოველ სიტყვას დიდი სიფრთხილით უნდა მოკიდება მაშინ, როდესაც იცი, რომ საპირისპირო სიბრტყეზე ისეთი ძალა დგას, რომელიც ყოველ შენს სიტყვაზე ჩასაფრებულია და მზადაა მას თავისებური ბინძური ინტერპრეტაცია მიანიჭოს.

_ "ნაცები" სალომე ზურაბიშვილს პრო-რუსულობაშიც სწამებენ ცილს, თავად კი, პრო-დასავლელეებად გვევლინებიან.

_ ეს უკვე სასაცილოა იმიტომ, რომ სალომე ზურაბიშვილი ევროპულ პოლიტიკასთან მთელი თავისი მოღვაწეობით არის დაკავშირებული. "ნაციონალური მოძრაობა" კი ყოველი მხრიდან მართული ძალაა.

_ როგორ ფიქრობთ, მაინც საიდან იღებს სათავეს "ნაცმოძრაობა", მისი ფესვები სად არის?

_ მაგას, მე, მეკითხებით, კაცო, მე, მეკითხებით? "ნაციონალებმა" ხონჩით მიართვეს რუსეთს სამაჩაბლო და დალის ხეობა. ხალხი ვინც დალის ხეობას იცავდა, ყველა იქედან გამოყარეს. რად უნდა ამას ბევრი ლაპარაკი, თუ სად არის "ნაცმოძრაობის" ფესვები, ამ კითხვას როგორ მისვამთ? ხომ ყველაფერი დღესავით ნათელია.

_ თქვენთვის კოდორის მოვლენების შესახებაც ბევრი რამ არის ცნობილი.

_ დიახ, ასეა, "ნაცმოძრაობას" ძალიან ბევრი დანაშაული აქვს ჩადენილი. მაშინ ვთქვი: კიდევ კარგი, მადლობა უფალს, რომ თავად იმ ბიჭებმა, ვინც საზოგადოება `მონადირეს~ სათავეში ედგნენ, არ გაისროლეს. ბოლობოლო, მათ საქართველოს შუაზე გახლეჩვას, იქედან გაცლა ამჯობინეს. სხვათა შორის, ჩვენ გვახსოვს ბრეხტის "კავკასიური ცარცის წრე", სადაც ბავშვი შუაში დააყენეს, ძიძა და დედა კი მას თავისკენ ეწევიან. ბოლოს, ბავშვს ძიძამ გაუშვა ხელი, შუაზე ხომ არ გავგლეჯდიო. ანუ, ბავშვი ძიძას უფრო შეეცოდა. კოდორის შემთხვევაშიც ანალოგიური რამ მოხდა, ოღონდ, დედობისას მათ ვერაფერს ვატყობ. იმ მომენტში, მათ საქართველო შუაზე გასაგლეჯად გაიმეტეს, ფაქტობრივად, ქვეყანა სამოქალაქო ომის წინაშე დააყენეს. ერთსაც გეტყვით: დღემდე აფხაზეთის აღიარება რომ არ მოხდა იმანაც განაპირობა, რომ აფხაზეთის ტერიტორია ბოლომდე გაწმენდილი არ იყო. ამიტომ, ამ სეპარატისტულ რეჟიმს არავინ აღიარებდა. ახლა, უკვე "ნაცმოძრაობამ" ესეც მოშალა. ღმერთმა დაიფაროს რამე მოხდეს, თორემ, ერთი ხელის გაწვდენაზე არიან. ტერიტორია ბოლომდე გააწმენდინეს სამაჩაბლოშიც და იქაც. რა არის ამაზე იოლი: გამოხვიდე, ლანძღო, აგინო რუსეთი და დაანგრიო საქართველო. ამაზე ადვილი არის რამე?!

_ "ნაცმოძრაობა" მოგვიწოდებს: დავივიწყოთ 9 წლიანი რეჟიმიო, მაგრამ მათ ვინც უშუალოდ საკუთარ თავზე იწვნია ეს ყველაფერი, რა პასუხი გავცეთ?

