სარეკლამო ადგილი

947x125



26 მაისი თეთრიწყაროში გრანდიოზულად აღინიშნა

მუნიციპალიტეტში „კულტურისა და საბიბლიოთეკო დაწესებულებების გაერთიანების - კულტურის ცენტრის“ ორგანიზებით და ცენტრთან არსებული შემოქმედებითი ჯგუფების მონაწილეობით დამოუკიდებლობის აღდგენის დღე გრანდიოზულად აღინიშნა. ქალაქის ცენტრში ღონისძიება დილის 12 საათზე საქართველოს ჰიმნით გაიხსნა. დამოუკიდებლობის დღე შეკრებილ საზოგადოებას მიულოცეს ადგილობრივი თვითმ- მართველობის წარმომადგენლებმა. მოეწყო ფოტომასალებისა და ხელოვნების ნიმუშების გამოფენა.

დამოუკიდებლობის დღე ჩოხატაურში

ჩოხატაურში დამოუკიდებლობის აღდგენიდან 100 წლისთავი მრავალფეროვანი ღონისძიებებით აღინიშნა: მოეწყო საზეიმო მსვლელობა, გაიმართა ადგილობრივ მხატვართა ნამუშევრების გამოფენა, საზეიმო კონცერტში მონაწილეობდნენ როგორც მოზრდილთა, ისე ბავშვთა ფოლკლორული ანსამბლები, დააჯილდოვეს სპორტული ასპარეზობების გამარჯვებულები. შეკრებილებს დამოუკიდებლობის დღე და პირველი რესპუბლიკის საიუბილეო თარიღი მიულოცა მუნიციპალიტეტის მერმა ირაკლი კუჭავამ.

პირველი რესპუბლიკის 100 წლისთავი დედოფლისწყაროში

დედოფლისწყაროს კულტურის სახლში ადგილობრივი შემოქმედებითი ჯგუფებისა და ინდივიდუალური შემსრულებლების მონაწილეობით გალა-კონცერტი გაიმართა. მუნიციპალიტეტის მერმა ნიკოლოზ ჯანიაშვილმა "პურის, ღვინისა და ფოლკლორის“ ფესტივალსა და სპორტულ ასპარეზობებში გამარჯვებულები დაჯილდოვა.
მუნიციპალიტეტის კულტურულ ცხოვრებაში განსაკუთრებული წვლილისთვის დაჯილდოვდნენ ცარო მარტიაშვილი, დალი ელისაშვილი და ნინო ნიკვაშვილი. ფესტივალებში აქტიური მონაწილეობისთვის დაჯილდოვდა დედოფლისწყაროს ხელოვნების სკოლაც.

ლაგოდეხი - საქართველოს დამოუკიდებლობის აღდგენის 100 წლის იუბილე

მუნიციპალიტეტში გამართულ მრავალფეროვან კულტურულ ღონისძიებებს მერი ჯონდო მდივნიშვილი მოადგილეებთან ერთად დაესწრო.
ქალაქის ცენტრში გაიმართა საზეიმო მსვლელობა, გამოფენილი იყო ხელნაკეთი ნივთები და დამოუკიდებლობის 100 წლისადმი მიძღვნილი ფოტოები, სკოლის მოსწავლეებმა ზეიმის მონაწილეებს გაახსენეს საქართველოს დამოუკიდებლობის გამოცხადების ისტორიული ფაქტები. ზეიმი გრანდიოზული ფეიერვერკით დასრულდა.

გურჯაანი - 100 წელი საქართველოს დამოუკიდებლობიდან!

გურჯაანში, დიდების მემორიალთან, საქართველოს დამოუკიდებლობის 100 წლისთავი მრავალფეროვანი ღონისძიებებით აღინიშნა: წარმოდგენილი იყო დამოუკიდებლობის თემაზე მუზეუმებში დაცული ექსპონატები, რომლებითაც გაცოცხლდა საქართველოს ისტორია 1918 წლიდან დღემდე.
მოეწყო ხალხური რეწვის ნამუშევრებისა და ნახატების გამოფენა. ადგილობრივმა მეწარმეებმა საკუთარი პროდუქცია გამოფინეს გასაყიდად.
ინსცენირებით გააცოცხლეს 100 წლის წინანდელი ამბები, ხელი მოაწერეს დამოუკიდებლობის აქტს. საზეიმო ღონისძიებას გურჯაანის მაჟორიტარი დეპუტატი დავით სონღულაშვილი, გურჯაანის მუნიციპალიტეტის მერი არჩილ ხანდამაშვილი და ადგილობრივი ხელისუფლების სხვა წარმომადგენლები დაესწრნენ.

საქართველოს დამოუკიდებლობის აღდგენის 100 წლისთავი სიღნაღში

ამ საზეიმო თარიღს წინ უსწრებდა იუბილესადმი მიძღვნილი კვირეული. ზეიმში ყველა თაობის სიღნაღელები მონაწილეობდნენ. 26 მაისს დილა დაიწყო მუნიციპალურ თეატრში გამართული საბავშვო ზღაპრების წარმოდგენით, დავით აღმაშენებლის მოედანთან არსებულ სკვერში გაიმართა ტრადიციული სახალხო ზეიმების შეუცვლელი შეჯიბრება ქართულ ჭიდაობაში. მოგვიანებით მსვლელობა მოეწყო ქალაქის ცენტრში, შუადღისას კი
დიდი კონცერტი გაიმართა ადგილობრივი და საქართველოს სხვადასხვა კუთხიდან მოწვეული ანსამბლების მონაწილეობით.

დუშეთში საქართველოს დამოუკიდებლობის აღდგენის 100 წლისთავი აღინიშნა

საქართველოს სხვა მუნიცი- პალიტეტების მსგავსად, დამოუკიდებლობის დღე დუშეთიც განსაკუთრებულად აღნიშნეს. ტრადიციულად, ქალაქში გაიმართა სხვდასხვა  კულტურული და სპორტული ღონისძიებები, რომლებსაც მოსახლეობასთან ერთად ადგილობრივი ხელისუფლების  წარმომადგენლებიც ესწრებოდნენ. ამ დღისადმი მიძღვნილი ღონისძიებები ქალაქში სპორტული ასპარეზობებით დაიწყო: ტურნირები გაიმართა ჭიდაობასა და ჭადრაკში. ჭიდაობის ტურნირში მუნიციპალიტეტის სხვადასხვა კუთხიდან 70-მდე ახალგაზრდა სპორტსმენი მონაწილეობდა, გამოვლინდნენ გამარჯვებულები.
ი. ზაქაიძის სახელობის ქ. დუშეთის კულტურის სახლში გაიმართა სადღესასწაულო კონცერტი, რომელშიც მონაწილეობდნენ ადგილობრივი შემსრულებლები, ხოლო საზეიმო დღე ქ. დუშეთში სახელოვნებო სკოლის მოსწავლეების კონცერტით დასრულდა. მთელი დღის განმავლობაში ქალაქის შემოსასვლელში გამოფენილი იყო ქ. დუშეთის სახელოვნებო სკოლის ხატვის წრის მოსწავლეთა ნამუშევრები, რომლებმაც მოსახლეობის განსაკუთრებული მოწონება დაიმსახურა.

26 მაისი ზუგდიდში გრანდიოზული ღონისძიებებით აღინიშნა

დამოუკიდებლობის 100 წლის- თავი ზუგდიდში განსაკუთრებულად და მასშტაბურად აღინიშნა. ზუგდიდის მთავარ მოედანზე გააცოცხლეს ორი ეპოქა: საქართველო 100 წლის წინ და ახლა. ისტორიულ ზონაში მოეწყო 1918–1921 წლების მოვლენების ამსახველი დოკუმენტების მუზეუმი, ღია კინოთეტრი, სადაც შინაგან საქმეთა სამინისტროს არქივში დამზადებული დოკუმენტური ფილმების, ხოლო ბავშვებისთვის მულტფილმების ჩვენება გაიმართა. დამოუკიდებლობის დღისადმი მიძღვნილ ღონისძიებებში მონაწილეობდნენ სამეგრელო-ზემო სვანეთის გუბერნატორი ლევან შონია, ზუგდიდის მუნიციპლიტეტის მერი ლაშა გოგია, საკრებულოს თავმჯდომარე მამუკა წოწერია და ადგილობრივი ხელისუფლების წარმომადგენლები.

26 მაისი ფოთის მუნიციპალიტეტში

ფოთის კოლხური კულტურის მუზეუმმა უმასპინძლა თემატურ გამოფენას, სახელწოდებით „ისტორიის კვალდაკვალ“, ხოლო ქალაქის საბიბლიოთეკო გაერთიანებამ საუკუნისწინანდელი ბიბლიოგრაფიული გამოცემები გამოფინა. ფოთში გამართულ ღონის- ძიებებში მონაწილეობდა საქართველოს გარემოს დაცვისა და სოფლის მეურნეობის მინისტრი ლევან დავითაშვილი. მან ქალაქის მერთან გოჩა კურდღელიასთან, საკრებულოს
თავმჯდომარესთან ირაკლი კაკულიასთან, ხობისა და ფოთის მიტროპოლიტ მეუფე გრიგოლთან და ადგილობრივი ხელისუფლების სხვა წარმომადგენლებთან ერთად, ქალაქის ცენტრალური პარკში საგამოფენო სივრცეები დაათვალიერა და საქართველოს დამოუკიდებლობის აქტის გამოცხადების იმიტირებულ ჩვენებას დაესწრო.

დამოუკიდებლობის 100 წლის იუბილე მარტვილში

მუნიციპალიტეტში საქართველოს პირველი დემოკრატიული რესპუბლიკის დაარსებიდან 100 წლის იუბილე საზეიმოდ აღინიშნა. გაიმართა კულტურული და სპორტული ღონისძიებები, რომლებსაც მარტვილის მუნიციპალიტეტის ადგილობრივი ხელისუფლების წარმომადგენლები ესწრებოდნენ. ხელისუფლების წარმომადგენლებმა მერაბ კოსტავასა და ზვიად გამსახურდიას ბიუსტები და დაღუპულთა ხსოვნის მემორიალი
გვირგვინებით შეამკეს, აქვე კულტურისა და ახალგაზრდობის განვითარების ცენტრთან არსებული მხატვრული კითხვის წრის მოსწავლეებმა წარმოადგინეს ლიტერატურულ-შემეცნებითი კომპოზიცია. კულტურის სახლში გაიმართა სახვითი და გამოყენებითი ხელოვნების წრეების ბავშვთა ნამუშევრების გამოფენა, ხოლო საჯარო ბიბლიოთეკაში - ამ დღისადმი მიძღვნილი თემატური გამოფენა.
დღის ბოლოს კულტურის სახლში გაიმართა საზეიმო კონცერ- ტი ადგილობრივი შემოქმედებითი კოლექტივების მონაწილეობით.

დამოუკიდებლობის აღდგენის 100 წლისთავი სენაკში

საიუბილეო ღონისძიებები სენაკის ცენტრალურ მოედანზე სამხედრო ტექნიკის გამოფენით დაიწყო. აქვე მოეწყო ფოტოგამოფენა "დამოუკიდებლობის ქრონიკები 1918–1921" და სენაკელი ფოტოხელოვანის, გიორგი ნიკოლავას ნამუშევრების გამოფენა "საქართველო არის ესე". სპეციალურად მომზადებულ ბანერზე - "ჩემს სამშობლოს ვუსურვებ" - მოქალაქეები გამოხატავდნენ თავიანთ თვალთახედვას ქვეყნის მომავლის შესახებ.
მუნიციპალიტეტის მერმა ლევან კუპრეიშვილმა, ხელისუფლებისა და საზოგადოების წარმომადგენლებმა პატივი მიაგეს საქართველოს ეროვნული გმირის, ჟიული შარტავას ხსოვნას და გვირგვინებით შეამკეს მათი ბიუსტები.

დამოუკიდებლობის 100 წლის იუბილე ჩხოროწყუში

საქართველოს დამოუკიდებლობის დღესთან და საქართველოს პირველი დემოკრატიული რესპუბლიკის დაარსების 100 წლის იუბილესთან დაკავშირებით კულტურულ-სპორტული ღონისძიბები მთელი დღის განმავლობაში მიმ- დინარეობდა მუნიციპალიტეტში. ღონისძიებების დასასრულს, დაბის ცენტრში, ღია ცის ქვეშ, გაიმართა გალა-კონცერტი ცეკვისა და სიმღერის ადგილობრი- ვი ანსამბლების მონაწილეობით. შეკრებილებს სიტყვით მიმართეს და დამოუკიდებლობის დღე მიუ- ლოცეს მუნიციპალიტეტის მერმა დათო გოგუამ, საკრებულოს თავმჯდომარემ ბესიკ ესებუამ და წალენჯიხისა და ჩხოროწყუს მაჟორიტარმა დეპუტატმა გოგა გულორდავამ. 1990 წლის უზენაესი საბჭოს წევრმა, ისტორიკოსმა ანზორ სიჭინავამ ვრცლად ისაუბრა 26 მაისის მნიშნელობაზე.

ბოლნისის მუნიციპალიტეტში დამოუკიდებლობის 100 წლის იუბილე აღნიშნეს

ასე ერქვა წარმოდგენას, რომელიც საქართველოს პირველი დემოკრატიული რესპუბლიკის დაარსებიდან 100 წლის იუბილეს მიეძღვნა.
1918 წლიდან დღემდე, საქართველოს ისტორის ფურცლებს უამრავი ადამიანის სახელი, ფაქტი და მოვლენა ახსოვს. საქართველოს კათოლიკოს-პატრიარქები (კირიონ მეორე, ამბროსი ხელაია), ქაქუცა ჩოლოყაშვილი და შეფიცულთა რაზმი, "ცისფერყანწელები", გენერალი მაზნიაშვილი, მერაბ კოსტავა, ზვიად გამსახურდია - ეს იმ საზოგადო მოღვაწეთა არასრული ჩამონათვალია, რომელებმაც საქართველოს დამოკი- დებლობის იდეისთვის ბრძოლაში დათმეს სიცოცხლე.

დამოუკიდებლობის აღდგენის 100 წლისთავი დმანისში

დმანისის კულტურისა და ხელოვნების ცენტრის მიმდებარე ტერიტორიაზე გაიმართა საქართველოს დამოუკიდებლობის დღისადმი მიძღვნილი დასკვნითი საზეიმო კონცერტი, რომელშიც მონაწილეობდნენ კულტურისა და ხელოვნების ცენტრის ფოლკლორული ანსამბლები "შგარიდა",
"ირინოლა", "დმანისური აისი“. მოზეიმეებს 26 მაისი და დამოუკიდებლობის აღდგენის 100 წლის იუბილე მიულოცა დმანისის მუნიციპალიტეტის მერმა გიორგი ტატუაშვილმა.

დამოუკიდებლობის დღე მარნეულში

ქალაქის ცენტრალურ ქუჩაზე წარმოდგენელი იყო სხვადასხვა კულტურული, სპორტული ღონისძიება და თემატური გამოფენები. ამ დღისთვის სახელდახელოდ წარმოდგენილი თემატური პავილიონები მუნიციპალიტეტის მერმა თემურ აბაზოვმა, საკრებულოს თავმჯდომარემ ამირან გიორგაძემ,
გუბერნატორის მოადგილესთან ერთად დაათვალიერეს და მოსახ- ლეობას საქართველოს დამოუკიდებლობის 100 წლის იუბილე მიულოცეს.
მერმა მისასალმებელი სიტყვით მიმართა მოსახლეობას და აღნიშნა: "საქართველოს წინ დიდი და ნათელი მომავალი აქვს და მე მჯერა, რომ საქართველო აუცილებლად აღიდგენს ტერიტორიულ მთლიანობას. აუცილებლად დადგება დღე, როცა ჩვენი აფხაზი და ოსი ძმები ისევ ერთი ქვეყნის ქვეშ ვიქნებით და ვილაპარაკებთ საერთო ენაზე, ისევ ვიცხოვრებთ გამთლიანებულ და ძლიერ საქართველოში!"

წარმოდგენილი იყო სამხედრო ტექნიკის გამოფენა, სპეციალურად ამ დღისთვის დამონტაჟდა ქართული პავილონი, სადაც გამოფენილი იყო ტრადიციული სამოსი, მოეწყო მარნეულის საჯარო ბიბლიოთეკის და ანბანის კუთხეები, გაცოცხლდა ძველი თბილისის ქუჩა თავისი მახასიათებლებით. კულტურის სახლის მიმდებარე სკვერში მუხის ხის ნერგი დარგეს, როგორც ძლიერი და გამთლიანებული საქართველოს სიმბოლო.