_ იცით რას გეტყვით, ერთი კაცი მაინც მითხარით "ნაცებისგან", ვინც ორი კვირა მაინც წასულიყოს მონასტერში და ცოდვები მოენანიებინოს, განეცადოს ეს უზნეობა, ცუდი საქციელი. რა დავივიწყოთ, რა?! განა მათ ქმედებებს სინანული ახლავს? პირდაპირ სახეში გვიყურებენ და გვაბითურებენ.

_ ხალხს მოკლე ეხსიერება გვაქვს თუ 600 ათასმა ადამიანმა ამ ყველაფრის მიუხედავად მათ მხარი რატომ დაუჭირა?

_ ხალხს მადლობა უნდა ვუთხრათ, რომ ბრძოლის ძალა კიდევ შერჩათ. იგი იმდენჯერ მოატყუეს და თვალში ნაცარი შეაყარეს, რომ მას მეტს ნუღარ მოვთხოვთ. მადლობელი არ ვართ არჩევნებზე მაინც რომ მოდიან და საარჩევნო ყუთთან დგებიან? ხალხი, თავისთავად, არ შეიძლება ან ცუდი იყოს ან კარგი. მაგალითად, გოეთეს, შილერის, მოცარტის, ბეთხოვენის და ჰაიდნის ერმა ოსვენციმის ბანაკები შექმნა. როგორ ვიმსჯელოთ ჩვენ გერმანელებზე _ როგორც ცუდზე თუ როგორც კარგზე? პირველ შემთხვევაში, ერის შიგნით, ნათელი ძალა შევიდა, მეორე შემთხვევაში _ ბნელი ძალა. ხალხს ხსნის გზა უნდა უჩვენო, ასევე ასწავლო როგორ იპოვოს თავის თავთან, შენთან მოსასვლელი გზა. ეს გზა არ უნდა გადაუკეტო.

_ ბატონო ერეკლე, მოსახლეობის 56% არჩევნებზე არ მივიდა. მათ რწმენა როგორ დავუბრუნოთ?

_ იმიტომ არ მივიდა, რომ უკვე ხელი აქვთ ჩაქნეული. ანუ, ეს ყველაზე საშინელი რამ არის, იცით რატომ? როცა ადამიანი უსიტყვოდ უარგყოფს, ამაზე საშინელი არაფერი არ არის. ეს ნიშნავს, რომ ის შენ აღარ გცნობს. თუ როგორ შემოვაბრუნოთ ეს ხალხი ჩვენსკენ, ამაზე პოლიტიკოსებმა უნდა იფიქრონ, მაგრამ მათ მაინცდამაინც დიდ ფიქრს ვერ ვატყობ. მეტსაც გეტყვით, რომ არ მოგატყუოთ: ჩვენი გაერთიანება "პატრიოტთა ალიანსი" და ვახტანგ ხარჩილავას "საერთო გაზეთი" უფრო დარდობს, ნერვიულობს ამ მოვლენებზე, ვიდრე თვითონ მმართველი გუნდი. ჩვენ _ "პატრიოტთა ალიანსი" და "საერთო გაზეთი" უფრო ვიბრძვით სამშობლოს გადარჩენისთვის, ვიდრე "ქართული ოცნება".

_ 25 ნოემბერს "პატრიოტთა ალიანსი" დიდ შეკრებას აპირებს. მიზანი რა არის?

_ იქ, ალბათ, ბევრ რამეს გადაწყვეტენ. ჩვენი მოთხოვნები იქნება ის, რაც ყველაზე მეტად აწუხებს ჩვენს ერს.

თამარ შველიძე

მეტის ნახვა
18-11-2018, 10:00


მეორე ტური _ ეს არ არის ბრძოლა პრეზიდენტობისთვის ორ კანდიდატს _ ზურაბიშვილსა და ვაშაძეს შორის, მეორე ტური _ ეს არ არის დაპირისპირება ორ პოლიტიკურ ძალას, "ქართულ ოცნებასა" და "ნაცმოძრაობას" შორის, მეორე ტური _ ეს არ არის შეჯიბრი ამ ორი ძალის მხარდამჭერებს შორის.

მეორე ტურში ასპარეზზე გამოდის ახალი, დამოუკიდებელი მოთამაშე _ მისი უდიდებულესობა ქართველი ხალხი, რომლის მიზანია – საკუთარი სამშობლოს, საქართველოს, გადარჩენა.

ეს არის ის 2 მილიონამდე ქართველი, რომელიც პირველ ტურში არჩევნებზე არ მივიდა, რითაც თავისი პროტესტი და უარყოფითი დამოკიდებულება გამოხატა მთლიანად იმ პოლიტიკური სპექტრისადმი, რომელმაც ქართულ სახელმწიფოს ვერ უპატრონა.
ახლა ქართველი ხალხი თვითონ აპირებს თავის ქვეყანას უპატრონოს და არჩევნების დღეს `ნაცმოძრაობის~ სახით კარზე მომდგარ მტერს და მოძალადეს საკადრისი პასუხი გასცეს.

მეორე ტურის არჩევნების დღე ეს არის ახალი დიდგორი 21-ე საუკუნის საქართველოსთვის, სადაც ერთ მხარეს დგას უახლესი პოლიტტექნოლოგიებით აღჭურვილი ყველაზე უტიფარი და ქვებუდანი მტერი, რაც კი ოდესმე საქართველოს ჰყოლია, მეორე მხარეს კი 2 მილიონი ქართველი, რომელიც ბოლოს და ბოლოს მიხვდა, რომ თუ დღეს ამ ბრძოლას დათმობს, ამით დათმობს აწმყოსაც და მომავალსაც.

მე ღრმად ვარ დარწმუნებული, რომ ამ ახალი დიდგორის მოგების შემდეგ აუცილებლად დაიბადება თვისობრივად ახალი საქართველო, რომელიც, ამიერიდან, პოლიტიკური პარტიების ნება-სურვილს კი არ გაჰყვება მორჩილად, არამედ თვითონ გახდება მოვლენათა მთავარი წარმმართველი ძალა.

თაგვმა თხარა, თხარაო, კატა გამოთხარაო.

"ნაცმოძრაობამაც" თხარა, თხარა და მეორე ტური გამოთხარა, რომელიც მას აუცილებლად გადასანსლავს თავის განაყოფებიანად და ბიძაშვილ-მამიდაშვილებიანად.
მეორე ტური "ნაცმოძრაობის" პოლიტიკურ საფლავად იქცევა, საიდანაც ის ვერასოდეს ვერ მოახერხებს წამოდგომას და რეინკარნაციას.
რა მაძლევს ამის თქმის საშუალებას?
რა მაძლევს და ის, რომ "ნაცმოძრაობამ" I ტურში მთლიანად ამოწურა ყველა რესურსი, ის მეორე ტურში თითქმის იმავე რაოდენობის ხმებს მიიღებს (შეიძლება, უფრო ნაკლებს), რაც პირველ ტურში მიიღო.
ამომრჩეველთა 54%-იდან, რომელიც I ტურში არჩევნებზე არ მივიდა, ერთი პროცენტიც კი არ არის `ნაცმოძრაობის~ მხარდამჭერი.

"ნაცმოძრაობის" მხარდამჭერებიდან I ტურში არავინ დარჩენილა სახლში, სახლში დარჩნენ `"ქართულ ოცნებაზე" მიზეზთა და მიზეზთა გამო განაწყენებული "ქართული ოცნების" მხარდამჭეები და ის ადამიანები, რომლებიც თვლიდნენ, რომ მათი ჩარევის გარეშეც "ქართული ოცნება" ადვილად დაამარცხებდა "ნაცმოძრაობას".

ამ 54%-ის უმრავლესობა მეორე ტურში აუცილებლად მივა არჩევნებზე, რომ ხმა "ნაცმოძრაობის" წინააღმდეგ მისცეს და ამით გამორიცხოს "ნაცმოძრაობის" ბნელი და ფაშისტური რეჟიმის ხელისუფლებაში მობრუნება.
ამ არჩევნებში გამარჯვების მთავარი მოტივი ის არის, რომ კარზე მომდგარი მტერი შევაჩეროთ, ამისთვის კი აუცილებელი პირობაა ხმა სალომე ზურაბიშვილს მივცეთ, მოგვწონს თუ არ მოგვწონს იგი.