დამოუკიდებლობის აღდგენის 100 წლისთავი წალკაში

საქართველოს პირველი რესპუბლიკის დაარსებიდან 100 წლისადმი მიძღვნილი ღონისძიებები გაიმართა წალკის მუნიციპალიტეტში. დღესასწაულის მონაწილეებს ეს დღე მიულოცა მუნიციპალიტეტის მერმა ილია საბაძემ. გაიმართა სადღესასწაულო კონცერტი, რომელშიც მონაწილეობდნენ სხვადასხვა თაობის შემსრულებლები, ხალხური სიმღერებისა და ცეკვის ანსამბლების წევრები. მოზარდებმა წაიკითხეს პატრიოტული ლექსები.



მეტის ნახვა
30-05-2018, 20:12


12 მაისს "ბასიანის" "დაპყრობას" დიდი ვნებათაღელვა მოჰყვა. აქციის მონაწილეებმა გადაკეტეს რუსთაველი. გაისმა პოლიტიკური მოწოდებები. აქციაზე კი ტრანსგენდერების, გეების, ფემინისტების გარდა თავი მოიყარა პოლიტიკოსებმა და იმ ადამიანებმაც, ვინც ჩათვალეს რომ საქართველოს დამოუკიდებლობა, თავისუფლება, ღამის კლუბ "ბასიანიდან" იწყებოდა და მთავრდებოდა.

მოხდა დაყოფა, ერთ მხარეს იდგნენ "გასხივოსნებულები", მეორე მხარეს "ბნელები": "გასხივოსნებულთაგან" რამდენიმე ადამიანი თავს დაესხა პოლიციელს, იყო გინება, ფურთხი. ეგრედწოდებულ არაცნობადებს მხარი ეგრედწოდებულმა ცნობადებმა აუბეს და ოხრად "დაიყარა" ზიზღი, აგრესია: მოვუხნათ დედის ტრაკი ამ ბნელებს!” – დავით კოვზირიძე;

"მოგხანთ სალი კლდეები და სახელოვანი წარსული!” – ანა სუბელიანი;
"დაუხეთქეთ თავები და გააჯმევინეთ სახლში მაგათ!" – სალომე ბარკერი;
"ვიღაც ნაბიჭვრები რომ სხედან იქ სადღაც!" – ბექა წიქარიშვილი;
"მოდით, ბევრი ვიყოთ რომ მოვუხნათ კარგის ტრაკები!” – ხათუნა გოგებაშვილი;
"ვიღაც ყ.ე სამართალდამცველი თმაში მწვდა" – მათე ხიდაშელი;

"ჩვენ ვიცავთ თავისუფლების იდეალს, რომელიც მათ დაკარგეს, იმიტომ რომ თავისუფლება არის აქ და არა კაბინეტებში. დამოუკიდიებლობის მოპოვება დიდი ბრძოლის შედეგი იყო. არავინ არ გვაჩუქებს თავისუფლებას და ბრძოლა დღესაც გრძელდება. მივმართავ მაყურებელს, თავს ნუ მოატყუებინებთ ამ ხალხს. მოდით და შემოგვიერთდით, ვინაიდან ეს არის ბრძოლა პროგრესსა და განუვითარებლობას შორის", – ლაშა ბუღაძე;

"ბასიანს არბევენ, ერთ-ერთ საუკეთესო კლუბს ევროპაში. ესაა კალაძის დანაპირები "ღამის ცხოვრების" განვითარების შესახებ? ნარკოდანაშაულს ვერაფერი მოუხერხეს და ახლა განტევების ვაცს ეძებენ, ვინმეს უნდათ რომ შეახოცონ ხელი. ღამის ეკონომიკა კრიმინალის დამარცხებამ, უსაფრთხო გარემომ და ტურიზმის ბუმმა შექმნა და არა კალაძის `ღამის სამინისტრომ".
ნუ ანგრევთ იმას, რაც თქვენ არ შეგიქმნიათ! ჩემი სოლიდარობა ბასიანს!”, – რომან გოცირიძე;
"არ დაგვიტოვეს ადგილი, ისეთი სადაც შეგვიძლია ვიყოთ ისე როგორც გვინდა. ჩვენ არაფერს არ ვაფუჭებთ, ჩვენ არაფერს არ ვაშავებთ. არ ვაშავებთ, როდესაც ვცეკვავთ. მეტი რა გავაკეთოთ?" – ბაია პატარაია.

დავით ზურაბიშვილი: "კეთილი ინებეთ ხელისუფლებავ და ეს ფაშისტი ნაბიჭვრები მოაცილეთ აქციას!"
დავით გაბუნია: "აქ რაც ხდება არის არანაკლები, რაც ხდებოდა 7 ნოემბერს… ჩვენ აქ ვიდგებით 17 მაისსაც, სამწუხაროდ, აქ ვიქნებით ალბათ საქართველოს დამოუკიდებლობის 100 წლისთავისაც, 26 მაისს".

გიორგი ვაშაძე: "ხელისუფლებავ! ახალგაზრდებს თმის ღერი არ ჩამოუვარდეს თორე კუდით ქვას გასროლინებთ!"
"სამწუხაროდ, მე დღესაც არ მაქვს პასუხები და კომუნიკაცია გუშინდელ ღამესთან დაკავშირებით. ჩემი დაჟინებული რჩევაა, სასწრაფოდ მოხდეს გუშინდელი ღამის ოპერაციის დეტალური განმარტება, დაიწყოს დიალოგი, თუნდაც განსხვავებული პოზიცების მატარებელ, განსაკუთრებით კი ახალგაზრდა ადამიანებთან, რომლებიც დღესაც იბრძვიან თანამედროვე და თავისუფალი ქვეყნის მომავლისთვის. ამ მოცემულობაში, ცხადია ღამის ეკონომიკის განვითარებაზე საუბარი წარმოუდგენელად მიმაჩნია დღეს, თუ ეს წინააღმდეგობები არ გადავლახეთ", – სერგი გვარჯალაძე.

ღამის ეკონომიკის "მინისტრის" (რომელსაც თურმე 4000 ლარზე მეტი აქვს ხელფასი და ჯერჯერობით არანაირი პროექტი არ განუხორციელებია) მხარდამხარ "ბასიანის" დასაცავად "იბრძოდნენ" დეპუტატებიც, ყოფილები, მომავალი. საბოლოო ჯამში "პრადვინუტული საზოგადოება" შეჯერდა, რომ რუსთაველზე იდგა "მთელი თფილისი" და რომ ყველა ვინც "ბასიანში" არ დადის ბნელია. აქცენტი გადატანილი იქნა ეკონომიკაზე და რაოდენ გასაკვირადაც არ უნდა ჩანდეს, თურმე სერგი გვარჯელაძის "ღამის ეკონომიკა" "ბასიანზე ყოფილა დამოკიდებული. როგორც ჩანს, არავინ მიაქცია ყურადღება, რომ წინა ხელისუფლების დროს, სასტუმრო "აჭარის" კლუბში ("აჭარა მიუზიკლ ჰოლი"), შეიჭრა სპეცრაზმი, იგივე მოტივით, რაც "ბასიანში", კლუბის დირექტორი სერგი გვარჯალაძე იყო და თავად კლუბი, ასეთივე ცნობილი, როგორც `"ბასიანი”, მაშინ სუბუტექსის დიდი პარტია იქნა ამოღებული. მაშინ საზოგადოება ამართლებდა ძალოვანების ქმედებას და ხელისუფლებას ნარკორეალიზატორების მიმართ კანონის კიდევ უფრო გამკაცრებისკენ მოუწოდებდა. ამდენად, "ბასიანში" რომ ხედავს გვარჯალაძე გამოსავალს და ღამის ეკონომიკის აღორძინებას, გასაკვირი არაა.

წინმსწრები მოვლენები:

სამწუხაროა, რომ ამ ფაქტებს წინ სიკვდილი უსწრებდა. სიკვდილი, რომელმაც, საზოგადოების დიდი ნაწილი შეაშფოთა, დააფიქრა. სიკვდილი დადიოდა ღამის კლუბებში, ფესტივალებზე (კაზანტიპი). საზოგადოების აზრის გასაგებად, დღეს საუკეთესო საშუალება სოციალური ქსელია და როცა რამდენიმე ახალგაზრდამ სიკვდილს თვალებში ჩახედა დაისვა კითხვები – რას აკეთებს ხელისუფლება? რატომ იყიდება თავისუფლად ღამის კლუბებში გაურკვეველი თუ გარკვეული სახის ნარკოტიკი? რატომ არ აკავებენ "ბარიგებს"? რამდენიმე ადამიანი აქციების მოწყობის ინიციატივითაც გამოვიდა და კანონის გამკაცრება მოითხოვა. საქმე ისაა, რომ მოქმედი კანონის მეტად გამკაცრება, უბრალოდ შეუძლებელია და საზოგადოების მოთხოვნაც, შესაბამისად, აბსურდული. მთავარი, კანონის აღსრულებაა და რაოდენ გასაკვირიც არ უნდა იყოს, ამას არავინ, ან ძალიან ცოტა ითხოვს.

ბოლო ერთი კვირის განმავლობაში განვითარებულ მოვლენებს უფრო ადრე, წინ უსწრებდა "უსისხლო" და "უსიკვდილო" ფაქტები: ორი წლის განმავლობაში, რამდენჯერმე იქნნენ დაკავებულნი ქართული შოუ-ბიზნესის "ელიტარული" წარმომადგენლები, რომელთა დასაცავად ცალკე "ელიტამ" და ცალკე საზოგადოების მუდამ უკმაყოფილო ნაწილმა, მკლავები დაიკაპიწა. მოხდა ისე, რომ დეპუტატებიც ჩაერთვნენ საქმეში და დაკავებულების გათავისუფლების მოთხოვნით "გამომცხვარ" "პეტიციებზე" თავიანთი ფაქსიმელე სავიზიტო ბარათივით, დამღად დაასვეს. მოგვიანებით, ერთმა დეპუტატმა ბოდიშიც მოიხადა "პეტიციაზე" ხელის მოწერის გამო – საზოგადოებას ასე თუ არ უყვარდა ეს "ცნობადი სახე", ამას როგორ წარმოვიდგენდიო, ხელმოწერა "უკან გამოითხოვა" და ერთი სიტყვითაც არ დაგმო ფაქტი – დიდი რაოდენობის ნარკოტიკების შემოტანა.

"ელიტამ" გარისკა და აღიარა, "ცნობადის" დაკავებამდე ტაბუდადებული საკითხი და განაცხადეს, რომ თურმე "ცნობადმა" საკუთარი მოხმარებისთვის შემოიტანა განსაკუთრებით დიდი რაოდენობის წამალი. მოგვიანებით, ალბათ, ინანეს აჩქარება – "ცნობადი" მალე გაათავისუფლეს – არც გამოცხადებული თვითმკვლელობის და არც კონტრაბანდისთვის არ დააკავეს, მისი ნაზი ბუნებისთვის ციხე ზედმეტი იყო.

12 მაისს, გამთენიისას ჩატარებული სპეცოპერაციის შემდეგ, მოხდა ისე, რომ იმ ადამიანების ნაწილიც კი, ვინც წინა დღეებში ზედმეტი დოზისგან გარდაცვლილ ბავშვებს გლოვობდნენ, უცებ აღმოჩნდნენ ნარკოტიკების გამსაღებელთა დამცველები. `"ეთრმა ხმაური", რომელსაც თავის დროზე, ჩანასახშივე, ე.წ. ხმაური არ აუკრძალეს და არ დააკავეს ნარკოტიკების პოპულარიზაცია-აგიტაციისთვის, ხელისუფლების შეცვლაზე `"ჭიკჭიკდა", "გირჩმა", რომელსაც კანაფის დათესვისა და აგიტაციისთვის პასუხი არავინ მოსთხოვა, საქმიანობას არ შევწყვეტთო. "ბარიგებმა", უკაცრავად, დილერებმა, რევოლუცია "დაანონსეს". "სტრატეგიულად მნიშვნელოვან" ადგილზე მეტეორული სისწრაფით გამოცხადებულმა ნაცმაცუნებმა "ამბრაზურას" როლი იკისრეს.

ასეთ ფონზე "ბასიანის" ერთ-ერთმა დამფუძნებელმა ტატო გეთიამ განაცხადა: "კვლავ მიმდინარეობს საგამოძიებო მოქმედებები და კლუბის გახსნის კონკრეტულ ვადას ვერ გვეუბნებიან, თუმცა საუბარი არ არის თვეებზე, საუბარია დღეებზე". ანუ, "ბასიანი" ზარალის ანაზღაურებას ითხოვს და პარალელურად აცხადებს რომ თურმე კლუბში, ნარკოტიკი კი არა, ციტრამონი იყიდებოდა.
"ბასიანის" გარდა პოლიცია შევიდა ღამის კლუბ "გალერიში", თუმცა დიდი ვნებათაღელვის ფონზე `"გალერი" არავის გახსენებია. სოციალურ ქსელში ვრცელდება ინფორმაცია: "კლუბი “ბასიანის” მთავარი მოწილე თავდაცვის სამინისტროს ყოფილი მაღალჩინოსანია! აკაკი ხურციძე – საქართველოს თავდაცვის სამინისტრო, საქართველოს შეიარაღებული ძალების გაერთიანებული შტაბის ჯ 1 პირადი შემადგენლობის დეპარტამენტის უფროსი 2012 წლამდე, აკაკი ხურციძის ვაჟი, გიორგი ხურციძე უკრაინაშია…
კლუბი "ბასიანი" – წილები და მეწილეები:
– აკაკი ხურციძე 50%
– ნიკო ნიკოლაძე 10%
– ნათია ორაშვილი 10%
– ზვიად გელბახიანი 10%
– ივანე გეთია 10%
– ვახტანგ გოცაძე 10%".

ასევე სოციალურ ქსელში, "გალერის" შესახებ ვრცელდება ინფორმაცია: "გალერი" იყო ჩერნიგოველის სახელობის ეკლესიის შენობა. შენობა გროშებად გაიყიდა 90-იან წლებში, აფხაზეთის ომის დროს.

საინტერესოა ასევე ისიც, რომ, მაგალითად "ბასიანში", როგორც ამბობენ, თავისი "სადილერო" "ბუტკა" აქვს გახსნილი ცნობილი მომღერლის ცნობილ ქმარს. ხოლო "გალერიში" გადაღებული ვიდეოები, რომელიც სოციალურ ქსელში იქნა გამოქვეყნებული, სხვა არაფერია თუ არა გარყვნილება. არც "ბასიანი" და არც "გალერი" დღევანდელი და გუშინდელი "პროდუქტი" არაა. "გალერი"უფრო მხცოვანია, `"ბასიანი" უფრო ახალგაზრდა, მაგრამ ამ ორივე `ღამის ეკონომიკის მთავარ სიძლიერეს~ აკავშირებს პოლიტიკა.

"ბასიანის" ერთ-ერთი დამფუძნებელი, 10%-იანი წილის მეპატრონე არის ზვიად გელბახიანი. ზვიად გელბახიანი არის ვალერი გელბახიანის ძმის შვილი. თავის მხრივ ვალერი გელბახიანი, როგორც თავად აცხადებდა, სააკაშვილის ხელისუფლების მიერ იდევნებოდა. მეტიც, ბადრი პატარკაციშვილთან ურთიერთობისა და მისი შტაბის ხელმძღვანელობის გამო, ის თურმე სასიკვდილოდ გაწირეს. ისმის კითხვა: მაშ როგორ მოხდა რომ "დევნილი" ვალერი გელბახიანის ძმის შვილი "ბასიანში" 10%-იანი წილი მფლობელია? იმიტომ ხომ არა, რომ თავის დროზე, როცა ვალერი გელბახიანი დაბრუნდა საქართველოში (დედა მყავს ავად და მომეცით ნება რომ ვნახოო, ამ მოტივით ჩამოვიდა და ნება მისცეს კი არა, ხელიც არავინ ახლო თუ არ ჩავთვლით ერთდღიან პატიმრობას) საქართველოს მთავარი ნარკუშა და ნარკობარიგა ირაკლი – ერეკლე კოდუა აეროპორტში დახვდა? ვინმემ არ თქვას, ეს ევალებოდაო. ჰო, აბა, თურმე, ეგრედწოდებულ პოლიტიკურ დევნილს სოდ-ის უფროსზე ნაკლები არ უნდა დახვედროდა აეროპორტში და თან არ დაგავიწყდეთ, ამ "სტუმართმოყვარე აქტის" დროს კოდუა გელბახიანის სს საქმეში ერთ-ერთი მთავარი მოწმე იყო.