მტერი! _ ბევრჯერ ვახსენე ეს სიტყვა ამ წერილში.
_ მტერი კი არა, ისინი ჩვენი ქვეყნის მოქალაქეები არიან! _ შემომედავებიან, ალბათ.
_ დიახ, ისინი ჩვენი ქვეყნის მოქალაქეები არიან, მაგრამ ეს არაფერს არ ცვლის, ჩვენი ქვეყნის მოქალაქეც შეიძლება იყოს მტერი და თან გარედან მოსულ მტერზე უფრო საშიში მტერი.
საქართველოს ისტორია ამ შინაური მტრების, ამ შინაური დამპყრობლების მიერ უამრავჯერ გაუბედურებული ქვეყნის ტრაგიკული ისტორიაა.

ასე რომ, საქართველოს მოქალაქეობის დამადასტურებელი საბუთი ზოგჯერ სულაც არ გამოდგება იმის დამასაბუთებელ დოკუმენტად, რომ ესა თუ ის ვიგინდარა, ქართული გვარ-სახელით, საქართველოს დიდი პატრიოტია.

რამდენიც არ უნდა იფარისევლონ ნაციონალებმა, რამდენიც არ უნდა იდემაგოგონ, ფაქტი სახეზეა: მათ მიერ ჩადენილი საქმეები ეს არის სახელმწიფოს ინტერესების ღალატის გრძელი, ერთმანეთზე გადაბმული ჯაჭვი, ქვეყნის ღია და დაუფარავი მტრობა, ხოლო მათ მიერ ბოლო დროს ჩადენილი დანაშაული _ ქვეყნის პრეზიდენტად თხემით ტერფამდე რუსი პოლიტიკოსის,. რუსეთის ზესაიდუმლო სამსახურების მაღალჩინოსანი თანამშრომლის გრიგოლ ვაშაძის პრეზიდენტობის კანდიდატად წარდგენა, თავისი ცინიზმით და უტიფრობით ყოველგვარ საზღვარს სცილდება.

ამხანაგი გრიგოლი, რომელიც ზოგჯერ ისეთ სიბრიყვეებს დაახეთქებს, რომ მის ჭკუათმყოფელობაში შეიძლება ეჭვიც კი შეგეპაროს, არც მალავს, თუ რა დავალება აქვს მიღებული თავისი პატრონებისგან _ ქვეყანაში დესტაბილიზაციის და არეულობის პროვოცირება:

_ მე, პრეზიდენტის რანგში, ვინ დამიშლის პოლიტიკურ პროცესებს ჩავუდგე სათავეში და ქუჩაში 50 000, 100 000 ადამიანი გამოვიყვანო? _ აცხადებს ვაშაძე და ვერც კი ხვდება, რომ ეს არ უნდა ეთქვა. 

ასეა თუ ისეა, ცხადზე ცხადია: მტერია ამხანაგი გრიგოლი, მტრის მიერ სააკაშვილის ხელით გამოგზავნილი ბომბია, რომლითაც საქართველოს უპირებენ აფეთქებას.

დიახ, არჩევნები კი არა დიდგორია ეს, 21-ე საუკუნის დასაწყისის ახალი დიდგორი, ქართული სახელმწიფოს არსებობისთვის ისეთივე საბედისწერო და გადამწყვეტი მნიშვნელობის, როგორიც ათი საუკუნის წინანდელი დიდგორი იყო.
ამიტომაც ვამბობ: ქუდზე კაცი საქართველოს გადასარჩენად!!!

ვახტანგ ხარჩილავა
®
P.S. შორს ვარ იმ აზრისგან, რომ იმ 600 000 ადამიანიდან, რომლებმაც I ტურში ხმა ვაშაძეს მისცეს, ყველა საქართველოს მტერი და მოღალატეა.

არა, ქვეყნის მტერი და მოღალატე არა, მაგრამ ამ ადამიანების დიდი უმრავლესობა პოლიტიკურ პარტიად წოდებული სატანისტური ორგანიზაციის "ნაცმოძრაობის" მიერ მთელი სიმძლავრით ამუშავებული ტვინების გამომრეცხავი მანქანის მსხვერპლია. ისინი, ფაქტობრივად, ფსიქოლოგიური ზეწოლისა და ტერორის ქვეშ იმყოფებიან და ამ დამთრგუნველი ზემოქმედებიდან გამოსვლას ვერ ახერხებენ.

მათ არ აინტერესებთ რეალური ფაქტები, არ აინტერესებთ სიმართლის დადგენა და გაგება _ ისინი თითქოს ზომბირებულ მდგომარეობაში არიან, შეპყრობილები, მონუსხულები იმ ვირტუალურ-მოდელირებული "რეალობით", რომელშიც ისინი "ნაცმოძრაობამ" ცხვრის ფარასავით შერეკა და კარები გარედან დაუკეტა.

სამწუხაროდ, "ქართულმა ოცნებამ" ვერ შეძლო ამ ადამიანების დაცვა და მათი დახსნა ამ მდგომარეობიდან.
იმედია, არჩევნების II ტურში ქართველი ხალხი დაამთავრებს ამ მარაზმატიკულ-შიზოფრენიული სექტის პარპაშს და ყველას და ყველაფერს თავის სახელს დაარქმევს.
ვ.ხ

მეტის ნახვა
15-11-2018, 10:30


რაც უფრო ძირეულად ვსწავლობ საკითხს, ვრწმუნდები, რომ ე.წ. ოპოზიციამ ხელისუფლებას არჩევნები ცხვირწინ გაუყალბა. მე რომ "ოცნების" ადგილას ვიყო, პირველი ტურის ბიულეტენებს ხელახლა გადავითვლიდი და ეჭვიც არ მეპარება, სხვანაირი შედეგი იქნებოდა. როდესაც საკუთარი აქტივი ფარული "ნაციონალებით" გყავს დაკომპლექტებული, ასევე კომისიის წევრები თუ შტაბების თავმჯდომარეები, უნდა იცოდე, რომ ბიულეტენებს გადათვლის დროსაც გაგიყალბებენ.

მე არც ვიცოდი, პროცესებში მონაწილე ადამიანები ახლა მიყვაბიან, რომ უბნების დახურვის შემდეგ, როცა კომისიის წევრები მიუსხდნენ მაგიდას და დაიწყეს თვლა, თუ რამდენი ხმა ერგო სალომე ზურაბიშვილს, გრიგოლ ვაშაძეს, ან დავით უსუფაშვილს, სწორედ აქ დაიწყო ილუზიონისტობა. მერე რა, რომ "მავნებმა" ზურაბიშვილი შემოხაზეს? გამოაცხადებ, ვაშაძეო… და ჩაუძახებ ულვაშას ტოპრაკაში. მთავარია, უბნის "ნაჩალნიკი" და კომისიის რამდენიმე წევრი გყავდეს მოსყიდული. თითქოს დაუჯერებელია, აუცილებლად უნდა გაგიჩნდეთ კითხვა: ეს როგორ, ხმის დამთვლელ კომისიებში ხომ ყველა კვალიფიციურ პარტიას ჰყავს წარმომადგენელ-ზედამხედველი? ისევ იგივე ბანალობამდე მივდივართ, რასაც მე და ჩემნაირები ბოლო ექვსი წლის განმავლობაში ვამტკიცებთ, რაზეც ყოველდღე ვლაპარაკობთ — თითქმის ყველგან "ნაცები" არიან "ოცნების" ეგიდით, 2012-იანელები, რომლებმაც სასწორზე შეაგდეს საკუთარი ცხოვრება და არნახულ რისკზე წავიდნენ, განდევნეს, გააძევეს, პანჩური ურტყეს, სახლებში დასვეს, გული დასწყვიტეს და ხელი ჩააქნევინეს. ყველგან "ნაციონალები" "ბლატაობენ", მაგარ "დუხზე" არიან. მე თითქმის ყველა სტრუქტურაში, ყველა სახელმწიფო დაწესებულებაში მყვანან მეგობრები და ისინი მაწვდიან აღმაშფოთებელ ინფორმაციებს, თუ როგორ თავხედობენ, როგორ გადადიან ყოველგვარ ზღვარს. მაგალითად, ენერგეტიკის სამინისტროში "ოცნების" მომხრეებს უკვე მაგიდაზე ურტყამენ მუშტებს და ავალდებულებენ, რომ ხმა უნდა მისცენ გრიგოლ ვაშაძეს, ამ შემთხვევაში შეიძლება გადარჩნენ, ანუ სამსახური შეინარჩუნონ, თუ არა და აუცილებლად დაიმახსოვრებენ და წიწაკის ჭამით ამოხდიან სულს.