რუსთაველზე აქციაზე მისულმა გახარიამ, აქციის მონაწილეებს მოსთხოვა ბოდიში მოეხადათ იმ პოლიციელებისთვის, ვისაც შეურაცხყოფა მიაყენეს. იმ ადამიანებმა, რომელთაც არა ერთ კომენტარში აღიარეს, რომ კლუბში "კაიფის გამო დადიოდნენ" (დაგვაცადეთ ჩვენ ეს გვისწორდება) ბოდიშის მოხდაზე უარი განაცხადეს. პარლამენტში გახარიამ გამგებთათვის გასაგებად თქვა, გამოძიება მიდის და გვაცალეთ ყველა თავისას მიიღებს, პოლიციელთა შეურაცხყოფისთვისაც და ნარკოტიკების გასაღებისთვისაცო. ახლა "საქართველოს მომავალს", "დაგვაცალეთ კაიფი, ჩვენ ეს გვისწორდება" ხალხს არჩევანი არა აქვთ. ეგრედწოდებულ ლიდერებს, თავისი დამცველებითურთ ცხირ-პირში მიარტყეს ფირები, სადაც ბარიგობის, წინააღმდეგობის გაწევის და შეურაცხყოფის კადრებია აღბეჭდილი. ერთადერთი გზა, რაც მათ დარჩათ ისევ აქციის მოწყობაა, თუმცა როგორც "ცნობადმა სახე" ნიკა ქავთარაძე წერს: "მოვიდა ტიპი ჩვენს მოედანზე და მივეცით საშუალება, რომ მისი წესებით გვეთამაშა". გახარიამ დიდი ანგარიშით მოუგო საპარლამენტო ოპოზიციასაც. ამდენად, ლიდერებმა უკვე იციან, რომ ჩანასახშივე წაგებულ აქციას, მოწოდებას – "თავისუფლებას გვართმევენ, თავისუფლება დავიცვათ" – ანკესზე ტრანსგენდერების და "ჩვენ კაიფი გვინდა" ხალხის გარდა, მხარს არავინ დაუჭერს.

ახლა ისინი სხედან და ტირიან…

ქეთევან ზარნაძე

მეტის ნახვა
29-05-2018, 17:00


"საერთო გაზეთის" სტუმარია სკანდალური განცხადებებით ცნობილი რესტავრატორი, ქვაზე ჩუქურთმის ოსტატი, ბატონი არჩილ ღუდუშაური.

– სად აღარ მივედი – არავინ მისმენს… საშინელი სენია მოდებული: უცოდინარობა, გაუნათლებლობა, ისევ და ისევ ყოველგვარი უცხოურის თაყვანისცემა… ქართული აღარაფერი უნდათ… საქართველოს ისტორია გაყალბებულიაო, გიკვირთ! კარგი, გააყალბეს შენამდე, შენ რომ მოხვედი, როგორადაც შეგიძლია, თქვი სიმართლე!
საქართველო ზესაოცარი ქვეყანაა საკუთარი სალოცავი მდინარეებით, მთებითა და ნაგებობებით, მაგრამ უბედურება ის არის, რომ გადაკეთდა უცხოური რელიგიებით – დაწყებული ქრისტიანობით, დამთავრებული მუსლიმანობით, ყველას მითვისებული აქვს ქართული სალოცავები, ძველებიც და ახლებიც… მაგალითად, უფლისციხეში ქართველთა ღმერთის ტაძარი დაინგრა და გადაკეთდა ქრისტიანულად, ისევე, როგორც მცხეთაში. სვეტიცხოველი კი არ აშენებულა, არამედ გადაკეთდა. სვეტიცხოველს აქვს სამი კედელი, შიდა კედელი არის ქართველთა ღმერთის სალოცავი, რომელიც გარედან შეფუთეს ქრისტიანული კედლით. ეს იმდენად უხეიროდაა გაკეთებული, მითუმეტეს მისთვის, ვინც იცნობს ბერძნულ კულტურას, მასზე საუბარიც კი სამარცხვინოა. თვით ტაძარი ბერძნული არქიტექტურული მიმდინარეობის შენობაა. დღემდეა შემორჩენილი ქართული სიმბოლოები სვეტიცხოველზე: გონიო, ბორჯღალი, ვაზი…

– "ქართულ რელიგიას" თქვენ რას უწოდებთ?

– მაგალითად, "გიორგი" არის ქართული ღვთაება…

– "გიორგი" ბერძნულია და მიწათმოქმედს ნიშნავს…

– საქმე მაგაში გახლავთ, რომ როგორც ბევრი სხვა რამ, მითვისებული აქვთ ბერძნებს. ორივე "გიორგობა" მიძღვნილია მის წამებასა და სიკვდილზე, დაბადებასა და წარმატებაზე არ არის აქცენტი, რატომ, არ დაბადებულა? ქართული ღვთებაა და იმიტომ!

– კაპადოკიაში დაიბადა… გასაგებია კაპადოკია ძველი ქართული (კოლხური) ცივილიზაციის ნაწილი იყო…

– ხალხმა უნდა გაიგოს სიმართლე, რაც დაავიწყეს და თავს მოახვიეს, უნდა გაიხსენონ… შაბათი მეშვიდე დღეა ბიბლიურად, ხომ? კვირის პირველი დღე არის ქართველთა ღმერთის შვილის დღე, დღესასწაული, რომელიც მითვისებული აქვთ ქრისტიანებს. რომ გამოვაცალკევოთ და აღვნიშნოთ, რომ ეს ქართული ღმერთის დღეა და არა ქრისტიანული, უკვე შედეგია. მაგალითად, სვეტიცხოველი შიგნიდან კვირაცხოველია, კვირაცხოვლობა ქართული დღესასწაულია, რომელიც ქრისტიანებმა მიითვისეს. ბარბარობაც ქართულია, ბარბარე მზის სალოცავია, რომელიც შემდეგ ქრისტიანებმა მიითვისეს (ცნობისათვის, მეფის რუსეთი უფრო გვიწყობდა ამაში ხელს და 40-იან წლებამდე კომუნისტები).

_ მაშასადამე, თქვენ ამბობთ, რომ ძელიცხოველი უკვე უცხოურია? სვეტიცხოველი ხომ ძელიცხოველზე დაიდგა.

– უცხოურის ხიბლია. სვეტიცხოველს გარეთა კედლები რომ მოვხსნათ, საწყისი არის ქართული სალოცავი. ბავშვობაში, სვეტიცხოველში რომ დავდიოდი, სამი ახალგაზრდა გოგონა იყო გიდი და იმ მყარი ათეიზმის დროს ისინიც ყვებოდნენ, რომ სვეტიცხოვლის შიგნითა კედელი იყო ქართული სალოცავის კედელი.
ანჩის ხატი, როგორც შენობა-ნაგებობა, არის ბუდა რომელიც 1989 წელს გამოიტანეს როგორც იესო და არის ბუდა. ახლა ხელოვნების მუზეუმში ინახება ორი ბუდა, ერთი არის ნამდვილი ბუდა რასაც ჰქვია…
ქურთებს რომ გადაეცათ ნარიყალას ქვემოთ არსებული ტერიტორია ე.წ ათეშგათი. ათეშგათი შებოლილია 1985 წელს…

– რას ჰქვია შებოლილი…

– მაგ ადგილზე იყო მცირე ზომის ხის საწყობი სადაც ინახებოდა საბურავები და ის დაიწვა. შეისწავლონ ჭვარტლი და ხომ გაირკვევა რა შემადგენლობისაც არის – რომელი "მუდმივი ცეცხლის ტაძარი" რა ტყუილები და სიბრიყვეა, როგორ უნდა ბედავდეს ვინმე ასე თვალში ნაცრის შეყრას?
მე ისეთი პროფესია მაქვს ადვილად ვერავინ დამიდგება წინ, მითუმეტეს, რომ რაზეც ვსაუბრობ საკუთარი თვალით მაქვს ნანახი და გადამოწმებული. მე რომც არაფერი ვთქვა, თვითონ ღაღადებენ ქვები!… "მუდმივი ცეცხლის ტაძარი" კი არა, იქ არსებული ქართული სალოცავი მიართვეს ქურთებს! რომელი პოლიტიკის ნაწილია საკუთარი ისტორიის გაყალბება, არ მესმის და ვერც გავიგებ!
კაცხის სვეტი! – სვეტს ქვემოთ შემორჩენილი აქვს მზის სიმბოლო, მაგრამ რვა წელი გავიდა და გადაკეთდა ქრისტიანულად, რატომ?! რა ვქნა, საიდან ვიყვირო რომ გაიგოთ _ ქრისტიანობა არის ახალი ბერძნული რელიგია რომელსაც შიგნით გაერთიანებული აქვს კიდევ რამდენიმე რელიგიური მიმდინარეობა. ბერძნული, ებრაული _ თვით იმ ებრაულში განშტოებებია. მაგალითად, იოანობა. იქ წერია, რომ იესო მივიდა იოანესთან და გახდა, "ჩვენებურად" რომ ვთქვათ "იოანისტი". ეს უკვე სულ სხვა რელიგიური მიმდინარეობაა, ხომ?

უბედურებაა, აბა, რა არის, როცა შენს სულიერებასთან ერთად სრულიად უცხო რამ ითვისებს შენივე მზა შენობა-ნაგებობებსაც და იქიდან გიქადაგებს უცხოურს!… ასე მიითვისა ყველა უცხოურმა ქართველი ადამიანის სულიერება და მატერიალური სიმდიდრე და მინდა ხმა მივაწვდინო ვინმეს, ვთქვათ, "იუნესკოს", "მსოფლიო ძეგლთა დაცვის ორგანიზაციას", მე – ერთი კაცი თუ ვერაფერს გავაწყობ, ფაქტი დაფიქსირდეს რომ ტყუილზეა აგებული ეს ყველაფერი და დღესვე თუ არა, ხვალ მაინც უნდა დაუბრუნდეს კანონიერ შემოქმედს – დაგვიბრუნდეს ის, რაც ჩვენია!
"ალაზანი" მუსლიმანური სახელია, ქართულად ერქვა "ღვთის წყალი", სალოცავი მდინარე იყო…

– მაშასადამე, თქვენ ამბობთ რომ ქართულ რელიგიას ერქვა "გიორგიანობა" და ვიყავით (გვერქვა) "გიორგიანელები"?

_ გეოგრაფიული მეზობლები "გრუზიას" რომ გვიწოდებენ, "გურჯისტანს" – ეს ნიშნავს არა ქრისტიანობას, არამედ "გიორგიანელობას", ქართულ რელიგიას. ქართული მიწა-წყალი შემოსაზღვრულია ძველ არა მხოლოდ ქართულ რუკებში, ევროპულშიც და აზიურშიც და არის "გიორგიათი" შემოსაზღვრული.
ფაქტია, რომ საუკუნეების მანძილზე ხდებოდა მსოფლიო ისტორიის გაყალბება, უპირველესად ქართულს ვწუხვარ, ჩვენს თანამედროვეობაში კი ასე გამიზნულად ხდება რელიგიებისა და ისტორიული ფაქტების აღრევა, ვიღაცამ ხომ უნდა თქვას?
სულ რვა საუკუნეა, რაც საქართველომ ქრისტიანობა მიიღო, თქვენ კი გგონიათ, IV საუკუნეში მივიღეთ...

– მე 9 საუკუნეში მიიღეს რუსებმა ქრისტიანობა და მანამდე რა ჰქონოდათ, როცა მე 5 საუკუნეში ტომობრივი გაერთიანება ჰქონდათ…

– არ მიუღია მთლიანად რუსეთს (ან სად იყო), ეს ჩვენ მივიღეთ რვა საუკუნეა…

– რას ამბობთ? თქვენ მეუბნებით რომ XII–XIII საუკუნეებში მივიღეთ? ჩვენ მართლმადიდებლობის მიღების საწყისად ნანა დედოფლისა და მირიან მეფის გაქრისტიანება გვაქვს…

– არა! არა! ამ მოგონილ ზღაპრებს ნუ იჯერებთ! ეს იყო უცხოურის ხიბლი!

ჯვარი არის მსოფლიო ნიშანი, რომელიც აქვს ავსტრალიასაც, ინდონეზიასაც, ტიბეტსაც, ევროპასაც და რომელი ერთი ჩამოვთვალო, ინდიელებსაც კი. ჯვარი სამყაროს ოთხი მხარეა და გვქონდა ჩვენც, ბერძნებსაც, აისორებსაც და ა. შ ჯვარი არ არის არც ქართული და არც არავის ნიშანი, სამყაროს ოთხი მხარეა და მორჩა, ქართული ნიშანი არის ბორჯღალი!"

გადაკეთებულია ყველაფრის ისტორია და ასაკი! მაგალითად, თბილისის მეჩეთი და ე.წ არმიანული ეკლესია, სულ 170–180 წლისაა. აგურები შეამოწმონ! არმიანული ეკლესია აშენებულია ქართული აგურით, მეჩეთი – რუსული დაბეჭდილი აგურით, თარიღიც ზედ არტყია, მანამდე ეგ უცხოური სალოცავები იქ არ იყო, ეს არის ფაქტი და რატომ გავურბივართ? ათეშგათი იყო, მაგრამ ქურთული კი არა, ქართული სალოცავი იყო…

– ამეებს საიდან ამბობთ, პროფესიიიდან გამომდინარე?

– რესტავრაციებზე მუშაობა არც არის საჭირო, თვალნათლივ ეტყობა ყველა შენობას როგორ გადაკეთდა. მაგალითად, ანჩისხატს აბსოლუტურად ყველა გადაკეთება ეტყობა შეუიარაღებელი თვალისა და ცოდნის გარეშეც. მეტეხი მხოლოდ სამი საუკუნეა რაც ქრისტიანულად გადაკეთდა და ეტყობა გადაკეთება – მანამდე იყო ქართული რელიგიის შენობა, სახელიც იგივე შერჩა, ვერც შეუცვალეს.

– ქვაშვეთი? იმ ადგილას არაფერი იყო, ანუ არ არის ახლით შეფუთული?

– ქვაშვეთი მხოლოდ 100 წლისაა, მაგრამ ქვაშვეთი იმიტომ აშენდა, რომ "მასონი" ითარგმნება "ქვაშვეთად". ქვის შვეთაც შეიძლება, თლაც, ფლეთვაც, ხვეწაც, ტეხვაც. "მასონი" თვითონ რელიგიების ნაკრებია და ამ ნაკრებით გაკეთდა ერთი ახალი მიმდინარეობა.

უცხოელებს ესმით რასაც ვსაუბრობ, მაგრამ რატომღაც ქართველებს არ ესმით. ახლახანს დავესწარი უცხოური რელიგიების შეკრებას. თურქეთიდან იყო სუფისტების შეიხი, სუნიტების შეიხი, შიიტების შეიხი, დერვიშების შეიხი და ნაკაიძის თბილისელი წარმომადგენელი, ხოლო შეხვედრა იყო ბაპტისტების ეკლესიაში, მათ მოაწყვეს შეხვედრა და სცეს პატივი. მოკლედ რომ ვთქვათ, უცხოური რელიგიების შეკრება იყო საქართველოში. მე კი დავესწარი, მაგრამ არ დამალაპარაკეს, მხოლოდ ნაკაიძის წარმომადგენელმა უთარგმნა დერვიშების შეიხს რასაც ვამბობდი და დიდი ყურადღებით მისმენდა რომ წარმოვუდგინე თავი "ქართული" რელიგიის წარმომადგენლად, მაგრამ ვიღამ დამალაპარაკა, გამარიდეს იმ კაცს ბაპტისტებმა…
ბაპტისტების გადასაწყვეტია საქართველოში მე, ქართველი, ვის დაველაპარაკები და ვის არა? ეს იმდენად დამამცირებელია ქართული მიწისა და რელიგიისთვის, რა გითხრათ…

გიორგი ჩხეიძე

მეტის ნახვა
29-05-2018, 16:00


თითქმის ერთი წელია ხატიაშვილების ექვსსულიანი ოჯახი გამოსახლების მოლოდინით ცხოვრობს. ოჯახის უფროსი, 79 წლის ვიქტორ ხატიაშვილი პირველი ჯგუფის ინვალიდია, მისი მეუღლე, 78 წლის ნარი გეგეშიძე კი პენსიონერი. ხატიაშვილების ერთი ქალიშვილი საზღვარგარეთ, სამუშაოს საძიებლად არის წასული, მეორე დროებით უმუშევარი მარტოხელა დედაა და 15 წლის შვილს ზრდის. წლების მანძილზე, ოჯახის ერთადერთი შემოსავალი იჯარით აღებულ მიწის ნაკვეთზე გახსნილი კერძო ავტოსადგომი იყო, რომელსაც 1993 წლიდან 2011 წლამდე საიჯარო ხელშეკრულების საფუძველზე ფლობდნენ.
2011 წელს მერიის სსიპ „ქონების მართვის სააგენტომ“ ოჯახს საიჯარო ხელშეკრულება ვადაზე ადრე შეუწყვიტა და ამის მიზეზად, საიჯარო საფასურის გადაუხდელობა დაასახელა, თუმცა ოჯახში არსებული გადახდის ქვითრები საპირისპიროზე მეტყველებს. ნარი გეგეშიძის მონაყოლიდან ირკვევა, რომ მათთვის ჩამორთმეული მიწის ნაკვეთი მერიის სსიპ „ქონების მართვის სააგენტოს“ უფროსმა დავით ჭედიამ საკუთარ მეგობარზე გაასხვისა. მოგვიანებით კი ზემოთ აღნიშნული ტერიტორია არაბმა ინვესტორებმა შეიძინეს. ნარი გეგეშიძისა და ახალგაზრდა იურისტთა ასოციაციის არა ერთი მიმართვის მიუხედავად, პროკურატურამ საქმეზე გამოძიების დაწყება საჭიროდ არ ჩათვალა, ხატიაშვილების ოჯახი კი დღემდე ქუჩაში დარჩენის საფრთხე ემუქრება. სად გაქრა ხატიაშვილების მიერ გადახდილი გადასახადები და როგორ დაკარგა ოჯახმა ერთადერთი საცხოვრებელი?

„საერთო გაზეთს“ ნარი გეგეშიძე ესაუბრა:

— თითქმის ერთი წელია, რაც ქუჩაში დარჩენის მოლოდინით ვცხოვრობთ. ჩემი მეუღლე პირველი ჯგუფის ინვალიდია. ინსულტის შემდეგ პარალიზებულს დიაბეტური განგრენის გამო, აპრილში ფეხი მოკვეთეს და თავადაც ხედავთ, რომ ლოგინიდან ადგომა არ შეუძლია. ასეთი ავადმყოფი გამუდმებულ მოვლას საჭიროებს, ამიტომ შვილი მუშაობას ვერ ახერხებს და ჩვენ გვივლის. ამბის მოყოლას ცოტა შორიდან დავიწყებ და გეტყვით, რომ 1964 წლიდან 2007 წლამდე გლდანის 1 მიკრორაიონში მდებარე 33-ე ბაგა-ბაღის გამგედ ვიმუშავე. ბაღის შენობის უკან 1800 კვ.მ. ნაგავსაყრელად ქცეული ტერიტორია მდებარეობდა. მოგეხსენებათ, სამოქალაქო ომის შემდეგ მოსახლეობას ეკონომიურად გაუჭირდა. ყველა ცდილობდა, პატარა ბიზნესი წამოეწყო და ოჯახი ამით ერჩინა. მეც ამ პერიოდში გადავწყვიტე ადგილობრივ ხელისუფლებასთან შეთანხმებით, ნაგავსაყრელად ქცეული ტერიტორია გამესუფთავებინა და ავტოსადგომი გამეხსნა. 1995 წელს ხსენებული მიწის ნაკვეთი იჯარით ავიღეთ, გავასუფთავეთ, მავთულბადით შემოვღობეთ, ნარგავები ჩავყარეთ და ღამის ავტოსადგომი გავხსენით. მაშინ ქონების მართვის სააგენტოს ნაცვლად, ეკონომიკის სამინისტროსთან არსებული არქიტექტურის სამსახური იყო და იქ ხუთწლიანი ხელშეკრულება გავაფორმეთ, რომელიც ვადის გასვლის შემდეგ გავაგძელეთ. ბოლო, მესამე ხელშეკრულება 2007 წელს გაფორმდა და 2013 წლის 6 ივლისამდე ჰქონდა ვადა. საიჯარო გადასახადს, რომელიც წელიწადში 6000 დოლარს შეადგენდა, წლების მანძილზე კეთილსინდისიერად იხდიდით. 2010 წელს ქონების მართვის სააგენტომ 4 წლის საიჯარო გადასახადების წარდგენა გვთხოვა. მოთხოვნის შესაბამისად, მერიაში გადახდის ქვითრები წარვადგინეთ. მერიამ დაადასტურა, რომ ყველაფერი წესრიგში იყო და შენიშვნა არ მიგვიღია. 2011 წელს მერიამ უძრავ ქონებაზე ფასების ცვლილებასთან დაკავშირებით, საიჯარო გადასახადის ოდენობის გადახედვა გადაწყვიტა და სამხარაულის საექსპერტო ბიუროს ექსპერტიზის გავლა მოგვთხოვა. ეს ეტაპიც გავიარეთ და მერიაში ავიღეთ საბუთი, რომლის მიხედით, საიჯარო გადასახადი იგივე დარჩა, თუმცა 6000 დოლარის ნაცვლად, ამ თანხის ექვივალენტი ლარებში უნდა გადაგვეხადა. ყოველთვიურად, 500 დოლარის ექვივანენტს ვიხდიდით ლარებში. 2011 წელს ზემოთ აღნიშნული მიწის ნაკვეთის შესყიდვის მიზნით, მერიის ქონების მართვის სააგენტოს უფროსს დავით ჭედიას შესაბამისი განცხადებით მივმართეთ და აქედან დაიწყო ჩვენი ოჯახის უბედურება.

— თანმიმდევრობით გვიამბეთ რა მოხდა.

– როგორც გითხარით, 2011 წელს გადავწყვიტეთ, რომ ნაკვეთი, რომელსაც 18 წელი ვუვლიდით, შეგვესყიდა და ბიზნესი გაგვეფართოვებინა. მიწის შესაძენი თანხა რომ მოგვეძიებინა, ბინა კერძო იპოთეკით დავტვირთეთ. ამასობაში, მერიამ მოგვწერა, რომ ჩვენს განცხადებას განიხილავდნენ, მაგრამ მანამდე მიმდებარე საცხოვრებელ კორპუსთან წითელი ხაზების დადგენა უნდა მომხდარიყო. ჩემი ფულით გავაკეთე გამიჯვნა ბაგა-ბაღის ტერიტორიიდან და ყველაფერი მერიაში წარვადგინე, მაგრამ ტერიტორიის შესყიდვის ნაცვლად, 2011 წლის 30 დეკემბერს ქონების მართვის სააგენტოს უფროსმა დავით ჭედიამ ხელშეკრულება უკანონოდ შეგვიწყვიტა.

– ხელშეკრულების შეწყვეტის საფუძველი რა იყო?

– საფუძველი ვითომ იჯარის საფასურის გადაუხდელობა იყო, სინამდვილეში კი ჭედიას ამ ტერიტორიის დასაკუთრება სურდა. შეგახსენებთ, რომ ამ ადამიანზე 2014 წელს ფინანსთა სამინისტროს საგამოძიებო სამსახურმა სამსახურეობრივი უფლებამოსილების ბოროტად გამოყენების მუხლით სისხლის სამართლის საქმე აღძრა, თუმცა, გამოძიებასთან ითანამშრომლა და პასუხისმგებლობიდან თავის დაძვრენა მოახერხა. რა თქმა უნდა, დავინტერესდი იჯარა რატომ შემიწყვიტეს. მიპასუხეს, რომ საიჯარო გადასახადის დადგენასთან დაკავშირებით, წერილი გამოგიგზავნეთ, მერიაში მოსვლა გთხოვეთ და არ მოხვედითო. სინამდვილეში, წერილი არ ჩაგვბარებია და ამის დამადასტურებელი საბუთიც გვაქვს. ქონების მართვის სააგენტომ ჩვენი არგუმენტები არ გაითვალისწინა და სასამართლოში გვიჩივლა. ჩემს ოჯახს 25 000 დოლარის გადახდას თხოვდნენ, საიდანაც საიჯარო თანხა 17 641 დოლარს, ხოლო პირგასამტეხლო 8820 დოლარს შეადგენდა.

– როგორც ბრძანეთ, ქონების მართვის სააგენტომ 2010 წელს თქვენი 4 წლის საიჯარო გადასახადები შეამოწმა და დარღვევა ვერ ნახა. საინტერესოა, ერთ წელიწადში 25 000 დოლარიანი დანაკლისი საიდან აღმოაჩინეს?


– საქმეც ესაა.. 25 000 ლარი ფაქტობრივად, 4 წლის ქირა იყო და გამოდის, რომ 4 წელი არაფერი გადამიხდია. მალე გაირკვა, რომ ჩვენს მიერ ბანკში ყოველთვიურად გადახდილი თანხის ოდენობა, ქვითრებს არ ემთხვეოდა. მაგალითად, მერიის მიერ გამოქვეყნებულ დოკუმენტში წერია, რომ 2009 წლის იანვარში ჩემმა ოჯახმა 291 ლარი გადაიხადა, ჩვენი ქვითრის მიხედვით კი ეს თანხა 834 ლარს შეადგენს. მერიის მონაცემებით, 2009 წლის თებერვალში შეტანილი თანხა 292 ლარია, ჩვენი ქვითრის მიხედვით კი გადახდილი თანხა 837 ლარი გახლავთ. 2010 წლის მაისში მერიის მონაცემებით 311 ლარია გადახდილი, ქვითარში კი 890 ლარი ფიქსირდება. 2011 წლის მაისში მერიის მონაცემებით 294 ლარია გადახდილი, ქვითარზე 842 ლარი ფიქსირდება და ა.შ.

– მერიამ საკუთარ მონაცემებსა და თქვენს მიერ გადახდილ ქვითრებს შორის ცდომილების არსებობა რით ახსნა?

– ფულს სხვა კოდებზე რიცხავდითო, რაც სრული აბსურდია.. მე ზუსტად იმ სახაზინო კოდებზე ვრიცხავდი, რომლებიც ხელშეკრულებაშია მითითებული. სასამართლო პროცესების მიმდინარეობისას, მერიის იურისტმა ლევან აფხაზავამ დაზუსტებული სარჩელი წარადგინა და ოჯახისგან უკვე არა 17 641 დოლარი, არამედ 17 641 ლარი და პირგასამტეხლო 8820 ლარი მოითხოვა. 11 ივლისს გამართულ სასამართლო პროცესზე კიდევ ერთი სიურპრიზი გველოდა — მერიის ადვოკატმა ლევან აფხაზავამ სასამართლოს დავალიანების შესახებ ახალი დოკუმენტი წარადგინა და საიჯარო ქირის სახით 15 000 ლარით ნაკლები ანუ 2841 ლარი მოითხოვა, პირგასამტეხლოს სახით კი 8820 დოლარის ნაცვლად, 2081 ლარი. მერიამ სასამართლოზე ისიც კი ვერ ახსნა, თუ რატომ მოხდა მათ მიერ თანხის ამდენჯერ ცვლილება, თუმცა დარწმუნებული ვარ საიჯარო გადახდების დამადასტურებელი ქვითრები რომ არ შემენახა, პირველად დასახელებულ თანხას კაპიკს არ დააკლებდნენ და 25 000 დოლარის გადახდას მომთხოვდნენ. საბოლოოდ, სასამართლომ მერიის სარჩელი ნაწილობრივ დააკმაყოფილა და ხელშეკრულებიდან გამომდინარე, 2 853 ლარისა და პირგასამტეხლოს 2064 ლარის გადახდა დაგვაკისრა, თუმცა მთელი უბედურება ისაა, რომ ჭედია სასამართლოს გადაწყვეტილებას არ დაელოდა და პროცესების დასრულებამდე 6 თვით ადრე, მიწის ნაკვეთი თავის მეგობარზე ხათუნა გოგინაშვილზე გაასხვისა. სხვათა შორის, მისი მამა ზაურ გოგინაშვილი უმდიდრესი ადამიანია, რომელსაც თბილისში საცხოვრებელი კორპუსები, კახეთის რეგიონში ათასობით ჰექტარი სასოფლო-სამეურნეო მიწები, ალკოჰოლური სასმელის კომპანიები, და ღვინის ქარხნები აქვს. აღსანიშნავია, რომ გოგინაშვილებს ქონების დიდი ნაწილი დავით ჭედიას ქონების მართვის სააგენტოს უფროსის პოზიციაზე მუშაობის პერიოდში აქვთ შეძენილი. მიწის ნაკვეთი მე რომ შემესყიდა, საფასური 2 თვეში უნდა დამეფარა, გოგინაშვილებს კი განვადებით მისცეს. ფაქტობრივად, დავით ჭედიამ და ქონების მართვის სააგენტოს ადმინისტრაციული სამსახურის უფროსმა თამარ მათიაშვილმა მიწის ნაკვეთი უკანონოდ წამართვეს, მაგრამ სამართალს დღემდე ვერ მივაღწიე.. ნათქვამია, დიდ კაცთან პატარა კაცსა როდის გასვლია მართალიო.

– როგორც ვიცი ახალგაზრდა იურისტთა ასოციაციამ ამ საქმის შესწავლის მიზნით პროკურატურას მიმართა. პროკურატურისგან რა პასუხი მიიღეთ?

– საიას მიერ პროკურატურაში გაგზავნილ წერილში წერია, რომ ჩემი ოჯახი საიჯარო ხელშეკრულების გაფორმების დღიდან კეთილსინდისიერად ასრულებდა ხელშეკრულებით ნაკისრ ვალდებულებებს და გაურკეველია, რაზე დაყრდნობით არის გაანგარიშებული და კონკრეტულად, რომელი თვეების დავალიანებას ითხოვს მერია. წერილში ყურადღება გამახვილებულია იმაზე, რომ ჩემს მიერ დასახელებული ფაქტები სავარაუდო დანაშაულის ნიშნებს შეიცავს და გამოძიებას ექვემდებარება, თუმცა, პროკურატურიდან მიღებულ წერილში ასეთი რამ წერია: „როგორც გადახდის ქვითრებიდან ჩანს, თქვენს მიერ საიჯარო ქირის გადახდა ხორციელდებოდა სხვადასხვა სახაზინო კოდებზე, რის გამოც საქართველოს ფინანსთა სამინისტროს სახაზინო საამსახური 3208 სახაზინო კოდზე გადახდილ თანხებს ანაწილებდა სახელმწიფო და ქალაქ თბილისის ადგილობრივ ბიუჯეტებს შორის. შესაბამისად, ქალაქ თბილისის ბიუჯეტში აისახა გადახდილი თანხის 35%, ნაცვლად 100%-სა. ამიტომაც თბილისის მერიაში დაფიქსირდა თანხის არასრულად გადახდა“. საბოლოოდ, პროკურატურამ დაადგინა, რომ გამოძიების დაწყების საფუძველი არ არსებობს, მაგრამ დღემდე გაუგებარია, სად წავიდა ჩემს მიერ გადახდილი თანხის 65% და კეთილსინდისიერი გადამხდელი რატომ უნდა დავისაჯო ბიუროკრატიული შეცდომების გამო? ამის გარდა, საქმის სასამართლოში განხილვის დროს, არ მომხდარა იმ გარემოების გათვალისწინება, რომ იჯარით აღებული ფართის 38,3 კვ.მ მე არ მისარგებლია. 2007 წლიდან გლდანის რაიონის გამგებელმა აღნიშნული ფართი შემოღობა და იქ დევნილი მანანა თვარაძე ჩაასახლა, თუმცა ჩემი უამრავი მოთხოვნის მიუხედავად, იჯარის ხელშეკრულებაში არ მომხდარა ცვლილება ფართის ნაწილში და იმ ფართობის საიჯარო გადასახადსაც მე ვიხდიდი, სადაც დევნილი ქალბატონი ცხოვრობდა.

– როგორ აღმოჩნდა ხათუნა გოგინაშვილზე გასხვისებული მიწის ნაკვეთი არაბი ინვესტორების ხელში?

– არაბი ინვესტორები გოგინაშვილის მეგობარმა და სამშენებლო კომპანია „ბონა დეა და კომპანიას“ დირექტორმა პაატა ნუცუბიძემ მოიძია და 2017 წლის მარტში გოგინაშვილმა ჩემთვის წართმეული მიწა მათ მიყიდა. სხვათა შორის, ამ არაბებს სხვა მიწის ნაკვეთებიც ჩამოურიგეს. ზოგი თბილისში, ზოგი, ჯიხაიშში და ზოგი იანეთში. დღეს მიწის ნაკვეთი, რომელსაც ჩემი ოჯახი 18 წლის განმავლობაში უვლიდა, მიშელ სალიბას, სეიფ ჰაჩიმის, კაზან ფარიდის, სეიფ ჟანის და სიმონ ტაბჩარანის მფლობელობაშია, მე და ჩემს ოჯახს კი გამოსახლება გვემუქრება, რადგან ხელშეკრულების გაუქმების შემდეგ, იპოთეკარებისთვის პროცენტების გადახდა ვეღარ შევძელით. როგორც გითხარით, მიწის შესაძენად, ბინა კერძო იპოთეკარებთან, ცოლ-ქმარ მარინა მაღალდაძე და კობა კახნიაშვილებთან იპოთეკით დავტვირთეთ. ეს ადამიანები ცნობილი მევახშეები არიან და უამრავი ოჯახი ჰყავთ გამწარებული. სამაჩაბლოდან დევნილები არიან და მშვენივრად იციან რას ნიშნავს უსახლკაროდ დარჩენა, მაგრამ ამის მიუხედავად, ჩვენი სახლიდან გაყრისთვის ყველაფერი გააკეთეს. ძირი თანხა 55 000 დოლარი იყო. ამის სანაცვლოდ, 92 000 დოლარი და ყვარლის რაიონი სოფელი საბუეში მდებარე მიწის ნაკვეთები წაგვართვეს და კიდევ 7000 დოლარს გვთხოვენ. 2017 წლის 27 ივნისს, როცა იპოთეკარები გამოსასახლებლად მოგვადგნენ, იძულებული გავხდი ნათესავის დახმარებით, ფული „საქართველოს ბანკიდან“ გამომეტანა და ახლა უკვე ბანკი გვედავება.. წარმოიდგინეთ, რა დღეში ჩაგვაგდო მერიის უსინდისო ჩინოვნიკის მოქმედებამ. ამჟამად, ჩვენი სახლი „საქართველოს ბანკის“ სახელზეა გადაფორმებული და კაცმა არ იცის, ქუჩაში როდის გაგვყრიან. სამწუხაროდ, ჩვენს ქვეყანაში უცხოელი ინვესტორების უფლებები უფრო დაცულია, ვიდრე ჩვენი და მერე გვიკვირს, რატომ გარბის ხალხი ქვეყნიდან. ჩემს მეუღლეს თვეში სულ მცირე, 500 ლარის მედიკამენტი ჭირდება. ამ დროს, პირველი ჯგუფის ინვალიდია და მხოლოდ 180 ლარიან პენსიას იღებს. იმის ნაცვლად, რომ სახელმწიფო ასეთ მდგომარეობაში მყოფ ადამიანებს დახმარებოდა, ერთადერთი შემოსავლის წყარო წაგვართვა და ახლა ბინიდანაც გვაგდებს..
როგორც ზემოთ აღვნიშნეთ, პროკურატურამ საქმეში გამოძიების დაწყების საფუძველი ვერ აღმოაჩინა და ნარი გეგეშიძეს საქმის განხილვა სასამართლოში ურჩია. ხატიაშვილების ოჯახს ახალი სამართლებრივი დავის დასაწყებად არც ფინანსური და აღარც მორალური რესურსი გააჩნია, ამიტომ როგორ დასრულდება გამოსახლების მოლოდინში მცხოვრები ოჯახის ამბავი, ჯერჯერობით, უცნობია.