"ნაციონალები" აქტიურად მუშაობენ მოსახლეობაში, მიდის ტოტალური მოსყიდვა — კოორდინატორების მიერ ერთი ადამიანის მიყვანაში იხდიან 20 ლარს. "ნაცები" თავიანთ აგიტატორებს უხდიან 800 ლარს, კოორდინატორებს — 400 ლარს, ზონის უფროსებს — 1000 ლარს. ამავე დროს მიდის საჯარო სამსახურების თანამშრომელთა დაშინება — ურეკავენ და ემუქრებიან: დედებს მოგიტ…ნავთ, ჩვენ უკვე მოსულები ვართ, ყველას გიმახსოვრებთო! ძალიან დიდი ზეწოლაა აჭარის მოსახლეობასა და საჯარო სამსახურებზე, სკოლებსა და საბავშვო ბაღების პერსონალზე. ქუჩებში დადიან ზონდერ-ჯგუფები და ეწევიან აგიტაციას, არიგებენ ბუკლეტებს და ჟურნალებს, წინააღმდეგობის გაწევის, ან უკმაყოფილების გამოთქმის შემთხვევაში გადადიან შეურაცხყოფაზე. ამ ზონდერ-ჯგუფების მეთაური გახლავთ მოუთოკავი ჯელალ ქიქავა. ბათუმიდან მირეკავს ახლობელი: "ბიჭო, მივდივარ ჩემთვის ბულვარში, მივსეირნობ, უცებ მიწიდან ამოძვრა სამი ტიპი, გრიგოლ ვაშაძის ჟურნალი შემომაჩეჩეს, გავაპროტესტე, ხელები გავასავსავე, წადით, თქვენი-მეთქი. საიდანღაც ათი სული მოცვივდა, დამიწყეს "კაჩავი", ორ-სამს ვცემდი, მაგრამ ბევრნი იყვნენ. ამ ათ სულს ქიქავა მოჰყვა, ჯემალი, სახეზე მიცნო, თავისიანები დააშოშმინა, მაგ კაცს ვიცნობ, მაგას არ სცემოთო. ესე იგი, ვისაც ჯელალი არ ჩაუწყობს საქმეს, ყველას გაიგდებენ წიხლქვეშ".

გესმით, რა დონეზე მიდის ამათი თავხედობა? ისევ უნდა დავუბრუნდე ფულის შემოტანის თემას: მუშაობენ, ეს ყველაფრის მკადრებლები, გადადიან თურქეთში ჯგუფ-ჯგუფად და იმავე დღეს გადმოდიან, მერე სხვა ჯგუფები გადადიან. გახსოვთ, წლების წინ ირმა ნადირაშვილი და ზურაბ ჯაფარიძე რომ გაჭედეს აზრებაიჯანის საზღვარზე? მაგათ მილიონები შემოჰქონდათ და ძლივს გამოძვრნენ, ძლივს დაუსხლტნენ ხელიდან სამართალდამცავებს. ახლაც იგივე მომენტია, ოღონდ თითოეულს იმდენი შემოაქვს, რაც კანონით არის დაშვებული, ფაქტობრივად ვერც მოედავები. ავი ენები ვარაუდობენ, რომ თურქეთიდან თემურ ალასანიას ფული შემოდის. არც იმას გამორიცხავენ, რომ ამას ფეთჰულაჰ გიულენის ფულიც ემატება "ჩერეზ" მიხოს დედა. პრინციპში, რა მნიშვნელობა აქვს? ფაქტია, რომ საქართველოში შემოდის დიდი რაოდენობით შავი ფული. ეს არის თუ არა ლარის გაუფასურების წყარო, მე არ ვიცი, შექმნილი სიტუაცია ფინანსისტებმა უნდა გააანალიზონ.