ნელი თორდია

მეტის ნახვა
29-05-2018, 14:30


კეშას ბლოგი 
____________________
ამბობენ, მალე ლეგალიზებული პლანი გვექნებაო, მაგრამ, ამ ჩვენს პროგრესულ ახალგაზრდებს რომ თეთრი ხმაური ქვიათ? თეთრი ხმაური და არა მწვანე სიმშვიდე. რას ეყოფა მაგათ ნარკოტიკით გაჯერებულ ორგანიზმს პლანის კაიფი?

არასოდეს მინახავს ქართული სპეცრაზმი ასე მობილიზებული მოსახლეობის დაცვაზე, არასოდეს მინახავს ორი დაპირისპირებული ძალის ასე უსისხლოდ დაშლა, არასოდეს მინახავს შსს-ს მინისტრი, რომელიც ორივე მხარესთან მივიდა სალაპარაკოდ და ორივე მხარემ მოუსმინა.
მანამდე კი, მანამდე ადამიანები იღუპებოდნენ, ზოგი გოგო, ზოგი ბიჭი, ზოგი პატარა და ზოგი დიდი…
ადამიანები და პოლიტიკოსები ერთხმად ითხოვდნენ – გვაჩვენეთ რა ხდება ბასიანში, ნუ უყურებთ ჩვენი შვილების სიკვდილს შორიდან, შედით ბასიანში და გამოიტანეთ ნარკოტიკი, თორემ, ჩვენ შევალთ და ჯერ რუმბივით გავაგორებთ იქაურ ფალავნებს და მერე თავებს დავკვეთთო.
ხოდა, ადგა შსს და შევიდა ბასიანში.

ტიტუ, შსს – ბასიანში ისე მოულოდნელად შევიდა და თან იარაღიც ეკეთაო…

მოგიკვდით, არ გაგაფრთხილათ, მოვდივარ და წამალი გადამალეთო? არ შემოყარეს ფერადი ბუშტები და არ გაუშვეს ფეიერვეკი, ისე მოვიდნენ?
რუსთავი 2 ის ჟურნალისტი ყოფილა მაგ დროს კლუბში, ხოდა, პირდაპირ ეთერში აღწერა, როგორ შევიდა შსს და როგორ ითხოვა კლუბის დაცლა სტუმრებისგან – მაგრამ, არ ცლიდნენ კლუბს, არ ჰქონდათ ბოლო ყლუპი ვისკი დალეული, ვერ მოასწრეს კოქტეილის მოწრუპვა…
აქეთ მაღალმა საზოგადოებამ დაიწყო აღშფოთება – საქართველოს კულტურულ ცენტრს, ბასიანს კლავენ, საქართველოში ტურისტები ბასიანის სანახავად ჩამოდიოდნენ და ახლა რა ვაჩვენოთო.

იქეთ, ბასიანელებმა დადეს პირველი ვერსია – საცეკვაოდ დავდივართ ჩვენ კლუბში და ცეკვას გვიშლიანო – მართალია, ფეხზე ვერ დგებოდნენ – მაგრამ დაწოლილი ცეკვაც ხომ არსებობს, კაცო? არსებობს, ალბათ, ტყუილს ხომ არ გვაკადრებდნენ.

მერე, ცოტა რომ შეფხიზლდნენ, გვითხრეს – არაო, მარტო საცეკვაოდ როგორ ვივლით ქვეყნის პროგრესული ნაწილი, ჩვენ კლუბებში ჰაერის დაბინძურებაზე, პოლიტიკაზე, სოციალურ თემებზე სასაუბროდ ვიკრიბებითო.
კლუბში ვინც არის, ერთხელ მაინც, ნამყოფი, ეცოდინება, რომ წარმოუდგენელია იქ რამეზე საუბარი მოახერხო, წარმოუდგენელია ხმა მიაწვდინო ადამიანებს და მათი ნათქვამი გაიგო – ხოდა, მგონი, ეგენი კლუბში არ იყვნენ, შეეშალათ მაგათ რაღაც.
ნუ, ახლა 9 აპრილის მემორიალზე რომ იცეკვეს, სამშობლოს რომ სულ ლანძღვა-გინებით მოიხსენიებდნენ და გაურკვეველ თავისუფლებას ეძახდნენ – სად გაიგეს თავისუფლება სამშობლოს გარეშე, რად უნდათ თავისუფლება სამშობლოს გარეშე. რა სამშობლო და რისი სამშობლო – ამათ ეს ქვეყანა საკაიფოდ უნდათ მხოლოდ.

რამდენ ხანს გაგრძელდება, ნეტავი, ნარკოტიკით მოტანილი თავისუფლება.
ნახევარი საქართველოღაა დარჩენილი, ამ ჩვენს ნახევარსაც არაბი და თურქი, სირიელი და ჩინელი გვართმევს – რა წამლით თავისუფლება, რის თეთრი ხმაური და მწვანე სიმშვიდე…

კარგად ჩანდა შსს-ს დადებულ ვიდეოებში, როგორ უთვლიდნენ ასლარიანებს ნარკორეალიზატორებს (ბარიგა არ უნდა დავუძახოთ, ხიხი სიტყვაა ბარიგა) – ვუყურებდი და ვფიქრობდი – რამდენ მშიერ ბავშვს დააპურებდნენ, რამდენ ობოლს გაახარებდნენ, რამდენ პენსიონერს გადაარჩენდნენ მცირე ხნით შიმშილისგან, მაგრამ თავისუფლების ფასიც ეს არის, ალბათ…

დაგვიანონსეს 17 ში – ლგბტ-ების გვერდით დავდგებითო – და აქამდე 11-ში, 12-ში და 13-ში ვის გვერდით იდგნენ, რო?
დადგნენ, უფრო გმირები გამოჩნდებიან, მეტად დიდები გამოჩნდებიან, მეტი ფასი დაედება მაგათ პროგრესულ აზროვნებას.
ასე იქცევა რუსი, რუსი კრძალავს ნარკოტიკს და ძირს რუსიო!

დებენ ჩვენი ემიგრანტი ქართველები, ევროპის ქალაქებიდან, პოლიციის მიერ, კლუბებში განხორციელებული რეიდების ფოტოებს – არ დაქცეულა ევროპა, არ გამოსულა ევროპის პროგრესული ნაწილი ქუჩაში – არა აქვთ, ეტყობა, იმათ ქუჩები.
მიუხტდნენ ქართველთა ნაწილი უწუ-ბუწუ პროგრესუკებს, მიუხტდნენ და დაშლა მოთხოვეს – გადაუვლიდნენ, ბევრნი იყვნენ, ლუკმად არ ეყოფოდათ.

არ დაანება პოლიციამ, ბოლომდე იბრძოდა, ფეხს არ იცვლიდა პოლიცია იმ დღეს.
მოიბოდიშა შსს-ს მინისტრმა, ვის მოუბოდიშა, რა მოიბოდიშა – მე კი ვერ გავიგე – მაგრამ თეთრმა ხმაურმა გაიგო და დაიშალა.
გაიგებდნენ, აბა, რა იქნებოდა, მომდგარი იყვნენ ქუჩას ხელკეტიანი ბიჭები, ცოტაც და ვეღარ შეაკავებდათ პოლიცია.
გაიგებდნენ, აბა, რას იზამდნენ, ორშაბათი მოდიოდა და ხალხს მაგათი ტანცებისთვის სადღა ეცლებოდათ.
მდგარიყვნენ, რომელი გმირები ეგ გყავდათ, რომ იქ კვირაობით გაეძლოთ მზისა და წვიმისათვის, ქარისა და მტვერისათვის, მოშივდებოდათ, მოწყურდებოდათ, დოზა მოუჭერდათ თავისუფლებაზე და მიაშურებდნენ თბილ კერებს.
ამასობაში, გახარიამ, ნარკოლიბერალიზაციაზე ვიფიქრებო.

ეჰ, ამ პროგრესულ თაობას განა თავისუფლება არ სურდა? განა თავისუფლებას არ ართმევდნენ? – რა ნარკოტიკი, რის ლიბერალიზაცია?
დღეს საავადმყოფოს ეზოში ჩამოვჯექი, გვერდით სკამთან პრაქტიკანტები იყვნენ შეკრებილნი – 15 მდე ახლაგაზრდა იქნებოდა.

- ეს რა სამარცხვინო აქცია იყო, მაგათ გვერდით დადგომაც კი ტეხავს.
- რა ნარკოტიკი, ნეტავი ოდესმე უფიქრიათ, მათმა შვილმა რომ წამალი გაიკეთოს, რას იგრძნობენ?
- ცეკვის წინააღმდეგი ვინაა, მაგრამ მემორიალზე რომ ცეკვავ…
- არ არის ის მემორიალი – წარწერაა, რომ მემორიალი უნდა დაიდგას იქ…
- მერე რა? მე რომ მოვკვდე და მარმარილოს დაფა ვერ დამადგან გულზე, ამიტომ უნდა მოხვიდე და ჩემს საფლავზე იცეკვო?
- ხო, ეგ მართალია…
- ნარკოტიკის ლეგიტიმაცია თუ მოხდება, ამ ქვეყანაში შვილები როგორ ვიყოლიო და გავზარდო, აღარ ვიცი. სადა აქვს ქართველ კაცს მაგისი თმენის უნარი, რომ ასე დაყრილ ნარკოტიკს აუქციოს გვერდი.
- წარმოდგენაც კი მიჭირს, ჩემმა შვილმა წამალი რომ გაიკეთოს, რა მომივა…
ეძებდით იმ დღეს მაგ ბრბოში პროგრესულ ახალგაზრდებს, ჭრელი ტანისამოსი რაკი აცვიათ და საყურე რაკი უკეთიათ, იმიტომ არ მოგწონთო – გვამუნათებდით.

ძალიანაც მომწონს ჭრელ ტანისამოსიანი და საყურებიანი ახალგაზრდები – ისინი აქ არიან, აქ, ჩვენს გვერდით არიან, პროგრესულად მოაზროვნეები, განათლებულები, ზრდილები და ლამაზები და არა იქ, სადაც მემორიალზე სტრიპტიზს ცეკვავენ და სამშობლოს დედ-მამის სულს უტრიალებენ. 
არ დგანან 9 აპრილის მემორიალზე – ნუ უყურებთ მხოლოდ პარლამენტის კიბეებს…

მეტის ნახვა
28-05-2018, 05:30


რა ეწერა "ქართული ოცნების" წინასაარჩევნო პროგრამაში, ვინ შეუშალა ხელი მის შესრულებას, რატომ უნდა გაეშვა ბიძინა ივანიშვილს გიორგი მარგველაშვილი განათლების მინისტრის თანამდებობიდან და რა გაამხილა ედუარდ შევარდნაძემ ხელისუფლებიდან წასვლამდე? "საერთო გაზეთი" განათლების ექსპერტს მანანა ნიკოლაიშვილს ესაუბრა:

– დავიწყებ იმით, რომ "ქართული ოცნების" სხვა დარგობრივი კომისიების მსგავსად, განათლებისა და მეცნიერების კომისიებშიც სერიოზული მუშაობა მიმდინარეობდა. ტარდებოდა შეხვედრები, რომლებსაც რამდენჯერმე ბიძინა ივანიშვილიც დაესწრო. პროგრამის ავტორებისა და ექსპერტების ერთობლივი შრომის შედეგად მივიღეთ კარგი და გამართული პროგრამა, რომლის მსგავსი არც ერთ პოლიტიკურ პარტიას არ ჰქონია. ძირითადი საკითხები შვიდ პუნქტად იყო ჩამოყალიბებული: განათლების სისტემის დეპოლიტიზირება, პოლიციური რეჟიმის აღმოფხვრა, ეფექტური მართვისა და დაფინანსების მექანიზმების შექმნა. მოგეხსენებათ, რომ სააკაშვილის ხელისუფლების დროს, დარღვეული იყო საერთაშორისო სამართლის ნორმებითა და ჩვენი კონსტიტუციით გათვალისწინებული განათლების ხელმისაწვდომობისა და თანაბრობის პრინციპი. ამ ვითარების გამოსწორება აუცილებელი იყო, რაც პროგრამაშიც ჩაიწერა. პირდაპირ იყო გაწერილი განათლების ხარისხის ამაღლებისა და მეცნიერების განვითარების ძირითადი მიმართულებები. მსოფლიოში მიმოფანტული ქართველი მეცნიერების მოზიდვის, დაფინანსებისა და სოციალური დაცვის საკითხები და ა.შ.

– საინტერესოა, რა შესრულდა ამ პროგრამიდან და რა არა?

– სამწუხაროდ, რამდენიმე ქვეპუნქტის გარდა, არაფერი გაკეთებულა. პროგრამაში პირდაპირ ეწერა, რომ სააკაშვილის ხელისუფლების დროს მიღებული ყველა ანტიმეცნიერული, ანტიეროვნული, ანტიკონსტიტუციური, ანტიხალხური, ანტიჰუმანური და საერთაშორისო სამართლის ნორმების წინააღმდეგ მიმართული კანონები უნდა შეცვლილიყო. დავსვათ მთავარი კითხვა- არის თუ არა ეს კანონები შეცვლილი დღეს, როცა ქართულმა ოცნებამ ერთი ვადა ამოწურა და მეორე ვადის შუაშია? რა თქმა უნდა, არა! დრო საკმარისზე მეტი ჰქონდათ, რომ გაეკეთებინათ, მაგრამ არ გააკეთეს. თუნდაც, განათლების დაფინანსება ავიღოთ. პროგრამის მიხედვით, ვაუჩერული დაფინანსება უნდა გაუქმებულიყო, საგრანტო დაფინანსება უნდა შეცვლილიყო და განათლების ოთხივე საფეხურზე სრულიად ახალი წესი უნდა შემოგვეღო, რაც არ მომხდარა. ეროვნული გამოცდების დღევანდელი მოდელი და საგნების არჩევითობა პირდაპირ ანგრევს უმაღლეს სკოლას. პროგრამა, რომლითაც "ქართული ოცნება" მოვიდა, ამ ყველაფრის შეცვლას ითვალისწინებდა, რაც არ მოხდა. პირად საუბრებში ხელისუფლების ზოგიერთი წარმომადგენელი პროგრამის შეუსრულებლობას საერთაშორისო ძალების წინააღმდეგობას აბრალებდა, მაგრამ ეს თავის მართლებას უფრო ჰგავს..

– განათლების სისტემის დეპოლიტიზირებასა და პოლიციური რეჟიმის აღმოფხვრაზე რას იტყვით?