სხვათა შორის, ბოლო დღეებში გაჩნდა კულუარული ინფორმაცია, თითქოს საპრეზიდენტო არჩევნების პირველ ტურში რუსი ჰაკერებიც ჩაერივნენ და გააყალბეს გრიგოლ ვაშაძის სასარგებლოდ. მართალია, ჩვენ დღეს გვებრძვის არა ვაშაძე, არამედ რუსეთი (მავთულხლართების გადმოწევაც ამაზე მიანიშნებს), მაგრამ ეს ინფორმაცია ცოტა დაუჯერებლად მეჩვენება. როდესაც ამტკიცებენ, რუსმა ჰაკერებმა აშშ-ში ჩატარებულ არჩევნებზე მოახდინეს ზეგავლენა, საქართველო მაგათთვის არაფერიაო, აქ უნდა გავიხსენოთ, რომ აშშ-ში არჩევნები ტარდება ელექტრონული სისტემით, ხოლო ჩვენთან ბიულეტენებით. ჰაკერმა შეიძლება შეაღწიოს ელექტრონულ სისტემაში, მაგრამ რას უზამს ბიულეტენს? კონკრეტულად გაყალბება არა, მაგრამ შესაძლებელია, რუსმა ჰაკერებმა სამთავრობო სტრუქტურებიდან გაიტანონ ისეთი ინფორმაციები, რომელიც გამოადგებათ გრიგოლ ვაშაძის რუს "პიარშიკებს".