– არც ეს მომხდარა.. თქვენ სააკაშვილის პერიოდში დეტალურად აშუქებდით განათლების სისტემის ოთხივე საფეხურს და მშვენივრად იცით, რომ საბავშვო ბაღებიდან დაწყებული, კვლევითი ინსტიტუტებით დამთავრებული, ყველაფერი პოლიტიზირებული იყო. ისიც გემახსოვრებათ, რომ 2004–2005 წლებში ნაციონალებმა ჯავახიშვილის უნივერსიტეტის ავტონომია ფეხქვეშ გათელეს, ერთი ბრძანებით ქუჩაში გაყარეს მსოფლიოში ცნობილი მეცნიერები, რექტორები, აკადემიური საბჭოები, პროფესორ-მასწავლები, სკოლის დირექტორები, პედაგოგები და მათ ნაცვლად, საკუთარი აქტივისტები დანიშნეს. ახლა მთავარი კითხვა – რატომ არ ჩაატარა "ქართულმა ოცნებამ" ხელახალი კონკურსები და რატომ არ მოაცილა სისტემას ნაციონალების პოლიტიზირებული კადრები? სხვათა შორის, ეს კითხვა ხელისუფლების ერთ-ერთ მაღალჩინოსანს დავუსვი და კითხვა შემომიბრუნა – რა მნიშვნელობა აქვს ქუჩაში აქციებს ვინ მოგვიწყობს ნაციონალი თუ ოცნების მომხრეო? ეს იყო მარგველაშვილის და ზოგადად, "ქართული ოცნების" ლოგიკა. პროგრამით გათვალისწინებული დეპოლიტიზირება სწორედ იმიტომ არ მოხდა, რომ ნაციონალების პარტიული ნიშნით დანიშნული ხალხი თანამდებობაზე დარჩა და იგივე საკადრო პოლიტიკა გრძელდება. 

– გემახსოვრებათ, პრეზიდენტის სიტყვები – განათლების სამინისტროში ჩემი მინისტრობის შემდეგ არაფერი გაკეთებულაო. 

– მარგველაშვილმა ბრძანა, მე გავეცანი ეროვნულ სასწავლო გეგმას, მოვისმინე სპეციალისტების რჩევები და ვფიქრობ, რომ ამ ეროვნულ სასწავლო გეგმას შეცვლა არ ჭირდებაო. საინტერესოა, რომელი სპეციალისტების რჩევები მოისმინა, იმ ნაციონალების ხომ არა, რომლებმაც განათლების სისტემა გაანადგურეს და დამანგრეველი კანონები მიიღეს? მე თუ მკითხავთ, როცა გიორგი მარგველაშვილმა ეროვნულ სასწავლო გეგმასთან დაკავშირებით განცხადება გააკეთა, იმავე დღეს თანამდებობიდან უნდა მოეხსნათ. პირველივე საჯარო განცხადებებიდან გამოჩნდა, რომ მარგველაშვილი "ქართული ოცნების" პოლიტიკურ ბანაკში არ იყო. 

– ახლახან, პრეზიდენტმა შეგვახსენა, რომ განათლების მინისტრად მუშაობის დროს პოლიტიკური ნიშნით გათავისუფლებული პედაგოგების სამსახურში აღსადგენად ქმედითი მექანიზმი შექმნა. 

– როგორც ვიცი, კომისიაში მხოლოდ ერთი კვირის მანძილზე ორი ათასამდე განცხადება შევიდა, მაგრამ მათი უმეტესობა კანცელარიიდან დაიკარგა, რაც ნაციონალებით დაკომპლექტებულ სამინისტროში გასაკვირი არაა. საბოლოოდ, ათასამდე განცხადებიდან ოციოდე დააკმაყოფილეს და აქედანაც სამსახურში ერთი თუ ორი უფლებადარღვეული დირექტორი აღადგინეს. ამით იწონებს თავს მარგველაშვილი?

– საუბრის დასაწყისში ბრძანეთ, რომ ხელისუფლების ზოგიერთი წარმომადგენელი წინასაარჩევნო პროგრამის შეუსრულებლობას საერთაშორისო ძალების წინააღმდეგობით ხსნიდა. იქნებ დაგვიკონკრეტოთ, რომელ საერთაშორისო ძალებს გულისხმობდნენ და რა იყო ზემოთხსენებულ პროგრამაში მათთვის მიუღებელი?

– ცოტა შორიდან დავიწყებ და გეტყვით, რომ მე წლების მანძილზე თბილისის საკრებულოში სოციალურ საკითხთა კომისიის ვხელმძღვანელობდი. ვადის ამოწურვის შემდეგ ანუ 2003 წლიდან თბილისის მერისა და საკრებულოს მთავარი მრჩეველი გახლდით. ეს ის პერიოდია, როცა საკრებულოს მიხეილ სააკაშვილი ხელმძღვანელობს, პარლამენტს ნინო ბურჯანაძე და ახალგაზრდა რეფორმატორები ხელისუფლებაში მოსასვლელად ემზადებიან. ამ გუნდის მიზანი ხელისუფლების მაქსიმალურად შესუსტება იყო, ამიტომ ხელისუფლებისთვის განათლების, სპორტისა და კულტურის ანუ ყველაზე მასობრივი დარგების წართმევა მოინდომეს და მუნიციპალური სკოლის დებულება შეიმუშავეს. ამის პარალელურად, სტუდენტებთან აქტიურად მუშაობა დაიწყეს.

სწორედ მაშინ მოხდა აბსოლუტურად მიუღებელი რამ – საერთაშორისო კანონმდებლობით, განათლების სისტემაში პოლიტიკური და რელიგიური გაერთიანებების შექმნა აკრძალულია. სწორედ ეს პრინციპი დაარღვიეს ახალგაზრდა რეფორმატორებმა. მე იმ დროს, ახალგაზრდა რეფორმატორების გუნდს ოპონირებას ვუწევდი. მუნიციპალური სკოლის დებულებასთან დაკავშირებით დეტალური დასკვნა დავწერე, რომელსაც ვერაფერი დაუპირისპირეს და როგორც ქვეყნის პოლიტიკურმა ელიტამ თუ ექსპერტულმა წრეებმა შეაფასეს, მაშინ რეფორმატორებს ასით ნული მოვუგე. მე პირდაპირ ვუთხარი სააკაშვილს, რომ ამის მიღებას არ დავანებებდი, თუმცა, შემდეგ დებულება თბილისის მთავრობას მიაღებინა.
სიტყვა რომ არ გამიგრძელდეს, გეტყვით, რომ ამ საკითხებზე სასაუბროდ შევარდნაძემ ჩემთან შეხვედრა მოისურვა. ჩვენს შორის რამდენიმე შეხვედრა შედგა.

პირველ შეხვედრაზე პრეზიდენტმა მთხოვა, როგორც ექსპერტს შემეფასებინა საქართველოში განათლების ოთხივე საფეხური და მოურიდებლად მეთქვა რა გაფუჭდა ან არასწორად გაკეთდა მისი მმართველობის დროს განათლების სისტემაში. მეორე შეხვედრაზე შევარდნაძეს ჩემი დასკვნა მივუტანე და როცა კიდევ შევხვდი, ყველაფერი წაკითხული და დამუშავებული ჰქონდა. ჩვენს შორის საინტერესო დიალოგი გაიმართა. მე მას საკადრო პოლიტიკის შესახებ და კონკრეტულად, ერთ-ერთი მინისტრის თანამდებობაზე დანიშვნის მიზანშეწონილობაზე ვკითხე და გამაოგნებელი პასუხი გამცა. შევარდნაძემ მითხრა, თქვენ რომ ის კანდიდატურები გენახათ, რომელსაც მთავაზობდნენო, თვალებს არ დაუჯერებდით. ყალბი თავმდაბლობის გარეშე აღნიშნა, რომ მისი წონისა და გავლენების მქონე პოლიტიკოსს უზარმაზარი ძალისხმევა დაჭირდა, რომ განათლების მინისტრად შეთავაზებულებზე უკეთესი კანდიდატურა დაენიშნა. ამის გარდა, ისეთი რეფორმების გატარებას მოითხოვდნენ, რასაც არასოდეს გავაკეთებო.

– კონკრეტულად, რა რეფორმებზე იყო საუბარი?

– მაგალითად, საერთაშორისო სავალუტო ფონდში საქართველოს "კურატორმა" შადმან ვალავიმ ბაგა-ბაღების დახურვა მოთხოვა. თუ გინდათ, რომ ფოთში ხორბალი შემოვიდეს, ბაღები უნდა დახუროთო. საერთაშორისო ორგანიზაციებმა მშვენივრად იცოდნენ, რომ ხარისხიანი განათლება ხარისხიანი სკოლამდელი აღზრდის სისტემის გარეშე შეუძლებელია. რა თქმა უნდა, შევარდნაძის ხელისუფლებიდან ჩამოშორების შემდეგ ეს ყველაფერი განახორციელეს და მიშა იქნებოდა თუ გრიშა, არავინ არაფერს ჰკითხავდა. საქართველოს ერთ-ერთი საუკეთესო განათლების სისტემა ჰქონდა და სისტემის ასეთი სრულმასშტაბიანი ნგრევა არც ერთ ქვეყანაში არ მომხდარა. სანამ ხელისუფლება ნაციონალების მემკვიდრეობაზე უარს არ იტყვის და თავისი პირველი პროგრამის განხორციელებას არ შეუდგება, არავითარი განათლების ხარისხის ამაღლება არ გვექნება და ამას რაც უფრო მალე მიხვდებიან, ქვეყნისთვის უკეთესი იქნება.

ნელი თორდია

მეტის ნახვა
27-05-2018, 20:00


საგარეო საქმეთა სამინისტროსა და საზღვარგარეთ საქართველოს წარმომადგენლობების ჩართულობით 26 მაისი მსოფლიოს მასშტაბით საზეიმოდ აღინიშნა.

საქართველოს დამოუკიდებლობის დღეს, 26 მაისს საქართველოს დროშის ფერებში განათდა მსოფლიოს სხვადასხვა ღირშესანიშნაობები. მათ შორის ლიუბლიანის ციხესიმაგრე, თურქეთში, ქალაქ ანკარაში სასტუმრო შერატონის შენობა; კორეაში, სეულის მუნიციპალიტეტის და ესტონეთში საქართველოს საელჩოს შენობები.

საბერძნეთში ეროვნული სიმბოლოს ფერებში განათდა ქალაქის ერთ-ერთი ცენტრალური შენობა - ქ. თესალონიკის მერია, ხოლო შენობის წინ, განთავსდა ბანერი საქართველოს დამოუკიდებლობის 100 წლისთავის ლოგოს გამოსახულებით. გენერალური საკონსულოსა და ქართული დიასპორის წარმომადგენელთა მონაწილეობით, გაიმართა პერფორმანსი.

ასევე განათებული იქნა ლიეტუვას დედაქალაქ ვილნიუსში ხიდები მდინარე ნერისზე და ქალქის ღირსშესანიშნაობა - სამი ჯვრის მონუმენტი. ამასთან, პრეზიდენტის ადმინისტრაციამ განათავსა სიმბოლური წარწერა შენობის ფასადზე და ადმინისტრაციის წინ მდებარე მოედანზე და აღმართა საქართველოს სახელმწიფო დროშა. ლიეტუვას პრეზიდენტმა, დალია გრიბაუსკაიტემ საქართველოში ჩამოსვლასთან ერთად ვიდეო-მოლოცვა მოამზადა საქართველოს მოქალაქეებისათვის.

ლატვიაში, იურმალას ზაფხულის ფესტივალის ფარგლებში წარმოდგენილი იქნა ქართული სტენდი. ღონისძიების ფარგლებში საქართველოს საელჩოს წარმომადგენლებმა, ქართულ სათვისტომოსთან ერთად საქართველოს დროშებით და საიუბილეო ბანერებით მონაწილეობა მიიღეს ქალაქის ცენტრალურ ქუჩაზე გამართულ იურმალას მარშში. ამავე დღეს ქალაქ რიგაში საქართველოს საელჩოს შენობის წინ განთავსდა ყვავილებისგან შექმნილი კომპოზიცია - საქართველოს ეროვნული დროშა და რიცხვი 100.

ირლანდიაში საქართველოს საელჩოსა და დუბლინის მერიის ერთობლივი ორგანიზებით, საქართველოს დამოუკიდებლობის დღის აღსანიშნავად, დუბლინის ცენტრში საქართველოს სახელმწიფო დროშები გამოიფინა. ხოლო დამოუკიდებლობის გამოცხდების ისტორიულ დროს 17:10 საათზე საელჩომ ირალნდიაში მცხოვრებ ქართველებთან დუბლინის ცენტრალური მოედნიდან ვიდეომილოცვა გაავრცელა.

საქართველოს დამოუკიდებლობის დღის და პირველი დემოკრატიული რესპუბლიკის დაარსების 100 წლისთავის აღსანიშნავად, ეგვიპტეში საქართველოს საელჩომ გიზას პირამიდებთან სადღესასწაულო სანახაობრივი ღონისძიება გამართა.


უკვე ტრადიციულად ქართული ჩოხით შეიმოსა ბელგიაში ბრიუსელის სიმბოლო Manneken-Pis და ბრიუსელის ქართული ეკლესიის მგალობელთა გუნდმა შეასრულა საქართველოს ჰიმნი.

ესტონეთში საქართველოს პირველი დემოკრატიული რესპუბლიკის დაარსებიდან 100 წლის იუბილის აღსანიშნავად გაიმართა საზეიმო საჯარო ღონისძება - კომპანია „ბორჯომის“ პიკნიკი საქართველოსსაელჩოსთან ერთად, ხოლო საქართველოს დროშები აღიმართა ესტონეთის სხვადასხვა ქალაქებში.

საიუბილეო თარიღის შესახებ ინფორმაცია და ვიდეო რგოლები მთელი დღის განმავლობაში ტრიალებდა ტალინის, მინსკის, კიშინეუსა და სხვა დედაქალაქების ცენტრალურ მოედნებზეგანთავსებულ ბილბორდებზე.

საქართველოს დროშები ფრიალებდა სლოვაკეთში საქართველოს საელჩოს შენობიდანაც.

26 მაისს, საქართველოს დამოუკიდებლობის დღისა და საქართველოს პირველი დემოკრატიული რესპუბლიკის გამოცხადების 100 წლის იუბილეს აღსანიშნავად საზეიმო მიღებები გაიმართა ბრაზილიის ფედერაციულ რესპუბლიკაში, სლოვენიის რესპუბლიკასა და დანიაში. ღონისძიებებში მონაწილეობას აღმასრულებელი და საკანონმდებლო ხელისუფლების, სამოქალაქოსაზოგადოებისა და საერთაშორისო ორგანიზაციების, დიპლომატიური კორპუსისა და ქართული დიასპორის წარმომადგენლები იღებდნენ.

26 მაისს, თბილისის დროით 17.10 სთ-ზე, საქართველოს პირველი დემოკრატიული რესპუბლიკის დამოუკიდებლობის გამოცხადების დრო მსოფლიოს სხვადასხვა ქალაქებში საზიმოდ აღნიშნეს საქართველოს დიპლომატიური წარმომადგენლობების და ქართული დიასპორული ორგანიზაციების წევრებმა. საიუბილეო თარიღის პოპულარიზაციის მიზნით, საზეიმო აქტივობების და მილოცვების ამსახველი ვიდეოები რეგულარულად თავსდებოდა, სოცილაურ ქსელებსა და მედიაში.

საქართველოს პირველი დამოუკიდებელი რესპუბლიკის 100 წლის საიუბილეო ღონისძიებების ციკლი მთელი წლის განმავლობაში გასტანს.

mfa.gov.ge

მეტის ნახვა
27-05-2018, 15:30


18 მაისს შინაგან საქმეთ მინისტრი გიორგი გახარია საქართველოს საკანონმდებლო ორგანოს პლენარულ სხდომაზე პარლამენტართა წინაშე წარდგა. მან მადლობა გადაუხადა დეპუტატებს მისთვის მიცემული შესაძლებლობისთვის, წარუდგინოს მათ სამინისტროში მიმდინარე პროცესებზე თავისი მოსაზრებები, გეგმები, აგრეთვე დეტალური ინფორმაცია ბოლო დღეებში განვითარებულ მოვლენებზე, განსაკუთრებით, 12 მაისის ღონისძიების შესახებ. გიორგი გახარიამ ხაზგასმით აღნიშნა, რომ პარლამენტში გამოსვლა მისთვის, მისი გუნდისა და მთლიანად სამისტროსთვის არის შესაძლებლობა, ესაუბროს არა მარტო პარლამენტარებს, არამედ ჩვენს მოქალაქეებსაც.

გიორგი გახარია:
„გვინდა, წარმოგიდგინოთ რეფორმების გეგმა, რომელსაც ჩვენ დავარქვით სისტემური განახლება. რეფორმების სრული გეგმა გვინდა წარვუდგინოთ პოლიციელებს 31 მაისს, პოლიციის დღეს, და შემდგომ გეწვიოთ თქვენ და კიდევ უფრო დეტალურად გაგაცნოთ ის გეგმები, რომლებსაც ახორციელებს შინაგან საქმეთა სამინისტრო 2018 წლის განმავლობაში.

კონცეპტუალურად ამ გეგმების შესახებ: ჩვენი მოქალაქეების უსაფრთხოებისა და მართლწესრიგის დაცვა ჩვენს ქვეყანაში შინაგან საქმეთა სამინისტროს ძირითადი ამოცანაა. საზოგადოების მხრიდან უსაფრთხოებაზე, მართლწესრიგსა და საპოლიციო სერვისებზეც მოთხოვნა დღითიდღე იზრდება – ჩვენს რეგიონშიც და ქვეყანაშიც გამოწვევები მატულობს და ისინი უფრო მრავალფეროვანი ხდება. ამ გამოწვევების საპასუხოდ, სამინისტროში შემუშავებულია სისტემური განახლების სამოქმედო გეგმა, რომელიც სამ მიმართულებას მოიცავს. ეს გახლავთ სტრუქტურული რეფორმები, შინაარსობრივი რეფორმები და საკანონმდებლო ჩარჩოს დახვეწა. თითოეული გულისხმობს კონკრეტულ გეგმას. სტრუქტურული რეფორმების ძირითადი კომპონენტებია: კრიმინალური პოლიციის რეფორმა, საპატრულო პოლიციის რეფორმა, საზღვრის ინტეგრირებული მართვა და ადამიანის უფლებების კომპონენტის დაცვის გაძლიერება ცენტრალურ აპარატში.

კრიმინალური პოლიციის კომპონენტი სამართალდამცავი სისტემის და კრიმინალთან ბრძოლის ხერხემალია. პირველ რიგში, რაც გავაკეთეთ, არის ის, რომ დღეს კრიმინალურ პოლიციაში ხდება სპეციალიზაციის მკაფიო გამიჯვნა. ცალკე გამოიყო საგამოძიებო კომპონენტი და უკვე დავიწყეთ ტესტირება ამ მიმართულებით. საკმაოდ კარგი მონაცემები გვაქვს. რაც ყველაზე მთავარია და რისიც ყველაზე დიდი იმედი გვაქვს, ეს არის ე.წ. უბნის ინსპექტორი, რომელსაც უახლოეს პერიოდში წარმოგიდგენთ უკვე ახალი სახელით და ახალი, განახლებული ფუნქციებით – ეს გახლავთ უბნის ოფიცერი. უკვე შექმნილი გვაქვს მათი კონკრეტული სამოქმედო გეგმა. თბილისის მასშტაბით, ასეთ პოზიციაზე გვჭირდება 365 ადამიანი, 80 ადამიანის მომზადება უკვე დაწყებულია. 10 ივნისიდან გამოცხადდება ღია კონკურსი საქართველოს მოქალაქეებისთვის".

მინისტრმა ისაუბრა იმ სიახლის შესახებ, რომელიც ქვეითი პატრულის კორპუსის ჩამოყალიბებას ეხება. ამგვარი პატრულირება განაპირობა ჩვენს ქვეყანაში ტურისტების ნაკადის მატებამ, რაც დიდი სარგებელია ეკონომიკისთვის და იმავდროულად, უდიდესი გამოწვევაა სამართალდამცავი სისტემისთვის. 21 მაისიდან ტურისტულ ზონაში საპატრულო პოლიციის ქვეითი ქვედანაყოფის 20 ეკიპაჟის პატრულირების გარდა, ყოველთვიურად მას დამატებით 20 ეკიპაჟი მიემატება. საბოლოოდ, ამ ქვედანაყოფის 60 ეკიპაჟი სრულად გააკონტროლებს თბილისის ტურისტულ ადგილებს.

გიორგი გახარია: „კრიმინალთან ბრძოლაში ვერანაირი წარმატება ვერ იქნება სათანადოდ შეფასებული ჩვენი მოქალაქეების მხრიდან, თუ არ შევინარჩუნეთ ადამიანის უფლებების დაცვის შესაბამისი სტანდარტი. სწორედ ამ მიზნით, ცენტრალურ აპარატში შეიქმნა ადამიანის უფლებების დაცვის დეპარტამენტი, რომელსაც აქვს კონკრეტული ამოცანები, აქვს კონკრეტული გეგმები და მისი მუშაობის ეფექტიანობა უკვე აისახება ციფრებშიც. კიდევ ერთხელ მინდა აღვნიშნო, რომ ადამიანის უფლებების დაცვის გარეშე კრიმინალთან ბრძოლის ფასი არის ნული და ვერანაირი შედეგები და წარმატებები ჩვენთვის დამაკმაყოფილებელი ვერ იქნება“.

გამომსვლელმა განსაკუთრებული ყურადღება დაუთმო ანალიტიკისა და ტექნოლოგიების საკითხებს და აღნიშნა, რომ სამინისტროში ყველაფერი კეთდება საიმისოდ, რომ მათს საქმიანობაში ძირითადი მიმართულებები იყოს ანალიზზე დაფუძნებული საპოლიციო მომსახურების ყველაზე მაღალი სტანდარტების მაჩვენებელი.

გიორგი გახარია:
„ჩვენი ძირითადი ამოცანაა მართლწესრიგი, საზოგადოებრივი უსაფრთხოება და კრიმინალთან ბრძოლა. ამ ამოცანებზე შესაბამისი და სათანადო პასუხის გაცემა შეუძლებელია ეფექტიანად მომუშავე პოლიციის გარეშე, ეფექტიანად მომუშავე პოლიციის სოციალური დაცულობის ხარისხი კი უნდა იყოს ძალზე მაღალი. კიდევ ერთხელ აღვნიშნავ, რომ კრიმინალთან ბრძოლაში ვერანაირი წარმატებები ვერ გაამართლებს ადამიანის უფლებების დაცვის სტანდარტის დაუცველობას“.

მინისტრმა დიდი დრო დაუთმო იმ სპეცოპერაციაზე საუბარს, რომელიც ღამის კლუბებში „ბასიანსა“ და „გალერიში“12–13 მაისის ღამეს ჩატარდა. მან მადლობა გადაუხადა თითოეულ პოლიციელს, რომელიც მონაწილეობდა ამ ღონისძიებაში, მით უმეტეს, რომ, მინისტრის თქმით, უფლებამოსილების გადამეტების ვერც ერთი მაგალითი ვერავინ ვერ წარმოადგინა. და თუ მსგავსი მაგალითები წარმოდგენილი იქნება, სამინისტრო შესაბამისს რეაგირებას მოახდენს.

გიორგი გახარია:
სამთვიანი საგამოძიებო მოქმედებების შედეგად, ერთმნიშვნელოვნად ფაქტობრივი მასალებით დადასტურდა, რომ კლუბებში ნარკოტიკული საშუალებების გაყიდვა სისტემური სახით მიმდინარეობდა. ჩვენ, საკონტროლო შესყიდვის საფუძველზე პირდაპირ ვადასტურებთ, რომ კონკრეტული ადამიანები კონკრეტულ კლუბებში სისტემატურად ყიდდნენ ნარკოტიკულ საშუალებებს. საკონტროლო შესყიდვა დაფიქსირებული გვაქვს სასამართლო განჩინებით, 20-ზე მეტი კონკრეტული ფაქტი, როგორც მიმდებარე ტერიტორიაზე (მიმდებარე ტერიტორია არ ნიშნავს გვერდით უბანს, ეს არის კლუბის წინ), ისე კლუბის შიგნი თ. სადაც დადასტურებული არ გვქონდა კლუბის შიგნით შესყიდვა, ღონისძიება არ ჩაგვიტარებია. ერთ-ერთ კლუბში გაყიდვას ახორციელებდა დაცვის უფროსი, ადმინისტრაციის ჩვეულებრივი წევრი. შესაბამისად, ჩნდება კითხვა: როდესაც მსგავსი მტკიცებულებები გაგვაჩნია, უნდა შევსულიყავით კლუბში თუ არა? ვფიქრობ, აქ კითხვის ნიშნები საერთოდ არ არსებობს. ფორმასთან დაკავშირებითაც გვაქვს შინაგანი რწმენა იმისა, რომ სწორად მოვიქეცით, ჩვენი მოქალაქეების უფლებების დაცვით. თუ უფლებამოსილების გადამეტების ერთი ფაქტი მაინც დადასტურდება, ამაზე გვექნება აბსოლუტურად ღია, ტრანსპარანტული რეაქცია.

ამასთან ერთად, მინდა გითხრათ, რომ სამწუხაროდ, ბოლო რამდენიმე კვირის განმავლობაში, ინტოქსიკაციის რაოდენობა კრიტიკულად გაიზარდა, რასაც თავისი ახსნა აქვს. ეს იყო ის ძირითადი გამოწვევები, რის გამოც ჩვენ გადავწყვიტეთ ღონისძიების ჩატარება. იყო ორი კომპონენტი, პირველი – აბსოლუტურად ნათელი მტკიცებულებები და არანაირი ფორმალური იურიდიული შეკითხვები ამ მიმართულებით არ არსებობს, და მეორე – ოპერატიული ინფორმაცია, რის გამოც ჩვენ ეს ოპერაცია ჩავატარეთ.

მინისტრმა განმარტა აგრეთვე, თუ რატომ ჩატარდა ჩხრეკა ღამის კლუბებში მაინცდამაინც ასეთ დროს:

გიორგი გახარია: „არჩევანი იყო ძალიან მარტივი – ან ეს უნდა განგვეხორციელებინა დაახლოებით პირველი-ორი საათის განმავლობაში, სადაც მინიმალური რაოდენობის ხალხი იქნებოდა კლუბებში და მაქსიმალურად ფხიზელი, ან გამთენიისას, 6-იდან 7 საათამდე, როცა იქნებოდა მაქსიმალური რაოდენობა ხალხის და მდგომარეობა იქნებოდა ნაკლებად პროგნოზირებადი. პირველ შემთხვევაში, პრობლემები გვექნებოდა ღონისძიების შემდეგ, რაც მოხდა და ეს აბსოლუტურად გააზრებული გვქონდა, მეორე შემთხვევაში – ღონისძიების მსვლელობის დროს. ეს იყო საგამოძიებო ჯგუფის კონკრეტული გადაწყვეტილება, რომელიც იყო აბსოლუტურად სწორი და გამართლებული. ის, რაც მოხდა ამ ღონისძიების შემდგომ, ეს ჩვეულებრივი აზრის გამოხატვაა, რომლის თავისუფლებაც პოლიციამ უზრუნველყო. თუ იქ ხდებოდა დაკავება, მხოლოდ დაუმორჩილებლობის ნაწილში. ერთადერთი კომპონენტი იყო მაშინ, როდესაც მომიტინგეები ცდილობდნენ გზის გადაკეტვას. აქ იყო გარკვეული, ასე ვთქვათ, დისკომფორტი პოლიციელებსა და მათ ურთიერთობას შორის… არანაირი სახის სპეცაღჭურვილობა ამ ღონისძიებებში გამოყენებული არ ყოფილა“.

პლენარულ სხდომაზე შინაგან საქმეთა მინისტრის გამოსვლის პოლიტიკური შეფასებებისა და დებატების შემდეგ, გიორგი გახარიამ დეპუტატებს დასკვნითი სიტყვით მიმართა. მინისტრის სიტყვის მთავარი ადრესატი რიგითი პოლიციელები იყვნენ.

გიორგი გახარია:
„პირველ რიგში, მინდა, მადლობა გადავუხადო დეპუტატებს. ჩვენთვის პატივია და ძალიან სასარგებლო, წარვდგეთ თქვენ წინაშე. რა თქმა უნდა, მინდა, კიდევ ერთხელ მადლობა გადავუხადო თითოეულ პოლიციელს და ვუთხრა, რომ თმენის ვალდებულება არის საფუძველი ჩვენი მოვალეობის შესრულების. კეთილსინდისიერება და ეფექტიანობა არის ის კრიტერიუმები, რომლებიც მოგვცემს საშუალებას, აღვადგინოთ ნდობის ის მაღალი ხარისხი, ურომლისოდაც ეფექტიანი ბრძოლა კრიმინალთან იქნება შეუძლებელი.“.

მეტის ნახვა
26-05-2018, 23:11


ქვეყანაში 200 000 ნარკომომხმარებელი და 50 000 პრობლემური ნარკომანია

გვესაუბრება დამოუკიდებელი უფლებადამცველი დიმა ლორთქიფანიძე:

– ბატონო დიმა, სამოქალაქო დაპირისპირების შემდეგ, 90-იან წლებში, ნარკოტიკების მოხმარების ბუმი იყო, თუმცა, ნარკომომხმარებლები ამას მალავდნენ, ახლა კი, ღიად ამბობენ: მე ნარკომანი ვარო, უფრო მეტიც, მოგვიწოდებენ მათ მივბაძოთ. აქამდე, როგორ მივედით?

– 60-იანი წლების სკანდალურ, სექსუალურ რევოლუციას, რომელიც აშშ-ში დაიწყო არაერთი კლასიკური ნაწარმოები მიეძღვნა, მათ შორის, მილოშ ფორმანის"თმები", რომელშიც იმდროინდელი ახალგაზრდობის თავისუფლების იდეით საოცარი გატაცებაა გადმოცემული. ეს იდეა ჩამოყალიბდა როგორც სწრაფვა სექსისკენ, ნარკოტიკებისკენ, რეალობისგან გაქცევის მცდელობა.

შემდეგ იყო ჰიპების მოძრაობა და რაღაც დოზით ნარკოტიკი მთელს მსოფლიოში გავრცელდა. ქართველები ნიჭიერი ხალხი ვართ ყველაფერს (როგორც დადებით ისე უარყოფით კონტექსტში) სწრაფად ვიღებთ და ვამუშავებთ. ამ მიმართულებასაც სწრაფად გამოვეხმაურეთ და 60-იან წლებში თბილისი ნარკოტიკების საშუალებით გართობის საშიშმა ტენდენციამ მოიცვა. ეს იყო მოდა, რომელთა ფუძემდებლები ულამაზესი, უმშვენიერესი ადამიანები იყვნენ, გამორჩეულები ნიჭით, გარეგნობით, ოჯახიშვილობით. ასევე, ქურდული სამყაროს წარმომადგენლებიც. როცა საზოგადოების სახე მოდურ ტრენდს იწყებს, ბუნებრივია, ეს ქვედა ფენებში ძალიან სწრაფად ვრცელდება. შედეგად, 70–80 და, განსაკუთრებით, 90-იანი წლები ქვეყანაში ნარკოტიკული ბუმი იყო.ე.წ. კოგნარის და ოპიუმის შემოტანას, მის მოხმარებას უკან სულ უფრო და უფრო მეტი ადამიანი ედგა. რა თქმა უნდა, ამას უკვალოდ არ ჩაუვლია. დღეს, როცა "ზიანის შემცირების ეროვნული ქსელი" გვიცხადებს: ქვეყანაში 200 ათასი ნარკომომხმარებელია და 56 ათასი პრობლემური ნარკომანი, ეს ნიშნავს, რომ საქმე ეხება ფსიქიკური ჯანმრთელობის გარკვეული ფორმით მოშლას, ინვალიდობას, რაც მთელი ერის ტრაგედიაა იმიტომ, რომ 18-დან 45 წლამდე ყველაზე უფრო პროდუქტიული ასაკი ამ ადიქციონერთა რიცხვს მოიცავს.

– ბატონო დიმა, რა ნარკოპოლიტიკა უნდა გაატაროს სახელმწიფომ?