ე.წ. გაერთიანებული ოპოზიცია (მაჭუტაძეები) ჩვეულ რეჟიმში განაგრძობენ არჩევნების მეორე ტურის გაყალბებას, კვლავ ძალაშია მოსახლეობის მასობრივი მოსყიდვა — სული 20–30 ლარი და რაც მთავარია, უკვე აამუშავეს თავიანთი ჭორბიურო მეთოდით: იქით შეედავე და დააბრალე ის, რასაც შენ აკეთებ, რომ აქეთ შეგრჩეს! "შტაბკვარტირიდან" გაისმის შემოძახილები — თურმე "ქართული ოცნება" ხალხს აშინებს, არის აუტანელი ზეწოლა მოსახლეობაზე, მიდის არნახული მოსყიდვა, დაშანტაჟება, სახელმწიფო რესურსის გამოყენება. თურმე სუსმა შეაღწია ცენტრალურ საარჩევნო კომისიაში და წაიღო დალუქული სიები, რათა გაარკვიონ, ვინ არ იყო არჩევნებზე. წარმოგიდგენიათ? ახლა სუსმა უნდა გაარკვიოს, მოსახლეობის ნახევარზე მეტიდან ვინ არ მივიდა არჩევნებზე. ალბათ "შტაბკვარტირაში" იციან, რომ დიდ სისულელეებს ლაპარაკობენ, მაგრამ მოსახლეობის გამოლენჩებულ ნაწილზე ეს მაინც მოქმედებს. "ნაცმოძრაობის" წარაკუა წარმომადგენლები მომენტს არ უშვებენ ხელიდან, რომ რამე არ დააბრალონ "ქართულ ოცნებას", ამ საქმეში ზვიად კუპრავა და ლევან ხაბეიშვილი ირჯებიან ნამეტნავად. მათი სტილი ასეთია: მოგეხსენებათ, ყველა ტელევიზიაში ესენი არიან ჩამოტარებით, აიღებენ ხოლმე რაღაც ფურცლებს და პირდაპირ ეთერში აფრიალებენ. კაცმა არ იცის, რა წერია შიგ, ისინი ამტკიცებენ, რომ ვიღაცებს წაართვეს ცარიელი ბიულეტენები, რომლებსაც ხმა უნდა მიეცათ "ქართული ოცნებისთვის". წესით, ამ დროს წამყვანებმა უნდა ჰკითხონ, საიდან იცით, რომ ეს ცარიელი ბიულეტენი "ოცნების" მომხრეს ჰქონდა და უნდა გაეყალბებინა? არა, წამყვანები ამ დროს სიამოვნებისგან ათავებენ. ამ დღეებში აჭარელი მედეა ვასაძე გამოიყვანეს "ტვ პირველის" თოქ-შოუში, რომელმაც განრისხებული ტონით აღნიშნა: იცით, სადამდე მივიდა ეს ხელისუფლება? აი, ცოტა ხნის წინ ბათუმიდან დამირეკა ერთმა მეეზოვემ, ხმა ვაშაძისთვის მიუცია და ამის გამო ცოცხი წაურთმევიათ, ეს როგორ უნდა ვაპატიო ბიძინა ივანიშვილსო? გულში გავიფიქრე, ნახე, ჩემო თავო, როგორი სხვაობაა "ოცნებასა" და "ნაცმოძრაობას" შორის, სააკაშვილი ყველას ცოცხს უკეთებდა, ივანიშვილი კიდევ პირიქით იქცევა, ართმევს. ეგ რა არი, ქალბატონო მედეავ, ყოფილო "ოცნებელო", იღლიაგამხმარ მურმან დუმბაძის სულიერო დავო, უმადურობის განსახიერებავ და ბოროტების მხარდამჭერო, მეც დამირეკეს ბათუმიდან და მომიყვნენ, თუ როგორ ულოცავდნენ საარჩევნო უბნებზე "ოცნებისა" და "ნაცების" წარმომადგენლები ერთმანეთს სალომე ზურაბიშვილის დამარცხებას. ეს ფარისევლები საუბნო საარჩევნო კომისიის წევრები არიან "ოცნების" ეგიდით. ჰო, კიდევ ისეთები მითხრეს, ყურო ნუ გაიგონებ, მედეას და მურმანს აჭარის მართვა უნდოდათ, ბიზნესების დათრევაც უნდოდათ, "ოცნებამ" სამი თითის კომბინაცია უჩვენა და ამიტომაც გადაბუნძულდნენ სააკაშვილის ხროვაშიო. თუმცა ბევრი ჩემი მეგობარი ამტკიცებს, ეგენი თავიდანვე გადაბუნძულებულნი იყვნენ მიშასთან, "ოცნებაში" სპეციალურად ჩანერგესო. ახლა მიხო გპირდებათ, აჭარას თქვენ ჩაგაბარებთო და ამიტომაც ხართ გასავსავებულნი და დუჟმორეულნი. მიხო კი არის გიჟი, მაგრამ იმდენი მაინც იცის, რომ აჭარა თქვენ არ უნდა ჩაგიგდოთ ხელში, ამოგისვამთ ძონძივით და მიგყრით სადმე ნაგავსაყრელზე. მეტი საქმე არ აქვს, გამოყ…ევებულ მურმანას რამე გადასცეს სამართავად. ეგ ის კაცია, 26 მაისს აქციის დარბევისას ხელი რომ სტაცეს და ჩაიკუკა, პოლიციელებმა ავტობუსიდან ჩამოაგდეს, სუნი აგდისო. 2012-ში ყოველდღე "ქართული ოცნების" ოფისში იყო აყუდებული გრძელტარიანი ცოცხივით, სანამ თავისი არ გაისწორა, არ მოშორებია იქაურობას. ახლაც ისწორებს თავისას თავისი ჭკუით, მაგრამ ერთი ადგილიდან პამპერსი უჩანს, ერთხელ რომ დაუყვირონ, ისევ ჩაიკუკებს.

აი, ასე, ჩემო მკითხველებო, ეს გახლავთ მსოფლიო ისტორიაში პირველი შემთხვევა, როცა ე.წ. ოპოზიცია ხელისუფლება ცხვირწინ უყალბებს არჩევნებს. მე ვერავინ დამაჯერებს, რომ "ნაცმოძრაობას" ამ არჩევნებში 600 ათასმა ადამიანმა დაუჭირა მხარი. კი, ბატონო, დაახლოებით 300 ათასამდე ფანატიკოსი მიხოს ჰყავს, მაგრამ ნახევარ მილიონზე მეტი — ნამდვილად არა, ეს უკვე გაყალბებული ციფრებია. რასაკვირველია, ეს ძონძები მეორე ტურშიც ეცდებიან, ხალხი გააბრიყვონ, მაგრამ ახლა სხვა სიტუაციაა, მწარედ დამარცხდებიან.

გელა ზედელაშვილი

მეტის ნახვა
15-11-2018, 10:00