– რა გამოსავალი შეიძლება ყოფილიყო სახელმწიფოს მხრიდან, ვინ იფიქრა რეალური ნარკოპოლიტიკის გატარებაზე, ვინ გაატარა საკანონმდებლო დონეზე დესოციალიზაციის კონცეფცია, რაც რეალურად, ნარკომოხმარებას შეამცირებდა? – ეს კითხვები პასუხგაუცემელია. ასე ნათელი გახდებოდა, რომ ნარკოტიკებთან ერთად ცხოვრება, სიცოცხლის საწყის ეტაპზევე, 100%-იანი, გარდაუვალი კრახია. ამ მიმართულებით მუშაობა არ წარმართულა. 90-იან წლებს თუ ჩავუღრმავდებით, მთავრობის არაერთი წევრი მინახავს საკმაოდ საეჭვო მდგომარეობაში, ხაზგასმით ვამბობ, მთავრობის წევრი და არა რიგითი მოქალაქე, ასევე, პარლამენტის წევრებიც. ბევრ მათგანზე ანეკდოტებიც კი დადიოდა. როცა სახეზეა ასეთი დაუსჯელობა, წახალისება, ბუნებრივია, მომავალ თაობებს ისღა რჩებათ გაიაზრონ: არ შეიძლება თან ნარკოტიკებით იცხოვრო, თან ოჯახი გყავდეს, გქონდეს სოციალური სტატუსი, ყველანაირი პერსპექტივა. ჩნდება კითხვა: მაშინ რატომ არის ნარკოტიკი ცუდი, ხომ? ბუნებრივია, ბავშვის ცნობიერებაში ეს კითხვა ჩნდება და ამიტომაც იყო, რომ 90-იან წლების მეორე ნახევარი ამ გამოხატულების პიკია. როდესაც ვარდების რევოლუცია მოხდა და ქვეყანა სოციალური რეფორმების ლაბორატორიად გამოცხადდა, ამის ფარგლებში რეპრესიული პოლიტიკა დაიწყო. რა თქმა უნდა, ეს ნარკომომხმარებლებს და ზოგადად, ნარკოდანაშაულსაც შეეხო. მაგრამ არა იმიტომ,რომ ვინმეს გული შესტკიოდა ნარკოტიკების მომხმარებლების რიცხვის შემცირებაზე. არა! ამას, უბრალოდ, ფისკალური დატვირთვა ჰქონდა – ყველაზე მეტი ნარკომომხმარებლის არსებობის პირობებში, ამ ადამიანების უკან მდგომი ოჯახის წევრებიდან ამოსაღები კაპიტალიზირებული ქონება კოლოსალურ რაოდენობას წარმოადგენდა, რასაც ათვისება სჭირდებოდა. ამიტომაც, 2006 წლის დასაწყისში კერძო სამართლის იურიდიული პირი – პენიტენციალური სისტემის განვითარების ფონდი შეიქმნა, რომელიც არა საჯარო, არამედ კერძო სამართლის იყო. იგი შეიქმნა პროკურატურის სისტემასთან. ყველა ადამიანს რომელსაც ნარკოდანაშაულისათვის აკავებდნენ იმ დროს ახლადდანერგილი საპროცესო შეთანხმების ნორმას სთავაზობდნენ, რომლის მიხედვით განსაზღვრული სასჯელისთვის შეტანილი თანხის ერთი ნაწილი შედიოდა პირდაპირ ბიუჯეტში, ხოლო მეორე, არაოფიციალური ადვოკატის ხელით უნდა შეტანილიყო კერძო სამართლის იურიდიული პირის სახელზე როგორც შემოწირულობა, რაც საკმარისი პირობა იყო იმისა, რომ პირი გაეთავისუფლებინათ ან ნაკლები სასჯელი მიესაჯათ. ფაქტობრივად, ინდულგენციას ყიდულობდი.


ÐаÑÑинки по запÑоÑÑ 12 áááá¡áá¡  áá¥áªáá á á£á¡ááááááá

"ნაცმოძრაობის" დროს ციხეში მჯდომი პირების რაოდენობამ 32 ათასს მიაღწია, ყოველი მეოთხე პირობით მსჯავრდადებული იყო. 32 ათასიდან 12 ათასი ადამიანი სასჯელს ნარკოდანაშაულისთვის იხდიდა. 2007, 2008, 2009 წლების სტატისტიკას თუ შევხედავთ, მხოლოდ ნარკოტიკული დანაშაულით გათვალისწინებული დამატებითი სასჯელების თანხა, რაც ბიუჯეტში ჯარიმების სახით შედის, ანუ, არასაგადასახადო სეგმენტი, ყოველწლიურად, 30-დან 42 მილიონამდე იზრდება.

ცხადია, ნარკოდანაშაულისთვის მსჯავრდებული პირებისგან ამოღებული თანხებით ბიუჯეტის შევსება ხდებოდა. ეს ჩამოყალიბდა როგორც პრაქტიკა,პროკურატურებს შორის სოციალისტური შეჯიბრებები გაჩაღდა. ის პროკურატურა რომელიც ამ მიმართულებით ყველაზე უფრო ჯალათური, არაადამიანური მეთოდებით უმკლავდებოდა საზოგადოებას, გარდამავალ დროშას იღებდა.

ნარკორეპრესიულმა პოლიტიკამ პიკს მიაღწია და ზოგადად, კრიმინალის მიმართ ნულოვანმა ტოლერანტობამ, რაც ასე იქნა გაგებული – 60-ზე მეტი ახალგაზრდა ადამიანი სიცოცხლეს გამოასალმეს ქუჩაში ჩატარებული, ჩაუტარებელი თუ მერე იმიტირებული სცენარების მიხედვით. ბევრ მათგანზე დღეს სისხლის სამართლის გამოძიებაა დაწყებული, რაც არასაკმარისია იმ სისტემური დანაშაულის მხილებისთვის, რასაც იმ დროს, რეალურად, ადგილი ჰქონდა. საბოლოო ჯამში, მივედით 2011 წლამდე, როდესაც პოლიტიკაში ბიძინა ივანიშვილი შემოვიდა. მან თქვა: კმარა, ამ ყველაფერს წერტილი უნდა დაესვას, ქვეყანა დაიწყებს ხელახალ განვითარებას იმ წერტილიდან, საიდანაც "ნაცმოძრაობამ" გადაუხვიაო.

აქ, ჩანს, რომ ივანიშვილი გულისხმობდა სწორედ იმ რეპრესიულ პოლიტიკაზე გადასვლას, რასაც სააკაშვილმა თავის დროზე ნულოვანი ტოლერანტობა დაარქვა. ეს იყო სამართლიანი გარემოს აღდგენა და საგარეო პოლიტიკაში რუსეთის ფედერაციასთან ურთიერთობების დალაგება. დღეს, პროკურატურაში შექმნილია შვიდკაციანი ჯგუფი, რომელიც ამ მიმართულებით მუშაობს, თუმცა, ეს საკმარისი არ არის. სამწუხაროა ისიც, რომ სისტემური დანაშაულისთვის არ გასამართლდა თავად "ნაციონალური მოძრაობა", არ მოხდა დენაციფიკაცია. პირიქით, "ნაცმოძრაობის" შემომქმედი ადამიანები ის მოსამართლეები, პროკურორები, გამომძიებლები არიან, რომლებიც საქართველოს სახელით აკავებდნენ, აძლევდნენ პასუხისგებაში და გამოჰქონდათ განჩინებები. ამასთან კავშირშია ის, რომ ნარკოპოლიტიკამ არათუ სწორი რეფორმა განიცადა, არამედ პირიქით, ასცდა ყველანაირი განვითარების გზას. ამის ერთ-ერთი თანაავტორი, შემოქმედი არის "ნაციონალური მოძრაობის" აქტივისტი, სააკაშვილის მარჯვენა ხელი გიორგი პაპუაშველოს საკონსტივილი,ტუციო სასამართლოს იმდროინდელი თავმჯდომარე, რომლის თავმჯდომარეობის პერიოდში საკონსტიტუციო სასამართლომ – მაკონტროლებელმა ორგანომ უპრეცედენტო გადაწყვეტილება მიიღო და პიროვნების თავისუფალი განვითარების კონსტიტუციურ უფლებას ნარკოტიკული საშუალების მიღების თავისუფლება დაუკავშირა.

ასევე, რატომღაც დაადგინა, რომ ნარკოტიკული საშუალება მარიხუანის 70 გრამამდე ტარება სისხლის სამართლის წესით არ უნდა ისჯებოდეს. აქ პაპუაშვილმა ორი უდიდესი შეცდომა დაუშვა, ერთი – მარიხუანა როგორც ნარკოტიკული საშუალება, მოცულობით – მთლიანი ბალახის რაოდენობითა და წონით არ განისაზღვრება. 70 გრამი კულტურული ნარკოტიკული საშუალება მარიხუანა შეიძლება იყოს 80 ადამიანის მოხმარების დოზა, ხოლო ველურად მზარდი – 30–35-ის. აქ, უკვე, სერიოზული აცდენაა, რაც საფუძველია იმისა, რომ საკონსტიტუციო სასამართლოს მიერ მიღებული გადაწყვეტილება სერიოზული კითხვის ნიშნის ქვეშ დავაყენოთ. აღარაფერს ვამბობ იმაზე, რომ დასავლეთ-ევროპის ცივილიზებული და ყველაზე შორს წასული ქვეყნები ნარკოპოლიტიკის თვალსაზრისით, 10 გრამზე მეტს არ ადგენენ, ისიც იმ გრადაციის მიხედვით, რომელი შესაბამისი კულტურიდან გამოდის ნარკოტიკული საშუალება. ზოგადად, როცა ნარკოტიკულ საშუალებაზე ვსაუბრობთ, მიმაჩნია, რომ კარგი და ცუდი, სუსტი და ძლიერი არ არსებობს, ნარკოტიკი არის ნარკოტიკი, რაც იწვევს ქცევით ადიქციებს — ეს არის ფსიქიკის მოშლა გრძელვადიანი თუ საშუალო პერსპექტივით. ნარკომანია გამოუსწორებელი სენია, რაზეც მთელი მსოფლიო თანხმდება. მაგრამ ამას ასე არ თვლის ნეო-ლიბერალური ტრენდი. ნეო-ლიბერალური პოლიტიკური სისტემა, რომელიც თავს მოგვახვიეს, თვლის, რომ ადამიანს ეკუთვნის თავისი სხეული და მისთვის რაიმეს აკრძალვა ეტიკეტირების მცდელობაა. თურმე, ვალდებულება გვქონია, როდესაც პირი ნარკოტიკის სისტემატურ მოხმარებას დაიწყებს და ეს ყველაფერი დაავადებაში, ფსიქიკური ჯანმრთელობის მოსპობაში გადავა, ჩვენ, გადასახადის გადამხდელმა სხვა ადამიანებმა მისი მკურნალობა დავაფინანსოთ. ეს არ არის არც ევროპული სტანდარტი, არც რომელიმე განვითარებული ქვეყნის პრაქტიკა. შეიძლება ბევრს ჩვენს გარშემო კონსპირაციის თეორიის არ სჯერა, მაგრამ ეს არის ძირითადი დემოგრაფიული პლაზმის შეცვლის დაჩქარების კატალიზატორი. ერის, ქვეყნის მტერმა, გარკვეულმა რეაქციულმა ძალამ კარგად მიაგნო თუ რა არის ყველაზე სუსტი წერტილი ქართველი კაცისთვის – ეს არის ნარკოტიკული საშუალების მიღება, რაც არ არის ექსპერიმენტი, რასაც დღეს ქართველი ხალხი საკუთარ თავზე გადის. თუ მე-19 საუკუნის ისტორიას ჩავუღრმავდებით, გავიხსენოთ ბრიტანეთის იმპერია, რომელმაც ჩინეთში ნარკოტიკული ინტერვენცია განახორციელა, რამაც ათეულობით მილიონი ჩინელი სიცოცხლეს გამოასალმა. ბრიტანეთი პირდაპირ ზარბაზნებიდან ისროდა ოპიუმის შეფუთვებს. ჩინეთი სრულმა ეპიდემიამ მოიცვა. შედეგად, ჩინეთმა ჰონგ-კონგის კუნძული და ყველა მნიშვნელოვან პორტზე კონტროლი დაკარგა. ამით იმის თქმა მინდა, რომ საქართველოში თუკი ვინმეს მიაჩნია, რომ ეს კონსპირაციაა და ჩვენი მოწამვლა შეგნებულად არ ხდება, ძალიან ცდება. ფაქტები შემდეგია: მხოლოდ ორ თვეში ამოღებულია 4 კგ ნარკოტიკული საშუალება ოპიუმი, რაც დაახლოებით, 50 ათასი ადამიანის მოხმარების დოზაა. ასეთი პატარა ქვეყნისთვის მხოლოდ ორ თვეში ამოღებული დოზით თუ ვიმსჯელებთ, დავრწმუნდებით, რომ ეს ნარკოტიკული ომია.

– თქვენ საკუთარ ფეისბუქზე დაწერეთ, რომ ნარკომოვაჭრე არ უნდა იყოს შეფასებული როგორც რიგითი დანაშაულის ჩამდენი პირი. ასეთი ადამიანი რა სასჯელს იმსახურებს?

– ნარკომოვაჭრე ნარკოდივერსანტი, ჩვეულებრივი მეომარი, ქვეყნის რეაქციული ძალების წარმომადგენელია, რომელიც სიკვდილს ავრცელებს ანუ, სიკვდილით ვაჭრობს. ამიტომ, სიკვდილით მოვაჭრეს - სიკვდილი. განგაშის ზარები უნდა დავარისხოთ, ვინაიდან ამის იქით, დასაკარგი, აღარაფერი გვაქვს.

10 დღის განმავლობაში ღამის კლუბებიდან  გამოსული 16 ადამიანი გარდაიცვალა, აღნიშნული პროცესი არ ჩერდება, ნარკოტიკის ბუმს ხელს უწყობს დახვეწილი ტექნოლოგიებით ინტერნეტით ვაჭრობა. როცა ვაიბერზე, ფეისბუქზე მოგვდის ინფორმაცია, რომ შეგვიძლია ნარკოტიკული საშუალება თავისუფლად შევიძინოთ თუკი გარკვეულ მისამართზე თანხას გადავრიცხავთ და ნარკოტიკი შეიძლება საკუთარი სადარბაზოს კიბის უჯრედზეც კი ვიპოვოთ, ეს ნიშნავს, რომ ნარკორეალიზატორები, მათი მფარველები და ორგანიზატორები აქვე, ჩვენს გვერდით არიან.

– ბატონო დიმა, როგორ აფასებთ 12 მაისს ჩატარებულ სპეცოპერაციას?

– იმედის პირველი მერცხალი იყო სწორედ რვა ნარკორეალიზატორის დაკავების ფაქტი. მიუხედავად იმისა, რომ ურემი გადაბრუნდა და ეს პირები მერე დააკავეს, თავისთავად ცხადია, რვა დივერსანტის წინააღმდეგ ჩატარებული სპეცოპერაცია თავისი შედეგებით ძალიან მნიშვნელოვანია. პარლამენტში გამოსვლისას ბატონი გახარიასგან გავიგეთ, რომ ამ პროცესში უცხოელი კოლეგებიც იყვნენ ჩართული, რათა უმაღლესი ტექნოლოგიები გამოყენებულიყო. ეს მხოლოდ მისასალმებელია. ოპერაციის ჩატარებიდან ერთ საათში გავაკეთე განცხადება: შსს-ს არცერთი ნაბიჯი უკან არ დაეხია, არ მოქცეულიყო იდეოლოგიური მარწუხების ქვეშ, ვინაიდან ხალ- ხი და საზოგადოება მის გვერდით იდგა. როდესაც ნარკობარიგების დაკავებას მძლავრი საპროტესტო მუხტი მოჰყვა, რომელიც კარგად იყო ორკესტრირებული, ორგანიზებული და დაფინანსებული გარკვეული ძალების მხრიდან, კარგად დავინახეთ ორი-სამი ათასი ახალგაზრდა გამოსული რუსთაველის გამზირზე, რომელთა უმრავლესობა წარმოუდგენლად მძიმედ იქცეოდა, მათ ქმედებებში აღინიშნებოდა სისხლის სამართლის დანაშაულის ნიშნები – მუქარა, ხულიგნობა, ძალადობისკენ მოწოდება და ეს ყველაფერი რატომღაც დაუსჯელი დარჩა.

გახარიას მისვლა ადგილზე უპრეცედენტო იყო. ვეთანხმები, რომ იმ მომენტში მიზანი საშუალებას ამართლებდა და დიპლომატიური ხრიკის გამოყენებით მართული პროცესის დეესკალაცია უნდა მომხდარიყო. მინდა მას ვთხოვო: ყველა იმ პირის მიმართ, ვინც დანაშაულს ჩადიოდა, გამოძიება დაიწყოს. არ შეიძლება ისეთი რამ დარჩეს დაუსჯელი, რაც შემდგომში გადამდები იქნება როგორც მაგალითი. მით უმეტეს, როცა საქმე ახალგაზრდებს ეხება, რომლებიც მსგავს რამეს ღრუბელივით იწოვენ. სანამ ესდაფინანსებული შაბაში დაიშლებოდა, მეგობრების ერთმა ჯგუფმა გადავწყვიტეთ უპრეცედენტო ხასიათის აქცია ჩაგვეტარებინა, კერძოდ, მხარი დაგვეჭირა შსს-ს მოქმედებებისთვის. ვიმედოვნებდით, რომ ჩვენი მხარდამჭერთა რაოდენობა გაცილებით მეტი იქნებოდა, ვიდრე ის ერთი მუჭა ადამიანები, რომლებიც იქ, დესტაბილიზაციის მოხდენას ცდილობდნენ. მაგალითად, ჟურნალისტიკაში ცნობილი ადამიანები, მათ შორის, ბატონი კოვზირიძე მეტსახელად "მძიმე კაცი", საზოგადოებას, პოლიციას დედის გინებას არ აკლებდა და ახალგაზრდობას ძალადობისკენ მოუწოდებდა. ჩვენმა განცხადებამ დიდი მხარდაჭერა ჰპოვა. იმ აქციაზე იმყოფებოდნენ ადამიანები რომელთა დანდობა, უბრალოდ, არ შეიძლება. ჩვენი აქციით, როცა 17 მაისს ერი და ბერი ერთად დავდექით, მსოფლიოს ვანახეთ, რეალურად, თუ რა ღირებულებებს იცავს ქართული საზოგადოება.

თამარ შველიძე




მეტის ნახვა
25-05-2018, 18:00